| Library / Tipiṭaka / तिपिटक • Tipiṭaka / विमतिविनोदनी-टीका • Vimativinodanī-ṭīkā |
अनापत्तिपन्नरसकादिकथावण्णना
Anāpattipannarasakādikathāvaṇṇanā
१७२. केनचि ६३ करणीयेन गन्त्वाति सीमापरिच्छेदतो बहिभूतं गामं वा अरञ्ञं वा गन्त्वाति अत्थो। एतेनेव उपोसथञत्तिया ठपनकाले समग्गा एव ते ञत्तिं ठपेसुन्ति सिद्धं। तेनेव पाळियं ‘‘उद्दिट्ठं सुउद्दिट्ठ’’न्ति सब्बपन्नरसकेसुपि वुत्तं। वग्गा समग्गसञ्ञिनोतिआदि पन ञत्तिया निट्ठिताय ‘‘किं सङ्घस्स पुब्बकिच्च’’न्तिआदीनं (महाव॰ १३४) वचनक्खणे बहिगतानं भिक्खूनं सीमाय पविट्ठत्ता भिक्खू तस्मिं खणे वग्गा होन्तीति वुत्तं। तेनाह ‘‘तेसं सीमं ओक्कन्तत्ता वग्गा’’तिआदि, एतेन पाराजिकुद्देसादिक्खणेपि वग्गसञ्ञीनं उद्दिसन्तानं आपत्ति एव, ञत्तिया पन पुब्बे निट्ठितत्ता कम्मकोपो नत्थीति दस्सितमेव होति। एवं उपरिपि सब्बवारेसु अधिप्पायो वेदितब्बो।
172.Kenaci 63 karaṇīyena gantvāti sīmāparicchedato bahibhūtaṃ gāmaṃ vā araññaṃ vā gantvāti attho. Eteneva uposathañattiyā ṭhapanakāle samaggā eva te ñattiṃ ṭhapesunti siddhaṃ. Teneva pāḷiyaṃ ‘‘uddiṭṭhaṃ suuddiṭṭha’’nti sabbapannarasakesupi vuttaṃ. Vaggā samaggasaññinotiādi pana ñattiyā niṭṭhitāya ‘‘kiṃ saṅghassa pubbakicca’’ntiādīnaṃ (mahāva. 134) vacanakkhaṇe bahigatānaṃ bhikkhūnaṃ sīmāya paviṭṭhattā bhikkhū tasmiṃ khaṇe vaggā hontīti vuttaṃ. Tenāha ‘‘tesaṃ sīmaṃ okkantattā vaggā’’tiādi, etena pārājikuddesādikkhaṇepi vaggasaññīnaṃ uddisantānaṃ āpatti eva, ñattiyā pana pubbe niṭṭhitattā kammakopo natthīti dassitameva hoti. Evaṃ uparipi sabbavāresu adhippāyo veditabbo.
एत्थ च पाळियं ‘‘सब्बाय वुट्ठिताय…पे॰… तेसं सन्तिके पारिसुद्धि आरोचेतब्बा’’ति (महाव॰ १७४) वुत्तत्ता बहिसीमागताय परिसाय तेसु यस्स कस्सचि सन्तिके अनधिट्ठितेहि पारिसुद्धिं आरोचेतुं वट्टतीति वदन्ति।
Ettha ca pāḷiyaṃ ‘‘sabbāya vuṭṭhitāya…pe… tesaṃ santike pārisuddhi ārocetabbā’’ti (mahāva. 174) vuttattā bahisīmāgatāya parisāya tesu yassa kassaci santike anadhiṭṭhitehi pārisuddhiṃ ārocetuṃ vaṭṭatīti vadanti.
अनापत्तिपन्नरसकादिकथावण्णना निट्ठिता।
Anāpattipannarasakādikathāvaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महावग्गपाळि • Mahāvaggapāḷi / ९५. अनापत्तिपन्नरसकं • 95. Anāpattipannarasakaṃ
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महावग्ग-अट्ठकथा • Mahāvagga-aṭṭhakathā / अनापत्तिपन्नरसकादिकथा • Anāpattipannarasakādikathā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / अनापत्तिपन्नरसकादिकथावण्णना • Anāpattipannarasakādikathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / ९५. अनापत्तिपन्नरसकादिकथा • 95. Anāpattipannarasakādikathā
