| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
அனாபத்திபன்னரஸகாதி³கதா²
Anāpattipannarasakādikathā
222. புன பவாரேதப்³ப³ந்தி புன புப்³ப³கிச்சங் கத்வா ஞத்திங் ட²பெத்வா ஸங்க⁴த்தே²ரதோ பட்டா²ய பவாரேதப்³ப³ங். ஸேஸங் உபோஸத²க்க²ந்த⁴கவண்ணனாயங் வுத்தனயேனேவ வேதி³தப்³ப³ங்.
222.Puna pavāretabbanti puna pubbakiccaṃ katvā ñattiṃ ṭhapetvā saṅghattherato paṭṭhāya pavāretabbaṃ. Sesaṃ uposathakkhandhakavaṇṇanāyaṃ vuttanayeneva veditabbaṃ.
228. ஆக³ந்துகேஹி ஆவாஸிகானங் அனுவத்திதப்³ப³ந்தி ‘‘அஜ்ஜ பவாரணா சாதுத்³த³ஸீ’’தி ஏததே³வ புப்³ப³கிச்சங் காதப்³ப³ங். பன்னரஸிகவாரேபி ஏஸேவ நயோ. ஆவாஸிகேஹி நிஸ்ஸீமங் க³ந்த்வா பவாரேதப்³ப³ந்தி அஸ்ஸாவஸானே அயங் பாளிமுத்தகவினிச்ச²யோ – ஸசே புரிமிகாய பஞ்ச பி⁴க்கூ² வஸ்ஸங் உபக³தா, பச்சி²மிகாயபி பஞ்ச, புரிமேஹி ஞத்திங் ட²பெத்வா பவாரிதே பச்சி²மேஹி தேஸங் ஸந்திகே பாரிஸுத்³தி⁴உபோஸதோ² காதப்³போ³, ந ஏகஸ்மிங் உபோஸத²க்³கே³ த்³வே ஞத்தியோ ட²பேதப்³பா³. ஸசேபி பச்சி²மிகாய உபக³தா சத்தாரோ தயோ த்³வே ஏகோ வா ஹோதி, ஏஸேவ நயோ. அத² புரிமிகாய சத்தாரோ பச்சி²மிகாயபி சத்தாரோ தயோ த்³வே ஏகோ வா ஏஸேவ நயோ. அதா²பி புரிமிகாய தயோ, பச்சி²மிகாயபி தயோ த்³வே வா, ஏஸேவ நயோ. இத³ஞ்ஹெத்த² லக்க²ணங் – ஸசே புரிமிகாய உபக³தேஹி பச்சி²மிகாய உபக³தா தோ²கதரா சேவ ஹொந்தி ஸமஸமா ச, ஸங்க⁴பவாரணாய க³ணங் பூரெந்தி, ஸங்க⁴பவாரணாவஸேன ஞத்தி ட²பேதப்³பா³தி.
228.Āgantukehiāvāsikānaṃ anuvattitabbanti ‘‘ajja pavāraṇā cātuddasī’’ti etadeva pubbakiccaṃ kātabbaṃ. Pannarasikavārepi eseva nayo. Āvāsikehi nissīmaṃ gantvā pavāretabbanti assāvasāne ayaṃ pāḷimuttakavinicchayo – sace purimikāya pañca bhikkhū vassaṃ upagatā, pacchimikāyapi pañca, purimehi ñattiṃ ṭhapetvā pavārite pacchimehi tesaṃ santike pārisuddhiuposatho kātabbo, na ekasmiṃ uposathagge dve ñattiyo ṭhapetabbā. Sacepi pacchimikāya upagatā cattāro tayo dve eko vā hoti, eseva nayo. Atha purimikāya cattāro pacchimikāyapi cattāro tayo dve eko vā eseva nayo. Athāpi purimikāya tayo, pacchimikāyapi tayo dve vā, eseva nayo. Idañhettha lakkhaṇaṃ – sace purimikāya upagatehi pacchimikāya upagatā thokatarā ceva honti samasamā ca, saṅghapavāraṇāya gaṇaṃ pūrenti, saṅghapavāraṇāvasena ñatti ṭhapetabbāti.
ஸசே பன புரிமிகாய தயோ, பச்சி²மிகாய ஏகோ ஹோதி, தேன ஸத்³தி⁴ங் தே சத்தாரோ ஹொந்தி, சதுன்னங் ஸங்க⁴ஞத்திங் ட²பெத்வா பவாரேதுங் ந வட்டதி. க³ணஞத்தியா பன ஸோ க³ணபூரகோ ஹோதி, தஸ்மா க³ணவஸேன ஞத்திங் ட²பெத்வா புரிமேஹி பவாரேதப்³ப³ங். இதரேன தேஸங் ஸந்திகே பாரிஸுத்³தி⁴உபோஸதோ² காதப்³போ³. ஸசே புரிமிகாய த்³வே பச்சி²மிகாய த்³வே வா ஏகோ வா ஹோதி, ஏஸேவ நயோ. ஸசே புரிமிகாய ஏகோ, பச்சி²மிகாயபி ஏகோ ஹோதி, ஏகேன ஏகஸ்ஸ ஸந்திகே பவாரேதப்³ப³ங், ஏகேன பாரிஸுத்³தி⁴உபோஸதோ² காதப்³போ³. ஸசே பன புரிமவஸ்ஸூபக³தேஹி பச்சி²மவஸ்ஸூபக³தா ஏகேனபி அதி⁴கதரா ஹொந்தி, பட²மங் பாதிமொக்க²ங் உத்³தி³ஸித்வா பச்சா² தோ²கதரேஹி தேஸங் ஸந்திகே பவாரேதப்³ப³ங்.
Sace pana purimikāya tayo, pacchimikāya eko hoti, tena saddhiṃ te cattāro honti, catunnaṃ saṅghañattiṃ ṭhapetvā pavāretuṃ na vaṭṭati. Gaṇañattiyā pana so gaṇapūrako hoti, tasmā gaṇavasena ñattiṃ ṭhapetvā purimehi pavāretabbaṃ. Itarena tesaṃ santike pārisuddhiuposatho kātabbo. Sace purimikāya dve pacchimikāya dve vā eko vā hoti, eseva nayo. Sace purimikāya eko, pacchimikāyapi eko hoti, ekena ekassa santike pavāretabbaṃ, ekena pārisuddhiuposatho kātabbo. Sace pana purimavassūpagatehi pacchimavassūpagatā ekenapi adhikatarā honti, paṭhamaṃ pātimokkhaṃ uddisitvā pacchā thokatarehi tesaṃ santike pavāretabbaṃ.
கத்திகசாதுமாஸினியா பவாரணாய பன ஸசே பட²மங் வஸ்ஸூபக³தேஹி மஹாபவாரணாய பவாரிதேஹி பச்சா² உபக³தா அதி⁴கதரா வா ஸமஸமா வா ஹொந்தி, பவாரணாஞத்திங் ட²பெத்வா பவாரேதப்³ப³ங். தேஹி பவாரிதே பச்சா² இதரேஹி பாரிஸுத்³தி⁴உபோஸதோ² காதப்³போ³. அத² மஹாபவாரணாய பவாரிதா ப³ஹூ பி⁴க்கூ² ஹொந்தி, பச்சி²மவஸ்ஸூபக³தா தோ²கதரா வா ஏகோ வா, பாதிமொக்கே² உத்³தி³ட்டே² பச்சா² தேஸங் ஸந்திகே தேன பவாரேதப்³ப³ங்.
Kattikacātumāsiniyā pavāraṇāya pana sace paṭhamaṃ vassūpagatehi mahāpavāraṇāya pavāritehi pacchā upagatā adhikatarā vā samasamā vā honti, pavāraṇāñattiṃ ṭhapetvā pavāretabbaṃ. Tehi pavārite pacchā itarehi pārisuddhiuposatho kātabbo. Atha mahāpavāraṇāya pavāritā bahū bhikkhū honti, pacchimavassūpagatā thokatarā vā eko vā, pātimokkhe uddiṭṭhe pacchā tesaṃ santike tena pavāretabbaṃ.
233. ந ச பி⁴க்க²வே அப்பவாரணாய பவாரேதப்³ப³ங், அஞ்ஞத்ர ஸங்க⁴ஸாமக்³கி³யாதி எத்த² கோஸம்ப³கஸாமக்³கீ³ஸதி³ஸாவ ஸாமக்³கீ³ வேதி³தப்³பா³. ‘‘அஜ்ஜ பவாரணா ஸாமக்³கீ³’’தி ஏவஞ்செத்த² புப்³ப³கிச்சங் காதப்³ப³ங். யே பன கிஸ்மிஞ்சிதே³வ அப்பமத்தகே பவாரணங் ட²பெத்வா ஸமக்³கா³ ஹொந்தி, தேஹி பவாரணாயமேவ பவாரணா காதப்³பா³. ஸாமக்³கீ³பவாரணங் கரொந்தேஹி ச பட²மபவாரணங் ட²பெத்வா பாடிபத³தோ பட்டா²ய யாவ கத்திகசாதுமாஸினீ புண்ணமா, எத்த²ந்தரே காதப்³பா³, ததோ பச்சா² வா புரே வா ந வட்டதி.
233.Na ca bhikkhave appavāraṇāya pavāretabbaṃ, aññatra saṅghasāmaggiyāti ettha kosambakasāmaggīsadisāva sāmaggī veditabbā. ‘‘Ajja pavāraṇā sāmaggī’’ti evañcettha pubbakiccaṃ kātabbaṃ. Ye pana kismiñcideva appamattake pavāraṇaṃ ṭhapetvā samaggā honti, tehi pavāraṇāyameva pavāraṇā kātabbā. Sāmaggīpavāraṇaṃ karontehi ca paṭhamapavāraṇaṃ ṭhapetvā pāṭipadato paṭṭhāya yāva kattikacātumāsinī puṇṇamā, etthantare kātabbā, tato pacchā vā pure vā na vaṭṭati.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
128. அனாபத்திபன்னரஸகங் • 128. Anāpattipannarasakaṃ
134. தி³வஸனானத்தங் • 134. Divasanānattaṃ
139. வஜ்ஜனீயபுக்³க³லஸந்த³ஸ்ஸனா • 139. Vajjanīyapuggalasandassanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அனாபத்திபன்னரஸககதா²வண்ணனா • Anāpattipannarasakakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அனாபத்திபன்னரஸகாதி³கதா²வண்ணனா • Anāpattipannarasakādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 121. பவாரணாபே⁴த³கதா² • 121. Pavāraṇābhedakathā
