| Library / Tipiṭaka / ติปิฎก • Tipiṭaka / วชิรพุทฺธิ-ฎีกา • Vajirabuddhi-ṭīkā |
อนาปตฺติปนฺนรสกาทิกถาวณฺณนา
Anāpattipannarasakādikathāvaṇṇanā
‘‘ตสฺสา จ ปวารณาย อาโรจิตาย สเงฺฆน จ ปวาริเต สเพฺพสํ สุปฺปวาริตํ โหตีติ วจนโต เกวลํ ปวารณาย ปวารณาทายโกปิ ปวาริโตว โหตี’’ติ วทนฺตีติฯ
‘‘Tassā ca pavāraṇāya ārocitāya saṅghena ca pavārite sabbesaṃ suppavāritaṃ hotīti vacanato kevalaṃ pavāraṇāya pavāraṇādāyakopi pavāritova hotī’’ti vadantīti.
๒๒๒. อวุฎฺฐิตาย ปริสายาติ ปวาเรตฺวา ปจฺฉา อญฺญมญฺญํ กเถนฺติยาฯ เอกจฺจาย วุฎฺฐิตายาติ เอกเจฺจสุ ยถานิสิเนฺนสุ เอกเจฺจสุ สกสกฎฺฐานํ คเตสุฯ ปุน ปวาเรตพฺพนฺติ ปุนปิ สเพฺพหิ สมาคนฺตฺวา ปวาเรตพฺพํฯ อาคจฺฉนฺติ สมสมา, เตสํ สนฺติเก ปวาเรตพฺพนฺติ ‘‘คเต อนาเนตฺวา นิสินฺนานํเยว สนฺติเก ปวาเรตพฺพํ, อุโปสถกฺขนฺธเกปิ เอเสว นโย’’ติ ลิขิตํฯ สพฺพาย วุฎฺฐิตาย ปริสาย อาคจฺฉนฺติ สมสมา, เตสํ สนฺติเก ปวาเรตพฺพนฺติ ‘‘ยทิ สเพฺพ วุฎฺฐหิตฺวา คตา, สนฺนิปาเตตุญฺจ น สกฺกา, เอกเจฺจ สนฺนิปาตาเปตฺวา ปวาเรตุํ วฎฺฎตี’’ติ วทนฺติฯ กสฺมา? ญตฺติํ ฐเปตฺวา กตฺตพฺพสงฺฆกมฺมาภาวา วคฺคํ น โหติ กิรฯ เอตฺถ ปน เอกเจฺจสุ คเตสุปิ สเพฺพสุ คเตสุปิ สเพฺพ สนฺนิปาตาเปตฺวา ญตฺติํ อฎฺฐเปตฺวา เกวลํ ปวาเรตพฺพํฯ เอกเจฺจ สนฺนิปาตาเปตฺวา ปวาเรตุํ น วฎฺฎติ ‘‘สงฺฆํ, ภเนฺต, ปวาเรมี’’ติ วจนโตฯ สเพฺพปิ หิ สนฺนิปติตา ปจฺฉา ทิฎฺฐํ วา สุตํ วา ปริสงฺกิตํ วา วตฺตาโร โหนฺติฯ อนาคตานํ อตฺถิภาวํ ญตฺวาปิ เอกจฺจานํ สนฺติเก ปวารณาวจนํ วิย โหติฯ สมฺมุขีภูเต จตฺตาโร สนฺนิปาตาเปตฺวา นิสฺสคฺคิยํ อาปนฺนจีวราทินิสฺสชฺชนํ วิย ปวารณา น โหติ สพฺพายตฺตตฺตาฯ ‘‘สมคฺคานํ ปวารณา ปญฺญตฺตา’’ติ วจนเญฺจตฺถ สาธกํฯ ‘‘อิโต อญฺญถา น วฎฺฎติ อฎฺฐกถายํ อนนุญฺญาตตฺตา’’ติ อุปติสฺสเตฺถโร วทติฯ ‘‘โถกตเรหิ เตสํ สนฺติเก ปวาเรตพฺพํ ญตฺติํ อฎฺฐเปตฺวาวา’’ติ วุตฺตํฯ อาคนฺตุกา นาม นวมิโต ปฎฺฐายาคตา วา วชสตฺถนาวาสุ วุตฺถวสฺสา วา โหนฺติฯ
222.Avuṭṭhitāya parisāyāti pavāretvā pacchā aññamaññaṃ kathentiyā. Ekaccāya vuṭṭhitāyāti ekaccesu yathānisinnesu ekaccesu sakasakaṭṭhānaṃ gatesu. Puna pavāretabbanti punapi sabbehi samāgantvā pavāretabbaṃ. Āgacchanti samasamā, tesaṃ santike pavāretabbanti ‘‘gate anānetvā nisinnānaṃyeva santike pavāretabbaṃ, uposathakkhandhakepi eseva nayo’’ti likhitaṃ. Sabbāya vuṭṭhitāya parisāya āgacchanti samasamā, tesaṃ santike pavāretabbanti ‘‘yadi sabbe vuṭṭhahitvā gatā, sannipātetuñca na sakkā, ekacce sannipātāpetvā pavāretuṃ vaṭṭatī’’ti vadanti. Kasmā? Ñattiṃ ṭhapetvā kattabbasaṅghakammābhāvā vaggaṃ na hoti kira. Ettha pana ekaccesu gatesupi sabbesu gatesupi sabbe sannipātāpetvā ñattiṃ aṭṭhapetvā kevalaṃ pavāretabbaṃ. Ekacce sannipātāpetvā pavāretuṃ na vaṭṭati ‘‘saṅghaṃ, bhante, pavāremī’’ti vacanato. Sabbepi hi sannipatitā pacchā diṭṭhaṃ vā sutaṃ vā parisaṅkitaṃ vā vattāro honti. Anāgatānaṃ atthibhāvaṃ ñatvāpi ekaccānaṃ santike pavāraṇāvacanaṃ viya hoti. Sammukhībhūte cattāro sannipātāpetvā nissaggiyaṃ āpannacīvarādinissajjanaṃ viya pavāraṇā na hoti sabbāyattattā. ‘‘Samaggānaṃ pavāraṇā paññattā’’ti vacanañcettha sādhakaṃ. ‘‘Ito aññathā na vaṭṭati aṭṭhakathāyaṃ ananuññātattā’’ti upatissatthero vadati. ‘‘Thokatarehi tesaṃ santike pavāretabbaṃ ñattiṃ aṭṭhapetvāvā’’ti vuttaṃ. Āgantukā nāma navamito paṭṭhāyāgatā vā vajasatthanāvāsu vutthavassā vā honti.
๒๓๗. ‘‘ทสวตฺถุกา มิจฺฉาทิฎฺฐิ โหติ ตถาคโตติอาที’’ติ ลิขิตํฯ ‘‘นตฺถิ ทินฺนนฺติอาที’’ติ วุตฺตํฯ
237. ‘‘Dasavatthukā micchādiṭṭhi hoti tathāgatotiādī’’ti likhitaṃ. ‘‘Natthi dinnantiādī’’ti vuttaṃ.
๒๓๙. ‘‘อุปปริกฺขิตฺวา ชานิสฺสามาติ เตน สห ปวาเรตพฺพ’’นฺติ ลิขิตํฯ
239. ‘‘Upaparikkhitvā jānissāmāti tena saha pavāretabba’’nti likhitaṃ.
ปวารณากฺขนฺธกวณฺณนา นิฎฺฐิตาฯ
Pavāraṇākkhandhakavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวคฺคปาฬิ • Mahāvaggapāḷi
๑๒๘. อนาปตฺติปนฺนรสกํ • 128. Anāpattipannarasakaṃ
๑๔๑. ปวารณาฐปนํ • 141. Pavāraṇāṭhapanaṃ
๑๔๓. วตฺถุฐปนาทิ • 143. Vatthuṭhapanādi
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวคฺค-อฎฺฐกถา • Mahāvagga-aṭṭhakathā
อนาปตฺติปนฺนรสกาทิกถา • Anāpattipannarasakādikathā
ปวารณาฐปนกถา • Pavāraṇāṭhapanakathā
วตฺถุฐปนาทิกถา • Vatthuṭhapanādikathā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā
อนาปตฺติปนฺนรสกกถาวณฺณนา • Anāpattipannarasakakathāvaṇṇanā
ปวารณาฐปนกถาวณฺณนา • Pavāraṇāṭhapanakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / อผาสุวิหารกถาทิวณฺณนา • Aphāsuvihārakathādivaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi
๑๒๑. ปวารณาเภทกถา • 121. Pavāraṇābhedakathā
๑๔๑. ปวารณาฎฺฐปนกถา • 141. Pavāraṇāṭṭhapanakathā
๑๔๓. วตฺถุฎฺฐปนาทิกถา • 143. Vatthuṭṭhapanādikathā
