| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ • Majjhimanikāya |
༥. སལཱ༹ཡཏནཝགྒོ
5. Saḷāyatanavaggo
༡. ཨནཱཐཔིཎྜིཀོཝཱདསུཏྟཾ
1. Anāthapiṇḍikovādasuttaṃ
༣༨༣. ཨེཝཾ མེ སུཏཾ – ཨེཀཾ སམཡཾ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཨནཱཐཔིཎྜིཀོ གཧཔཏི ཨཱབཱདྷིཀོ ཧོཏི དུཀྑིཏོ བཱལ༹ྷགིལཱནོ། ཨཐ ཁོ ཨནཱཐཔིཎྜིཀོ གཧཔཏི ཨཉྙཏརཾ པུརིསཾ ཨཱམནྟེསི – ‘‘ཨེཧི ཏྭཾ, ཨམྦྷོ པུརིས, ཡེན བྷགཝཱ ཏེནུཔསངྐམ; ཨུཔསངྐམིཏྭཱ མམ ཝཙནེན བྷགཝཏོ པཱདེ སིརསཱ ཝནྡཱཧི 1 – ‘ཨནཱཐཔིཎྜིཀོ, བྷནྟེ, གཧཔཏི ཨཱབཱདྷིཀོ དུཀྑིཏོ བཱལ༹ྷགིལཱནོ། སོ བྷགཝཏོ པཱདེ སིརསཱ ཝནྡཏཱི’ཏི། ཡེན ཙཱཡསྨཱ སཱརིཔུཏྟོ ཏེནུཔསངྐམ; ཨུཔསངྐམིཏྭཱ མམ ཝཙནེན ཨཱཡསྨཏོ སཱརིཔུཏྟསྶ པཱདེ སིརསཱ ཝནྡཱཧི 2 – ‘ཨནཱཐཔིཎྜིཀོ, བྷནྟེ, གཧཔཏི ཨཱབཱདྷིཀོ དུཀྑིཏོ བཱལ༹ྷགིལཱནོ། སོ ཨཱཡསྨཏོ སཱརིཔུཏྟསྶ པཱདེ སིརསཱ ཝནྡཏཱི’ཏི། ཨེཝཉྩ ཝདེཧི – ‘སཱདྷུ ཀིར, བྷནྟེ, ཨཱཡསྨཱ སཱརིཔུཏྟོ ཡེན ཨནཱཐཔིཎྜིཀསྶ གཧཔཏིསྶ ནིཝེསནཾ ཏེནུཔསངྐམཏུ ཨནུཀམྤཾ ཨུཔཱདཱཡཱ’’’ཏི།
383. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena anāthapiṇḍiko gahapati ābādhiko hoti dukkhito bāḷhagilāno. Atha kho anāthapiṇḍiko gahapati aññataraṃ purisaṃ āmantesi – ‘‘ehi tvaṃ, ambho purisa, yena bhagavā tenupasaṅkama; upasaṅkamitvā mama vacanena bhagavato pāde sirasā vandāhi 3 – ‘anāthapiṇḍiko, bhante, gahapati ābādhiko dukkhito bāḷhagilāno. So bhagavato pāde sirasā vandatī’ti. Yena cāyasmā sāriputto tenupasaṅkama; upasaṅkamitvā mama vacanena āyasmato sāriputtassa pāde sirasā vandāhi 4 – ‘anāthapiṇḍiko, bhante, gahapati ābādhiko dukkhito bāḷhagilāno. So āyasmato sāriputtassa pāde sirasā vandatī’ti. Evañca vadehi – ‘sādhu kira, bhante, āyasmā sāriputto yena anāthapiṇḍikassa gahapatissa nivesanaṃ tenupasaṅkamatu anukampaṃ upādāyā’’’ti.
‘‘ཨེཝཾ, བྷནྟེ’’ཏི ཁོ སོ པུརིསོ ཨནཱཐཔིཎྜིཀསྶ གཧཔཏིསྶ པཊིསྶུཏྭཱ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ སོ པུརིསོ བྷགཝནྟཾ ཨེཏདཝོཙ – ‘‘ཨནཱཐཔིཎྜིཀོ, བྷནྟེ, གཧཔཏི ཨཱབཱདྷིཀོ དུཀྑིཏོ བཱལ༹ྷགིལཱནོ། སོ བྷགཝཏོ པཱདེ སིརསཱ ཝནྡཏཱི’’ཏི། ཡེན ཙཱཡསྨཱ སཱརིཔུཏྟོ ཏེནུཔསངྐམི; ཨུཔསངྐམིཏྭཱ ཨཱཡསྨནྟཾ སཱརིཔུཏྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ སོ པུརིསོ ཨཱཡསྨནྟཾ སཱརིཔུཏྟཾ ཨེཏདཝོཙ – ‘‘ཨནཱཐཔིཎྜིཀོ, བྷནྟེ, གཧཔཏི ཨཱབཱདྷིཀོ དུཀྑིཏོ བཱལ༹ྷགིལཱནོ། སོ ཨཱཡསྨཏོ སཱརིཔུཏྟསྶ པཱདེ སིརསཱ ཝནྡཏི; ཨེཝཉྩ ཝདེཏི – ‘སཱདྷུ ཀིར, བྷནྟེ, ཨཱཡསྨཱ སཱརིཔུཏྟོ ཡེན ཨནཱཐཔིཎྜིཀསྶ གཧཔཏིསྶ ནིཝེསནཾ ཏེནུཔསངྐམཏུ ཨནུཀམྤཾ ཨུཔཱདཱཡཱ’’’ཏི། ཨདྷིཝཱསེསི ཁོ ཨཱཡསྨཱ སཱརིཔུཏྟོ ཏུཎྷཱིབྷཱཝེན།
‘‘Evaṃ, bhante’’ti kho so puriso anāthapiṇḍikassa gahapatissa paṭissutvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so puriso bhagavantaṃ etadavoca – ‘‘anāthapiṇḍiko, bhante, gahapati ābādhiko dukkhito bāḷhagilāno. So bhagavato pāde sirasā vandatī’’ti. Yena cāyasmā sāriputto tenupasaṅkami; upasaṅkamitvā āyasmantaṃ sāriputtaṃ abhivādetvā ekamantaṃ nisīdi. Ekamantaṃ nisinno kho so puriso āyasmantaṃ sāriputtaṃ etadavoca – ‘‘anāthapiṇḍiko, bhante, gahapati ābādhiko dukkhito bāḷhagilāno. So āyasmato sāriputtassa pāde sirasā vandati; evañca vadeti – ‘sādhu kira, bhante, āyasmā sāriputto yena anāthapiṇḍikassa gahapatissa nivesanaṃ tenupasaṅkamatu anukampaṃ upādāyā’’’ti. Adhivāsesi kho āyasmā sāriputto tuṇhībhāvena.
༣༨༤. ཨཐ ཁོ ཨཱཡསྨཱ སཱརིཔུཏྟོ ནིཝཱསེཏྭཱ པཏྟཙཱིཝརམཱདཱཡ ཨཱཡསྨཏཱ ཨཱནནྡེན པཙྪཱསམཎེན ཡེན ཨནཱཐཔིཎྜིཀསྶ གཧཔཏིསྶ ནིཝེསནཾ ཏེནུཔསངྐམི; ཨུཔསངྐམིཏྭཱ པཉྙཏྟེ ཨཱསནེ ནིསཱིདི། ནིསཛྫ ཁོ ཨཱཡསྨཱ སཱརིཔུཏྟོ ཨནཱཐཔིཎྜིཀཾ གཧཔཏིཾ ཨེཏདཝོཙ – ‘‘ཀཙྩི ཏེ, གཧཔཏི, ཁམནཱིཡཾ, ཀཙྩི ཡཱཔནཱིཡཾ? ཀཙྩི ཏེ དུཀྑཱ ཝེདནཱ པཊིཀྐམནྟི, ནོ ཨབྷིཀྐམནྟི; པཊིཀྐམོསཱནཾ པཉྙཱཡཏི, ནོ ཨབྷིཀྐམོ’’ཏི?
384. Atha kho āyasmā sāriputto nivāsetvā pattacīvaramādāya āyasmatā ānandena pacchāsamaṇena yena anāthapiṇḍikassa gahapatissa nivesanaṃ tenupasaṅkami; upasaṅkamitvā paññatte āsane nisīdi. Nisajja kho āyasmā sāriputto anāthapiṇḍikaṃ gahapatiṃ etadavoca – ‘‘kacci te, gahapati, khamanīyaṃ, kacci yāpanīyaṃ? Kacci te dukkhā vedanā paṭikkamanti, no abhikkamanti; paṭikkamosānaṃ paññāyati, no abhikkamo’’ti?
‘‘ན མེ, བྷནྟེ སཱརིཔུཏྟ, ཁམནཱིཡཾ ན ཡཱཔནཱིཡཾ། བཱལ༹ྷཱ མེ དུཀྑཱ ཝེདནཱ ཨབྷིཀྐམནྟི, ནོ པཊིཀྐམནྟི; ཨབྷིཀྐམོསཱནཾ པཉྙཱཡཏི, ནོ པཊིཀྐམོ། སེཡྻཐཱཔི, བྷནྟེ སཱརིཔུཏྟ, བལཝཱ པུརིསོ ཏིཎྷེན སིཁརེན མུདྡྷནི 5 ཨབྷིམཏྠེཡྻ 6; ཨེཝམེཝ ཁོ མེ, བྷནྟེ སཱརིཔུཏྟ, ཨདྷིམཏྟཱ ཝཱཏཱ མུདྡྷནི 7 ཨཱུཧནནྟི 8། ན མེ, བྷནྟེ སཱརིཔུཏྟ, ཁམནཱིཡཾ ན ཡཱཔནཱིཡཾ། བཱལ༹ྷཱ མེ དུཀྑཱ ཝེདནཱ ཨབྷིཀྐམནྟི, ནོ པཊིཀྐམནྟི; ཨབྷིཀྐམོསཱནཾ པཉྙཱཡཏི, ནོ པཊིཀྐམོ། སེཡྻཐཱཔི, བྷནྟེ སཱརིཔུཏྟ, བལཝཱ པུརིསོ དལ༹ྷེན ཝརཏྟཁཎྜེན སཱིསེ སཱིསཝེཋཾ དདེཡྻ; ཨེཝམེཝ ཁོ མེ, བྷནྟེ སཱརིཔུཏྟ, ཨདྷིམཏྟཱ སཱིསེ སཱིསཝེདནཱ། ན མེ, བྷནྟེ སཱརིཔུཏྟ, ཁམནཱིཡཾ ན ཡཱཔནཱིཡཾ། བཱལ༹ྷཱ མེ དུཀྑཱ ཝེདནཱ ཨབྷིཀྐམནྟི, ནོ པཊིཀྐམནྟི; ཨབྷིཀྐམོསཱནཾ པཉྙཱཡཏི, ནོ པཊིཀྐམོ། སེཡྻཐཱཔི, བྷནྟེ སཱརིཔུཏྟ, དཀྑོ གོགྷཱཏཀོ ཝཱ གོགྷཱཏཀནྟེཝཱསཱི ཝཱ ཏིཎྷེན གོཝིཀནྟནེན ཀུཙྪིཾ པརིཀནྟེཡྻ; ཨེཝམེཝ ཁོ མེ, བྷནྟེ སཱརིཔུཏྟ, ཨདྷིམཏྟཱ ཝཱཏཱ ཀུཙྪིཾ པརིཀནྟནྟི། ན མེ, བྷནྟེ སཱརིཔུཏྟ, ཁམནཱིཡཾ ན ཡཱཔནཱིཡཾ། བཱལ༹ྷཱ མེ དུཀྑཱ ཝེདནཱ ཨབྷིཀྐམནྟི, ནོ པཊིཀྐམནྟི; ཨབྷིཀྐམོསཱནཾ པཉྙཱཡཏི, ནོ པཊིཀྐམོ། སེཡྻཐཱཔི, བྷནྟེ སཱརིཔུཏྟ, དྭེ བལཝནྟོ པུརིསཱ དུབྦལཏརཾ པུརིསཾ ནཱནཱབཱཧཱསུ གཧེཏྭཱ ཨངྒཱརཀཱསུཡཱ སནྟཱཔེཡྻུཾ, སམྤརིཏཱཔེཡྻུཾ; ཨེཝམེཝ ཁོ མེ, བྷནྟེ སཱརིཔུཏྟ, ཨདྷིམཏྟོ ཀཱཡསྨིཾ ཌཱཧོ། ན མེ, བྷནྟེ སཱརིཔུཏྟ, ཁམནཱིཡཾ ན ཡཱཔནཱིཡཾ། བཱལ༹ྷཱ མེ དུཀྑཱ ཝེདནཱ ཨབྷིཀྐམནྟི, ནོ པཊིཀྐམནྟི; ཨབྷིཀྐམོསཱནཾ པཉྙཱཡཏི, ནོ པཊིཀྐམོ’’ཏི།
‘‘Na me, bhante sāriputta, khamanīyaṃ na yāpanīyaṃ. Bāḷhā me dukkhā vedanā abhikkamanti, no paṭikkamanti; abhikkamosānaṃ paññāyati, no paṭikkamo. Seyyathāpi, bhante sāriputta, balavā puriso tiṇhena sikharena muddhani 9 abhimattheyya 10; evameva kho me, bhante sāriputta, adhimattā vātā muddhani 11 ūhananti 12. Na me, bhante sāriputta, khamanīyaṃ na yāpanīyaṃ. Bāḷhā me dukkhā vedanā abhikkamanti, no paṭikkamanti; abhikkamosānaṃ paññāyati, no paṭikkamo. Seyyathāpi, bhante sāriputta, balavā puriso daḷhena varattakhaṇḍena sīse sīsaveṭhaṃ dadeyya; evameva kho me, bhante sāriputta, adhimattā sīse sīsavedanā. Na me, bhante sāriputta, khamanīyaṃ na yāpanīyaṃ. Bāḷhā me dukkhā vedanā abhikkamanti, no paṭikkamanti; abhikkamosānaṃ paññāyati, no paṭikkamo. Seyyathāpi, bhante sāriputta, dakkho goghātako vā goghātakantevāsī vā tiṇhena govikantanena kucchiṃ parikanteyya; evameva kho me, bhante sāriputta, adhimattā vātā kucchiṃ parikantanti. Na me, bhante sāriputta, khamanīyaṃ na yāpanīyaṃ. Bāḷhā me dukkhā vedanā abhikkamanti, no paṭikkamanti; abhikkamosānaṃ paññāyati, no paṭikkamo. Seyyathāpi, bhante sāriputta, dve balavanto purisā dubbalataraṃ purisaṃ nānābāhāsu gahetvā aṅgārakāsuyā santāpeyyuṃ, samparitāpeyyuṃ; evameva kho me, bhante sāriputta, adhimatto kāyasmiṃ ḍāho. Na me, bhante sāriputta, khamanīyaṃ na yāpanīyaṃ. Bāḷhā me dukkhā vedanā abhikkamanti, no paṭikkamanti; abhikkamosānaṃ paññāyati, no paṭikkamo’’ti.
༣༨༥. ‘‘ཏསྨཱཏིཧ ཏེ, གཧཔཏི, ཨེཝཾ སིཀྑིཏབྦཾ – ‘ན ཙཀྑུཾ ཨུཔཱདིཡིསྶཱམི, ན ཙ མེ ཙཀྑུནིསྶིཏཾ ཝིཉྙཱཎཾ བྷཝིསྶཏཱི’ཏི། ཨེཝཉྷི ཏེ, གཧཔཏི, སིཀྑིཏབྦཾ།
385. ‘‘Tasmātiha te, gahapati, evaṃ sikkhitabbaṃ – ‘na cakkhuṃ upādiyissāmi, na ca me cakkhunissitaṃ viññāṇaṃ bhavissatī’ti. Evañhi te, gahapati, sikkhitabbaṃ.
‘‘ཏསྨཱཏིཧ ཏེ, གཧཔཏི, ཨེཝཾ སིཀྑིཏབྦཾ – ‘ན སོཏཾ ཨུཔཱདིཡིསྶཱམི, ན ཙ མེ སོཏནིསྶིཏཾ ཝིཉྙཱཎཾ བྷཝིསྶཏཱི’ཏི། ཨེཝཉྷི ཏེ, གཧཔཏི, སིཀྑིཏབྦཾ། ཏསྨཱཏིཧ ཏེ, གཧཔཏི, ཨེཝཾ སིཀྑིཏབྦཾ – ‘ན གྷཱནཾ ཨུཔཱདིཡིསྶཱམི, ན ཙ མེ གྷཱནནིསྶིཏཾ ཝིཉྙཱཎཾ བྷཝིསྶཏཱི’ཏི། ཨེཝཉྷི ཏེ, གཧཔཏི, སིཀྑིཏབྦཾ། ཏསྨཱཏིཧ ཏེ, གཧཔཏི, ཨེཝཾ སིཀྑིཏབྦཾ – ‘ན ཛིཝ྄ཧཾ ཨུཔཱདིཡིསྶཱམི, ན ཙ མེ ཛིཝ྄ཧཱནིསྶིཏཾ ཝིཉྙཱཎཾ བྷཝིསྶཏཱི’ཏི། ཨེཝཉྷི ཏེ, གཧཔཏི, སིཀྑིཏབྦཾ། ཏསྨཱཏིཧ ཏེ, གཧཔཏི, ཨེཝཾ སིཀྑིཏབྦཾ – ‘ན ཀཱཡཾ ཨུཔཱདིཡིསྶཱམི, ན ཙ མེ ཀཱཡནིསྶིཏཾ ཝིཉྙཱཎཾ བྷཝིསྶཏཱི’ཏི། ཨེཝཉྷི ཏེ, གཧཔཏི, སིཀྑིཏབྦཾ། ཏསྨཱཏིཧ ཏེ, གཧཔཏི, ཨེཝཾ སིཀྑིཏབྦཾ – ‘ན མནཾ ཨུཔཱདིཡིསྶཱམི, ན ཙ མེ མནོནིསྶིཏཾ ཝིཉྙཱཎཾ བྷཝིསྶཏཱི’ཏི། ཨེཝཉྷི ཏེ, གཧཔཏི, སིཀྑིཏབྦཾ།
‘‘Tasmātiha te, gahapati, evaṃ sikkhitabbaṃ – ‘na sotaṃ upādiyissāmi, na ca me sotanissitaṃ viññāṇaṃ bhavissatī’ti. Evañhi te, gahapati, sikkhitabbaṃ. Tasmātiha te, gahapati, evaṃ sikkhitabbaṃ – ‘na ghānaṃ upādiyissāmi, na ca me ghānanissitaṃ viññāṇaṃ bhavissatī’ti. Evañhi te, gahapati, sikkhitabbaṃ. Tasmātiha te, gahapati, evaṃ sikkhitabbaṃ – ‘na jivhaṃ upādiyissāmi, na ca me jivhānissitaṃ viññāṇaṃ bhavissatī’ti. Evañhi te, gahapati, sikkhitabbaṃ. Tasmātiha te, gahapati, evaṃ sikkhitabbaṃ – ‘na kāyaṃ upādiyissāmi, na ca me kāyanissitaṃ viññāṇaṃ bhavissatī’ti. Evañhi te, gahapati, sikkhitabbaṃ. Tasmātiha te, gahapati, evaṃ sikkhitabbaṃ – ‘na manaṃ upādiyissāmi, na ca me manonissitaṃ viññāṇaṃ bhavissatī’ti. Evañhi te, gahapati, sikkhitabbaṃ.
‘‘ཏསྨཱཏིཧ ཏེ, གཧཔཏི, ཨེཝཾ སིཀྑིཏབྦཾ – ‘ན རཱུཔཾ ཨུཔཱདིཡིསྶཱམི, ན ཙ མེ རཱུཔནིསྶིཏཾ ཝིཉྙཱཎཾ བྷཝིསྶཏཱི’ཏི། ཨེཝཉྷི ཏེ, གཧཔཏི, སིཀྑིཏབྦཾ། ཏསྨཱཏིཧ ཏེ, གཧཔཏི, ཨེཝཾ སིཀྑིཏབྦཾ – ‘ན སདྡཾ ཨུཔཱདིཡིསྶཱམི…པེ॰… ན གནྡྷཾ ཨུཔཱདིཡིསྶཱམི… ན རསཾ ཨུཔཱདིཡིསྶཱམི… ན ཕོཊྛབྦཾ ཨུཔཱདིཡིསྶཱམི… ན དྷམྨཾ ཨུཔཱདིཡིསྶཱམི ན ཙ མེ དྷམྨནིསྶིཏཾ ཝིཉྙཱཎཾ བྷཝིསྶཏཱི’ཏི། ཨེཝཉྷི ཏེ, གཧཔཏི, སིཀྑིཏབྦཾ།
‘‘Tasmātiha te, gahapati, evaṃ sikkhitabbaṃ – ‘na rūpaṃ upādiyissāmi, na ca me rūpanissitaṃ viññāṇaṃ bhavissatī’ti. Evañhi te, gahapati, sikkhitabbaṃ. Tasmātiha te, gahapati, evaṃ sikkhitabbaṃ – ‘na saddaṃ upādiyissāmi…pe… na gandhaṃ upādiyissāmi… na rasaṃ upādiyissāmi… na phoṭṭhabbaṃ upādiyissāmi… na dhammaṃ upādiyissāmi na ca me dhammanissitaṃ viññāṇaṃ bhavissatī’ti. Evañhi te, gahapati, sikkhitabbaṃ.
‘‘ཏསྨཱཏིཧ ཏེ, གཧཔཏི, ཨེཝཾ སིཀྑིཏབྦཾ – ‘ན ཙཀྑུཝིཉྙཱཎཾ ཨུཔཱདིཡིསྶཱམི, ན ཙ མེ ཙཀྑུཝིཉྙཱཎནིསྶིཏཾ ཝིཉྙཱཎཾ བྷཝིསྶཏཱི’ཏི། ཨེཝཉྷི ཏེ, གཧཔཏི, སིཀྑིཏབྦཾ། ཏསྨཱཏིཧ ཏེ, གཧཔཏི, ཨེཝཾ སིཀྑིཏབྦཾ – ‘ན སོཏཝིཉྙཱཎཾ ཨུཔཱདིཡིསྶཱམི… ན གྷཱནཝིཉྙཱཎཾ ཨུཔཱདིཡིསྶཱམི… ན ཛིཝ྄ཧཱཝིཉྙཱཎཾ ཨུཔཱདིཡིསྶཱམི… ན ཀཱཡཝིཉྙཱཎཾ ཨུཔཱདིཡིསྶཱམི… ན མནོཝིཉྙཱཎཾ ཨུཔཱདིཡིསྶཱམི ན ཙ མེ མནོཝིཉྙཱཎནིསྶིཏཾ ཝིཉྙཱཎཾ བྷཝིསྶཏཱི’ཏི། ཨེཝཉྷི ཏེ, གཧཔཏི, སིཀྑིཏབྦཾ།
‘‘Tasmātiha te, gahapati, evaṃ sikkhitabbaṃ – ‘na cakkhuviññāṇaṃ upādiyissāmi, na ca me cakkhuviññāṇanissitaṃ viññāṇaṃ bhavissatī’ti. Evañhi te, gahapati, sikkhitabbaṃ. Tasmātiha te, gahapati, evaṃ sikkhitabbaṃ – ‘na sotaviññāṇaṃ upādiyissāmi… na ghānaviññāṇaṃ upādiyissāmi… na jivhāviññāṇaṃ upādiyissāmi… na kāyaviññāṇaṃ upādiyissāmi… na manoviññāṇaṃ upādiyissāmi na ca me manoviññāṇanissitaṃ viññāṇaṃ bhavissatī’ti. Evañhi te, gahapati, sikkhitabbaṃ.
‘‘ཏསྨཱཏིཧ ཏེ, གཧཔཏི, ཨེཝཾ སིཀྑིཏབྦཾ – ‘ན ཙཀྑུསམྥསྶཾ ཨུཔཱདིཡིསྶཱམི, ན ཙ མེ ཙཀྑུསམྥསྶནིསྶིཏཾ ཝིཉྙཱཎཾ བྷཝིསྶཏཱི’ཏི། ཨེཝཉྷི ཏེ, གཧཔཏི, སིཀྑིཏབྦཾ། ཏསྨཱཏིཧ ཏེ, གཧཔཏི, ཨེཝཾ སིཀྑིཏབྦཾ – ‘ན སོཏསམྥསྶཾ ཨུཔཱདིཡིསྶཱམི… ན གྷཱནསམྥསྶཾ ཨུཔཱདིཡིསྶཱམི… ན ཛིཝ྄ཧཱསམྥསྶཾ ཨུཔཱདིཡིསྶཱམི… ན ཀཱཡསམྥསྶཾ ཨུཔཱདིཡིསྶཱམི… ན མནོསམྥསྶཾ ཨུཔཱདིཡིསྶཱམི, ན ཙ མེ མནོསམྥསྶནིསྶིཏཾ ཝིཉྙཱཎཾ བྷཝིསྶཏཱི’ཏི། ཨེཝཉྷི ཏེ, གཧཔཏི, སིཀྑིཏབྦཾ།
‘‘Tasmātiha te, gahapati, evaṃ sikkhitabbaṃ – ‘na cakkhusamphassaṃ upādiyissāmi, na ca me cakkhusamphassanissitaṃ viññāṇaṃ bhavissatī’ti. Evañhi te, gahapati, sikkhitabbaṃ. Tasmātiha te, gahapati, evaṃ sikkhitabbaṃ – ‘na sotasamphassaṃ upādiyissāmi… na ghānasamphassaṃ upādiyissāmi… na jivhāsamphassaṃ upādiyissāmi… na kāyasamphassaṃ upādiyissāmi… na manosamphassaṃ upādiyissāmi, na ca me manosamphassanissitaṃ viññāṇaṃ bhavissatī’ti. Evañhi te, gahapati, sikkhitabbaṃ.
‘‘ཏསྨཱཏིཧ ཏེ, གཧཔཏི, ཨེཝཾ སིཀྑིཏབྦཾ – ‘ན ཙཀྑུསམྥསྶཛཾ ཝེདནཾ ཨུཔཱདིཡིསྶཱམི, ན ཙ མེ ཙཀྑུསམྥསྶཛཱཝེདནཱནིསྶིཏཾ ཝིཉྙཱཎཾ བྷཝིསྶཏཱི’ཏི། ཨེཝཉྷི ཏེ, གཧཔཏི, སིཀྑིཏབྦཾ། ཏསྨཱཏིཧ ཏེ , གཧཔཏི, ཨེཝཾ སིཀྑིཏབྦཾ – ‘ན སོཏསམྥསྶཛཾ ཝེདནཾ ཨུཔཱདིཡིསྶཱམི… ན གྷཱནསམྥསྶཛཾ ཝེདནཾ ཨུཔཱདིཡིསྶཱམི… ན ཛིཝ྄ཧཱསམྥསྶཛཾ ཝེདནཾ ཨུཔཱདིཡིསྶཱམི… ན ཀཱཡསམྥསྶཛཾ ཝེདནཾ ཨུཔཱདིཡིསྶཱམི… ན མནོསམྥསྶཛཾ ཝེདནཾ ཨུཔཱདིཡིསྶཱམི, ན ཙ མེ མནོསམྥསྶཛཱཝེདནཱནིསྶིཏཾ ཝིཉྙཱཎཾ བྷཝིསྶཏཱི’ཏི། ཨེཝཉྷི ཏེ, གཧཔཏི, སིཀྑིཏབྦཾ།
‘‘Tasmātiha te, gahapati, evaṃ sikkhitabbaṃ – ‘na cakkhusamphassajaṃ vedanaṃ upādiyissāmi, na ca me cakkhusamphassajāvedanānissitaṃ viññāṇaṃ bhavissatī’ti. Evañhi te, gahapati, sikkhitabbaṃ. Tasmātiha te , gahapati, evaṃ sikkhitabbaṃ – ‘na sotasamphassajaṃ vedanaṃ upādiyissāmi… na ghānasamphassajaṃ vedanaṃ upādiyissāmi… na jivhāsamphassajaṃ vedanaṃ upādiyissāmi… na kāyasamphassajaṃ vedanaṃ upādiyissāmi… na manosamphassajaṃ vedanaṃ upādiyissāmi, na ca me manosamphassajāvedanānissitaṃ viññāṇaṃ bhavissatī’ti. Evañhi te, gahapati, sikkhitabbaṃ.
༣༨༦. ‘‘ཏསྨཱཏིཧ ཏེ, གཧཔཏི, ཨེཝཾ སིཀྑིཏབྦཾ – ‘ན པཐཝཱིདྷཱཏུཾ ཨུཔཱདིཡིསྶཱམི, ན ཙ མེ པཐཝཱིདྷཱཏུནིསྶིཏཾ ཝིཉྙཱཎཾ བྷཝིསྶཏཱི’ཏི། ཨེཝཉྷི ཏེ, གཧཔཏི, སིཀྑིཏབྦཾ། ཏསྨཱཏིཧ ཏེ, གཧཔཏི, ཨེཝཾ སིཀྑིཏབྦཾ – ‘ན ཨཱཔོདྷཱཏུཾ ཨུཔཱདིཡིསྶཱམི… ན ཏེཛོདྷཱཏུཾ ཨུཔཱདིཡིསྶཱམི… ན ཝཱཡོདྷཱཏུཾ ཨུཔཱདིཡིསྶཱམི… ན ཨཱཀཱསདྷཱཏུཾ ཨུཔཱདིཡིསྶཱམི… ན ཝིཉྙཱཎདྷཱཏུཾ ཨུཔཱདིཡིསྶཱམི, ན ཙ མེ ཝིཉྙཱཎདྷཱཏུནིསྶིཏཾ ཝིཉྙཱཎཾ བྷཝིསྶཏཱི’ཏི། ཨེཝཉྷི ཏེ, གཧཔཏི, སིཀྑིཏབྦཾ།
386. ‘‘Tasmātiha te, gahapati, evaṃ sikkhitabbaṃ – ‘na pathavīdhātuṃ upādiyissāmi, na ca me pathavīdhātunissitaṃ viññāṇaṃ bhavissatī’ti. Evañhi te, gahapati, sikkhitabbaṃ. Tasmātiha te, gahapati, evaṃ sikkhitabbaṃ – ‘na āpodhātuṃ upādiyissāmi… na tejodhātuṃ upādiyissāmi… na vāyodhātuṃ upādiyissāmi… na ākāsadhātuṃ upādiyissāmi… na viññāṇadhātuṃ upādiyissāmi, na ca me viññāṇadhātunissitaṃ viññāṇaṃ bhavissatī’ti. Evañhi te, gahapati, sikkhitabbaṃ.
‘‘ཏསྨཱཏིཧ ཏེ, གཧཔཏི, ཨེཝཾ སིཀྑིཏབྦཾ – ‘ན རཱུཔཾ ཨུཔཱདིཡིསྶཱམི, ན ཙ མེ རཱུཔནིསྶིཏཾ ཝིཉྙཱཎཾ བྷཝིསྶཏཱི’ཏི། ཨེཝཉྷི ཏེ, གཧཔཏི, སིཀྑིཏབྦཾ། ཏསྨཱཏིཧ ཏེ, གཧཔཏི, ཨེཝཾ སིཀྑིཏབྦཾ – ‘ན ཝེདནཾ ཨུཔཱདིཡིསྶཱམི… ན སཉྙཾ ཨུཔཱདིཡིསྶཱམི… ན སངྑཱརེ ཨུཔཱདིཡིསྶཱམི… ན ཝིཉྙཱཎཾ ཨུཔཱདིཡིསྶཱམི, ན ཙ མེ ཝིཉྙཱཎནིསྶིཏཾ ཝིཉྙཱཎཾ བྷཝིསྶཏཱི’ཏི། ཨེཝཉྷི ཏེ, གཧཔཏི, སིཀྑིཏབྦཾ།
‘‘Tasmātiha te, gahapati, evaṃ sikkhitabbaṃ – ‘na rūpaṃ upādiyissāmi, na ca me rūpanissitaṃ viññāṇaṃ bhavissatī’ti. Evañhi te, gahapati, sikkhitabbaṃ. Tasmātiha te, gahapati, evaṃ sikkhitabbaṃ – ‘na vedanaṃ upādiyissāmi… na saññaṃ upādiyissāmi… na saṅkhāre upādiyissāmi… na viññāṇaṃ upādiyissāmi, na ca me viññāṇanissitaṃ viññāṇaṃ bhavissatī’ti. Evañhi te, gahapati, sikkhitabbaṃ.
‘‘ཏསྨཱཏིཧ ཏེ, གཧཔཏི, ཨེཝཾ སིཀྑིཏབྦཾ – ‘ན ཨཱཀཱསཱནཉྩཱཡཏནཾ ཨུཔཱདིཡིསྶཱམི , ན ཙ མེ ཨཱཀཱསཱནཉྩཱཡཏནནིསྶིཏཾ ཝིཉྙཱཎཾ བྷཝིསྶཏཱི’ཏི ། ཨེཝཉྷི ཏེ, གཧཔཏི, སིཀྑིཏབྦཾ། ཏསྨཱཏིཧ ཏེ, གཧཔཏི, ཨེཝཾ སིཀྑིཏབྦཾ – ‘ན ཝིཉྙཱཎཉྩཱཡཏནཾ ཨུཔཱདིཡིསྶཱམི… ན ཨཱཀིཉྩཉྙཱཡཏནཾ ཨུཔཱདིཡིསྶཱམི… ན ནེཝསཉྙཱནཱསཉྙཱཡཏནཾ ཨུཔཱདིཡིསྶཱམི ན ཙ མེ ནེཝསཉྙཱནཱསཉྙཱཡཏནནིསྶིཏཾ ཝིཉྙཱཎཾ བྷཝིསྶཏཱི’ཏི། ཨེཝཉྷི ཏེ, གཧཔཏི, སིཀྑིཏབྦཾ།
‘‘Tasmātiha te, gahapati, evaṃ sikkhitabbaṃ – ‘na ākāsānañcāyatanaṃ upādiyissāmi , na ca me ākāsānañcāyatananissitaṃ viññāṇaṃ bhavissatī’ti . Evañhi te, gahapati, sikkhitabbaṃ. Tasmātiha te, gahapati, evaṃ sikkhitabbaṃ – ‘na viññāṇañcāyatanaṃ upādiyissāmi… na ākiñcaññāyatanaṃ upādiyissāmi… na nevasaññānāsaññāyatanaṃ upādiyissāmi na ca me nevasaññānāsaññāyatananissitaṃ viññāṇaṃ bhavissatī’ti. Evañhi te, gahapati, sikkhitabbaṃ.
‘‘ཏསྨཱཏིཧ ཏེ, གཧཔཏི, ཨེཝཾ སིཀྑིཏབྦཾ – ‘ན ཨིདྷལོཀཾ ཨུཔཱདིཡིསྶཱམི, ན ཙ མེ ཨིདྷལོཀནིསྶིཏཾ ཝིཉྙཱཎཾ བྷཝིསྶཏཱི’ཏི། ཨེཝཉྷི ཏེ, གཧཔཏི, སིཀྑིཏབྦཾ། ཏསྨཱཏིཧ ཏེ, གཧཔཏི, ཨེཝཾ སིཀྑིཏབྦཾ – ‘ན པརལོཀཾ ཨུཔཱདིཡིསྶཱམི, ན ཙ མེ པརལོཀནིསྶིཏཾ ཝིཉྙཱཎཾ བྷཝིསྶཏཱི’ཏི། ཨེཝཉྷི ཏེ, གཧཔཏི, སིཀྑིཏབྦཾ། ཏསྨཱཏིཧ ཏེ, གཧཔཏི, ཨེཝཾ སིཀྑིཏབྦཾ – ‘ཡམྤི མེ དིཊྛཾ སུཏཾ མུཏཾ ཝིཉྙཱཏཾ པཏྟཾ པརིཡེསིཏཾ ཨནུཔརིཡེསིཏཾ ཨནུཙརིཏཾ མནསཱ ཏམྤི ན ཨུཔཱདིཡིསྶཱམི, ན ཙ མེ ཏཾནིསྶིཏཾ ཝིཉྙཱཎཾ བྷཝིསྶཏཱི’ཏི། ཨེཝཉྷི ཏེ, གཧཔཏི, སིཀྑིཏབྦ’’ནྟི།
‘‘Tasmātiha te, gahapati, evaṃ sikkhitabbaṃ – ‘na idhalokaṃ upādiyissāmi, na ca me idhalokanissitaṃ viññāṇaṃ bhavissatī’ti. Evañhi te, gahapati, sikkhitabbaṃ. Tasmātiha te, gahapati, evaṃ sikkhitabbaṃ – ‘na paralokaṃ upādiyissāmi, na ca me paralokanissitaṃ viññāṇaṃ bhavissatī’ti. Evañhi te, gahapati, sikkhitabbaṃ. Tasmātiha te, gahapati, evaṃ sikkhitabbaṃ – ‘yampi me diṭṭhaṃ sutaṃ mutaṃ viññātaṃ pattaṃ pariyesitaṃ anupariyesitaṃ anucaritaṃ manasā tampi na upādiyissāmi, na ca me taṃnissitaṃ viññāṇaṃ bhavissatī’ti. Evañhi te, gahapati, sikkhitabba’’nti.
༣༨༧. ཨེཝཾ ཝུཏྟེ, ཨནཱཐཔིཎྜིཀོ གཧཔཏི པརོདི, ཨསྶཱུནི པཝཏྟེསི། ཨཐ ཁོ ཨཱཡསྨཱ ཨཱནནྡོ ཨནཱཐཔིཎྜིཀཾ གཧཔཏིཾ ཨེཏདཝོཙ – ‘‘ཨོལཱིཡསི ཁོ ཏྭཾ, གཧཔཏི, སཾསཱིདསི ཁོ ཏྭཾ, གཧཔཏཱི’’ཏི? ‘‘ནཱཧཾ, བྷནྟེ ཨཱནནྡ, ཨོལཱིཡཱམི, ནཔི སཾསཱིདཱམི; ཨཔི ཙ མེ དཱིགྷརཏྟཾ སཏྠཱ པཡིརུཔཱསིཏོ མནོབྷཱཝནཱིཡཱ ཙ བྷིཀྑཱུ; ན ཙ མེ ཨེཝརཱུཔཱི དྷམྨཱི ཀཐཱ སུཏཔུབྦཱ’’ཏི། ‘‘ན ཁོ, གཧཔཏི, གིཧཱིནཾ ཨོདཱཏཝསནཱནཾ ཨེཝརཱུཔཱི དྷམྨཱི ཀཐཱ པཊིབྷཱཏི; པབྦཛིཏཱནཾ ཁོ, གཧཔཏི, ཨེཝརཱུཔཱི དྷམྨཱི ཀཐཱ པཊིབྷཱཏཱི’’ཏི། ‘‘ཏེན ཧི, བྷནྟེ སཱརིཔུཏྟ, གིཧཱིནམྤི ཨོདཱཏཝསནཱནཾ ཨེཝརཱུཔཱི དྷམྨཱི ཀཐཱ པཊིབྷཱཏུ། སནྟི ཧི, བྷནྟེ, ཀུལཔུཏྟཱ ཨཔྤརཛཀྑཛཱཏིཀཱ, ཨསྶཝནཏཱ དྷམྨསྶ པརིཧཱཡནྟི; བྷཝིསྶནྟི དྷམྨསྶ ཨཉྙཱཏཱརོ’’ཏི།
387. Evaṃ vutte, anāthapiṇḍiko gahapati parodi, assūni pavattesi. Atha kho āyasmā ānando anāthapiṇḍikaṃ gahapatiṃ etadavoca – ‘‘olīyasi kho tvaṃ, gahapati, saṃsīdasi kho tvaṃ, gahapatī’’ti? ‘‘Nāhaṃ, bhante ānanda, olīyāmi, napi saṃsīdāmi; api ca me dīgharattaṃ satthā payirupāsito manobhāvanīyā ca bhikkhū; na ca me evarūpī dhammī kathā sutapubbā’’ti. ‘‘Na kho, gahapati, gihīnaṃ odātavasanānaṃ evarūpī dhammī kathā paṭibhāti; pabbajitānaṃ kho, gahapati, evarūpī dhammī kathā paṭibhātī’’ti. ‘‘Tena hi, bhante sāriputta, gihīnampi odātavasanānaṃ evarūpī dhammī kathā paṭibhātu. Santi hi, bhante, kulaputtā apparajakkhajātikā, assavanatā dhammassa parihāyanti; bhavissanti dhammassa aññātāro’’ti.
ཨཐ ཁོ ཨཱཡསྨཱ ཙ སཱརིཔུཏྟོ ཨཱཡསྨཱ ཙ ཨཱནནྡོ ཨནཱཐཔིཎྜིཀཾ གཧཔཏིཾ ཨིམིནཱ ཨོཝཱདེན ཨོཝདིཏྭཱ ཨུཊྛཱཡཱསནཱ པཀྐམིཾསུ། ཨཐ ཁོ ཨནཱཐཔིཎྜིཀོ གཧཔཏི, ཨཙིརཔཀྐནྟེ ཨཱཡསྨནྟེ ཙ སཱརིཔུཏྟེ ཨཱཡསྨནྟེ ཙ ཨཱནནྡེ , ཀཱལམཀཱསི ཏུསིཏཾ ཀཱཡཾ ཨུཔཔཛྫི། ཨཐ ཁོ ཨནཱཐཔིཎྜིཀོ དེཝཔུཏྟོ ཨབྷིཀྐནྟཱཡ རཏྟིཡཱ ཨབྷིཀྐནྟཝཎྞོ ཀེཝལཀཔྤཾ ཛེཏཝནཾ ཨོབྷཱསེཏྭཱ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ཨཊྛཱསི། ཨེཀམནྟཾ ཛྛིཏོ ཁོ ཨནཱཐཔིཎྜིཀོ དེཝཔུཏྟོ བྷགཝནྟཾ གཱཐཱཧི ཨཛ྄ཛྷབྷཱསི –
Atha kho āyasmā ca sāriputto āyasmā ca ānando anāthapiṇḍikaṃ gahapatiṃ iminā ovādena ovaditvā uṭṭhāyāsanā pakkamiṃsu. Atha kho anāthapiṇḍiko gahapati, acirapakkante āyasmante ca sāriputte āyasmante ca ānande , kālamakāsi tusitaṃ kāyaṃ upapajji. Atha kho anāthapiṇḍiko devaputto abhikkantāya rattiyā abhikkantavaṇṇo kevalakappaṃ jetavanaṃ obhāsetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ jṭhito kho anāthapiṇḍiko devaputto bhagavantaṃ gāthāhi ajjhabhāsi –
‘‘ཨིདཉྷི ཏཾ ཛེཏཝནཾ, ཨིསིསངྒྷནིསེཝིཏཾ།
‘‘Idañhi taṃ jetavanaṃ, isisaṅghanisevitaṃ;
ཨཱཝུཏྠཾ དྷམྨརཱཛེན, པཱིཏིསཉྫནནཾ མམ༎
Āvutthaṃ dhammarājena, pītisañjananaṃ mama.
‘‘ཀམྨཾ ཝིཛྫཱ ཙ དྷམྨོ ཙ, སཱིལཾ ཛཱིཝིཏམུཏྟམཾ།
‘‘Kammaṃ vijjā ca dhammo ca, sīlaṃ jīvitamuttamaṃ;
ཨེཏེན མཙྩཱ སུཛ྄ཛྷནྟི, ན གོཏྟེན དྷནེན ཝཱ༎
Etena maccā sujjhanti, na gottena dhanena vā.
‘‘ཏསྨཱ ཧི པཎྜིཏོ པོསོ, སམྤསྶཾ ཨཏྠམཏྟནོ།
‘‘Tasmā hi paṇḍito poso, sampassaṃ atthamattano;
ཡོནིསོ ཝིཙིནེ དྷམྨཾ, ཨེཝཾ ཏཏྠ ཝིསུཛ྄ཛྷཏི༎
Yoniso vicine dhammaṃ, evaṃ tattha visujjhati.
‘‘སཱརིཔུཏྟོཝ པཉྙཱཡ, སཱིལེན ཨུཔསམེན།
‘‘Sāriputtova paññāya, sīlena upasamena;
ཡོཔི པཱརངྒཏོ བྷིཀྑུ, ཨེཏཱཝཔརམོ སིཡཱ’’ཏི༎
Yopi pāraṅgato bhikkhu, etāvaparamo siyā’’ti.
ཨིདམཝོཙ ཨནཱཐཔིཎྜིཀོ དེཝཔུཏྟོ། སམནུཉྙོ སཏྠཱ ཨཧོསི། ཨཐ ཁོ ཨནཱཐཔིཎྜིཀོ དེཝཔུཏྟོ – ‘‘སམནུཉྙོ མེ སཏྠཱ’’ཏི བྷགཝནྟཾ ཨབྷིཝཱདེཏྭཱ པདཀྑིཎཾ ཀཏྭཱ ཏཏྠེཝནྟརདྷཱཡི།
Idamavoca anāthapiṇḍiko devaputto. Samanuñño satthā ahosi. Atha kho anāthapiṇḍiko devaputto – ‘‘samanuñño me satthā’’ti bhagavantaṃ abhivādetvā padakkhiṇaṃ katvā tatthevantaradhāyi.
༣༨༨. ཨཐ ཁོ བྷགཝཱ ཏསྶཱ རཏྟིཡཱ ཨཙྩཡེན བྷིཀྑཱུ ཨཱམནྟེསི – ‘‘ཨིམཾ, བྷིཀྑཝེ, རཏྟིཾ ཨཉྙཏརོ དེཝཔུཏྟོ ཨབྷིཀྐནྟཱཡ རཏྟིཡཱ ཨབྷིཀྐནྟཝཎྞོ ཀེཝལཀཔྤཾ ཛེཏཝནཾ ཨོབྷཱསེཏྭཱ ཡེནཱཧཾ ཏེནུཔསངྐམི; ཨུཔསངྐམིཏྭཱ མཾ ཨབྷིཝཱདེཏྭཱ ཨེཀམནྟཾ ཨཊྛཱསི། ཨེཀམནྟཾ ཋིཏོ ཁོ སོ དེཝཔུཏྟོ མཾ གཱཐཱཧི ཨཛ྄ཛྷབྷཱསི –
388. Atha kho bhagavā tassā rattiyā accayena bhikkhū āmantesi – ‘‘imaṃ, bhikkhave, rattiṃ aññataro devaputto abhikkantāya rattiyā abhikkantavaṇṇo kevalakappaṃ jetavanaṃ obhāsetvā yenāhaṃ tenupasaṅkami; upasaṅkamitvā maṃ abhivādetvā ekamantaṃ aṭṭhāsi. Ekamantaṃ ṭhito kho so devaputto maṃ gāthāhi ajjhabhāsi –
‘‘ཨིདཉྷི ཏཾ ཛེཏཝནཾ, ཨིསིསངྒྷནིསེཝིཏཾ།
‘‘Idañhi taṃ jetavanaṃ, isisaṅghanisevitaṃ;
ཨཱཝུཏྠཾ དྷམྨརཱཛེན, པཱིཏིསཉྫནནཾ མམ༎
Āvutthaṃ dhammarājena, pītisañjananaṃ mama.
‘‘ཀམྨཾ ཝིཛྫཱ ཙ དྷམྨོ ཙ, སཱིལཾ ཛཱིཝིཏམུཏྟམཾ།
‘‘Kammaṃ vijjā ca dhammo ca, sīlaṃ jīvitamuttamaṃ;
ཨེཏེན མཙྩཱ སུཛ྄ཛྷནྟི, ན གོཏྟེན དྷནེན ཝཱ༎
Etena maccā sujjhanti, na gottena dhanena vā.
‘‘ཏསྨཱ ཧི པཎྜིཏོ པོསོ, སམྤསྶཾ ཨཏྠམཏྟནོ།
‘‘Tasmā hi paṇḍito poso, sampassaṃ atthamattano;
ཡོནིསོ ཝིཙིནེ དྷམྨཾ, ཨེཝཾ ཏཏྠ ཝིསུཛ྄ཛྷཏི༎
Yoniso vicine dhammaṃ, evaṃ tattha visujjhati.
‘‘སཱརིཔུཏྟོཝ པཉྙཱཡ, སཱིལེན ཨུཔསམེན།
‘‘Sāriputtova paññāya, sīlena upasamena;
ཡོཔི པཱརངྒཏོ བྷིཀྑུ, ཨེཏཱཝཔརམོ སིཡཱ’’ཏི༎
Yopi pāraṅgato bhikkhu, etāvaparamo siyā’’ti.
‘‘ཨིདམཝོཙ , བྷིཀྑཝེ, སོ དེཝཔུཏྟོ། ‘སམནུཉྙོ མེ སཏྠཱ’ཏི མཾ ཨབྷིཝཱདེཏྭཱ པདཀྑིཎཾ ཀཏྭཱ ཏཏྠེཝནྟརདྷཱཡཱི’’ཏི།
‘‘Idamavoca , bhikkhave, so devaputto. ‘Samanuñño me satthā’ti maṃ abhivādetvā padakkhiṇaṃ katvā tatthevantaradhāyī’’ti.
ཨེཝཾ ཝུཏྟེ, ཨཱཡསྨཱ ཨཱནནྡོ བྷགཝནྟཾ ཨེཏདཝོཙ – ‘‘སོ ཧི ནཱུན སོ, བྷནྟེ, ཨནཱཐཔིཎྜིཀོ དེཝཔུཏྟོ བྷཝིསྶཏི། ཨནཱཐཔིཎྜིཀོ, བྷནྟེ, གཧཔཏི ཨཱཡསྨནྟེ སཱརིཔུཏྟེ ཨབྷིཔྤསནྣོ ཨཧོསཱི’’ཏི། ‘‘སཱདྷུ, སཱདྷུ, ཨཱནནྡ! ཡཱཝཏཀཾ ཁོ, ཨཱནནྡ, ཏཀྐཱཡ པཏྟབྦཾ, ཨནུཔྤཏྟཾ ཏཾ ཏཡཱ། ཨནཱཐཔིཎྜིཀོ སོ, ཨཱནནྡ, དེཝཔུཏྟོ’’ཏི།
Evaṃ vutte, āyasmā ānando bhagavantaṃ etadavoca – ‘‘so hi nūna so, bhante, anāthapiṇḍiko devaputto bhavissati. Anāthapiṇḍiko, bhante, gahapati āyasmante sāriputte abhippasanno ahosī’’ti. ‘‘Sādhu, sādhu, ānanda! Yāvatakaṃ kho, ānanda, takkāya pattabbaṃ, anuppattaṃ taṃ tayā. Anāthapiṇḍiko so, ānanda, devaputto’’ti.
ཨིདམཝོཙ བྷགཝཱ། ཨཏྟམནོ ཨཱཡསྨཱ ཨཱནནྡོ བྷགཝཏོ བྷཱསིཏཾ ཨབྷིནནྡཱིཏི།
Idamavoca bhagavā. Attamano āyasmā ānando bhagavato bhāsitaṃ abhinandīti.
ཨནཱཐཔིཎྜིཀོཝཱདསུཏྟཾ ནིཊྛིཏཾ པཋམཾ།
Anāthapiṇḍikovādasuttaṃ niṭṭhitaṃ paṭhamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༡. ཨནཱཐཔིཎྜིཀོཝཱདསུཏྟཝཎྞནཱ • 1. Anāthapiṇḍikovādasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༡. ཨནཱཐཔིཎྜིཀོཝཱདསུཏྟཝཎྞནཱ • 1. Anāthapiṇḍikovādasuttavaṇṇanā
