| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
অনাপুচ্ছাৰরণৰত্থুআদিকথাৰণ্ণনা
Anāpucchāvaraṇavatthuādikathāvaṇṇanā
১০৮. পরস্স দুস্সীলভিক্খুস্সপীতি অত্থো। কেচি ‘‘দুস্সীলভিক্খূপী’’তি লিখন্তি, তং ন সুন্দরং। পোরাণা পন ‘‘যাৰততিযং ৰুচ্চমানো চে ন ওরমতি, সঙ্ঘং অপলোকেত্ৰা নাসেতব্বো, পুন পব্বজ্জং যাচমানোপি অপলোকেত্ৰা পব্বাজেতব্বো’’তি ৰদন্তি। ভিক্খূনং উপসম্পদকম্মৰাচাসদিসন্তি এত্থ ‘‘যথা উপসম্পন্নো সিক্খং পচ্চক্খায যথানিৰত্থপারুতোৰ হুত্ৰা পচ্ছা উপসম্পন্নো পুব্বে অত্তনো নৰকতরস্স সমানৰস্সিকস্স পুন ৰন্দনাদীনি করোতি, এৰং সামণেরোপি পুন গহিতসরণো ততো পুব্বে অত্তনো নৰকতরস্স সমানৰস্সিকস্স সামণেরস্স পুন ৰন্দনাদীনি করোতি। লিঙ্গং পনেত্থ ৰুড্ঢতরভাৰং ন সাধেতীতি ৰুত্তং হোতী’’তি ৰুত্তং। ৰিকালভোজনং সামণেরানং ৰীতিক্কমেৰাতি একে। ‘‘অচ্চযো মং, ভন্তে, অচ্চাগমা’’তিআদিনা নযেন অচ্চযং দেসাপেতব্বো। ‘‘দিট্ঠিযা অনিস্সজ্জনেন ‘ত্ৰং, সামণের, গচ্ছা’তি ৰুত্তেযেৰ পারাজিকো হোতী’’তি ৰুত্তং, ‘‘যাৰততিযন্তি ৰুত্তত্তা বুদ্ধাদীনং অৰণ্ণভাসিতমত্তেন চ দিট্ঠিগ্গহিতমত্তেন চ সরণানি ন ভিজ্জন্তীতি ৰুত্তং হোতী’’তি ৰদন্তি। এৰং সন্তে পাণাতিপাতাদিং করোন্তস্সাপি তং সম্ভোতীতি মম তক্কো। ‘‘নিস্সীলস্স পুন নাসনা ৰুত্তা’’তি চ কেচি ৰদন্তি, তং যুত্তং ৰিয। ন হি ভগৰা সীলৰন্তস্স লিঙ্গনাসনং অনুজানাতীতি ৰিচারেতব্বং, ভিক্খুনিদূসকাপদেসেন ভব্বাভব্বে সঙ্গণ্হাতীতি পোরাণা। ‘‘পব্বজ্জম্পি ন লভতীতি যথা চেত্থ অযমত্থো দস্সিতো, তথা ‘পণ্ডকো, ভিক্খৰে, অনুপসম্পন্নো ন উপসম্পাদেতব্বো, উপসম্পন্নো নাসেতব্বো’তি (মহাৰ॰ ১০৯) আদিনা নযেন ৰুত্তানম্পি পব্বজ্জং নত্থীতি দীপিতং হোতি। ন হি ইদং ঠানং ঠপেত্ৰা তেসং পব্বজ্জায ৰারিতট্ঠানং অত্থি। ‘ভিক্খুনিদূসকো, ভিক্খৰে, অনুপসম্পন্নো ন উপসম্পাদেতব্বো, উপসম্পন্নো নাসেতব্বো’তি (মহাৰ॰ ১১৪) ৰুত্তেনপি সমানত্তা তস্স পব্বজ্জা ৰিয তেসম্পি পব্বজ্জা ৰারিতাৰ হোতীতিপি দস্সেতুং পুন ভিক্খুনিদূসকোতি গহিতন্তি অপরে’’তি ৰুত্তং। কিং ইমিনা? ননু অট্ঠকথাযং ৰুত্তং ‘‘যস্স চেত্থ পব্বজ্জা ৰারিতা, তং সন্ধায ইদং ৰুত্তং অনুপসম্পন্নো ন উপসম্পাদেতব্বো, উপসম্পন্নো নাসেতব্বো’’তি।
108. Parassa dussīlabhikkhussapīti attho. Keci ‘‘dussīlabhikkhūpī’’ti likhanti, taṃ na sundaraṃ. Porāṇā pana ‘‘yāvatatiyaṃ vuccamāno ce na oramati, saṅghaṃ apaloketvā nāsetabbo, puna pabbajjaṃ yācamānopi apaloketvā pabbājetabbo’’ti vadanti. Bhikkhūnaṃ upasampadakammavācāsadisanti ettha ‘‘yathā upasampanno sikkhaṃ paccakkhāya yathānivatthapārutova hutvā pacchā upasampanno pubbe attano navakatarassa samānavassikassa puna vandanādīni karoti, evaṃ sāmaṇeropi puna gahitasaraṇo tato pubbe attano navakatarassa samānavassikassa sāmaṇerassa puna vandanādīni karoti. Liṅgaṃ panettha vuḍḍhatarabhāvaṃ na sādhetīti vuttaṃ hotī’’ti vuttaṃ. Vikālabhojanaṃ sāmaṇerānaṃ vītikkamevāti eke. ‘‘Accayo maṃ, bhante, accāgamā’’tiādinā nayena accayaṃ desāpetabbo. ‘‘Diṭṭhiyā anissajjanena ‘tvaṃ, sāmaṇera, gacchā’ti vutteyeva pārājiko hotī’’ti vuttaṃ, ‘‘yāvatatiyanti vuttattā buddhādīnaṃ avaṇṇabhāsitamattena ca diṭṭhiggahitamattena ca saraṇāni na bhijjantīti vuttaṃ hotī’’ti vadanti. Evaṃ sante pāṇātipātādiṃ karontassāpi taṃ sambhotīti mama takko. ‘‘Nissīlassa puna nāsanā vuttā’’ti ca keci vadanti, taṃ yuttaṃ viya. Na hi bhagavā sīlavantassa liṅganāsanaṃ anujānātīti vicāretabbaṃ, bhikkhunidūsakāpadesena bhabbābhabbe saṅgaṇhātīti porāṇā. ‘‘Pabbajjampi na labhatīti yathā cettha ayamattho dassito, tathā ‘paṇḍako, bhikkhave, anupasampanno na upasampādetabbo, upasampanno nāsetabbo’ti (mahāva. 109) ādinā nayena vuttānampi pabbajjaṃ natthīti dīpitaṃ hoti. Na hi idaṃ ṭhānaṃ ṭhapetvā tesaṃ pabbajjāya vāritaṭṭhānaṃ atthi. ‘Bhikkhunidūsako, bhikkhave, anupasampanno na upasampādetabbo, upasampanno nāsetabbo’ti (mahāva. 114) vuttenapi samānattā tassa pabbajjā viya tesampi pabbajjā vāritāva hotītipi dassetuṃ puna bhikkhunidūsakoti gahitanti apare’’ti vuttaṃ. Kiṃ iminā? Nanu aṭṭhakathāyaṃ vuttaṃ ‘‘yassa cettha pabbajjā vāritā, taṃ sandhāya idaṃ vuttaṃ anupasampanno na upasampādetabbo, upasampanno nāsetabbo’’ti.
অনাপুচ্ছাৰরণৰত্থুআদিকথাৰণ্ণনা নিট্ঠিতা।
Anāpucchāvaraṇavatthuādikathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ৪৪. অনাপুচ্ছাৰরণৰত্থু • 44. Anāpucchāvaraṇavatthu
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / অনাপুচ্ছাৰরণৰত্থুআদিকথা • Anāpucchāvaraṇavatthuādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অনাপুচ্ছাৰরণৰত্থুআদিকথাৰণ্ণনা • Anāpucchāvaraṇavatthuādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অনাপুচ্ছাৰরণৰত্থুআদিকথাৰণ্ণনা • Anāpucchāvaraṇavatthuādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৪৩. অনাপুচ্ছাৰরণৰত্থুআদিকথা • 43. Anāpucchāvaraṇavatthuādikathā
