| Library / Tipiṭaka / තිපිටක • Tipiṭaka / සාරත්‌ථදීපනී-ටීකා • Sāratthadīpanī-ṭīkā |
අනාපත්‌තිභෙදවණ්‌ණනා
Anāpattibhedavaṇṇanā
131. යාය සෙය්‍යාය සයිතො කාලං කරොති, සා අනුට්‌ඨානසෙය්‍යා නාම. ‘‘චිත්‌තෙන පන අධිවාසෙතී’’ති වුත්‌තමත්‌ථං විභාවෙතුං ‘‘න කිඤ්‌චි වදතී’’ති වුත්‌තං. පාකතිකං කාතුන්‌ති යත්‌තකං ගහිතං පරිභුත්‌තං වා, තත්‌තකං දාතබ්‌බන්‌ති වුත්‌තං හොති.
131. Yāya seyyāya sayito kālaṃ karoti, sā anuṭṭhānaseyyā nāma. ‘‘Cittena pana adhivāsetī’’ti vuttamatthaṃ vibhāvetuṃ ‘‘na kiñci vadatī’’ti vuttaṃ. Pākatikaṃ kātunti yattakaṃ gahitaṃ paribhuttaṃ vā, tattakaṃ dātabbanti vuttaṃ hoti.
පටිදස්‌සාමීති යං ගහිතං, තදෙව වා අඤ්‌ඤං වා තාදිසං පුන දස්‌සාමීති අත්‌ථො. සඞ්‌ඝසන්‌තකෙ සඞ්‌ඝං අනුජානාපෙතුමසක්‌කුණෙය්‍යත්‌තා කස්‌සචි වත්‌ථුනො අනනුජානිතබ්‌බතො ච ‘‘සඞ්‌ඝසන්‌තකං පන පටිදාතුමෙව වට්‌ටතී’’ති වුත්‌තං.
Paṭidassāmīti yaṃ gahitaṃ, tadeva vā aññaṃ vā tādisaṃ puna dassāmīti attho. Saṅghasantake saṅghaṃ anujānāpetumasakkuṇeyyattā kassaci vatthuno ananujānitabbato ca ‘‘saṅghasantakaṃ pana paṭidātumeva vaṭṭatī’’ti vuttaṃ.
තස්‌මිංයෙව අත්‌තභාවෙ නිබ්‌බත්‌තාපීති තස්‌මිංයෙව මතසරීරෙ උප්‌පන්‌නාපි. විනීතවත්‌ථූසු සාටකතණ්‌හාය තස්‌මිංයෙව මතසරීරෙ නිබ්‌බත්‌තපෙතො වියාති දට්‌ඨබ්‌බං. රුක්‌ඛාදීසු ලග්‌ගිතසාටකෙ වත්‌තබ්‌බමෙව නත්‌ථීති මනුස්‌සෙහි අපරිග්‌ගහිතං සන්‌ධාය වුත්‌තං. සචෙ පන තං ආරක්‌ඛකෙහි පරිග්‌ගහිතං හොති, ගහෙතුං න වට්‌ටතීති.
Tasmiṃyeva attabhāve nibbattāpīti tasmiṃyeva matasarīre uppannāpi. Vinītavatthūsu sāṭakataṇhāya tasmiṃyeva matasarīre nibbattapeto viyāti daṭṭhabbaṃ. Rukkhādīsu laggitasāṭake vattabbameva natthīti manussehi apariggahitaṃ sandhāya vuttaṃ. Sace pana taṃ ārakkhakehi pariggahitaṃ hoti, gahetuṃ na vaṭṭatīti.
අනාපත්‌තිභෙදවණ්‌ණනා නිට්‌ඨිතා.
Anāpattibhedavaṇṇanā niṭṭhitā.
පදභාජනීයවණ්‌ණනා නිට්‌ඨිතා.
Padabhājanīyavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 2. දුතියපාරාජිකං • 2. Dutiyapārājikaṃ
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 2. දුතියපාරාජිකං • 2. Dutiyapārājikaṃ
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / අනාපත්‌තිභෙදවණ්‌ණනා • Anāpattibhedavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / අනාපත්‌තිභෙදවණ්‌ණනා • Anāpattibhedavaṇṇanā
