| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
3. අනාසවකථාවණ්‌ණනා
3. Anāsavakathāvaṇṇanā
391. ඉදානි අනාසවකථා නාම හොති. තත්‌ථ යෙ ධම්‌මා අනාසවස්‌ස අරහතො, සබ්‌බෙ තෙ අනාසවාති යෙසං ලද්‌ධි, සෙය්‍යථාපි එතරහි උත්‌තරාපථකානං; තෙ සන්‌ධාය අරහතොති පුච්‌ඡා සකවාදිස්‌ස, පටිඤ්‌ඤා ඉතරස්‌ස. අථ නං අනාසවා නාම මග්‌ගාදයො, කිං තස්‌ස තෙයෙව උප්‌පජ්‌ජන්‌තීති චොදනත්‌ථං මග්‌ගො ඵලන්‌තිආදි ආරද්‌ධං. චක්‌ඛු අනාසවන්‌ති පුට්‌ඨො තස්‌ස සාසවත්‌තා පටික්‌ඛිපති. දුතියං පුට්‌ඨො අනාසවස්‌සෙතන්‌ති පටිජානාති.
391. Idāni anāsavakathā nāma hoti. Tattha ye dhammā anāsavassa arahato, sabbe te anāsavāti yesaṃ laddhi, seyyathāpi etarahi uttarāpathakānaṃ; te sandhāya arahatoti pucchā sakavādissa, paṭiññā itarassa. Atha naṃ anāsavā nāma maggādayo, kiṃ tassa teyeva uppajjantīti codanatthaṃ maggo phalantiādi āraddhaṃ. Cakkhu anāsavanti puṭṭho tassa sāsavattā paṭikkhipati. Dutiyaṃ puṭṭho anāsavassetanti paṭijānāti.
392. චීවරපඤ්‌හෙ එකොව ධම්‌මො අනාසවො සාසවො ච හොතීති ලක්‌ඛණවිරොධභයා පටික්‌ඛිපති. දුතියං පුට්‌ඨො අනාසවස්‌ස හුත්‌වා සාසවස්‌ස හොතීති පටිජානාති. තඤ්‌ඤෙව අනාසවන්‌ති පඤ්‌හාද්‌වයෙපි එසෙව නයො. සකවාදී පන තඤ්‌ඤෙවාති අනුඤ්‌ඤාතත්‌තා ‘‘මග්‌ගො අනාසවො හුත්‌වා’’තිආදීහි චොදෙති. ඉමිනා උපායෙන සබ්‌බත්‌ථ අත්‌ථො වෙදිතබ්‌බොති.
392. Cīvarapañhe ekova dhammo anāsavo sāsavo ca hotīti lakkhaṇavirodhabhayā paṭikkhipati. Dutiyaṃ puṭṭho anāsavassa hutvā sāsavassa hotīti paṭijānāti. Taññeva anāsavanti pañhādvayepi eseva nayo. Sakavādī pana taññevāti anuññātattā ‘‘maggo anāsavo hutvā’’tiādīhi codeti. Iminā upāyena sabbattha attho veditabboti.
අනාසවකථාවණ්‌ණනා.
Anāsavakathāvaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / (35) 3. අනාසවකථා • (35) 3. Anāsavakathā
