| Library / Tipiṭaka / තිපිටක • Tipiṭaka / මහාවග්‌ග-අට්‌ඨකථා • Mahāvagga-aṭṭhakathā |
අනාපත්‌තිපන්‌නරසකාදිකථා
Anāpattipannarasakādikathā
222. පුන පවාරෙතබ්‌බන්‌ති පුන පුබ්‌බකිච්‌චං කත්‌වා ඤත්‌තිං ඨපෙත්‌වා සඞ්‌ඝත්‌ථෙරතො පට්‌ඨාය පවාරෙතබ්‌බං. සෙසං උපොසථක්‌ඛන්‌ධකවණ්‌ණනායං වුත්‌තනයෙනෙව වෙදිතබ්‌බං.
222.Puna pavāretabbanti puna pubbakiccaṃ katvā ñattiṃ ṭhapetvā saṅghattherato paṭṭhāya pavāretabbaṃ. Sesaṃ uposathakkhandhakavaṇṇanāyaṃ vuttanayeneva veditabbaṃ.
228. ආගන්‌තුකෙහි ආවාසිකානං අනුවත්‌තිතබ්‌බන්‌ති ‘‘අජ්‌ජ පවාරණා චාතුද්‌දසී’’ති එතදෙව පුබ්‌බකිච්‌චං කාතබ්‌බං. පන්‌නරසිකවාරෙපි එසෙව නයො. ආවාසිකෙහි නිස්‌සීමං ගන්‌ත්‌වා පවාරෙතබ්‌බන්‌ති අස්‌සාවසානෙ අයං පාළිමුත්‌තකවිනිච්‌ඡයො – සචෙ පුරිමිකාය පඤ්‌ච භික්‌ඛූ වස්‌සං උපගතා, පච්‌ඡිමිකායපි පඤ්‌ච, පුරිමෙහි ඤත්‌තිං ඨපෙත්‌වා පවාරිතෙ පච්‌ඡිමෙහි තෙසං සන්‌තිකෙ පාරිසුද්‌ධිඋපොසථො කාතබ්‌බො, න එකස්‌මිං උපොසථග්‌ගෙ ද්‌වෙ ඤත්‌තියො ඨපෙතබ්‌බා. සචෙපි පච්‌ඡිමිකාය උපගතා චත්‌තාරො තයො ද්‌වෙ එකො වා හොති, එසෙව නයො. අථ පුරිමිකාය චත්‌තාරො පච්‌ඡිමිකායපි චත්‌තාරො තයො ද්‌වෙ එකො වා එසෙව නයො. අථාපි පුරිමිකාය තයො, පච්‌ඡිමිකායපි තයො ද්‌වෙ වා, එසෙව නයො. ඉදඤ්‌හෙත්‌ථ ලක්‌ඛණං – සචෙ පුරිමිකාය උපගතෙහි පච්‌ඡිමිකාය උපගතා ථොකතරා චෙව හොන්‌ති සමසමා ච, සඞ්‌ඝපවාරණාය ගණං පූරෙන්‌ති, සඞ්‌ඝපවාරණාවසෙන ඤත්‌ති ඨපෙතබ්‌බාති.
228.Āgantukehiāvāsikānaṃ anuvattitabbanti ‘‘ajja pavāraṇā cātuddasī’’ti etadeva pubbakiccaṃ kātabbaṃ. Pannarasikavārepi eseva nayo. Āvāsikehi nissīmaṃ gantvā pavāretabbanti assāvasāne ayaṃ pāḷimuttakavinicchayo – sace purimikāya pañca bhikkhū vassaṃ upagatā, pacchimikāyapi pañca, purimehi ñattiṃ ṭhapetvā pavārite pacchimehi tesaṃ santike pārisuddhiuposatho kātabbo, na ekasmiṃ uposathagge dve ñattiyo ṭhapetabbā. Sacepi pacchimikāya upagatā cattāro tayo dve eko vā hoti, eseva nayo. Atha purimikāya cattāro pacchimikāyapi cattāro tayo dve eko vā eseva nayo. Athāpi purimikāya tayo, pacchimikāyapi tayo dve vā, eseva nayo. Idañhettha lakkhaṇaṃ – sace purimikāya upagatehi pacchimikāya upagatā thokatarā ceva honti samasamā ca, saṅghapavāraṇāya gaṇaṃ pūrenti, saṅghapavāraṇāvasena ñatti ṭhapetabbāti.
සචෙ පන පුරිමිකාය තයො, පච්‌ඡිමිකාය එකො හොති, තෙන සද්‌ධිං තෙ චත්‌තාරො හොන්‌ති, චතුන්‌නං සඞ්‌ඝඤත්‌තිං ඨපෙත්‌වා පවාරෙතුං න වට්‌ටති. ගණඤත්‌තියා පන සො ගණපූරකො හොති, තස්‌මා ගණවසෙන ඤත්‌තිං ඨපෙත්‌වා පුරිමෙහි පවාරෙතබ්‌බං. ඉතරෙන තෙසං සන්‌තිකෙ පාරිසුද්‌ධිඋපොසථො කාතබ්‌බො. සචෙ පුරිමිකාය ද්‌වෙ පච්‌ඡිමිකාය ද්‌වෙ වා එකො වා හොති, එසෙව නයො. සචෙ පුරිමිකාය එකො, පච්‌ඡිමිකායපි එකො හොති, එකෙන එකස්‌ස සන්‌තිකෙ පවාරෙතබ්‌බං, එකෙන පාරිසුද්‌ධිඋපොසථො කාතබ්‌බො. සචෙ පන පුරිමවස්‌සූපගතෙහි පච්‌ඡිමවස්‌සූපගතා එකෙනපි අධිකතරා හොන්‌ති, පඨමං පාතිමොක්‌ඛං උද්‌දිසිත්‌වා පච්‌ඡා ථොකතරෙහි තෙසං සන්‌තිකෙ පවාරෙතබ්‌බං.
Sace pana purimikāya tayo, pacchimikāya eko hoti, tena saddhiṃ te cattāro honti, catunnaṃ saṅghañattiṃ ṭhapetvā pavāretuṃ na vaṭṭati. Gaṇañattiyā pana so gaṇapūrako hoti, tasmā gaṇavasena ñattiṃ ṭhapetvā purimehi pavāretabbaṃ. Itarena tesaṃ santike pārisuddhiuposatho kātabbo. Sace purimikāya dve pacchimikāya dve vā eko vā hoti, eseva nayo. Sace purimikāya eko, pacchimikāyapi eko hoti, ekena ekassa santike pavāretabbaṃ, ekena pārisuddhiuposatho kātabbo. Sace pana purimavassūpagatehi pacchimavassūpagatā ekenapi adhikatarā honti, paṭhamaṃ pātimokkhaṃ uddisitvā pacchā thokatarehi tesaṃ santike pavāretabbaṃ.
කත්‌තිකචාතුමාසිනියා පවාරණාය පන සචෙ පඨමං වස්‌සූපගතෙහි මහාපවාරණාය පවාරිතෙහි පච්‌ඡා උපගතා අධිකතරා වා සමසමා වා හොන්‌ති, පවාරණාඤත්‌තිං ඨපෙත්‌වා පවාරෙතබ්‌බං. තෙහි පවාරිතෙ පච්‌ඡා ඉතරෙහි පාරිසුද්‌ධිඋපොසථො කාතබ්‌බො. අථ මහාපවාරණාය පවාරිතා බහූ භික්‌ඛූ හොන්‌ති, පච්‌ඡිමවස්‌සූපගතා ථොකතරා වා එකො වා, පාතිමොක්‌ඛෙ උද්‌දිට්‌ඨෙ පච්‌ඡා තෙසං සන්‌තිකෙ තෙන පවාරෙතබ්‌බං.
Kattikacātumāsiniyā pavāraṇāya pana sace paṭhamaṃ vassūpagatehi mahāpavāraṇāya pavāritehi pacchā upagatā adhikatarā vā samasamā vā honti, pavāraṇāñattiṃ ṭhapetvā pavāretabbaṃ. Tehi pavārite pacchā itarehi pārisuddhiuposatho kātabbo. Atha mahāpavāraṇāya pavāritā bahū bhikkhū honti, pacchimavassūpagatā thokatarā vā eko vā, pātimokkhe uddiṭṭhe pacchā tesaṃ santike tena pavāretabbaṃ.
233. න ච භික්‌ඛවෙ අප්‌පවාරණාය පවාරෙතබ්‌බං, අඤ්‌ඤත්‍ර සඞ්‌ඝසාමග්‌ගියාති එත්‌ථ කොසම්‌බකසාමග්‌ගීසදිසාව සාමග්‌ගී වෙදිතබ්‌බා. ‘‘අජ්‌ජ පවාරණා සාමග්‌ගී’’ති එවඤ්‌චෙත්‌ථ පුබ්‌බකිච්‌චං කාතබ්‌බං. යෙ පන කිස්‌මිඤ්‌චිදෙව අප්‌පමත්‌තකෙ පවාරණං ඨපෙත්‌වා සමග්‌ගා හොන්‌ති, තෙහි පවාරණායමෙව පවාරණා කාතබ්‌බා. සාමග්‌ගීපවාරණං කරොන්‌තෙහි ච පඨමපවාරණං ඨපෙත්‌වා පාටිපදතො පට්‌ඨාය යාව කත්‌තිකචාතුමාසිනී පුණ්‌ණමා, එත්‌ථන්‌තරෙ කාතබ්‌බා, තතො පච්‌ඡා වා පුරෙ වා න වට්‌ටති.
233.Na ca bhikkhave appavāraṇāya pavāretabbaṃ, aññatra saṅghasāmaggiyāti ettha kosambakasāmaggīsadisāva sāmaggī veditabbā. ‘‘Ajja pavāraṇā sāmaggī’’ti evañcettha pubbakiccaṃ kātabbaṃ. Ye pana kismiñcideva appamattake pavāraṇaṃ ṭhapetvā samaggā honti, tehi pavāraṇāyameva pavāraṇā kātabbā. Sāmaggīpavāraṇaṃ karontehi ca paṭhamapavāraṇaṃ ṭhapetvā pāṭipadato paṭṭhāya yāva kattikacātumāsinī puṇṇamā, etthantare kātabbā, tato pacchā vā pure vā na vaṭṭati.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi
128. අනාපත්‌තිපන්‌නරසකං • 128. Anāpattipannarasakaṃ
134. දිවසනානත්‌තං • 134. Divasanānattaṃ
139. වජ්‌ජනීයපුග්‌ගලසන්‌දස්‌සනා • 139. Vajjanīyapuggalasandassanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / අනාපත්‌තිපන්‌නරසකකථාවණ්‌ණනා • Anāpattipannarasakakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / අනාපත්‌තිපන්‌නරසකාදිකථාවණ්‌ණනා • Anāpattipannarasakādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 121. පවාරණාභෙදකථා • 121. Pavāraṇābhedakathā
