| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೩. ಅನಾಸವಕಥಾವಣ್ಣನಾ
3. Anāsavakathāvaṇṇanā
೩೯೧. ಇದಾನಿ ಅನಾಸವಕಥಾ ನಾಮ ಹೋತಿ। ತತ್ಥ ಯೇ ಧಮ್ಮಾ ಅನಾಸವಸ್ಸ ಅರಹತೋ, ಸಬ್ಬೇ ತೇ ಅನಾಸವಾತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಏತರಹಿ ಉತ್ತರಾಪಥಕಾನಂ; ತೇ ಸನ್ಧಾಯ ಅರಹತೋತಿ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ। ಅಥ ನಂ ಅನಾಸವಾ ನಾಮ ಮಗ್ಗಾದಯೋ, ಕಿಂ ತಸ್ಸ ತೇಯೇವ ಉಪ್ಪಜ್ಜನ್ತೀತಿ ಚೋದನತ್ಥಂ ಮಗ್ಗೋ ಫಲನ್ತಿಆದಿ ಆರದ್ಧಂ। ಚಕ್ಖು ಅನಾಸವನ್ತಿ ಪುಟ್ಠೋ ತಸ್ಸ ಸಾಸವತ್ತಾ ಪಟಿಕ್ಖಿಪತಿ। ದುತಿಯಂ ಪುಟ್ಠೋ ಅನಾಸವಸ್ಸೇತನ್ತಿ ಪಟಿಜಾನಾತಿ।
391. Idāni anāsavakathā nāma hoti. Tattha ye dhammā anāsavassa arahato, sabbe te anāsavāti yesaṃ laddhi, seyyathāpi etarahi uttarāpathakānaṃ; te sandhāya arahatoti pucchā sakavādissa, paṭiññā itarassa. Atha naṃ anāsavā nāma maggādayo, kiṃ tassa teyeva uppajjantīti codanatthaṃ maggo phalantiādi āraddhaṃ. Cakkhu anāsavanti puṭṭho tassa sāsavattā paṭikkhipati. Dutiyaṃ puṭṭho anāsavassetanti paṭijānāti.
೩೯೨. ಚೀವರಪಞ್ಹೇ ಏಕೋವ ಧಮ್ಮೋ ಅನಾಸವೋ ಸಾಸವೋ ಚ ಹೋತೀತಿ ಲಕ್ಖಣವಿರೋಧಭಯಾ ಪಟಿಕ್ಖಿಪತಿ। ದುತಿಯಂ ಪುಟ್ಠೋ ಅನಾಸವಸ್ಸ ಹುತ್ವಾ ಸಾಸವಸ್ಸ ಹೋತೀತಿ ಪಟಿಜಾನಾತಿ। ತಞ್ಞೇವ ಅನಾಸವನ್ತಿ ಪಞ್ಹಾದ್ವಯೇಪಿ ಏಸೇವ ನಯೋ। ಸಕವಾದೀ ಪನ ತಞ್ಞೇವಾತಿ ಅನುಞ್ಞಾತತ್ತಾ ‘‘ಮಗ್ಗೋ ಅನಾಸವೋ ಹುತ್ವಾ’’ತಿಆದೀಹಿ ಚೋದೇತಿ। ಇಮಿನಾ ಉಪಾಯೇನ ಸಬ್ಬತ್ಥ ಅತ್ಥೋ ವೇದಿತಬ್ಬೋತಿ।
392. Cīvarapañhe ekova dhammo anāsavo sāsavo ca hotīti lakkhaṇavirodhabhayā paṭikkhipati. Dutiyaṃ puṭṭho anāsavassa hutvā sāsavassa hotīti paṭijānāti. Taññeva anāsavanti pañhādvayepi eseva nayo. Sakavādī pana taññevāti anuññātattā ‘‘maggo anāsavo hutvā’’tiādīhi codeti. Iminā upāyena sabbattha attho veditabboti.
ಅನಾಸವಕಥಾವಣ್ಣನಾ।
Anāsavakathāvaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೩೫) ೩. ಅನಾಸವಕಥಾ • (35) 3. Anāsavakathā
