| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
43. அனாபுச்சா²வரணவத்து²ஆதி³கதா²
43. Anāpucchāvaraṇavatthuādikathā
108. உபஜ்ஜா²யங் அனாபுச்சா²தி எத்த² உபஜ்ஜா²யங் அனாபுச்சி²த்வா. ஸப்³ப³தா² கிங் ந காதப்³ப³ந்தி ஆஹ ‘‘தும்ஹாக’’ந்திஆதி³. த³ண்ட³கம்மமஸ்ஸாதி த³ண்ட³கம்மங் அஸ்ஸ. அஸ்ஸாதி ஸாமணேரஸ்ஸ. ஸத்³தி⁴ங் உபஜ்ஜா²யேன விஹரந்தீதி ஸத்³தி⁴விஹாரிகா. நிஸ்ஸயாசரியாதீ³னங் அந்தே ஸமீபே வஸந்தீதி அந்தேவாஸிகா, உபஸம்பன்னாயேவ.
108.Upajjhāyaṃ anāpucchāti ettha upajjhāyaṃ anāpucchitvā. Sabbathā kiṃ na kātabbanti āha ‘‘tumhāka’’ntiādi. Daṇḍakammamassāti daṇḍakammaṃ assa. Assāti sāmaṇerassa. Saddhiṃ upajjhāyena viharantīti saddhivihārikā. Nissayācariyādīnaṃ ante samīpe vasantīti antevāsikā, upasampannāyeva.
அபலாளெந்தீதி எத்த² லள உபஸேவாயந்தி தா⁴துபாடே²ஸு வுத்தத்தா (ஸத்³த³னீதிதா⁴துமாலாயங் 18 ளகாரந்ததா⁴து) தே²ரே லளதோ உபஸேவதோ அபக³மெந்தீதி அத்தோ² த³ட்ட²ப்³போ³. இத⁴ பன அதி⁴ப்பாயத்த²ங் த³ஸ்ஸெந்தோ ஆஹ ‘‘தும்ஹாக’’ந்திஆதி³. அபலாளேதப்³பா³தி அஞ்ஞங் லளதோ உபஸேவதோ அபக³மேதப்³பா³. பரிஸபூ⁴தே ஸாமணேரூபஸம்பன்னேதி யோஜனா. ஆதீ³னவந்தி து³ஸ்ஸீலங் நிஸ்ஸாய வஸனஸ்ஸ தோ³ஸங். ந்ஹாயிதுங் ஆக³தேன தயா கூ³த²மக்க²னங் கதங் விய து³ஸ்ஸீலங் நிஸ்ஸாய விஹரந்தேன து³ஸ்ஸீலங் கதந்தி யோஜனா. ‘‘து³ஸ்ஸீல’’ந்தி பத³ங் புரிமபச்சி²மபதா³பெக்க²ங், தஸ்மா த்³வின்னங் பதா³னங் மஜ்ஜே² வுத்தங். தத்த² புரிமபதா³பெக்க²காலே வுத்தகம்மங், பச்சி²மபதா³பெக்க²காலே அவுத்தகம்மங். ஸோதி ஸாமணேரூபஸம்பன்னோ. உபஜ்ஜா²யங் வாதி ஸாமணேரங் ஸந்தா⁴ய வுத்தங். நிஸ்ஸயங் வாதி உபஸம்பன்னங் ஸந்தா⁴ய வுத்தங்.
Apalāḷentīti ettha laḷa upasevāyanti dhātupāṭhesu vuttattā (saddanītidhātumālāyaṃ 18 ḷakārantadhātu) there laḷato upasevato apagamentīti attho daṭṭhabbo. Idha pana adhippāyatthaṃ dassento āha ‘‘tumhāka’’ntiādi. Apalāḷetabbāti aññaṃ laḷato upasevato apagametabbā. Parisabhūte sāmaṇerūpasampanneti yojanā. Ādīnavanti dussīlaṃ nissāya vasanassa dosaṃ. Nhāyituṃ āgatena tayā gūthamakkhanaṃ kataṃ viya dussīlaṃ nissāya viharantena dussīlaṃ katanti yojanā. ‘‘Dussīla’’nti padaṃ purimapacchimapadāpekkhaṃ, tasmā dvinnaṃ padānaṃ majjhe vuttaṃ. Tattha purimapadāpekkhakāle vuttakammaṃ, pacchimapadāpekkhakāle avuttakammaṃ. Soti sāmaṇerūpasampanno. Upajjhāyaṃ vāti sāmaṇeraṃ sandhāya vuttaṃ. Nissayaṃ vāti upasampannaṃ sandhāya vuttaṃ.
தீஸு நாஸனாஸூதி ஸங்வாஸலிங்க³த³ண்ட³கம்மனாஸனஸங்கா²தாஸு தீஸு நாஸனாஸு. யோதி ஸாமணேரோ. நானாஆபத்தியோதி பாராஜிகது²ல்லச்சய பாசித்தியாபத்தியோ. ஹீதி ஸச்சங், யஸ்மா வா. குந்த²கிபில்லிகம்பீதி எத்த² பாணகா²த³கேஹி ஸத்தேஹி குதி²யதி ஹிங்ஸியதீதி குந்தோ², குங் பத²விங் வா தா⁴ரேதீதி குந்தோ⁴.
Tīsunāsanāsūti saṃvāsaliṅgadaṇḍakammanāsanasaṅkhātāsu tīsu nāsanāsu. Yoti sāmaṇero. Nānāāpattiyoti pārājikathullaccaya pācittiyāpattiyo. Hīti saccaṃ, yasmā vā. Kunthakipillikampīti ettha pāṇakhādakehi sattehi kuthiyati hiṃsiyatīti kuntho, kuṃ pathaviṃ vā dhāretīti kundho.
கிமியேவ பில்லிகங் போதகங் கிபில்லிகங் மிகாரஸ்ஸ லோபங் கத்வா. பில்லிகஸத்³தோ³ ஹி போதகபரியாயோ. கிமீனங், கிமீஸு வா பில்லிகங் கிபில்லிகங். நாஸேதப்³ப³தங்யேவாதி லிங்கே³ன நாஸேதப்³ப³பா⁴வமேவ. தாவதே³வாதி தஸ்மிங் மாரணபி⁴ந்த³னக்க²ணேயேவ. அஸ்ஸாதி ஸாமணேரஸ்ஸ. ஸேனாஸனக்³கா³ஹோ ச படிப்பஸ்ஸம்ப⁴தீதி வஸ்ஸச்சே²தோ³ ஹோதீதி அதி⁴ப்பாயோ. ஆகிண்ணதோ³ஸோவாதி லிங்க³னாஸனதோ³ஸேன ச த³ண்ட³கம்மனாஸனதோ³ஸேன ச ஆகுலதோ³ஸோவ. விரஜ்ஜி²த்வாதி விராதெ⁴த்வா. யதா²னிவத்த²பாருதஸ்ஸேவ ஸாமணேரஸ்ஸாதி ஸம்ப³ந்தோ⁴. தஸ்மாதி ஸரணக³மனஉபஸம்பத³கம்மவாசானங் ஸதி³ஸத்தா. பி⁴க்கு²னா ஸமாதி³ன்னங் விய இமினாபி ஸமாதி³ன்னானேவ ஹொந்தீதி யோஜனா. ஏவந்தி ஏவமிஜ்ஜ²னே, ஸமாதி³ன்னே வா. த³ள்ஹீகரணத்த²ந்தி ஸிக்கா²பதா³னங் த³ள்ஹீகரணத்த²ங். பதிட்டா²பனத்த²ந்தி ஸாமணேரஸ்ஸ பதிட்டா²பனத்த²ங். லச்ச²தீதி லபி⁴ஸ்ஸதி. ஸங்கே⁴ன தா³தப்³போ³தி ஸம்ப³ந்தோ⁴. அபலோகெத்வாதி ஸங்க⁴ங் ஆபுச்சி²த்வா. இமினா சி²ன்னவஸ்ஸகங் த³ஸ்ஸேதி.
Kimiyeva pillikaṃ potakaṃ kipillikaṃ mikārassa lopaṃ katvā. Pillikasaddo hi potakapariyāyo. Kimīnaṃ, kimīsu vā pillikaṃ kipillikaṃ. Nāsetabbataṃyevāti liṅgena nāsetabbabhāvameva. Tāvadevāti tasmiṃ māraṇabhindanakkhaṇeyeva. Assāti sāmaṇerassa. Senāsanaggāho ca paṭippassambhatīti vassacchedo hotīti adhippāyo. Ākiṇṇadosovāti liṅganāsanadosena ca daṇḍakammanāsanadosena ca ākuladosova. Virajjhitvāti virādhetvā. Yathānivatthapārutasseva sāmaṇerassāti sambandho. Tasmāti saraṇagamanaupasampadakammavācānaṃ sadisattā. Bhikkhunā samādinnaṃ viya imināpi samādinnāneva hontīti yojanā. Evanti evamijjhane, samādinne vā. Daḷhīkaraṇatthanti sikkhāpadānaṃ daḷhīkaraṇatthaṃ. Patiṭṭhāpanatthanti sāmaṇerassa patiṭṭhāpanatthaṃ. Lacchatīti labhissati. Saṅghena dātabboti sambandho. Apaloketvāti saṅghaṃ āpucchitvā. Iminā chinnavassakaṃ dasseti.
அதி³ன்னாதா³னே திணஸலாகமத்தேனாபி வத்து²னா அஸமணோ ஹோதீதி யோஜனா. விப்படிபத்தியாதி விகாரேன படிபஜ்ஜனதோ. ப⁴ணிதேதி ப⁴ணனே. ஜானித்வாதி ஜானித்வா ஏவ. ஏவகாரோ ஹெத்த² அஜ்ஜா²ஹரிதப்³போ³, தேன வுத்தங் ‘‘ந அஜானித்வா’’தி. யானி பஞ்ச ஸிக்கா²பதா³னீதி யோஜனா. அஸ்ஸாதி ஸாமணேரஸ்ஸ. ட²பனத்தா²யாதி ஸிக்கா²பதா³னங் ட²பனத்தா²ய. அயந்தி பாராஜிகோ. விஸேஸோதி பி⁴க்கூ²னங் பாசித்தியதோ விஸேஸோ.
Adinnādāne tiṇasalākamattenāpi vatthunā asamaṇo hotīti yojanā. Vippaṭipattiyāti vikārena paṭipajjanato. Bhaṇiteti bhaṇane. Jānitvāti jānitvā eva. Evakāro hettha ajjhāharitabbo, tena vuttaṃ ‘‘na ajānitvā’’ti. Yāni pañca sikkhāpadānīti yojanā. Assāti sāmaṇerassa. Ṭhapanatthāyāti sikkhāpadānaṃ ṭhapanatthāya. Ayanti pārājiko. Visesoti bhikkhūnaṃ pācittiyato viseso.
படிபக்க²வஸேனாதி ‘‘அனரஹங் அஸம்மாஸம்பு³த்³தோ⁴’’திஆதி³னா ச ‘‘த்³வாக்கா²தோ’’திஆதி³னா ச ‘‘து³ப்படிப்பன்னோ’’திஆதி³னா ச படிவிருத்³த⁴வஸேன க³ரஹந்தோ ஸாமணேரோ நிவாரேதப்³போ³தி ஸம்ப³ந்தோ⁴. கண்ட³கனாஸனாயாதி கண்ட³கனாமகஸ்ஸ ஸாமணேரஸ்ஸ த³ண்ட³கம்மனாஸனாய. தங் லத்³தி⁴ந்தி அவண்ணபா⁴ஸனதி³ட்டி²ங். அச்சயந்தி அதிக்கமங், தோ³ஸங் வா. தே³ஸாபேதப்³போ³தி ‘‘அச்சயோ மங் ப⁴ந்தே அச்சக³மா’’திஆதி³னா தே³ஸாபேதப்³பா³. தங் யுத்தந்தி ‘‘லிங்க³னாஸனாய நாஸேதப்³போ³’’தி தங் வசனங் பதிரூபங். ஹீதி ஸச்சங், யஸ்மா வா. இதா⁴தி க²ந்த⁴கே, ‘‘ஸாமணேரங் நாஸேது’’ந்திவசனே வா.
Paṭipakkhavasenāti ‘‘anarahaṃ asammāsambuddho’’tiādinā ca ‘‘dvākkhāto’’tiādinā ca ‘‘duppaṭippanno’’tiādinā ca paṭiviruddhavasena garahanto sāmaṇero nivāretabboti sambandho. Kaṇḍakanāsanāyāti kaṇḍakanāmakassa sāmaṇerassa daṇḍakammanāsanāya. Taṃ laddhinti avaṇṇabhāsanadiṭṭhiṃ. Accayanti atikkamaṃ, dosaṃ vā. Desāpetabboti ‘‘accayo maṃ bhante accagamā’’tiādinā desāpetabbā. Taṃ yuttanti ‘‘liṅganāsanāya nāsetabbo’’ti taṃ vacanaṃ patirūpaṃ. Hīti saccaṃ, yasmā vā. Idhāti khandhake, ‘‘sāmaṇeraṃ nāsetu’’ntivacane vā.
‘‘ஏஸேவ நயோ’’தி வுத்தவசனங் பாகடங் கரொந்தோ ஆஹ ‘‘ஸஸ்ஸதுச்சே²தா³னஞ்ஹீ’’திஆதி³. அஞ்ஞதரதி³ட்டி²கோ ஸாமணேரோதி யோஜனா. எத்தா²தி த³ஸஸு நாஸனங்கே³ஸு. ‘‘காம’’ந்திபதே³ன புனருத்தினிரத்த²கதோ³ஸாரோபனேன க³ரஹங் த³ஸ்ஸேதி. ‘‘பனா’’திபதே³ன தேஸங் தோ³ஸானங் பஹானேன ஸம்பா⁴வனங் த³ஸ்ஸேதி. அப்³ரஹ்மசாரிங் ஸாமணேரந்தி ஸம்ப³ந்தோ⁴. உபஸம்பாதே³துங் வட்டதீதி உபஸம்பாத³னங் வட்டதி. பி⁴க்கு²னிதூ³ஸகோ ஸாமணேரோதி ஸம்ப³ந்தோ⁴. பப்³ப³ஜ்ஜம்பீதி எத்த² பிஸத்³த³ஸ்ஸ க³ரஹத்த²பா⁴வங் த³ஸ்ஸேதுங் வுத்தங் ‘‘பகே³வ உபஸம்பத³’’ந்தி. ஏதமத்த²ந்தி ஏதாதி³ஸமத்த²ங்.
‘‘Eseva nayo’’ti vuttavacanaṃ pākaṭaṃ karonto āha ‘‘sassatucchedānañhī’’tiādi. Aññataradiṭṭhiko sāmaṇeroti yojanā. Etthāti dasasu nāsanaṅgesu. ‘‘Kāma’’ntipadena punaruttiniratthakadosāropanena garahaṃ dasseti. ‘‘Panā’’tipadena tesaṃ dosānaṃ pahānena sambhāvanaṃ dasseti. Abrahmacāriṃ sāmaṇeranti sambandho. Upasampādetuṃ vaṭṭatīti upasampādanaṃ vaṭṭati. Bhikkhunidūsako sāmaṇeroti sambandho. Pabbajjampīti ettha pisaddassa garahatthabhāvaṃ dassetuṃ vuttaṃ ‘‘pageva upasampada’’nti. Etamatthanti etādisamatthaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 44. அனாபுச்சா²வரணவத்து² • 44. Anāpucchāvaraṇavatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / அனாபுச்சா²வரணவத்து²ஆதி³கதா² • Anāpucchāvaraṇavatthuādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அனாபுச்சா²வரணவத்து²ஆதி³கதா²வண்ணனா • Anāpucchāvaraṇavatthuādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அனாபுச்சா²வரணவத்து²ஆதி³கதா²வண்ணனா • Anāpucchāvaraṇavatthuādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அனாபுச்சா²வரணவத்து²ஆதி³கதா²வண்ணனா • Anāpucchāvaraṇavatthuādikathāvaṇṇanā
