| Library / Tipiṭaka / තිපිටක • Tipiṭaka / වජිරබුද්‌ධි-ටීකා • Vajirabuddhi-ṭīkā |
අනාපත්‌තිපන්‌නරසකාදිකථාවණ්‌ණනා
Anāpattipannarasakādikathāvaṇṇanā
‘‘තස්‌සා ච පවාරණාය ආරොචිතාය සඞ්‌ඝෙන ච පවාරිතෙ සබ්‌බෙසං සුප්‌පවාරිතං හොතීති වචනතො කෙවලං පවාරණාය පවාරණාදායකොපි පවාරිතොව හොතී’’ති වදන්‌තීති.
‘‘Tassā ca pavāraṇāya ārocitāya saṅghena ca pavārite sabbesaṃ suppavāritaṃ hotīti vacanato kevalaṃ pavāraṇāya pavāraṇādāyakopi pavāritova hotī’’ti vadantīti.
222. අවුට්‌ඨිතාය පරිසායාති පවාරෙත්‌වා පච්‌ඡා අඤ්‌ඤමඤ්‌ඤං කථෙන්‌තියා. එකච්‌චාය වුට්‌ඨිතායාති එකච්‌චෙසු යථානිසින්‌නෙසු එකච්‌චෙසු සකසකට්‌ඨානං ගතෙසු. පුන පවාරෙතබ්‌බන්‌ති පුනපි සබ්‌බෙහි සමාගන්‌ත්‌වා පවාරෙතබ්‌බං. ආගච්‌ඡන්‌ති සමසමා, තෙසං සන්‌තිකෙ පවාරෙතබ්‌බන්‌ති ‘‘ගතෙ අනානෙත්‌වා නිසින්‌නානංයෙව සන්‌තිකෙ පවාරෙතබ්‌බං, උපොසථක්‌ඛන්‌ධකෙපි එසෙව නයො’’ති ලිඛිතං. සබ්‌බාය වුට්‌ඨිතාය පරිසාය ආගච්‌ඡන්‌ති සමසමා, තෙසං සන්‌තිකෙ පවාරෙතබ්‌බන්‌ති ‘‘යදි සබ්‌බෙ වුට්‌ඨහිත්‌වා ගතා, සන්‌නිපාතෙතුඤ්‌ච න සක්‌කා, එකච්‌චෙ සන්‌නිපාතාපෙත්‌වා පවාරෙතුං වට්‌ටතී’’ති වදන්‌ති. කස්‌මා? ඤත්‌තිං ඨපෙත්‌වා කත්‌තබ්‌බසඞ්‌ඝකම්‌මාභාවා වග්‌ගං න හොති කිර. එත්‌ථ පන එකච්‌චෙසු ගතෙසුපි සබ්‌බෙසු ගතෙසුපි සබ්‌බෙ සන්‌නිපාතාපෙත්‌වා ඤත්‌තිං අට්‌ඨපෙත්‌වා කෙවලං පවාරෙතබ්‌බං. එකච්‌චෙ සන්‌නිපාතාපෙත්‌වා පවාරෙතුං න වට්‌ටති ‘‘සඞ්‌ඝං, භන්‌තෙ, පවාරෙමී’’ති වචනතො. සබ්‌බෙපි හි සන්‌නිපතිතා පච්‌ඡා දිට්‌ඨං වා සුතං වා පරිසඞ්‌කිතං වා වත්‌තාරො හොන්‌ති. අනාගතානං අත්‌ථිභාවං ඤත්‌වාපි එකච්‌චානං සන්‌තිකෙ පවාරණාවචනං විය හොති. සම්‌මුඛීභූතෙ චත්‌තාරො සන්‌නිපාතාපෙත්‌වා නිස්‌සග්‌ගියං ආපන්‌නචීවරාදිනිස්‌සජ්‌ජනං විය පවාරණා න හොති සබ්‌බායත්‌තත්‌තා. ‘‘සමග්‌ගානං පවාරණා පඤ්‌ඤත්‌තා’’ති වචනඤ්‌චෙත්‌ථ සාධකං. ‘‘ඉතො අඤ්‌ඤථා න වට්‌ටති අට්‌ඨකථායං අනනුඤ්‌ඤාතත්‌තා’’ති උපතිස්‌සත්‌ථෙරො වදති. ‘‘ථොකතරෙහි තෙසං සන්‌තිකෙ පවාරෙතබ්‌බං ඤත්‌තිං අට්‌ඨපෙත්‌වාවා’’ති වුත්‌තං. ආගන්‌තුකා නාම නවමිතො පට්‌ඨායාගතා වා වජසත්‌ථනාවාසු වුත්‌ථවස්‌සා වා හොන්‌ති.
222.Avuṭṭhitāya parisāyāti pavāretvā pacchā aññamaññaṃ kathentiyā. Ekaccāya vuṭṭhitāyāti ekaccesu yathānisinnesu ekaccesu sakasakaṭṭhānaṃ gatesu. Puna pavāretabbanti punapi sabbehi samāgantvā pavāretabbaṃ. Āgacchanti samasamā, tesaṃ santike pavāretabbanti ‘‘gate anānetvā nisinnānaṃyeva santike pavāretabbaṃ, uposathakkhandhakepi eseva nayo’’ti likhitaṃ. Sabbāya vuṭṭhitāya parisāya āgacchanti samasamā, tesaṃ santike pavāretabbanti ‘‘yadi sabbe vuṭṭhahitvā gatā, sannipātetuñca na sakkā, ekacce sannipātāpetvā pavāretuṃ vaṭṭatī’’ti vadanti. Kasmā? Ñattiṃ ṭhapetvā kattabbasaṅghakammābhāvā vaggaṃ na hoti kira. Ettha pana ekaccesu gatesupi sabbesu gatesupi sabbe sannipātāpetvā ñattiṃ aṭṭhapetvā kevalaṃ pavāretabbaṃ. Ekacce sannipātāpetvā pavāretuṃ na vaṭṭati ‘‘saṅghaṃ, bhante, pavāremī’’ti vacanato. Sabbepi hi sannipatitā pacchā diṭṭhaṃ vā sutaṃ vā parisaṅkitaṃ vā vattāro honti. Anāgatānaṃ atthibhāvaṃ ñatvāpi ekaccānaṃ santike pavāraṇāvacanaṃ viya hoti. Sammukhībhūte cattāro sannipātāpetvā nissaggiyaṃ āpannacīvarādinissajjanaṃ viya pavāraṇā na hoti sabbāyattattā. ‘‘Samaggānaṃ pavāraṇā paññattā’’ti vacanañcettha sādhakaṃ. ‘‘Ito aññathā na vaṭṭati aṭṭhakathāyaṃ ananuññātattā’’ti upatissatthero vadati. ‘‘Thokatarehi tesaṃ santike pavāretabbaṃ ñattiṃ aṭṭhapetvāvā’’ti vuttaṃ. Āgantukā nāma navamito paṭṭhāyāgatā vā vajasatthanāvāsu vutthavassā vā honti.
237. ‘‘දසවත්‌ථුකා මිච්‌ඡාදිට්‌ඨි හොති තථාගතොතිආදී’’ති ලිඛිතං. ‘‘නත්‌ථි දින්‌නන්‌තිආදී’’ති වුත්‌තං.
237. ‘‘Dasavatthukā micchādiṭṭhi hoti tathāgatotiādī’’ti likhitaṃ. ‘‘Natthi dinnantiādī’’ti vuttaṃ.
239. ‘‘උපපරික්‌ඛිත්‌වා ජානිස්‌සාමාති තෙන සහ පවාරෙතබ්‌බ’’න්‌ති ලිඛිතං.
239. ‘‘Upaparikkhitvā jānissāmāti tena saha pavāretabba’’nti likhitaṃ.
පවාරණාක්‌ඛන්‌ධකවණ්‌ණනා නිට්‌ඨිතා.
Pavāraṇākkhandhakavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi
128. අනාපත්‌තිපන්‌නරසකං • 128. Anāpattipannarasakaṃ
141. පවාරණාඨපනං • 141. Pavāraṇāṭhapanaṃ
143. වත්‌ථුඨපනාදි • 143. Vatthuṭhapanādi
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā
අනාපත්‌තිපන්‌නරසකාදිකථා • Anāpattipannarasakādikathā
පවාරණාඨපනකථා • Pavāraṇāṭhapanakathā
වත්‌ථුඨපනාදිකථා • Vatthuṭhapanādikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā
අනාපත්‌තිපන්‌නරසකකථාවණ්‌ණනා • Anāpattipannarasakakathāvaṇṇanā
පවාරණාඨපනකථාවණ්‌ණනා • Pavāraṇāṭhapanakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / අඵාසුවිහාරකථාදිවණ්‌ණනා • Aphāsuvihārakathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi
121. පවාරණාභෙදකථා • 121. Pavāraṇābhedakathā
141. පවාරණාට්‌ඨපනකථා • 141. Pavāraṇāṭṭhapanakathā
143. වත්‌ථුට්‌ඨපනාදිකථා • 143. Vatthuṭṭhapanādikathā
