| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၃. အနာသဝကထာဝဏ္ဏနာ
3. Anāsavakathāvaṇṇanā
၃၉၁. ဣဒာနိ အနာသဝကထာ နာမ ဟောတိ။ တတ္ထ ယေ ဓမ္မာ အနာသဝသ္သ အရဟတော, သဗ္ဗေ တေ အနာသဝာတိ ယေသံ လဒ္ဓိ, သေယ္ယထာပိ ဧတရဟိ ဥတ္တရာပထကာနံ; တေ သန္ဓာယ အရဟတောတိ ပုစ္ဆာ သကဝာဒိသ္သ, ပဋိညာ ဣတရသ္သ။ အထ နံ အနာသဝာ နာမ မဂ္ဂာဒယော, ကိံ တသ္သ တေယေဝ ဥပ္ပဇ္ဇန္တီတိ စောဒနတ္ထံ မဂ္ဂော ဖလန္တိအာဒိ အာရဒ္ဓံ။ စက္ခု အနာသဝန္တိ ပုဋ္ဌော တသ္သ သာသဝတ္တာ ပဋိက္ခိပတိ။ ဒုတိယံ ပုဋ္ဌော အနာသဝသ္သေတန္တိ ပဋိဇာနာတိ။
391. Idāni anāsavakathā nāma hoti. Tattha ye dhammā anāsavassa arahato, sabbe te anāsavāti yesaṃ laddhi, seyyathāpi etarahi uttarāpathakānaṃ; te sandhāya arahatoti pucchā sakavādissa, paṭiññā itarassa. Atha naṃ anāsavā nāma maggādayo, kiṃ tassa teyeva uppajjantīti codanatthaṃ maggo phalantiādi āraddhaṃ. Cakkhu anāsavanti puṭṭho tassa sāsavattā paṭikkhipati. Dutiyaṃ puṭṭho anāsavassetanti paṭijānāti.
၃၉၂. စီဝရပဉ္ဟေ ဧကောဝ ဓမ္မော အနာသဝော သာသဝော စ ဟောတီတိ လက္ခဏဝိရောဓဘယာ ပဋိက္ခိပတိ။ ဒုတိယံ ပုဋ္ဌော အနာသဝသ္သ ဟုတ္ဝာ သာသဝသ္သ ဟောတီတိ ပဋိဇာနာတိ။ တညေဝ အနာသဝန္တိ ပဉ္ဟာဒ္ဝယေပိ ဧသေဝ နယော။ သကဝာဒီ ပန တညေဝာတိ အနုညာတတ္တာ ‘‘မဂ္ဂော အနာသဝော ဟုတ္ဝာ’’တိအာဒီဟိ စောဒေတိ။ ဣမိနာ ဥပာယေန သဗ္ဗတ္ထ အတ္ထော ဝေဒိတဗ္ဗောတိ။
392. Cīvarapañhe ekova dhammo anāsavo sāsavo ca hotīti lakkhaṇavirodhabhayā paṭikkhipati. Dutiyaṃ puṭṭho anāsavassa hutvā sāsavassa hotīti paṭijānāti. Taññeva anāsavanti pañhādvayepi eseva nayo. Sakavādī pana taññevāti anuññātattā ‘‘maggo anāsavo hutvā’’tiādīhi codeti. Iminā upāyena sabbattha attho veditabboti.
အနာသဝကထာဝဏ္ဏနာ။
Anāsavakathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၃၅) ၃. အနာသဝကထာ • (35) 3. Anāsavakathā
