| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
অনত্তলক্খণসুত্তৰণ্ণনা
Anattalakkhaṇasuttavaṇṇanā
২০. আমন্তেসীতি আসাল়্হীপুণ্ণমদিৰসে ধম্মচক্কপ্পৰত্তনতো পট্ঠায অনুক্কমেন সোতাপত্তিফলে পতিট্ঠিতে অঞ্ঞাসিকোণ্ডঞ্ঞপ্পমুখে পঞ্চৰগ্গিযে ‘‘ইদানি তেসং আসৰক্খযায ধম্মং দেসেস্সামী’’তি পঞ্চমিযা পক্খস্স আমন্তেসি। অনত্তাতি অৰসৰত্তনট্ঠেন অসামিকট্ঠেন সুঞ্ঞতট্ঠেন অত্তপটিক্খেপট্ঠেনাতি এৰং চতূহি কারণেহি অনত্তা। তত্থ ‘‘উপ্পন্নং রূপং ঠিতিং মা পাপুণাতু, ঠানপ্পত্তং মা জীরতু, জরপ্পত্তং মা ভিজ্জতু, উদযব্বযেহি মা কিলমযতূ’’তি ন এত্থ কস্সচি ৰসীভাৰো অত্থি, স্ৰাযমস্স অৰসৰত্তনট্ঠো। সামিভূতস্স কস্সচি অভাৰো অসামিকট্ঠো। নিৰাসীকারকৰেদকঅধিট্ঠাযকৰিরহেন ততো সুঞ্ঞতা সুঞ্ঞতট্ঠো। পরপরিকপ্পিতঅত্তসভাৰাভাৰো এৰ অত্তপটিক্খেপট্ঠো। ইদানি অনত্ততংযেৰ ৰিভাৰেতুং ‘‘রূপঞ্চ হিদং ভিক্খৰে’’তিআদিমাহ। তত্থ অত্তা অভৰিস্সাতি কারকো ৰেদকো সযংৰসীতি এৰংভূতো অত্তা অভৰিস্সাতি অধিপ্পাযো। এৰঞ্হি সতি রূপস্স আবাধায সংৰত্তনং অযুজ্জমানকং সিযা। কামঞ্চেত্থ ‘‘যস্মা চ খো, ভিক্খৰে, রূপং অনত্তা, তস্মা রূপং আবাধায সংৰত্ততী’’তি রূপস্স অনত্ততায দুক্খতা ৰিভাৰিতা ৰিয দিস্সতি, তথাপি ‘‘যস্মা রূপং আবাধায সংৰত্ততি, তস্মা অনত্তা’’তি পাকটায সাবাধতায রূপস্স অত্তসারাভাৰো ৰিভাৰিতো, ততো এৰ চ ‘‘ন চ লব্ভতি রূপে ‘এৰং মে রূপং হোতু, এৰং মে রূপং মা অহোসী’তি’’ রূপে কস্সচি অনিস্সরতা তস্স চ অৰসৰত্তনাকারো দস্সিতো। ৰেদনাদীসুপি এসেৰ নযো।
20.Āmantesīti āsāḷhīpuṇṇamadivase dhammacakkappavattanato paṭṭhāya anukkamena sotāpattiphale patiṭṭhite aññāsikoṇḍaññappamukhe pañcavaggiye ‘‘idāni tesaṃ āsavakkhayāya dhammaṃ desessāmī’’ti pañcamiyā pakkhassa āmantesi. Anattāti avasavattanaṭṭhena asāmikaṭṭhena suññataṭṭhena attapaṭikkhepaṭṭhenāti evaṃ catūhi kāraṇehi anattā. Tattha ‘‘uppannaṃ rūpaṃ ṭhitiṃ mā pāpuṇātu, ṭhānappattaṃ mā jīratu, jarappattaṃ mā bhijjatu, udayabbayehi mā kilamayatū’’ti na ettha kassaci vasībhāvo atthi, svāyamassa avasavattanaṭṭho. Sāmibhūtassa kassaci abhāvo asāmikaṭṭho. Nivāsīkārakavedakaadhiṭṭhāyakavirahena tato suññatā suññataṭṭho. Paraparikappitaattasabhāvābhāvo eva attapaṭikkhepaṭṭho. Idāni anattataṃyeva vibhāvetuṃ ‘‘rūpañca hidaṃ bhikkhave’’tiādimāha. Tattha attā abhavissāti kārako vedako sayaṃvasīti evaṃbhūto attā abhavissāti adhippāyo. Evañhi sati rūpassa ābādhāya saṃvattanaṃ ayujjamānakaṃ siyā. Kāmañcettha ‘‘yasmā ca kho, bhikkhave, rūpaṃ anattā, tasmā rūpaṃ ābādhāya saṃvattatī’’ti rūpassa anattatāya dukkhatā vibhāvitā viya dissati, tathāpi ‘‘yasmā rūpaṃ ābādhāya saṃvattati, tasmā anattā’’ti pākaṭāya sābādhatāya rūpassa attasārābhāvo vibhāvito, tato eva ca ‘‘na ca labbhati rūpe ‘evaṃ me rūpaṃ hotu, evaṃ me rūpaṃ mā ahosī’ti’’ rūpe kassaci anissaratā tassa ca avasavattanākāro dassito. Vedanādīsupi eseva nayo.
২১. তং কিংমঞ্ঞথ ভিক্খৰেতি ইদং কস্মা আরদ্ধং? এত্তকেন ঠানেন অনত্তলক্খণমেৰ কথিতং, ন অনিচ্চদুক্খলক্খণানি, ইদানি তানি দস্সেত্ৰা সমোধানেত্ৰা তীণিপি লক্খণানি দস্সেতুং ইদমারদ্ধন্তি ৰেদিতব্বং। অনিচ্চং ভন্তেতি ভন্তে যস্মা হুত্ৰা ন হোতি, তস্মা অনিচ্চং। যস্মা পুব্বে অসন্তং পচ্চযসমৰাযেন হুত্ৰা উপ্পজ্জিত্ৰা পুন ভঙ্গুপগমনেন ন হোতি, তস্মা ন নিচ্চন্তি অনিচ্চং, অদ্ধুৰন্তি অধিপ্পাযো। অথ ৰা উপ্পাদৰযৰন্ততায তাৰকালিকতায ৰিপরিণামকোটিযা নিচ্চপ্পটিক্খেপতোতি ইমেহিপি কারণেহি অনিচ্চং। এত্থ খণে খণে উপ্পজ্জনৰসেন নিরুজ্ঝনৰসেন চ পৰত্তনতো উপ্পাদৰযৰন্ততা। তঙ্খণিকতায তাৰকালিকতা। ৰিপরিণামৰন্ততায ৰিপরিণামকোটি। রূপঞ্হি উপ্পাদাদিৰিকারাপজ্জনেন ৰিপরিণামন্তং ৰিনাসং পাপুণাতি। নিচ্চসভাৰাভাৰো এৰ নিচ্চপটিক্খেপো। অনিচ্চা হি ধম্মা, তেনেৰ অত্তনো অনিচ্চভাৰেন অত্থতো নিচ্চতং পটিক্খিপন্তি নাম।
21.Taṃ kiṃmaññatha bhikkhaveti idaṃ kasmā āraddhaṃ? Ettakena ṭhānena anattalakkhaṇameva kathitaṃ, na aniccadukkhalakkhaṇāni, idāni tāni dassetvā samodhānetvā tīṇipi lakkhaṇāni dassetuṃ idamāraddhanti veditabbaṃ. Aniccaṃ bhanteti bhante yasmā hutvā na hoti, tasmā aniccaṃ. Yasmā pubbe asantaṃ paccayasamavāyena hutvā uppajjitvā puna bhaṅgupagamanena na hoti, tasmā na niccanti aniccaṃ, addhuvanti adhippāyo. Atha vā uppādavayavantatāya tāvakālikatāya vipariṇāmakoṭiyā niccappaṭikkhepatoti imehipi kāraṇehi aniccaṃ. Ettha khaṇe khaṇe uppajjanavasena nirujjhanavasena ca pavattanato uppādavayavantatā. Taṅkhaṇikatāya tāvakālikatā. Vipariṇāmavantatāya vipariṇāmakoṭi. Rūpañhi uppādādivikārāpajjanena vipariṇāmantaṃ vināsaṃ pāpuṇāti. Niccasabhāvābhāvo eva niccapaṭikkhepo. Aniccā hi dhammā, teneva attano aniccabhāvena atthato niccataṃ paṭikkhipanti nāma.
দুক্খং ভন্তেতি ভন্তে পটিপীল়নাকারেন দুক্খং। উপ্পাদজরাভঙ্গৰসেন হি রূপস্স নিরন্তরং বাধতি, পটিপীল়নাকারেনস্স দুক্খতা। অথ ৰা সন্তাপট্ঠেন দুক্খমট্ঠেন দুক্খৰত্থুকট্ঠেন সুখপটিক্খেপট্ঠেন চাতি চতূহি কারণেহি দুক্খং। এত্থ চ সন্তাপো নাম দুক্খদুক্খতাদিৰসেন সন্তাপনং পরিদহনং। ততো এৰস্স দুস্সহতায দুক্খমতা। তিস্সন্নং দুক্খতানং সংসারদুক্খস্স চ অধিট্ঠানতায দুক্খৰত্থুকতা। সুখসভাৰাভাৰো এৰ সুখপটিক্খেপো। ৰিপরিণামধম্মন্তি জরায মরণেন চ ৰিপরিণামসভাৰং। কল্লং নূতি যুত্তং নু। তন্তি এৰং অনিচ্চং দুক্খং ৰিপরিণামধম্মং রূপং। এতং মমাতি তণ্হাগাহো মমঙ্কারভাৰতো। এসোহমস্মীতি মানগাহো অহঙ্কারভাৰতো। এসো মে অত্তাতি দিট্ঠিগাহো অত্তভাৰৰিপল্লাসগ্গাহতো। তণ্হাগাহো চেত্থ অট্ঠসততণ্হাৰিচরিতৰসেন, মানগাহো নৰৰিধমানৰসেন, দিট্ঠিগাহো দ্ৰাসট্ঠিদিট্ঠিৰসেন ৰেদিতব্বো। ইমেসং তিণ্ণং তণ্হামানদিট্ঠিগাহানং ৰসেন যুত্তং নু তং সমনুপস্সিতুন্তি ৰুত্তং হোতি।
Dukkhaṃ bhanteti bhante paṭipīḷanākārena dukkhaṃ. Uppādajarābhaṅgavasena hi rūpassa nirantaraṃ bādhati, paṭipīḷanākārenassa dukkhatā. Atha vā santāpaṭṭhena dukkhamaṭṭhena dukkhavatthukaṭṭhena sukhapaṭikkhepaṭṭhena cāti catūhi kāraṇehi dukkhaṃ. Ettha ca santāpo nāma dukkhadukkhatādivasena santāpanaṃ paridahanaṃ. Tato evassa dussahatāya dukkhamatā. Tissannaṃ dukkhatānaṃ saṃsāradukkhassa ca adhiṭṭhānatāya dukkhavatthukatā. Sukhasabhāvābhāvo eva sukhapaṭikkhepo. Vipariṇāmadhammanti jarāya maraṇena ca vipariṇāmasabhāvaṃ. Kallaṃ nūti yuttaṃ nu. Tanti evaṃ aniccaṃ dukkhaṃ vipariṇāmadhammaṃ rūpaṃ. Etaṃ mamāti taṇhāgāho mamaṅkārabhāvato. Esohamasmīti mānagāho ahaṅkārabhāvato. Eso me attāti diṭṭhigāho attabhāvavipallāsaggāhato. Taṇhāgāho cettha aṭṭhasatataṇhāvicaritavasena, mānagāho navavidhamānavasena, diṭṭhigāho dvāsaṭṭhidiṭṭhivasena veditabbo. Imesaṃ tiṇṇaṃ taṇhāmānadiṭṭhigāhānaṃ vasena yuttaṃ nu taṃ samanupassitunti vuttaṃ hoti.
ইতি ভগৰা অনিচ্চদুক্খৰসেন অনত্তলক্খণংযেৰ দস্সেসি। ভগৰা হি কত্থচি অনিচ্চৰসেন অনত্ততং দস্সেতি, কত্থচি দুক্খৰসেন, কত্থচি উভযৰসেন। তথা হি ‘‘চক্খু অত্তাতি যো ৰদেয্য, তং ন উপপজ্জতি, চক্খুস্স উপ্পাদোপি ৰযোপি পঞ্ঞাযতি। যস্স খো পন উপ্পাদোপি ৰযোপি পঞ্ঞাযতি, ‘অত্তা মে উপ্পজ্জতি চেৰ ৰেতি চা’তি ইচ্চস্স এৰমাগতং হোতি, তস্মা তং ন উপপজ্জতি। ‘চক্খু অত্তা’তি যো ৰদেয্য, ইতি চক্খু অনত্তা’’তি ইমস্মিঞ্চ ছছক্কসুত্তে (ম॰ নি॰ ৩.৪২২) অনিচ্চৰসেন অনত্ততং দস্সেসি। ‘‘রূপঞ্চ হিদং, ভিক্খৰে, অত্তা অভৰিস্স…পে॰… এৰং মে রূপং মা অহোসী’’তি ইমস্মিংযেৰ অনত্তলক্খণসুত্তে দুক্খৰসেন অনত্ততং দস্সেসি। ‘‘রূপং, ভিক্খৰে, অনিচ্চং, যদনিচ্চং তং দুক্খং, যং দুক্খং তদনত্তা, যদনত্তা, তং ‘নেতং মম, নেসোহমস্মি, ন মে সো অত্তা’তি এৰমেতং যথাভূতং সম্মপ্পঞ্ঞায দট্ঠব্ব’’ন্তি ইমস্মিং অরহন্তসুত্তে (সং॰ নি॰ ৩.৭৬-৭৭) উভযৰসেন অনত্ততং দস্সেসি। কস্মা? অনিচ্চং দুক্খঞ্চ পাকটং, অনত্তা অপাকটং। পরিভোগভাজনাদীসু হি ভিন্নেসু ‘‘অহো অনিচ্চ’’ন্তি ৰদন্তি, ‘‘অহো অনত্তা’’তি পন ৰত্তা নাম নত্থি। সরীরে গণ্ডপিল়কাসু ৰা উট্ঠিতাসু কণ্টকেন ৰা ৰিদ্ধা ‘‘অহো দুক্খ’’ন্তি ৰদন্তি, ‘‘অহো অনত্তা’’তি পন ৰত্তা নাম নত্থি। কস্মা? ইদঞ্হি অনত্তলক্খণং নাম অৰিভূতং দুদ্দসং দুপ্পঞ্ঞাপনং। তথা হি সরভঙ্গাদযোপি সত্থারো নাদ্দসংসু, কুতো পঞ্ঞাপনা, তেন নং ভগৰা অনিচ্চৰসেন ৰা দুক্খৰসেন ৰা উভযৰসেন ৰা দস্সেসি। তযিদং ইমস্মিম্পি তেপরিৰট্টে অনিচ্চদুক্খৰসেনেৰ দস্সিতং। ৰেদনাদীসুপি এসেৰ নযো।
Iti bhagavā aniccadukkhavasena anattalakkhaṇaṃyeva dassesi. Bhagavā hi katthaci aniccavasena anattataṃ dasseti, katthaci dukkhavasena, katthaci ubhayavasena. Tathā hi ‘‘cakkhu attāti yo vadeyya, taṃ na upapajjati, cakkhussa uppādopi vayopi paññāyati. Yassa kho pana uppādopi vayopi paññāyati, ‘attā me uppajjati ceva veti cā’ti iccassa evamāgataṃ hoti, tasmā taṃ na upapajjati. ‘Cakkhu attā’ti yo vadeyya, iti cakkhu anattā’’ti imasmiñca chachakkasutte (ma. ni. 3.422) aniccavasena anattataṃ dassesi. ‘‘Rūpañca hidaṃ, bhikkhave, attā abhavissa…pe… evaṃ me rūpaṃ mā ahosī’’ti imasmiṃyeva anattalakkhaṇasutte dukkhavasena anattataṃ dassesi. ‘‘Rūpaṃ, bhikkhave, aniccaṃ, yadaniccaṃ taṃ dukkhaṃ, yaṃ dukkhaṃ tadanattā, yadanattā, taṃ ‘netaṃ mama, nesohamasmi, na me so attā’ti evametaṃ yathābhūtaṃ sammappaññāya daṭṭhabba’’nti imasmiṃ arahantasutte (saṃ. ni. 3.76-77) ubhayavasena anattataṃ dassesi. Kasmā? Aniccaṃ dukkhañca pākaṭaṃ, anattā apākaṭaṃ. Paribhogabhājanādīsu hi bhinnesu ‘‘aho anicca’’nti vadanti, ‘‘aho anattā’’ti pana vattā nāma natthi. Sarīre gaṇḍapiḷakāsu vā uṭṭhitāsu kaṇṭakena vā viddhā ‘‘aho dukkha’’nti vadanti, ‘‘aho anattā’’ti pana vattā nāma natthi. Kasmā? Idañhi anattalakkhaṇaṃ nāma avibhūtaṃ duddasaṃ duppaññāpanaṃ. Tathā hi sarabhaṅgādayopi satthāro nāddasaṃsu, kuto paññāpanā, tena naṃ bhagavā aniccavasena vā dukkhavasena vā ubhayavasena vā dassesi. Tayidaṃ imasmimpi teparivaṭṭe aniccadukkhavaseneva dassitaṃ. Vedanādīsupi eseva nayo.
২২. তস্মাতিহাতি তস্মা ইচ্চেৰ ৰুত্তং। তি-কার হ-কারা নিপাতা, যস্মা ইমে পঞ্চক্খন্ধা অনিচ্চা দুক্খা অনত্তা, তস্মাতি অত্থো। যং কিঞ্চীতি অনৰসেসপরিযাদানমেতং। যন্তি হি সামঞ্ঞেন অনিযমদস্সনং, কিঞ্চীতি পকারতো ভেদং আমসিত্ৰা অনিযমদস্সনং। উভযেনপি অতীতং ৰা…পে॰… সন্তিকে ৰা অপ্পং ৰা বহুং ৰা যাদিসং ৰা তাদিসং ৰা নপুংসকনিদ্দেসারহং সব্বং ব্যাপেত্ৰা সঙ্গণ্হাতি, তস্মা অনৰসেসপরিযাদানমেতং ‘‘যং কিঞ্চী’’তি। এৰঞ্চ সতি অঞ্ঞেসুপি নপুংসকনিদ্দেসারহেসু পসঙ্গং দিস্ৰা তত্থ অধিপ্পেতত্থং অধিচ্চ পৰত্তনতো অতিপ্পসঙ্গস্স নিযমনত্থং ‘‘রূপ’’ন্তি ৰুত্তং। এৰং পদদ্ৰযেনপি রূপস্স অসেসপরিগ্গহো কতো হোতি। অথস্স অতীতাদিৰিভাগং আরভতি ‘‘অতীতানাগতপচ্চুপ্পন্ন’’ন্তিআদিনা। তঞ্হি কিঞ্চি অতীতং কিঞ্চি অনাগতাদিভেদন্তি। এস নযো ৰেদনাদীসুপি।
22.Tasmātihāti tasmā icceva vuttaṃ. Ti-kāra ha-kārā nipātā, yasmā ime pañcakkhandhā aniccā dukkhā anattā, tasmāti attho. Yaṃ kiñcīti anavasesapariyādānametaṃ. Yanti hi sāmaññena aniyamadassanaṃ, kiñcīti pakārato bhedaṃ āmasitvā aniyamadassanaṃ. Ubhayenapi atītaṃ vā…pe… santike vā appaṃ vā bahuṃ vā yādisaṃ vā tādisaṃ vā napuṃsakaniddesārahaṃ sabbaṃ byāpetvā saṅgaṇhāti, tasmā anavasesapariyādānametaṃ ‘‘yaṃ kiñcī’’ti. Evañca sati aññesupi napuṃsakaniddesārahesu pasaṅgaṃ disvā tattha adhippetatthaṃ adhicca pavattanato atippasaṅgassa niyamanatthaṃ ‘‘rūpa’’nti vuttaṃ. Evaṃ padadvayenapi rūpassa asesapariggaho kato hoti. Athassa atītādivibhāgaṃ ārabhati ‘‘atītānāgatapaccuppanna’’ntiādinā. Tañhi kiñci atītaṃ kiñci anāgatādibhedanti. Esa nayo vedanādīsupi.
তত্থ রূপং তাৰ অদ্ধাসন্ততিসমযখণৰসেন চতুধা অতীতং নাম হোতি, তথা অনাগতপচ্চুপ্পন্নং। তত্থ অদ্ধাৰসেন তাৰ একস্স একস্মিং ভৰে পটিসন্ধিতো পুব্বে অতীতং, চুতিতো উদ্ধমনাগতং, উভিন্নমন্তরে পচ্চুপ্পন্নং। সন্ততিৰসেন সভাগেকউতুসমুট্ঠানএকাহারসমউট্ঠানঞ্চ পুব্বাপরিযৰসেন ৰত্তমানম্পি পচ্চুপ্পন্নং, ততো পুব্বে ৰিসভাগউতুআহারসমুট্ঠানং অতীতং, পচ্ছা অনাগতং। চিত্তজং একৰীথিএকজৰনএকসমাপত্তিসমুট্ঠানং পচ্চুপ্পন্নং, ততো পুব্বে অতীতং, পচ্ছা অনাগতং। কম্মসমুট্ঠানস্স পাটিযেক্কং সন্ততিৰসেন অতীতাদিভেদো নত্থি। তেসংযেৰ পন উতুআহারচিত্তসমুট্ঠানানং উপত্থম্ভকৰসেন তস্স অতীতাদিভাৰো ৰেদিতব্বো। সমযৰসেন একমুহুত্তপুব্বণ্হসাযন্হরত্তিদিৰাদীসু সমযেসু সন্তানৰসেন পৰত্তমানং তংতংসমযৰন্তং রূপং পচ্চুপ্পন্নং নাম, ততো পুব্বে অতীতং, পচ্ছা অনাগতং। খণৰসেন উপ্পাদাদিক্খণত্তযপরিযাপন্নং পচ্চুপ্পন্নং, ততো পুব্বে অতীতং, পচ্ছা অনাগতং, ইদমেৰেত্থ নিপ্পরিযাযং, সেসা পরিযাযকথা।
Tattha rūpaṃ tāva addhāsantatisamayakhaṇavasena catudhā atītaṃ nāma hoti, tathā anāgatapaccuppannaṃ. Tattha addhāvasena tāva ekassa ekasmiṃ bhave paṭisandhito pubbe atītaṃ, cutito uddhamanāgataṃ, ubhinnamantare paccuppannaṃ. Santativasena sabhāgekautusamuṭṭhānaekāhārasamauṭṭhānañca pubbāpariyavasena vattamānampi paccuppannaṃ, tato pubbe visabhāgautuāhārasamuṭṭhānaṃ atītaṃ, pacchā anāgataṃ. Cittajaṃ ekavīthiekajavanaekasamāpattisamuṭṭhānaṃ paccuppannaṃ, tato pubbe atītaṃ, pacchā anāgataṃ. Kammasamuṭṭhānassa pāṭiyekkaṃ santativasena atītādibhedo natthi. Tesaṃyeva pana utuāhāracittasamuṭṭhānānaṃ upatthambhakavasena tassa atītādibhāvo veditabbo. Samayavasena ekamuhuttapubbaṇhasāyanharattidivādīsu samayesu santānavasena pavattamānaṃ taṃtaṃsamayavantaṃ rūpaṃ paccuppannaṃ nāma, tato pubbe atītaṃ, pacchā anāgataṃ. Khaṇavasena uppādādikkhaṇattayapariyāpannaṃ paccuppannaṃ, tato pubbe atītaṃ, pacchā anāgataṃ, idamevettha nippariyāyaṃ, sesā pariyāyakathā.
অজ্ঝত্তং ৰা বহিদ্ধা ৰাতি চক্খাদিপঞ্চৰিধং রূপং অত্তভাৰং অধিকিচ্চ পৰত্তত্তা অজ্ঝত্তং, সেসং ততো বাহিরত্তা বহিদ্ধা। অপিচ নিযকজ্ঝত্তম্পি ইধ অজ্ঝত্তং, পরপুগ্গলিকম্পি চ বহিদ্ধাতি ৰেদিতব্বং। ওল়ারিকং ৰা সুখুমং ৰাতি চক্খাদীনি নৰ, আপোধাতুৰজ্জা তিস্সো ধাতুযো চাতি দ্ৰাদসৰিধং রূপং ঘট্টনৰসেন গহেতব্বতো ওল়ারিকং, সেসং ততো ৰিপরীতত্তা সুখুমং। হীনং ৰা পণীতং ৰাতি এত্থ হীনপণীতভাৰো পরিযাযতো নিপ্পরিযাযতো চ। তত্থ অকনিট্ঠানং রূপতো সুদস্সীনং রূপং হীনং, তদেৰ সুদস্সানং রূপতো পণীতং। এৰং যাৰ নরকসত্তানং রূপং, তাৰ পরিযাযতো হীনপণীততা ৰেদিতব্বা। নিপ্পরিযাযতো পন যং আরম্মণং কত্ৰা অকুসলৰিপাকৰিঞ্ঞাণং উপ্পজ্জতি, তং হীনং অনিট্ঠভাৰতো। যং পন আরম্মণং কত্ৰা কুসলৰিপাকৰিঞ্ঞাণং উপ্পজ্জতি, তং পণীতং ইট্ঠভাৰতো। যথা হি অকুসলৰিপাকো সযং অনিট্ঠো অনিট্ঠে এৰ উপ্পজ্জতি, ন ইট্ঠে, এৰং কুসলৰিপাকোপি সযং ইট্ঠো ইট্ঠেযেৰ উপ্পজ্জতি, ন অনিট্ঠে। যং দূরে সন্তিকে ৰাতি যং সুখুমং, তদেৰ দুপ্পটিৰিজ্ঝসভাৰত্তা দূরে, ইতরং সুপ্পটিৰিজ্ঝসভাৰত্তা সন্তিকে। অপিচেত্থ ওকাসতোপি উপাদাযুপাদায দূরসন্তিকতা ৰেদিতব্বা। তং সব্বন্তি তং অতীতাদীহি পদেহি ৰিসুং নিদ্দিট্ঠং সব্বং রূপং। সম্মপ্পঞ্ঞায দট্ঠব্বন্তি সহৰিপস্সনায মগ্গপঞ্ঞায দট্ঠব্বং।
Ajjhattaṃvā bahiddhā vāti cakkhādipañcavidhaṃ rūpaṃ attabhāvaṃ adhikicca pavattattā ajjhattaṃ, sesaṃ tato bāhirattā bahiddhā. Apica niyakajjhattampi idha ajjhattaṃ, parapuggalikampi ca bahiddhāti veditabbaṃ. Oḷārikaṃ vā sukhumaṃ vāti cakkhādīni nava, āpodhātuvajjā tisso dhātuyo cāti dvādasavidhaṃ rūpaṃ ghaṭṭanavasena gahetabbato oḷārikaṃ, sesaṃ tato viparītattā sukhumaṃ. Hīnaṃ vā paṇītaṃ vāti ettha hīnapaṇītabhāvo pariyāyato nippariyāyato ca. Tattha akaniṭṭhānaṃ rūpato sudassīnaṃ rūpaṃ hīnaṃ, tadeva sudassānaṃ rūpato paṇītaṃ. Evaṃ yāva narakasattānaṃ rūpaṃ, tāva pariyāyato hīnapaṇītatā veditabbā. Nippariyāyato pana yaṃ ārammaṇaṃ katvā akusalavipākaviññāṇaṃ uppajjati, taṃ hīnaṃ aniṭṭhabhāvato. Yaṃ pana ārammaṇaṃ katvā kusalavipākaviññāṇaṃ uppajjati, taṃ paṇītaṃ iṭṭhabhāvato. Yathā hi akusalavipāko sayaṃ aniṭṭho aniṭṭhe eva uppajjati, na iṭṭhe, evaṃ kusalavipākopi sayaṃ iṭṭho iṭṭheyeva uppajjati, na aniṭṭhe. Yaṃ dūre santike vāti yaṃ sukhumaṃ, tadeva duppaṭivijjhasabhāvattā dūre, itaraṃ suppaṭivijjhasabhāvattā santike. Apicettha okāsatopi upādāyupādāya dūrasantikatā veditabbā. Taṃ sabbanti taṃ atītādīhi padehi visuṃ niddiṭṭhaṃ sabbaṃ rūpaṃ. Sammappaññāya daṭṭhabbanti sahavipassanāya maggapaññāya daṭṭhabbaṃ.
যা কাচি ৰেদনাতিআদীসু পন সন্ততিৰসেন চ খণৰসেন চ ৰেদনায অতীতানাগতপচ্চুপ্পন্নভাৰো ৰেদিতব্বো। তত্থ (ৰিসুদ্ধি॰ ২.৪৯৭ আদযো) সন্ততিৰসেন একৰীথিএকজৰনএকসমাপত্তিপরিযাপন্না একৰিধৰিসযসমাযোগপ্পৰত্তা চ দিৰসম্পি বুদ্ধরূপং পস্সন্তস্স ধম্মং সুণন্তস্স পৰত্তসদ্ধাদিসহিতৰেদনা পচ্চুপ্পন্না, ততো পুব্বে অতীতা, পচ্ছা অনাগতা। খণৰসেন খণত্তযপরিযাপন্না পচ্চুপ্পন্না, ততো পুব্বে অতীতা, পচ্ছা অনাগতা। অজ্ঝত্তবহিদ্ধাভেদো নিযকজ্ঝত্তৰসেন ৰেদিতব্বো। ওল়ারিকসুখুমভেদো ‘‘অকুসলা ৰেদনা ওল়ারিকা, কুসলাব্যাকতা ৰেদনা সুখুমা’’তিআদিনা নযেন ৰিভঙ্গে (ৰিভ॰ ১১) ৰুত্তেন জাতিসভাৰপুগ্গললোকিযলোকুত্তরৰসেন ৰেদিতব্বো। জাতিৰসেন তাৰ অকুসলৰেদনা সাৰজ্জকিরিযহেতুতো কিলেসসন্তাপসভাৰতো চ অৰূপসন্তৰুত্তীতি কুসলৰেদনায ওল়ারিকা, সব্যাপারতো সউস্সাহতো সৰিপাকতো কিলেসসন্তাপসভাৰতো সাৰজ্জতো চ ৰিপাকাব্যাকতায ওল়ারিকা, সৰিপাকতো কিলেসসন্তাপসভাৰতো সব্যাপজ্জতো সাৰজ্জতো চ কিরিযাব্যাকতায ওল়ারিকা, কুসলাব্যাকতা পন ৰুত্তৰিপরিযাযতো অকুসলায সুখুমা। দ্ৰেপি কুসলাকুসলৰেদনা সব্যাপারতো সউস্সাহতো সৰিপাকতো চ যথাযোগং দুৰিধাযপি অব্যাকতায ওল়ারিকা, ৰুত্তৰিপরিযাযেন দুৰিধাপি অব্যাকতা তাহি সুখুমা। এৰং তাৰ জাতিৰসেন ওল়ারিকসুখুমতা ৰেদিতব্বা।
Yākāci vedanātiādīsu pana santativasena ca khaṇavasena ca vedanāya atītānāgatapaccuppannabhāvo veditabbo. Tattha (visuddhi. 2.497 ādayo) santativasena ekavīthiekajavanaekasamāpattipariyāpannā ekavidhavisayasamāyogappavattā ca divasampi buddharūpaṃ passantassa dhammaṃ suṇantassa pavattasaddhādisahitavedanā paccuppannā, tato pubbe atītā, pacchā anāgatā. Khaṇavasena khaṇattayapariyāpannā paccuppannā, tato pubbe atītā, pacchā anāgatā. Ajjhattabahiddhābhedo niyakajjhattavasena veditabbo. Oḷārikasukhumabhedo ‘‘akusalā vedanā oḷārikā, kusalābyākatā vedanā sukhumā’’tiādinā nayena vibhaṅge (vibha. 11) vuttena jātisabhāvapuggalalokiyalokuttaravasena veditabbo. Jātivasena tāva akusalavedanā sāvajjakiriyahetuto kilesasantāpasabhāvato ca avūpasantavuttīti kusalavedanāya oḷārikā, sabyāpārato saussāhato savipākato kilesasantāpasabhāvato sāvajjato ca vipākābyākatāya oḷārikā, savipākato kilesasantāpasabhāvato sabyāpajjato sāvajjato ca kiriyābyākatāya oḷārikā, kusalābyākatā pana vuttavipariyāyato akusalāya sukhumā. Dvepi kusalākusalavedanā sabyāpārato saussāhato savipākato ca yathāyogaṃ duvidhāyapi abyākatāya oḷārikā, vuttavipariyāyena duvidhāpi abyākatā tāhi sukhumā. Evaṃ tāva jātivasena oḷārikasukhumatā veditabbā.
সভাৰৰসেন পন দুক্খৰেদনা নিরস্সাদতো সৰিপ্ফারতো উব্বেজনীযতো অভিভৰনতো চ ইতরাহি দ্ৰীহি ওল়ারিকা, ইতরা পন দ্ৰে সাততো সন্ততো পণীততো মনাপতো মজ্ঝত্ততো চ যথাযোগং দুক্খায সুখুমা। উভো পন সুখদুক্খা সৰিপ্ফারতো খোভকরণতো পাকটতো চ অদুক্খমসুখায ওল়ারিকা, সা ৰুত্তৰিপরিযাযেন তদুভযতো সুখুমা। এৰং সভাৰৰসেন ওল়ারিকসুখুমতা ৰেদিতব্বা। পুগ্গলৰসেন পন অসমাপন্নস্স ৰেদনা নানারম্মণৰিক্খিত্তভাৰতো সমাপন্নস্স ৰেদনায ওল়ারিকা, ৰিপরিযাযেন ইতরা সুখুমা। এৰং পুগ্গলৰসেন ওল়ারিকসুখুমতা ৰেদিতব্বা। লোকিযলোকুত্তরৰসেন পন সাসৰা ৰেদনা লোকিযা। সা আসৰুপ্পত্তিহেতুতো ওঘনিযতো যোগনিযতো গন্থনিযতো নীৰরণিযতো উপাদানিযতো সংকিলেসিকতো পুথুজ্জনসাধারণতো চ অনাসৰায ওল়ারিকা, সা ৰিপরিযাযেন সাসৰায সুখুমা। এৰং লোকিযলোকুত্তরৰসেন ওল়ারিকসুখুমতা ৰেদিতব্বা।
Sabhāvavasena pana dukkhavedanā nirassādato savipphārato ubbejanīyato abhibhavanato ca itarāhi dvīhi oḷārikā, itarā pana dve sātato santato paṇītato manāpato majjhattato ca yathāyogaṃ dukkhāya sukhumā. Ubho pana sukhadukkhā savipphārato khobhakaraṇato pākaṭato ca adukkhamasukhāya oḷārikā, sā vuttavipariyāyena tadubhayato sukhumā. Evaṃ sabhāvavasena oḷārikasukhumatā veditabbā. Puggalavasena pana asamāpannassa vedanā nānārammaṇavikkhittabhāvato samāpannassa vedanāya oḷārikā, vipariyāyena itarā sukhumā. Evaṃ puggalavasena oḷārikasukhumatā veditabbā. Lokiyalokuttaravasena pana sāsavā vedanā lokiyā. Sā āsavuppattihetuto oghaniyato yoganiyato ganthaniyato nīvaraṇiyato upādāniyato saṃkilesikato puthujjanasādhāraṇato ca anāsavāya oḷārikā, sā vipariyāyena sāsavāya sukhumā. Evaṃ lokiyalokuttaravasena oḷārikasukhumatā veditabbā.
তত্থ জাতিআদিৰসেন সম্ভেদো পরিহরিতব্বো। অকুসলৰিপাককাযৰিঞ্ঞাণসম্পযুত্তা হি ৰেদনা জাতিৰসেন অব্যাকতত্তা সুখুমাপি সমানা সভাৰাদিৰসেন ওল়ারিকা হোতি। ৰুত্তঞ্হেতং ‘‘অব্যাকতা ৰেদনা সুখুমা, দুক্খা ৰেদনা ওল়ারিকা। অসমাপন্নস্স ৰেদনা ওল়ারিকা, সাসৰা ৰেদনা ওল়ারিকা’’তি (ৰিভ॰ ১১)। যথা চ দুক্খৰেদনা, এৰং সুখাদযোপি জাতিৰসেন ওল়ারিকা, সভাৰাদিৰসেন সুখুমা হোন্তি। তস্মা যথা জাতিআদিৰসেন সম্ভেদো ন হোতি, তথা ৰেদনানং ওল়ারিকসুখুমতা ৰেদিতব্বা। সেয্যথিদং – অব্যাকতা জাতিৰসেন কুসলাকুসলাহি সুখুমা। ন তত্থ ‘‘কতমা অব্যাকতা, কিং দুক্খা, কিং সুখা, কিং সমাপন্নস্স, কিং অসমাপন্নস্স, কিং সাসৰা, কিং অনাসৰা’’তি এৰং সভাৰাদিভেদো পরামসিতব্বো। এস নযো সব্বত্থ।
Tattha jātiādivasena sambhedo pariharitabbo. Akusalavipākakāyaviññāṇasampayuttā hi vedanā jātivasena abyākatattā sukhumāpi samānā sabhāvādivasena oḷārikā hoti. Vuttañhetaṃ ‘‘abyākatā vedanā sukhumā, dukkhā vedanā oḷārikā. Asamāpannassa vedanā oḷārikā, sāsavā vedanā oḷārikā’’ti (vibha. 11). Yathā ca dukkhavedanā, evaṃ sukhādayopi jātivasena oḷārikā, sabhāvādivasena sukhumā honti. Tasmā yathā jātiādivasena sambhedo na hoti, tathā vedanānaṃ oḷārikasukhumatā veditabbā. Seyyathidaṃ – abyākatā jātivasena kusalākusalāhi sukhumā. Na tattha ‘‘katamā abyākatā, kiṃ dukkhā, kiṃ sukhā, kiṃ samāpannassa, kiṃ asamāpannassa, kiṃ sāsavā, kiṃ anāsavā’’ti evaṃ sabhāvādibhedo parāmasitabbo. Esa nayo sabbattha.
অপিচ ‘‘তং তং ৰা পন ৰেদনং উপাদাযুপাদায ৰেদনা ওল়ারিকা সুখুমা দট্ঠব্বা’’তি ৰচনতো অকুসলাদীসুপি লোভসহগতায দোসসহগতৰেদনা অগ্গি ৰিয অত্তনো নিস্সযদহনতো ওল়ারিকা, লোভসহগতা সুখুমা। দোসসহগতাপি নিযতা ওল়ারিকা, অনিযতা সুখুমা। নিযতাপি কপ্পট্ঠিতিকা ওল়ারিকা, ইতরা সুখুমা। কপ্পট্ঠিতিকাসুপি অসঙ্খারিকা ওল়ারিকা, ইতরা সুখুমা। লোভসহগতা পন দিট্ঠিসম্পযুত্তা ওল়ারিকা, ইতরা সুখুমা। সাপি নিযতা কপ্পট্ঠিতিকা অসঙ্খারিকা ওল়ারিকা, ইতরা সুখুমা, অৰিসেসেন অকুসলা বহুৰিপাকা ওল়ারিকা, অপ্পৰিপাকা সুখুমা। কুসলা পন অপ্পৰিপাকা ওল়ারিকা, বহুৰিপাকা সুখুমা।
Apica ‘‘taṃ taṃ vā pana vedanaṃ upādāyupādāya vedanā oḷārikā sukhumā daṭṭhabbā’’ti vacanato akusalādīsupi lobhasahagatāya dosasahagatavedanā aggi viya attano nissayadahanato oḷārikā, lobhasahagatā sukhumā. Dosasahagatāpi niyatā oḷārikā, aniyatā sukhumā. Niyatāpi kappaṭṭhitikā oḷārikā, itarā sukhumā. Kappaṭṭhitikāsupi asaṅkhārikā oḷārikā, itarā sukhumā. Lobhasahagatā pana diṭṭhisampayuttā oḷārikā, itarā sukhumā. Sāpi niyatā kappaṭṭhitikā asaṅkhārikā oḷārikā, itarā sukhumā, avisesena akusalā bahuvipākā oḷārikā, appavipākā sukhumā. Kusalā pana appavipākā oḷārikā, bahuvipākā sukhumā.
অপিচ কামাৰচরকুসলা ওল়ারিকা, রূপাৰচরা সুখুমা, ততো অরূপাৰচরা, ততো লোকুত্তরা। কামাৰচরা চ দানমযা ওল়ারিকা, সীলমযা সুখুমা, ততো ভাৰনামযা। ভাৰনামযাপি দুহেতুকা ওল়ারিকা , তিহেতুকা সুখুমা। তিহেতুকাপি সসঙ্খারিকা ওল়ারিকা, অসঙ্খারিকা সুখুমা। রূপাৰচরা পঠমজ্ঝানিকা ওল়ারিকা…পে॰… পঞ্চমজ্ঝানিকা সুখুমাৰ। অরূপাৰচরা আকাসানঞ্চাযতনসম্পযুত্তা ওল়ারিকা…পে॰… নেৰসঞ্ঞানাসঞ্ঞাযতনসম্পযুত্তা সুখুমাৰ। লোকুত্তরা চ সোতাপত্তিমগ্গসম্পযুত্তা ওল়ারিকা…পে॰… অরহত্তমগ্গসম্পযুত্তা সুখুমাৰ। এস নযো তংতংভূমিৰিপাককিরিযৰেদনাসু দুক্খাদিঅসমাপন্নাদিসাসৰাদিৰসেন ৰুত্তৰেদনাসু চ।
Apica kāmāvacarakusalā oḷārikā, rūpāvacarā sukhumā, tato arūpāvacarā, tato lokuttarā. Kāmāvacarā ca dānamayā oḷārikā, sīlamayā sukhumā, tato bhāvanāmayā. Bhāvanāmayāpi duhetukā oḷārikā , tihetukā sukhumā. Tihetukāpi sasaṅkhārikā oḷārikā, asaṅkhārikā sukhumā. Rūpāvacarā paṭhamajjhānikā oḷārikā…pe… pañcamajjhānikā sukhumāva. Arūpāvacarā ākāsānañcāyatanasampayuttā oḷārikā…pe… nevasaññānāsaññāyatanasampayuttā sukhumāva. Lokuttarā ca sotāpattimaggasampayuttā oḷārikā…pe… arahattamaggasampayuttā sukhumāva. Esa nayo taṃtaṃbhūmivipākakiriyavedanāsu dukkhādiasamāpannādisāsavādivasena vuttavedanāsu ca.
ওকাসৰসেন চাপি নিরযে দুক্খা ওল়ারিকা, তিরচ্ছানযোনিযং সুখুমা…পে॰… পরনিম্মিতৰসৰত্তী সুখুমাৰ। যথা চ দুক্খা, এৰং সুখাপি সব্বত্থ যথানুরূপং যোজেতব্বা। ৰত্থুৰসেন চাপি হীনৰত্থুকা যা কাচি ৰেদনা ওল়ারিকা, পণীতৰত্থুকা সুখুমা। হীনপ্পণীতভেদে যা ওল়ারিকা, সা হীনা। যা চ সুখুমা, সা পণীতাতি ৰেদিতব্বা। দূরপদং পন অকুসলা ৰেদনা কুসলাব্যাকতাহি ৰেদনাহি দূরে, সন্তিকপদং অকুসলা ৰেদনা অকুসলায ৰেদনায সন্তিকেতিআদিনা নযেন ৰিভত্তং। তস্মা অকুসলা ৰেদনা ৰিসভাগতো অসংসট্ঠতো অসরিক্খতো চ কুসলাব্যাকতাহি দূরে, তথা কুসলাব্যাকতা অকুসলায। এস নযো সব্বৰারেসু। অকুসলা পন ৰেদনা সভাগতো চ সংসট্ঠতো চ সরিক্খতো চ অকুসলায সন্তিকেতি। তংতংৰেদনাসম্পযুত্তানং পন সঞ্ঞাদীনম্পি এৰমেৰ ৰেদিতব্বং।
Okāsavasena cāpi niraye dukkhā oḷārikā, tiracchānayoniyaṃ sukhumā…pe… paranimmitavasavattī sukhumāva. Yathā ca dukkhā, evaṃ sukhāpi sabbattha yathānurūpaṃ yojetabbā. Vatthuvasena cāpi hīnavatthukā yā kāci vedanā oḷārikā, paṇītavatthukā sukhumā. Hīnappaṇītabhede yā oḷārikā, sā hīnā. Yā ca sukhumā, sā paṇītāti veditabbā. Dūrapadaṃ pana akusalā vedanā kusalābyākatāhi vedanāhi dūre, santikapadaṃ akusalā vedanā akusalāya vedanāya santiketiādinā nayena vibhattaṃ. Tasmā akusalā vedanā visabhāgato asaṃsaṭṭhato asarikkhato ca kusalābyākatāhi dūre, tathā kusalābyākatā akusalāya. Esa nayo sabbavāresu. Akusalā pana vedanā sabhāgato ca saṃsaṭṭhato ca sarikkhato ca akusalāya santiketi. Taṃtaṃvedanāsampayuttānaṃ pana saññādīnampi evameva veditabbaṃ.
২৩. সুতৰাতি আগমাধিগমসঙ্খাতেন বাহুসচ্চেন সমন্নাগতত্তা সুতৰা। নিব্বিন্দতীতি উক্কণ্ঠতি। এত্থ চ নিব্বিদাতি ৰুট্ঠানগামিনীৰিপস্সনা অধিপ্পেতা। নিব্বিন্দং ৰিরজ্জতীতি এত্থ ৰিরাগৰসেন চত্তারো মগ্গা কথিতা। ৰিরাগা ৰিমুচ্চতীতি ৰিরাগেন মগ্গেনেৰ হেতুভূতেন পটিপ্পস্সদ্ধিৰিমুত্তিৰসেন ৰিমুচ্চতি। ইমিনা চত্তারি সামঞ্ঞফলানি কথিতানি। ৰিমুত্তস্মিং ৰিমুত্তমিতি ঞাণং হোতীতি ইমিনা পন পচ্চৰেক্খণঞাণং কথিতং। খীণা জাতীতিআদীহি তস্স ভূমি। তেন হি ঞাণেন অরিযসাৰকো পচ্চৰেক্খন্তো ‘‘খীণা জাতী’’তিআদীনি পজানাতি। কতমা পনস্স জাতি খীণা, কথঞ্চ নং পজানাতীতি? ন তাৰস্স অতীতা জাতি খীণা পুব্বেৰ খীণত্তা, ন অনাগতা অনাগতে ৰাযামাভাৰতো, ন পচ্চুপ্পন্না। যা পন মগ্গস্স অভাৰিতত্তা উপ্পজ্জেয্য একচতুপঞ্চৰোকারভৰেসু একচতুপঞ্চক্খন্ধপ্পভেদা জাতি, সা মগ্গস্স ভাৰিতত্তা অনুপ্পাদধম্মতং আপজ্জনেন খীণা, তং সো মগ্গভাৰনায পহীনকিলেসে পচ্চৰেক্খিত্ৰা কিলেসাভাৰে ৰিজ্জমানম্পি কম্মং আযতিং অপ্পটিসন্ধিকং হোতীতি জানন্তো পজানাতি।
23.Sutavāti āgamādhigamasaṅkhātena bāhusaccena samannāgatattā sutavā. Nibbindatīti ukkaṇṭhati. Ettha ca nibbidāti vuṭṭhānagāminīvipassanā adhippetā. Nibbindaṃ virajjatīti ettha virāgavasena cattāro maggā kathitā. Virāgā vimuccatīti virāgena maggeneva hetubhūtena paṭippassaddhivimuttivasena vimuccati. Iminā cattāri sāmaññaphalāni kathitāni. Vimuttasmiṃ vimuttamiti ñāṇaṃ hotīti iminā pana paccavekkhaṇañāṇaṃ kathitaṃ. Khīṇā jātītiādīhi tassa bhūmi. Tena hi ñāṇena ariyasāvako paccavekkhanto ‘‘khīṇā jātī’’tiādīni pajānāti. Katamā panassa jāti khīṇā, kathañca naṃ pajānātīti? Na tāvassa atītā jāti khīṇā pubbeva khīṇattā, na anāgatā anāgate vāyāmābhāvato, na paccuppannā. Yā pana maggassa abhāvitattā uppajjeyya ekacatupañcavokārabhavesu ekacatupañcakkhandhappabhedā jāti, sā maggassa bhāvitattā anuppādadhammataṃ āpajjanena khīṇā, taṃ so maggabhāvanāya pahīnakilese paccavekkhitvā kilesābhāve vijjamānampi kammaṃ āyatiṃ appaṭisandhikaṃ hotīti jānanto pajānāti.
ৰুসিতন্তি ৰুত্থং পরিৰুত্থং, কতং চরিতং নিট্ঠিতন্তি অত্থো। ব্রহ্মচরিযন্তি মগ্গব্রহ্মচরিযং। পুথুজ্জনকল্যাণকেন হি সদ্ধিং সত্ত সেক্খা মগ্গব্রহ্মচরিযং ৰসন্তি নাম, খীণাসৰো ৰুত্থৰাসো, তস্মা অরিযসাৰকো অত্তনো ব্রহ্মচরিযৰাসং পচ্চৰেক্খন্তো ‘‘ৰুসিতং ব্রহ্মচরিয’’ন্তি পজানাতি। কতং করণীযন্তি চতূসু সচ্চেসু চতূহি মগ্গেহি পরিঞ্ঞাপহানসচ্ছিকিরিযাভাৰনাৰসেন সোল়সৰিধম্পি কিচ্চং নিট্ঠাপিতন্তি অত্থো। পুথুজ্জনকল্যাণকাদযো হি তং কিচ্চং করোন্তি, খীণাসৰো কতকরণীযো। তস্মা অরিযসাৰকো অত্তনো করণীযং পচ্চৰেক্খন্তো ‘‘কতং করণীয’’ন্তি পজানাতি। নাপরং ইত্থত্তাযাতি ইদানি পুন ইত্থভাৰায এৰংসোল়সকিচ্চভাৰায, কিলেসক্খযায ৰা মগ্গভাৰনাকিচ্চং মে নত্থীতি পজানাতি। অথ ৰা ইত্থত্তাযাতি ইত্থভাৰা ইমস্মা এৰংপকারা ইদানি ৰত্তমানক্খন্ধসন্তানা অপরং খন্ধসন্তানং ময্হং নত্থি, ইমে পন পঞ্চক্খন্ধা পরিঞ্ঞাতা তিট্ঠন্তি ছিন্নমূলকা রুক্খা ৰিয। তে চরিমকৰিঞ্ঞাণনিরোধেন অনুপাদানো ৰিয জাতৰেদো নিব্বাযিস্সন্তীতি পজানাতি।
Vusitanti vutthaṃ parivutthaṃ, kataṃ caritaṃ niṭṭhitanti attho. Brahmacariyanti maggabrahmacariyaṃ. Puthujjanakalyāṇakena hi saddhiṃ satta sekkhā maggabrahmacariyaṃ vasanti nāma, khīṇāsavo vutthavāso, tasmā ariyasāvako attano brahmacariyavāsaṃ paccavekkhanto ‘‘vusitaṃ brahmacariya’’nti pajānāti. Kataṃ karaṇīyanti catūsu saccesu catūhi maggehi pariññāpahānasacchikiriyābhāvanāvasena soḷasavidhampi kiccaṃ niṭṭhāpitanti attho. Puthujjanakalyāṇakādayo hi taṃ kiccaṃ karonti, khīṇāsavo katakaraṇīyo. Tasmā ariyasāvako attano karaṇīyaṃ paccavekkhanto ‘‘kataṃ karaṇīya’’nti pajānāti. Nāparaṃ itthattāyāti idāni puna itthabhāvāya evaṃsoḷasakiccabhāvāya, kilesakkhayāya vā maggabhāvanākiccaṃ me natthīti pajānāti. Atha vā itthattāyāti itthabhāvā imasmā evaṃpakārā idāni vattamānakkhandhasantānā aparaṃ khandhasantānaṃ mayhaṃ natthi, ime pana pañcakkhandhā pariññātā tiṭṭhanti chinnamūlakā rukkhā viya. Te carimakaviññāṇanirodhena anupādāno viya jātavedo nibbāyissantīti pajānāti.
২৪. অত্তমনা তে ভিক্খূ ভগৰতো ভাসিতং অভিনন্দুন্তি তে ভিক্খূ সকমনা তুট্ঠমনা, পীতিসোমনস্সেহি ৰা সমত্তমনা হুত্ৰা করৰীকরুতমঞ্জুনা কণ্ণসুখেন পণ্ডিতজনহদযানং অমতাভিসেকসদিসেন ব্রহ্মস্সরেন ভাসতো ভগৰতো ৰচনং সুকথিতং সুলপিতং ‘‘এৰমেতং ভগৰা, এৰমেতং সুগতা’’তি মত্থকেন সম্পটিচ্ছন্তা অনুমোদিংসু চেৰ সম্পটিচ্ছিংসু চাতি অত্থো। অযঞ্হি অভিনন্দ-সদ্দো ‘‘অভিনন্দতি অভিৰদতী’’তিআদীসু (সং॰ নি॰ ৩.৫; ৪.১১৪, ১১৮) তণ্হাযপি আগতো। ‘‘অন্নমেৰাভিনন্দন্তি, উভযে দেৰমানুসা’’তিআদীসু (সং॰ নি॰ ১.৪৩) উপগমনেপি।
24.Attamanā te bhikkhū bhagavato bhāsitaṃ abhinandunti te bhikkhū sakamanā tuṭṭhamanā, pītisomanassehi vā samattamanā hutvā karavīkarutamañjunā kaṇṇasukhena paṇḍitajanahadayānaṃ amatābhisekasadisena brahmassarena bhāsato bhagavato vacanaṃ sukathitaṃ sulapitaṃ ‘‘evametaṃ bhagavā, evametaṃ sugatā’’ti matthakena sampaṭicchantā anumodiṃsu ceva sampaṭicchiṃsu cāti attho. Ayañhi abhinanda-saddo ‘‘abhinandati abhivadatī’’tiādīsu (saṃ. ni. 3.5; 4.114, 118) taṇhāyapi āgato. ‘‘Annamevābhinandanti, ubhaye devamānusā’’tiādīsu (saṃ. ni. 1.43) upagamanepi.
‘‘চিরপ্পৰাসিং পুরিসং, দূরতো সোত্থিমাগতং।
‘‘Cirappavāsiṃ purisaṃ, dūrato sotthimāgataṃ;
ঞাতিমিত্তা সুহজ্জা চ, অভিনন্দন্তি আগত’’ন্তি॥ (ধ॰ প॰ ২১৯; ৰি॰ ৰ॰ ৮৬১) –
Ñātimittā suhajjā ca, abhinandanti āgata’’nti. (dha. pa. 219; vi. va. 861) –
আদীসু সম্পটিচ্ছনেপি। ‘‘অভিনন্দিত্ৰা অনুমোদিত্ৰা’’তিআদীসু (ম॰ নি॰ ১.২০৫) অনুমোদনেপি। স্ৰাযমিধ অনুমোদনসম্পটিচ্ছনেসু যুজ্জতি। তেন ৰুত্তং ‘‘অনুমোদিংসু চেৰ সম্পটিচ্ছিংসু চা’’তি। অনুপাদায আসৰেহি চিত্তানি ৰিমুচ্চিংসূতি অনুপ্পাদনিরোধেন নিরুজ্ঝমানেহি আসৰেহি অনুপাদায অগ্গহেত্ৰা কঞ্চি ধম্মং ‘‘অহং মমা’’তি অনাদিযিত্ৰাৰ চিত্তানি ৰিমুচ্চিংসু। ছ অরহন্তোতি ভগৰতা সদ্ধিং ছ জনা অরহন্তো। অঞ্ঞেসং পন দেৰব্রহ্মানম্পি অরহত্তপ্পত্তিসম্ভৰতো ইদং মনুস্সঅরহন্তেযেৰ সন্ধায ৰুত্তন্তি আহ ‘‘ছ মনুস্সা অরহন্তো হোন্তী’’তি।
Ādīsu sampaṭicchanepi. ‘‘Abhinanditvā anumoditvā’’tiādīsu (ma. ni. 1.205) anumodanepi. Svāyamidha anumodanasampaṭicchanesu yujjati. Tena vuttaṃ ‘‘anumodiṃsu ceva sampaṭicchiṃsu cā’’ti. Anupādāya āsavehi cittāni vimucciṃsūti anuppādanirodhena nirujjhamānehi āsavehi anupādāya aggahetvā kañci dhammaṃ ‘‘ahaṃ mamā’’ti anādiyitvāva cittāni vimucciṃsu. Cha arahantoti bhagavatā saddhiṃ cha janā arahanto. Aññesaṃ pana devabrahmānampi arahattappattisambhavato idaṃ manussaarahanteyeva sandhāya vuttanti āha ‘‘cha manussā arahanto hontī’’ti.
অনত্তলক্খণসুত্তৰণ্ণনা নিট্ঠিতা।
Anattalakkhaṇasuttavaṇṇanā niṭṭhitā.
পঞ্চৰগ্গিযকথা নিট্ঠিতা।
Pañcavaggiyakathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ৬. পঞ্চৰগ্গিযকথা • 6. Pañcavaggiyakathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / পঞ্চৰগ্গিযকথা • Pañcavaggiyakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পঞ্চৰগ্গিযকথাৰণ্ণনা • Pañcavaggiyakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পঞ্চৰগ্গিযকথাৰণ্ণনা • Pañcavaggiyakathāvaṇṇanā
