| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
анад̇д̇алагкан̣асуд̇д̇аван̣н̣анаа
Anattalakkhaṇasuttavaṇṇanā
20. ааманд̇зсийд̇и аасаал̣хийбун̣н̣амад̣̇ивасз д̇хаммажаггаббавад̇д̇анад̇о бадтааяа ануггамзна сод̇аабад̇д̇ипалз бад̇идтид̇з ан̃н̃аасигон̣д̣ан̃н̃аббамукз бан̃жаваг̇г̇ияз ‘‘ид̣̇аани д̇зсам̣ аасавагкаяааяа д̇хаммам̣ д̣̇зсзссаамий’’д̇и бан̃жамияаа багкасса ааманд̇зси. анад̇д̇аад̇и авасавад̇д̇анадтзна асаамигадтзна сун̃н̃ад̇адтзна ад̇д̇абадигкзбадтзнаад̇и звам̣ жад̇уухи гааран̣зхи анад̇д̇аа. д̇ад̇т̇а ‘‘уббаннам̣ руубам̣ тид̇им̣ маа баабун̣аад̇у, таанаббад̇д̇ам̣ маа ж̇ийрад̇у, ж̇араббад̇д̇ам̣ маа бхиж̇ж̇ад̇у, уд̣̇аяаб̣б̣аязхи маа гиламаяад̇уу’’д̇и на зд̇т̇а гассажи васийбхааво ад̇т̇и, свааяамасса авасавад̇д̇анадто. саамибхууд̇асса гассажи абхааво асаамигадто. ниваасийгаарагавзд̣̇агаад̇хидтааяагавирахзна д̇ад̇о сун̃н̃ад̇аа сун̃н̃ад̇адто. барабаригаббид̇аад̇д̇асабхааваабхааво зва ад̇д̇абадигкзбадто. ид̣̇аани анад̇д̇ад̇ам̣язва вибхаавзд̇ум̣ ‘‘руубан̃жа хид̣̇ам̣ бхигкавз’’д̇иаад̣̇имааха. д̇ад̇т̇а ад̇д̇аа абхависсаад̇и гаараго взд̣̇аго саяам̣васийд̇и звам̣бхууд̇о ад̇д̇аа абхависсаад̇и ад̇хиббааяо. зван̃хи сад̇и руубасса ааб̣аад̇хааяа сам̣вад̇д̇анам̣ аяуж̇ж̇амаанагам̣ сияаа. гааман̃жзд̇т̇а ‘‘яасмаа жа ко, бхигкавз, руубам̣ анад̇д̇аа, д̇асмаа руубам̣ ааб̣аад̇хааяа сам̣вад̇д̇ад̇ий’’д̇и руубасса анад̇д̇ад̇ааяа д̣̇угкад̇аа вибхаавид̇аа вияа д̣̇иссад̇и, д̇ат̇ааби ‘‘яасмаа руубам̣ ааб̣аад̇хааяа сам̣вад̇д̇ад̇и, д̇асмаа анад̇д̇аа’’д̇и баагадааяа сааб̣аад̇хад̇ааяа руубасса ад̇д̇асаараабхааво вибхаавид̇о, д̇ад̇о зва жа ‘‘на жа лаб̣бхад̇и руубз ‘звам̣ мз руубам̣ ход̇у, звам̣ мз руубам̣ маа ахосий’д̇и’’ руубз гассажи аниссарад̇аа д̇асса жа авасавад̇д̇анаагааро д̣̇ассид̇о. взд̣̇анаад̣̇ийсуби зсзва наяо.
20.Āmantesīti āsāḷhīpuṇṇamadivase dhammacakkappavattanato paṭṭhāya anukkamena sotāpattiphale patiṭṭhite aññāsikoṇḍaññappamukhe pañcavaggiye ‘‘idāni tesaṃ āsavakkhayāya dhammaṃ desessāmī’’ti pañcamiyā pakkhassa āmantesi. Anattāti avasavattanaṭṭhena asāmikaṭṭhena suññataṭṭhena attapaṭikkhepaṭṭhenāti evaṃ catūhi kāraṇehi anattā. Tattha ‘‘uppannaṃ rūpaṃ ṭhitiṃ mā pāpuṇātu, ṭhānappattaṃ mā jīratu, jarappattaṃ mā bhijjatu, udayabbayehi mā kilamayatū’’ti na ettha kassaci vasībhāvo atthi, svāyamassa avasavattanaṭṭho. Sāmibhūtassa kassaci abhāvo asāmikaṭṭho. Nivāsīkārakavedakaadhiṭṭhāyakavirahena tato suññatā suññataṭṭho. Paraparikappitaattasabhāvābhāvo eva attapaṭikkhepaṭṭho. Idāni anattataṃyeva vibhāvetuṃ ‘‘rūpañca hidaṃ bhikkhave’’tiādimāha. Tattha attā abhavissāti kārako vedako sayaṃvasīti evaṃbhūto attā abhavissāti adhippāyo. Evañhi sati rūpassa ābādhāya saṃvattanaṃ ayujjamānakaṃ siyā. Kāmañcettha ‘‘yasmā ca kho, bhikkhave, rūpaṃ anattā, tasmā rūpaṃ ābādhāya saṃvattatī’’ti rūpassa anattatāya dukkhatā vibhāvitā viya dissati, tathāpi ‘‘yasmā rūpaṃ ābādhāya saṃvattati, tasmā anattā’’ti pākaṭāya sābādhatāya rūpassa attasārābhāvo vibhāvito, tato eva ca ‘‘na ca labbhati rūpe ‘evaṃ me rūpaṃ hotu, evaṃ me rūpaṃ mā ahosī’ti’’ rūpe kassaci anissaratā tassa ca avasavattanākāro dassito. Vedanādīsupi eseva nayo.
21. д̇ам̣ гим̣ман̃н̃ат̇а бхигкавзд̇и ид̣̇ам̣ гасмаа аарад̣̇д̇хам̣? зд̇д̇агзна таанзна анад̇д̇алагкан̣амзва гат̇ид̇ам̣, на анижжад̣̇угкалагкан̣аани, ид̣̇аани д̇аани д̣̇ассзд̇ваа самод̇хаанзд̇ваа д̇ийн̣иби лагкан̣аани д̣̇ассзд̇ум̣ ид̣̇амаарад̣̇д̇ханд̇и взд̣̇ид̇аб̣б̣ам̣. анижжам̣ бханд̇зд̇и бханд̇з яасмаа худ̇ваа на ход̇и, д̇асмаа анижжам̣. яасмаа буб̣б̣з асанд̇ам̣ бажжаяасамавааязна худ̇ваа уббаж̇ж̇ид̇ваа буна бхан̇г̇убаг̇аманзна на ход̇и, д̇асмаа на нижжанд̇и анижжам̣, ад̣̇д̇хуванд̇и ад̇хиббааяо. ат̇а ваа уббаад̣̇аваяаванд̇ад̇ааяа д̇аавагаалигад̇ааяа вибарин̣аамагодияаа нижжаббадигкзбад̇од̇и имзхиби гааран̣зхи анижжам̣. зд̇т̇а кан̣з кан̣з уббаж̇ж̇анавасзна нируж̇жханавасзна жа бавад̇д̇анад̇о уббаад̣̇аваяаванд̇ад̇аа. д̇ан̇кан̣игад̇ааяа д̇аавагаалигад̇аа. вибарин̣аамаванд̇ад̇ааяа вибарин̣аамагоди. руубан̃хи уббаад̣̇аад̣̇ивигаараабаж̇ж̇анзна вибарин̣ааманд̇ам̣ винаасам̣ баабун̣аад̇и. нижжасабхааваабхааво зва нижжабадигкзбо. анижжаа хи д̇хаммаа, д̇знзва ад̇д̇ано анижжабхаавзна ад̇т̇ад̇о нижжад̇ам̣ бадигкибанд̇и наама.
21.Taṃ kiṃmaññatha bhikkhaveti idaṃ kasmā āraddhaṃ? Ettakena ṭhānena anattalakkhaṇameva kathitaṃ, na aniccadukkhalakkhaṇāni, idāni tāni dassetvā samodhānetvā tīṇipi lakkhaṇāni dassetuṃ idamāraddhanti veditabbaṃ. Aniccaṃ bhanteti bhante yasmā hutvā na hoti, tasmā aniccaṃ. Yasmā pubbe asantaṃ paccayasamavāyena hutvā uppajjitvā puna bhaṅgupagamanena na hoti, tasmā na niccanti aniccaṃ, addhuvanti adhippāyo. Atha vā uppādavayavantatāya tāvakālikatāya vipariṇāmakoṭiyā niccappaṭikkhepatoti imehipi kāraṇehi aniccaṃ. Ettha khaṇe khaṇe uppajjanavasena nirujjhanavasena ca pavattanato uppādavayavantatā. Taṅkhaṇikatāya tāvakālikatā. Vipariṇāmavantatāya vipariṇāmakoṭi. Rūpañhi uppādādivikārāpajjanena vipariṇāmantaṃ vināsaṃ pāpuṇāti. Niccasabhāvābhāvo eva niccapaṭikkhepo. Aniccā hi dhammā, teneva attano aniccabhāvena atthato niccataṃ paṭikkhipanti nāma.
д̣̇угкам̣ бханд̇зд̇и бханд̇з бадибийл̣анаагаарзна д̣̇угкам̣. уббаад̣̇аж̇араабхан̇г̇авасзна хи руубасса ниранд̇арам̣ б̣аад̇хад̇и, бадибийл̣анаагаарзнасса д̣̇угкад̇аа. ат̇а ваа санд̇аабадтзна д̣̇угкамадтзна д̣̇угкавад̇т̇угадтзна сукабадигкзбадтзна жаад̇и жад̇уухи гааран̣зхи д̣̇угкам̣. зд̇т̇а жа санд̇аабо наама д̣̇угкад̣̇угкад̇аад̣̇ивасзна санд̇аабанам̣ барид̣̇аханам̣. д̇ад̇о звасса д̣̇уссахад̇ааяа д̣̇угкамад̇аа. д̇иссаннам̣ д̣̇угкад̇аанам̣ сам̣саарад̣̇угкасса жа ад̇хидтаанад̇ааяа д̣̇угкавад̇т̇угад̇аа. сукасабхааваабхааво зва сукабадигкзбо. вибарин̣аамад̇хамманд̇и ж̇арааяа маран̣зна жа вибарин̣аамасабхаавам̣. галлам̣ нууд̇и яуд̇д̇ам̣ ну. д̇анд̇и звам̣ анижжам̣ д̣̇угкам̣ вибарин̣аамад̇хаммам̣ руубам̣. зд̇ам̣ мамаад̇и д̇ан̣хааг̇аахо маман̇гаарабхаавад̇о. зсохамасмийд̇и маанаг̇аахо ахан̇гаарабхаавад̇о. зсо мз ад̇д̇аад̇и д̣̇идтиг̇аахо ад̇д̇абхаававибаллаасаг̇г̇аахад̇о. д̇ан̣хааг̇аахо жзд̇т̇а адтасад̇ад̇ан̣хаавижарид̇авасзна, маанаг̇аахо нававид̇хамаанавасзна, д̣̇идтиг̇аахо д̣̇ваасадтид̣̇идтивасзна взд̣̇ид̇аб̣б̣о. имзсам̣ д̇ин̣н̣ам̣ д̇ан̣хаамаанад̣̇идтиг̇аахаанам̣ васзна яуд̇д̇ам̣ ну д̇ам̣ саманубассид̇унд̇и вуд̇д̇ам̣ ход̇и.
Dukkhaṃ bhanteti bhante paṭipīḷanākārena dukkhaṃ. Uppādajarābhaṅgavasena hi rūpassa nirantaraṃ bādhati, paṭipīḷanākārenassa dukkhatā. Atha vā santāpaṭṭhena dukkhamaṭṭhena dukkhavatthukaṭṭhena sukhapaṭikkhepaṭṭhena cāti catūhi kāraṇehi dukkhaṃ. Ettha ca santāpo nāma dukkhadukkhatādivasena santāpanaṃ paridahanaṃ. Tato evassa dussahatāya dukkhamatā. Tissannaṃ dukkhatānaṃ saṃsāradukkhassa ca adhiṭṭhānatāya dukkhavatthukatā. Sukhasabhāvābhāvo eva sukhapaṭikkhepo. Vipariṇāmadhammanti jarāya maraṇena ca vipariṇāmasabhāvaṃ. Kallaṃ nūti yuttaṃ nu. Tanti evaṃ aniccaṃ dukkhaṃ vipariṇāmadhammaṃ rūpaṃ. Etaṃ mamāti taṇhāgāho mamaṅkārabhāvato. Esohamasmīti mānagāho ahaṅkārabhāvato. Eso me attāti diṭṭhigāho attabhāvavipallāsaggāhato. Taṇhāgāho cettha aṭṭhasatataṇhāvicaritavasena, mānagāho navavidhamānavasena, diṭṭhigāho dvāsaṭṭhidiṭṭhivasena veditabbo. Imesaṃ tiṇṇaṃ taṇhāmānadiṭṭhigāhānaṃ vasena yuttaṃ nu taṃ samanupassitunti vuttaṃ hoti.
ид̇и бхаг̇аваа анижжад̣̇угкавасзна анад̇д̇алагкан̣ам̣язва д̣̇ассзси. бхаг̇аваа хи гад̇т̇ажи анижжавасзна анад̇д̇ад̇ам̣ д̣̇ассзд̇и, гад̇т̇ажи д̣̇угкавасзна, гад̇т̇ажи убхаяавасзна. д̇ат̇аа хи ‘‘жагку ад̇д̇аад̇и яо вад̣̇зяяа, д̇ам̣ на убабаж̇ж̇ад̇и, жагкусса уббаад̣̇оби ваяоби бан̃н̃ааяад̇и. яасса ко бана уббаад̣̇оби ваяоби бан̃н̃ааяад̇и, ‘ад̇д̇аа мз уббаж̇ж̇ад̇и жзва взд̇и жаа’д̇и ижжасса звамааг̇ад̇ам̣ ход̇и, д̇асмаа д̇ам̣ на убабаж̇ж̇ад̇и. ‘жагку ад̇д̇аа’д̇и яо вад̣̇зяяа, ид̇и жагку анад̇д̇аа’’д̇и имасмин̃жа чачаггасуд̇д̇з (ма. ни. 3.422) анижжавасзна анад̇д̇ад̇ам̣ д̣̇ассзси. ‘‘руубан̃жа хид̣̇ам̣, бхигкавз, ад̇д̇аа абхависса…бз… звам̣ мз руубам̣ маа ахосий’’д̇и имасмим̣язва анад̇д̇алагкан̣асуд̇д̇з д̣̇угкавасзна анад̇д̇ад̇ам̣ д̣̇ассзси. ‘‘руубам̣, бхигкавз, анижжам̣, яад̣̇анижжам̣ д̇ам̣ д̣̇угкам̣, яам̣ д̣̇угкам̣ д̇ад̣̇анад̇д̇аа, яад̣̇анад̇д̇аа, д̇ам̣ ‘нзд̇ам̣ мама, нзсохамасми, на мз со ад̇д̇аа’д̇и звамзд̇ам̣ яат̇аабхууд̇ам̣ саммаббан̃н̃ааяа д̣̇адтаб̣б̣а’’нд̇и имасмим̣ араханд̇асуд̇д̇з (сам̣. ни. 3.76-77) убхаяавасзна анад̇д̇ад̇ам̣ д̣̇ассзси. гасмаа? анижжам̣ д̣̇угкан̃жа баагадам̣, анад̇д̇аа абаагадам̣. барибхог̇абхааж̇анаад̣̇ийсу хи бхиннзсу ‘‘ахо анижжа’’нд̇и вад̣̇анд̇и, ‘‘ахо анад̇д̇аа’’д̇и бана вад̇д̇аа наама над̇т̇и. сарийрз г̇ан̣д̣абил̣агаасу ваа удтид̇аасу ган̣дагзна ваа вид̣̇д̇хаа ‘‘ахо д̣̇угка’’нд̇и вад̣̇анд̇и, ‘‘ахо анад̇д̇аа’’д̇и бана вад̇д̇аа наама над̇т̇и. гасмаа? ид̣̇ан̃хи анад̇д̇алагкан̣ам̣ наама авибхууд̇ам̣ д̣̇уд̣̇д̣̇асам̣ д̣̇уббан̃н̃аабанам̣. д̇ат̇аа хи сарабхан̇г̇аад̣̇аяоби сад̇т̇ааро наад̣̇д̣̇асам̣су, гуд̇о бан̃н̃аабанаа, д̇зна нам̣ бхаг̇аваа анижжавасзна ваа д̣̇угкавасзна ваа убхаяавасзна ваа д̣̇ассзси. д̇аяид̣̇ам̣ имасмимби д̇збариваддз анижжад̣̇угкавасзнзва д̣̇ассид̇ам̣. взд̣̇анаад̣̇ийсуби зсзва наяо.
Iti bhagavā aniccadukkhavasena anattalakkhaṇaṃyeva dassesi. Bhagavā hi katthaci aniccavasena anattataṃ dasseti, katthaci dukkhavasena, katthaci ubhayavasena. Tathā hi ‘‘cakkhu attāti yo vadeyya, taṃ na upapajjati, cakkhussa uppādopi vayopi paññāyati. Yassa kho pana uppādopi vayopi paññāyati, ‘attā me uppajjati ceva veti cā’ti iccassa evamāgataṃ hoti, tasmā taṃ na upapajjati. ‘Cakkhu attā’ti yo vadeyya, iti cakkhu anattā’’ti imasmiñca chachakkasutte (ma. ni. 3.422) aniccavasena anattataṃ dassesi. ‘‘Rūpañca hidaṃ, bhikkhave, attā abhavissa…pe… evaṃ me rūpaṃ mā ahosī’’ti imasmiṃyeva anattalakkhaṇasutte dukkhavasena anattataṃ dassesi. ‘‘Rūpaṃ, bhikkhave, aniccaṃ, yadaniccaṃ taṃ dukkhaṃ, yaṃ dukkhaṃ tadanattā, yadanattā, taṃ ‘netaṃ mama, nesohamasmi, na me so attā’ti evametaṃ yathābhūtaṃ sammappaññāya daṭṭhabba’’nti imasmiṃ arahantasutte (saṃ. ni. 3.76-77) ubhayavasena anattataṃ dassesi. Kasmā? Aniccaṃ dukkhañca pākaṭaṃ, anattā apākaṭaṃ. Paribhogabhājanādīsu hi bhinnesu ‘‘aho anicca’’nti vadanti, ‘‘aho anattā’’ti pana vattā nāma natthi. Sarīre gaṇḍapiḷakāsu vā uṭṭhitāsu kaṇṭakena vā viddhā ‘‘aho dukkha’’nti vadanti, ‘‘aho anattā’’ti pana vattā nāma natthi. Kasmā? Idañhi anattalakkhaṇaṃ nāma avibhūtaṃ duddasaṃ duppaññāpanaṃ. Tathā hi sarabhaṅgādayopi satthāro nāddasaṃsu, kuto paññāpanā, tena naṃ bhagavā aniccavasena vā dukkhavasena vā ubhayavasena vā dassesi. Tayidaṃ imasmimpi teparivaṭṭe aniccadukkhavaseneva dassitaṃ. Vedanādīsupi eseva nayo.
22. д̇асмаад̇ихаад̇и д̇асмаа ижжзва вуд̇д̇ам̣. д̇и-гаара ха-гаараа нибаад̇аа, яасмаа имз бан̃жагканд̇хаа анижжаа д̣̇угкаа анад̇д̇аа, д̇асмаад̇и ад̇т̇о. яам̣ гин̃жийд̇и анавасзсабарияаад̣̇аанамзд̇ам̣. яанд̇и хи сааман̃н̃зна анияамад̣̇ассанам̣, гин̃жийд̇и багаарад̇о бхзд̣̇ам̣ аамасид̇ваа анияамад̣̇ассанам̣. убхаязнаби ад̇ийд̇ам̣ ваа…бз… санд̇игз ваа аббам̣ ваа б̣ахум̣ ваа яаад̣̇исам̣ ваа д̇аад̣̇исам̣ ваа набум̣саганид̣̇д̣̇зсаарахам̣ саб̣б̣ам̣ б̣яаабзд̇ваа сан̇г̇ан̣хаад̇и, д̇асмаа анавасзсабарияаад̣̇аанамзд̇ам̣ ‘‘яам̣ гин̃жий’’д̇и. зван̃жа сад̇и ан̃н̃зсуби набум̣саганид̣̇д̣̇зсаарахзсу басан̇г̇ам̣ д̣̇исваа д̇ад̇т̇а ад̇хиббзд̇ад̇т̇ам̣ ад̇хижжа бавад̇д̇анад̇о ад̇иббасан̇г̇асса нияаманад̇т̇ам̣ ‘‘рууба’’нд̇и вуд̇д̇ам̣. звам̣ бад̣̇ад̣̇ваязнаби руубасса асзсабариг̇г̇ахо гад̇о ход̇и. ат̇асса ад̇ийд̇аад̣̇ивибхааг̇ам̣ аарабхад̇и ‘‘ад̇ийд̇аанааг̇ад̇абажжуббанна’’нд̇иаад̣̇инаа. д̇ан̃хи гин̃жи ад̇ийд̇ам̣ гин̃жи анааг̇ад̇аад̣̇ибхзд̣̇анд̇и. зса наяо взд̣̇анаад̣̇ийсуби.
22.Tasmātihāti tasmā icceva vuttaṃ. Ti-kāra ha-kārā nipātā, yasmā ime pañcakkhandhā aniccā dukkhā anattā, tasmāti attho. Yaṃ kiñcīti anavasesapariyādānametaṃ. Yanti hi sāmaññena aniyamadassanaṃ, kiñcīti pakārato bhedaṃ āmasitvā aniyamadassanaṃ. Ubhayenapi atītaṃ vā…pe… santike vā appaṃ vā bahuṃ vā yādisaṃ vā tādisaṃ vā napuṃsakaniddesārahaṃ sabbaṃ byāpetvā saṅgaṇhāti, tasmā anavasesapariyādānametaṃ ‘‘yaṃ kiñcī’’ti. Evañca sati aññesupi napuṃsakaniddesārahesu pasaṅgaṃ disvā tattha adhippetatthaṃ adhicca pavattanato atippasaṅgassa niyamanatthaṃ ‘‘rūpa’’nti vuttaṃ. Evaṃ padadvayenapi rūpassa asesapariggaho kato hoti. Athassa atītādivibhāgaṃ ārabhati ‘‘atītānāgatapaccuppanna’’ntiādinā. Tañhi kiñci atītaṃ kiñci anāgatādibhedanti. Esa nayo vedanādīsupi.
д̇ад̇т̇а руубам̣ д̇аава ад̣̇д̇хаасанд̇ад̇исамаяакан̣авасзна жад̇уд̇хаа ад̇ийд̇ам̣ наама ход̇и, д̇ат̇аа анааг̇ад̇абажжуббаннам̣. д̇ад̇т̇а ад̣̇д̇хаавасзна д̇аава згасса згасмим̣ бхавз бадисанд̇хид̇о буб̣б̣з ад̇ийд̇ам̣, жуд̇ид̇о уд̣̇д̇хаманааг̇ад̇ам̣, убхиннаманд̇арз бажжуббаннам̣. санд̇ад̇ивасзна сабхааг̇згауд̇усамудтааназгаахаарасамаудтаанан̃жа буб̣б̣аабарияавасзна вад̇д̇амаанамби бажжуббаннам̣, д̇ад̇о буб̣б̣з висабхааг̇ауд̇уаахаарасамудтаанам̣ ад̇ийд̇ам̣, бажчаа анааг̇ад̇ам̣. жид̇д̇аж̇ам̣ згавийт̇изгаж̇аваназгасамаабад̇д̇исамудтаанам̣ бажжуббаннам̣, д̇ад̇о буб̣б̣з ад̇ийд̇ам̣, бажчаа анааг̇ад̇ам̣. гаммасамудтаанасса баадиязггам̣ санд̇ад̇ивасзна ад̇ийд̇аад̣̇ибхзд̣̇о над̇т̇и. д̇зсам̣язва бана уд̇уаахааражид̇д̇асамудтаанаанам̣ убад̇т̇амбхагавасзна д̇асса ад̇ийд̇аад̣̇ибхааво взд̣̇ид̇аб̣б̣о. самаяавасзна згамухуд̇д̇абуб̣б̣ан̣хасааяанхарад̇д̇ид̣̇иваад̣̇ийсу самаязсу санд̇аанавасзна бавад̇д̇амаанам̣ д̇ам̣д̇ам̣самаяаванд̇ам̣ руубам̣ бажжуббаннам̣ наама, д̇ад̇о буб̣б̣з ад̇ийд̇ам̣, бажчаа анааг̇ад̇ам̣. кан̣авасзна уббаад̣̇аад̣̇игкан̣ад̇д̇аяабарияаабаннам̣ бажжуббаннам̣, д̇ад̇о буб̣б̣з ад̇ийд̇ам̣, бажчаа анааг̇ад̇ам̣, ид̣̇амзвзд̇т̇а ниббарияааяам̣, сзсаа барияааяагат̇аа.
Tattha rūpaṃ tāva addhāsantatisamayakhaṇavasena catudhā atītaṃ nāma hoti, tathā anāgatapaccuppannaṃ. Tattha addhāvasena tāva ekassa ekasmiṃ bhave paṭisandhito pubbe atītaṃ, cutito uddhamanāgataṃ, ubhinnamantare paccuppannaṃ. Santativasena sabhāgekautusamuṭṭhānaekāhārasamauṭṭhānañca pubbāpariyavasena vattamānampi paccuppannaṃ, tato pubbe visabhāgautuāhārasamuṭṭhānaṃ atītaṃ, pacchā anāgataṃ. Cittajaṃ ekavīthiekajavanaekasamāpattisamuṭṭhānaṃ paccuppannaṃ, tato pubbe atītaṃ, pacchā anāgataṃ. Kammasamuṭṭhānassa pāṭiyekkaṃ santativasena atītādibhedo natthi. Tesaṃyeva pana utuāhāracittasamuṭṭhānānaṃ upatthambhakavasena tassa atītādibhāvo veditabbo. Samayavasena ekamuhuttapubbaṇhasāyanharattidivādīsu samayesu santānavasena pavattamānaṃ taṃtaṃsamayavantaṃ rūpaṃ paccuppannaṃ nāma, tato pubbe atītaṃ, pacchā anāgataṃ. Khaṇavasena uppādādikkhaṇattayapariyāpannaṃ paccuppannaṃ, tato pubbe atītaṃ, pacchā anāgataṃ, idamevettha nippariyāyaṃ, sesā pariyāyakathā.
аж̇жхад̇д̇ам̣ ваа б̣ахид̣̇д̇хаа ваад̇и жагкаад̣̇ибан̃жавид̇хам̣ руубам̣ ад̇д̇абхаавам̣ ад̇хигижжа бавад̇д̇ад̇д̇аа аж̇жхад̇д̇ам̣, сзсам̣ д̇ад̇о б̣аахирад̇д̇аа б̣ахид̣̇д̇хаа. абижа нияагаж̇жхад̇д̇амби ид̇ха аж̇жхад̇д̇ам̣, барабуг̇г̇алигамби жа б̣ахид̣̇д̇хаад̇и взд̣̇ид̇аб̣б̣ам̣. ол̣ааригам̣ ваа сукумам̣ ваад̇и жагкаад̣̇ийни нава, аабод̇хаад̇уваж̇ж̇аа д̇иссо д̇хаад̇уяо жаад̇и д̣̇ваад̣̇асавид̇хам̣ руубам̣ гхадданавасзна г̇ахзд̇аб̣б̣ад̇о ол̣ааригам̣, сзсам̣ д̇ад̇о вибарийд̇ад̇д̇аа сукумам̣. хийнам̣ ваа бан̣ийд̇ам̣ ваад̇и зд̇т̇а хийнабан̣ийд̇абхааво барияааяад̇о ниббарияааяад̇о жа. д̇ад̇т̇а аганидтаанам̣ руубад̇о суд̣̇ассийнам̣ руубам̣ хийнам̣, д̇ад̣̇зва суд̣̇ассаанам̣ руубад̇о бан̣ийд̇ам̣. звам̣ яаава нарагасад̇д̇аанам̣ руубам̣, д̇аава барияааяад̇о хийнабан̣ийд̇ад̇аа взд̣̇ид̇аб̣б̣аа. ниббарияааяад̇о бана яам̣ аарамман̣ам̣ гад̇ваа агусалавибаагавин̃н̃аан̣ам̣ уббаж̇ж̇ад̇и, д̇ам̣ хийнам̣ анидтабхаавад̇о. яам̣ бана аарамман̣ам̣ гад̇ваа гусалавибаагавин̃н̃аан̣ам̣ уббаж̇ж̇ад̇и, д̇ам̣ бан̣ийд̇ам̣ идтабхаавад̇о. яат̇аа хи агусалавибааго саяам̣ анидто анидтз зва уббаж̇ж̇ад̇и, на идтз, звам̣ гусалавибаагоби саяам̣ идто идтзязва уббаж̇ж̇ад̇и, на анидтз. яам̣ д̣̇уурз санд̇игз ваад̇и яам̣ сукумам̣, д̇ад̣̇зва д̣̇уббадивиж̇жхасабхаавад̇д̇аа д̣̇уурз, ид̇арам̣ суббадивиж̇жхасабхаавад̇д̇аа санд̇игз. абижзд̇т̇а огаасад̇оби убаад̣̇ааяубаад̣̇ааяа д̣̇уурасанд̇игад̇аа взд̣̇ид̇аб̣б̣аа. д̇ам̣ саб̣б̣анд̇и д̇ам̣ ад̇ийд̇аад̣̇ийхи бад̣̇зхи висум̣ нид̣̇д̣̇идтам̣ саб̣б̣ам̣ руубам̣. саммаббан̃н̃ааяа д̣̇адтаб̣б̣анд̇и сахавибассанааяа маг̇г̇абан̃н̃ааяа д̣̇адтаб̣б̣ам̣.
Ajjhattaṃvā bahiddhā vāti cakkhādipañcavidhaṃ rūpaṃ attabhāvaṃ adhikicca pavattattā ajjhattaṃ, sesaṃ tato bāhirattā bahiddhā. Apica niyakajjhattampi idha ajjhattaṃ, parapuggalikampi ca bahiddhāti veditabbaṃ. Oḷārikaṃ vā sukhumaṃ vāti cakkhādīni nava, āpodhātuvajjā tisso dhātuyo cāti dvādasavidhaṃ rūpaṃ ghaṭṭanavasena gahetabbato oḷārikaṃ, sesaṃ tato viparītattā sukhumaṃ. Hīnaṃ vā paṇītaṃ vāti ettha hīnapaṇītabhāvo pariyāyato nippariyāyato ca. Tattha akaniṭṭhānaṃ rūpato sudassīnaṃ rūpaṃ hīnaṃ, tadeva sudassānaṃ rūpato paṇītaṃ. Evaṃ yāva narakasattānaṃ rūpaṃ, tāva pariyāyato hīnapaṇītatā veditabbā. Nippariyāyato pana yaṃ ārammaṇaṃ katvā akusalavipākaviññāṇaṃ uppajjati, taṃ hīnaṃ aniṭṭhabhāvato. Yaṃ pana ārammaṇaṃ katvā kusalavipākaviññāṇaṃ uppajjati, taṃ paṇītaṃ iṭṭhabhāvato. Yathā hi akusalavipāko sayaṃ aniṭṭho aniṭṭhe eva uppajjati, na iṭṭhe, evaṃ kusalavipākopi sayaṃ iṭṭho iṭṭheyeva uppajjati, na aniṭṭhe. Yaṃ dūre santike vāti yaṃ sukhumaṃ, tadeva duppaṭivijjhasabhāvattā dūre, itaraṃ suppaṭivijjhasabhāvattā santike. Apicettha okāsatopi upādāyupādāya dūrasantikatā veditabbā. Taṃ sabbanti taṃ atītādīhi padehi visuṃ niddiṭṭhaṃ sabbaṃ rūpaṃ. Sammappaññāya daṭṭhabbanti sahavipassanāya maggapaññāya daṭṭhabbaṃ.
яаа гаажи взд̣̇анаад̇иаад̣̇ийсу бана санд̇ад̇ивасзна жа кан̣авасзна жа взд̣̇анааяа ад̇ийд̇аанааг̇ад̇абажжуббаннабхааво взд̣̇ид̇аб̣б̣о. д̇ад̇т̇а (висуд̣̇д̇хи. 2.497 аад̣̇аяо) санд̇ад̇ивасзна згавийт̇изгаж̇аваназгасамаабад̇д̇ибарияаабаннаа згавид̇хависаяасамааяог̇аббавад̇д̇аа жа д̣̇ивасамби б̣уд̣̇д̇харуубам̣ бассанд̇асса д̇хаммам̣ сун̣анд̇асса бавад̇д̇асад̣̇д̇хаад̣̇исахид̇авзд̣̇анаа бажжуббаннаа, д̇ад̇о буб̣б̣з ад̇ийд̇аа, бажчаа анааг̇ад̇аа. кан̣авасзна кан̣ад̇д̇аяабарияаабаннаа бажжуббаннаа, д̇ад̇о буб̣б̣з ад̇ийд̇аа, бажчаа анааг̇ад̇аа. аж̇жхад̇д̇аб̣ахид̣̇д̇хаабхзд̣̇о нияагаж̇жхад̇д̇авасзна взд̣̇ид̇аб̣б̣о. ол̣ааригасукумабхзд̣̇о ‘‘агусалаа взд̣̇анаа ол̣ааригаа, гусалааб̣яаагад̇аа взд̣̇анаа сукумаа’’д̇иаад̣̇инаа наязна вибхан̇г̇з (вибха. 11) вуд̇д̇зна ж̇аад̇исабхаавабуг̇г̇алалогияалогуд̇д̇аравасзна взд̣̇ид̇аб̣б̣о. ж̇аад̇ивасзна д̇аава агусалавзд̣̇анаа сааваж̇ж̇агирияахзд̇уд̇о гилзсасанд̇аабасабхаавад̇о жа авуубасанд̇авуд̇д̇ийд̇и гусалавзд̣̇анааяа ол̣ааригаа, саб̣яаабаарад̇о сауссаахад̇о савибаагад̇о гилзсасанд̇аабасабхаавад̇о сааваж̇ж̇ад̇о жа вибаагааб̣яаагад̇ааяа ол̣ааригаа, савибаагад̇о гилзсасанд̇аабасабхаавад̇о саб̣яаабаж̇ж̇ад̇о сааваж̇ж̇ад̇о жа гирияааб̣яаагад̇ааяа ол̣ааригаа, гусалааб̣яаагад̇аа бана вуд̇д̇авибарияааяад̇о агусалааяа сукумаа. д̣̇взби гусалаагусалавзд̣̇анаа саб̣яаабаарад̇о сауссаахад̇о савибаагад̇о жа яат̇ааяог̇ам̣ д̣̇увид̇хааяаби аб̣яаагад̇ааяа ол̣ааригаа, вуд̇д̇авибарияааязна д̣̇увид̇хааби аб̣яаагад̇аа д̇аахи сукумаа. звам̣ д̇аава ж̇аад̇ивасзна ол̣ааригасукумад̇аа взд̣̇ид̇аб̣б̣аа.
Yākāci vedanātiādīsu pana santativasena ca khaṇavasena ca vedanāya atītānāgatapaccuppannabhāvo veditabbo. Tattha (visuddhi. 2.497 ādayo) santativasena ekavīthiekajavanaekasamāpattipariyāpannā ekavidhavisayasamāyogappavattā ca divasampi buddharūpaṃ passantassa dhammaṃ suṇantassa pavattasaddhādisahitavedanā paccuppannā, tato pubbe atītā, pacchā anāgatā. Khaṇavasena khaṇattayapariyāpannā paccuppannā, tato pubbe atītā, pacchā anāgatā. Ajjhattabahiddhābhedo niyakajjhattavasena veditabbo. Oḷārikasukhumabhedo ‘‘akusalā vedanā oḷārikā, kusalābyākatā vedanā sukhumā’’tiādinā nayena vibhaṅge (vibha. 11) vuttena jātisabhāvapuggalalokiyalokuttaravasena veditabbo. Jātivasena tāva akusalavedanā sāvajjakiriyahetuto kilesasantāpasabhāvato ca avūpasantavuttīti kusalavedanāya oḷārikā, sabyāpārato saussāhato savipākato kilesasantāpasabhāvato sāvajjato ca vipākābyākatāya oḷārikā, savipākato kilesasantāpasabhāvato sabyāpajjato sāvajjato ca kiriyābyākatāya oḷārikā, kusalābyākatā pana vuttavipariyāyato akusalāya sukhumā. Dvepi kusalākusalavedanā sabyāpārato saussāhato savipākato ca yathāyogaṃ duvidhāyapi abyākatāya oḷārikā, vuttavipariyāyena duvidhāpi abyākatā tāhi sukhumā. Evaṃ tāva jātivasena oḷārikasukhumatā veditabbā.
сабхаававасзна бана д̣̇угкавзд̣̇анаа нирассаад̣̇ад̇о савибпаарад̇о уб̣б̣зж̇анийяад̇о абхибхаванад̇о жа ид̇араахи д̣̇вийхи ол̣ааригаа, ид̇араа бана д̣̇вз саад̇ад̇о санд̇ад̇о бан̣ийд̇ад̇о манаабад̇о маж̇жхад̇д̇ад̇о жа яат̇ааяог̇ам̣ д̣̇угкааяа сукумаа. убхо бана сукад̣̇угкаа савибпаарад̇о кобхагаран̣ад̇о баагадад̇о жа ад̣̇угкамасукааяа ол̣ааригаа, саа вуд̇д̇авибарияааязна д̇ад̣̇убхаяад̇о сукумаа. звам̣ сабхаававасзна ол̣ааригасукумад̇аа взд̣̇ид̇аб̣б̣аа. буг̇г̇алавасзна бана асамаабаннасса взд̣̇анаа наанаарамман̣авигкид̇д̇абхаавад̇о самаабаннасса взд̣̇анааяа ол̣ааригаа, вибарияааязна ид̇араа сукумаа. звам̣ буг̇г̇алавасзна ол̣ааригасукумад̇аа взд̣̇ид̇аб̣б̣аа. логияалогуд̇д̇аравасзна бана саасаваа взд̣̇анаа логияаа. саа аасавуббад̇д̇ихзд̇уд̇о огханияад̇о яог̇анияад̇о г̇ант̇анияад̇о нийваран̣ияад̇о убаад̣̇аанияад̇о сам̣гилзсигад̇о бут̇уж̇ж̇анасаад̇хааран̣ад̇о жа анаасавааяа ол̣ааригаа, саа вибарияааязна саасавааяа сукумаа. звам̣ логияалогуд̇д̇аравасзна ол̣ааригасукумад̇аа взд̣̇ид̇аб̣б̣аа.
Sabhāvavasena pana dukkhavedanā nirassādato savipphārato ubbejanīyato abhibhavanato ca itarāhi dvīhi oḷārikā, itarā pana dve sātato santato paṇītato manāpato majjhattato ca yathāyogaṃ dukkhāya sukhumā. Ubho pana sukhadukkhā savipphārato khobhakaraṇato pākaṭato ca adukkhamasukhāya oḷārikā, sā vuttavipariyāyena tadubhayato sukhumā. Evaṃ sabhāvavasena oḷārikasukhumatā veditabbā. Puggalavasena pana asamāpannassa vedanā nānārammaṇavikkhittabhāvato samāpannassa vedanāya oḷārikā, vipariyāyena itarā sukhumā. Evaṃ puggalavasena oḷārikasukhumatā veditabbā. Lokiyalokuttaravasena pana sāsavā vedanā lokiyā. Sā āsavuppattihetuto oghaniyato yoganiyato ganthaniyato nīvaraṇiyato upādāniyato saṃkilesikato puthujjanasādhāraṇato ca anāsavāya oḷārikā, sā vipariyāyena sāsavāya sukhumā. Evaṃ lokiyalokuttaravasena oḷārikasukhumatā veditabbā.
д̇ад̇т̇а ж̇аад̇иаад̣̇ивасзна самбхзд̣̇о барихарид̇аб̣б̣о. агусалавибаагагааяавин̃н̃аан̣асамбаяуд̇д̇аа хи взд̣̇анаа ж̇аад̇ивасзна аб̣яаагад̇ад̇д̇аа сукумааби самаанаа сабхааваад̣̇ивасзна ол̣ааригаа ход̇и. вуд̇д̇ан̃хзд̇ам̣ ‘‘аб̣яаагад̇аа взд̣̇анаа сукумаа, д̣̇угкаа взд̣̇анаа ол̣ааригаа. асамаабаннасса взд̣̇анаа ол̣ааригаа, саасаваа взд̣̇анаа ол̣ааригаа’’д̇и (вибха. 11). яат̇аа жа д̣̇угкавзд̣̇анаа, звам̣ сукаад̣̇аяоби ж̇аад̇ивасзна ол̣ааригаа, сабхааваад̣̇ивасзна сукумаа хонд̇и. д̇асмаа яат̇аа ж̇аад̇иаад̣̇ивасзна самбхзд̣̇о на ход̇и, д̇ат̇аа взд̣̇анаанам̣ ол̣ааригасукумад̇аа взд̣̇ид̇аб̣б̣аа. сзяяат̇ид̣̇ам̣ – аб̣яаагад̇аа ж̇аад̇ивасзна гусалаагусалаахи сукумаа. на д̇ад̇т̇а ‘‘гад̇амаа аб̣яаагад̇аа, гим̣ д̣̇угкаа, гим̣ сукаа, гим̣ самаабаннасса, гим̣ асамаабаннасса, гим̣ саасаваа, гим̣ анаасаваа’’д̇и звам̣ сабхааваад̣̇ибхзд̣̇о бараамасид̇аб̣б̣о. зса наяо саб̣б̣ад̇т̇а.
Tattha jātiādivasena sambhedo pariharitabbo. Akusalavipākakāyaviññāṇasampayuttā hi vedanā jātivasena abyākatattā sukhumāpi samānā sabhāvādivasena oḷārikā hoti. Vuttañhetaṃ ‘‘abyākatā vedanā sukhumā, dukkhā vedanā oḷārikā. Asamāpannassa vedanā oḷārikā, sāsavā vedanā oḷārikā’’ti (vibha. 11). Yathā ca dukkhavedanā, evaṃ sukhādayopi jātivasena oḷārikā, sabhāvādivasena sukhumā honti. Tasmā yathā jātiādivasena sambhedo na hoti, tathā vedanānaṃ oḷārikasukhumatā veditabbā. Seyyathidaṃ – abyākatā jātivasena kusalākusalāhi sukhumā. Na tattha ‘‘katamā abyākatā, kiṃ dukkhā, kiṃ sukhā, kiṃ samāpannassa, kiṃ asamāpannassa, kiṃ sāsavā, kiṃ anāsavā’’ti evaṃ sabhāvādibhedo parāmasitabbo. Esa nayo sabbattha.
абижа ‘‘д̇ам̣ д̇ам̣ ваа бана взд̣̇анам̣ убаад̣̇ааяубаад̣̇ааяа взд̣̇анаа ол̣ааригаа сукумаа д̣̇адтаб̣б̣аа’’д̇и важанад̇о агусалаад̣̇ийсуби лобхасахаг̇ад̇ааяа д̣̇осасахаг̇ад̇авзд̣̇анаа аг̇г̇и вияа ад̇д̇ано ниссаяад̣̇аханад̇о ол̣ааригаа, лобхасахаг̇ад̇аа сукумаа. д̣̇осасахаг̇ад̇ааби нияад̇аа ол̣ааригаа, анияад̇аа сукумаа. нияад̇ааби габбадтид̇игаа ол̣ааригаа, ид̇араа сукумаа. габбадтид̇игаасуби асан̇кааригаа ол̣ааригаа, ид̇араа сукумаа. лобхасахаг̇ад̇аа бана д̣̇идтисамбаяуд̇д̇аа ол̣ааригаа, ид̇араа сукумаа. сааби нияад̇аа габбадтид̇игаа асан̇кааригаа ол̣ааригаа, ид̇араа сукумаа, ависзсзна агусалаа б̣ахувибаагаа ол̣ааригаа, аббавибаагаа сукумаа. гусалаа бана аббавибаагаа ол̣ааригаа, б̣ахувибаагаа сукумаа.
Apica ‘‘taṃ taṃ vā pana vedanaṃ upādāyupādāya vedanā oḷārikā sukhumā daṭṭhabbā’’ti vacanato akusalādīsupi lobhasahagatāya dosasahagatavedanā aggi viya attano nissayadahanato oḷārikā, lobhasahagatā sukhumā. Dosasahagatāpi niyatā oḷārikā, aniyatā sukhumā. Niyatāpi kappaṭṭhitikā oḷārikā, itarā sukhumā. Kappaṭṭhitikāsupi asaṅkhārikā oḷārikā, itarā sukhumā. Lobhasahagatā pana diṭṭhisampayuttā oḷārikā, itarā sukhumā. Sāpi niyatā kappaṭṭhitikā asaṅkhārikā oḷārikā, itarā sukhumā, avisesena akusalā bahuvipākā oḷārikā, appavipākā sukhumā. Kusalā pana appavipākā oḷārikā, bahuvipākā sukhumā.
абижа гаамааважарагусалаа ол̣ааригаа, руубааважараа сукумаа, д̇ад̇о аруубааважараа, д̇ад̇о логуд̇д̇араа. гаамааважараа жа д̣̇аанамаяаа ол̣ааригаа, сийламаяаа сукумаа, д̇ад̇о бхааванаамаяаа. бхааванаамаяааби д̣̇ухзд̇угаа ол̣ааригаа , д̇ихзд̇угаа сукумаа. д̇ихзд̇угааби сасан̇кааригаа ол̣ааригаа, асан̇кааригаа сукумаа. руубааважараа батамаж̇жхаанигаа ол̣ааригаа…бз… бан̃жамаж̇жхаанигаа сукумаава. аруубааважараа аагаасаанан̃жааяад̇анасамбаяуд̇д̇аа ол̣ааригаа…бз… нзвасан̃н̃аанаасан̃н̃ааяад̇анасамбаяуд̇д̇аа сукумаава. логуд̇д̇араа жа сод̇аабад̇д̇имаг̇г̇асамбаяуд̇д̇аа ол̣ааригаа…бз… арахад̇д̇амаг̇г̇асамбаяуд̇д̇аа сукумаава. зса наяо д̇ам̣д̇ам̣бхуумивибаагагирияавзд̣̇анаасу д̣̇угкаад̣̇иасамаабаннаад̣̇исаасаваад̣̇ивасзна вуд̇д̇авзд̣̇анаасу жа.
Apica kāmāvacarakusalā oḷārikā, rūpāvacarā sukhumā, tato arūpāvacarā, tato lokuttarā. Kāmāvacarā ca dānamayā oḷārikā, sīlamayā sukhumā, tato bhāvanāmayā. Bhāvanāmayāpi duhetukā oḷārikā , tihetukā sukhumā. Tihetukāpi sasaṅkhārikā oḷārikā, asaṅkhārikā sukhumā. Rūpāvacarā paṭhamajjhānikā oḷārikā…pe… pañcamajjhānikā sukhumāva. Arūpāvacarā ākāsānañcāyatanasampayuttā oḷārikā…pe… nevasaññānāsaññāyatanasampayuttā sukhumāva. Lokuttarā ca sotāpattimaggasampayuttā oḷārikā…pe… arahattamaggasampayuttā sukhumāva. Esa nayo taṃtaṃbhūmivipākakiriyavedanāsu dukkhādiasamāpannādisāsavādivasena vuttavedanāsu ca.
огаасавасзна жааби нираяз д̣̇угкаа ол̣ааригаа, д̇иражчаанаяонияам̣ сукумаа…бз… бараниммид̇авасавад̇д̇ий сукумаава. яат̇аа жа д̣̇угкаа, звам̣ сукааби саб̣б̣ад̇т̇а яат̇аануруубам̣ яож̇зд̇аб̣б̣аа. вад̇т̇увасзна жааби хийнавад̇т̇угаа яаа гаажи взд̣̇анаа ол̣ааригаа, бан̣ийд̇авад̇т̇угаа сукумаа. хийнаббан̣ийд̇абхзд̣̇з яаа ол̣ааригаа, саа хийнаа. яаа жа сукумаа, саа бан̣ийд̇аад̇и взд̣̇ид̇аб̣б̣аа. д̣̇уурабад̣̇ам̣ бана агусалаа взд̣̇анаа гусалааб̣яаагад̇аахи взд̣̇анаахи д̣̇уурз, санд̇игабад̣̇ам̣ агусалаа взд̣̇анаа агусалааяа взд̣̇анааяа санд̇игзд̇иаад̣̇инаа наязна вибхад̇д̇ам̣. д̇асмаа агусалаа взд̣̇анаа висабхааг̇ад̇о асам̣садтад̇о асаригкад̇о жа гусалааб̣яаагад̇аахи д̣̇уурз, д̇ат̇аа гусалааб̣яаагад̇аа агусалааяа. зса наяо саб̣б̣аваарзсу. агусалаа бана взд̣̇анаа сабхааг̇ад̇о жа сам̣садтад̇о жа саригкад̇о жа агусалааяа санд̇игзд̇и. д̇ам̣д̇ам̣взд̣̇анаасамбаяуд̇д̇аанам̣ бана сан̃н̃аад̣̇ийнамби звамзва взд̣̇ид̇аб̣б̣ам̣.
Okāsavasena cāpi niraye dukkhā oḷārikā, tiracchānayoniyaṃ sukhumā…pe… paranimmitavasavattī sukhumāva. Yathā ca dukkhā, evaṃ sukhāpi sabbattha yathānurūpaṃ yojetabbā. Vatthuvasena cāpi hīnavatthukā yā kāci vedanā oḷārikā, paṇītavatthukā sukhumā. Hīnappaṇītabhede yā oḷārikā, sā hīnā. Yā ca sukhumā, sā paṇītāti veditabbā. Dūrapadaṃ pana akusalā vedanā kusalābyākatāhi vedanāhi dūre, santikapadaṃ akusalā vedanā akusalāya vedanāya santiketiādinā nayena vibhattaṃ. Tasmā akusalā vedanā visabhāgato asaṃsaṭṭhato asarikkhato ca kusalābyākatāhi dūre, tathā kusalābyākatā akusalāya. Esa nayo sabbavāresu. Akusalā pana vedanā sabhāgato ca saṃsaṭṭhato ca sarikkhato ca akusalāya santiketi. Taṃtaṃvedanāsampayuttānaṃ pana saññādīnampi evameva veditabbaṃ.
23. суд̇аваад̇и ааг̇амаад̇хиг̇амасан̇каад̇зна б̣аахусажжзна саманнааг̇ад̇ад̇д̇аа суд̇аваа. ниб̣б̣инд̣̇ад̇ийд̇и угган̣тад̇и. зд̇т̇а жа ниб̣б̣ид̣̇аад̇и вудтаанаг̇ааминийвибассанаа ад̇хиббзд̇аа. ниб̣б̣инд̣̇ам̣ вираж̇ж̇ад̇ийд̇и зд̇т̇а вирааг̇авасзна жад̇д̇ааро маг̇г̇аа гат̇ид̇аа. вирааг̇аа вимужжад̇ийд̇и вирааг̇зна маг̇г̇знзва хзд̇убхууд̇зна бадиббассад̣̇д̇хивимуд̇д̇ивасзна вимужжад̇и. иминаа жад̇д̇аари сааман̃н̃апалаани гат̇ид̇аани. вимуд̇д̇асмим̣ вимуд̇д̇амид̇и н̃аан̣ам̣ ход̇ийд̇и иминаа бана бажжавзгкан̣ан̃аан̣ам̣ гат̇ид̇ам̣. кийн̣аа ж̇аад̇ийд̇иаад̣̇ийхи д̇асса бхууми. д̇зна хи н̃аан̣зна арияасааваго бажжавзгканд̇о ‘‘кийн̣аа ж̇аад̇ий’’д̇иаад̣̇ийни баж̇аанаад̇и. гад̇амаа банасса ж̇аад̇и кийн̣аа, гат̇ан̃жа нам̣ баж̇аанаад̇ийд̇и? на д̇аавасса ад̇ийд̇аа ж̇аад̇и кийн̣аа буб̣б̣зва кийн̣ад̇д̇аа, на анааг̇ад̇аа анааг̇ад̇з вааяаамаабхаавад̇о, на бажжуббаннаа. яаа бана маг̇г̇асса абхаавид̇ад̇д̇аа уббаж̇ж̇зяяа згажад̇убан̃жавогаарабхавзсу згажад̇убан̃жагканд̇хаббабхзд̣̇аа ж̇аад̇и, саа маг̇г̇асса бхаавид̇ад̇д̇аа ануббаад̣̇ад̇хаммад̇ам̣ аабаж̇ж̇анзна кийн̣аа, д̇ам̣ со маг̇г̇абхааванааяа бахийнагилзсз бажжавзгкид̇ваа гилзсаабхаавз виж̇ж̇амаанамби гаммам̣ ааяад̇им̣ аббадисанд̇хигам̣ ход̇ийд̇и ж̇аананд̇о баж̇аанаад̇и.
23.Sutavāti āgamādhigamasaṅkhātena bāhusaccena samannāgatattā sutavā. Nibbindatīti ukkaṇṭhati. Ettha ca nibbidāti vuṭṭhānagāminīvipassanā adhippetā. Nibbindaṃ virajjatīti ettha virāgavasena cattāro maggā kathitā. Virāgā vimuccatīti virāgena maggeneva hetubhūtena paṭippassaddhivimuttivasena vimuccati. Iminā cattāri sāmaññaphalāni kathitāni. Vimuttasmiṃ vimuttamiti ñāṇaṃ hotīti iminā pana paccavekkhaṇañāṇaṃ kathitaṃ. Khīṇā jātītiādīhi tassa bhūmi. Tena hi ñāṇena ariyasāvako paccavekkhanto ‘‘khīṇā jātī’’tiādīni pajānāti. Katamā panassa jāti khīṇā, kathañca naṃ pajānātīti? Na tāvassa atītā jāti khīṇā pubbeva khīṇattā, na anāgatā anāgate vāyāmābhāvato, na paccuppannā. Yā pana maggassa abhāvitattā uppajjeyya ekacatupañcavokārabhavesu ekacatupañcakkhandhappabhedā jāti, sā maggassa bhāvitattā anuppādadhammataṃ āpajjanena khīṇā, taṃ so maggabhāvanāya pahīnakilese paccavekkhitvā kilesābhāve vijjamānampi kammaṃ āyatiṃ appaṭisandhikaṃ hotīti jānanto pajānāti.
вусид̇анд̇и вуд̇т̇ам̣ баривуд̇т̇ам̣, гад̇ам̣ жарид̇ам̣ нидтид̇анд̇и ад̇т̇о. б̣рахмажарияанд̇и маг̇г̇аб̣рахмажарияам̣. бут̇уж̇ж̇анагаляаан̣агзна хи сад̣̇д̇хим̣ сад̇д̇а сзгкаа маг̇г̇аб̣рахмажарияам̣ васанд̇и наама, кийн̣аасаво вуд̇т̇аваасо, д̇асмаа арияасааваго ад̇д̇ано б̣рахмажарияаваасам̣ бажжавзгканд̇о ‘‘вусид̇ам̣ б̣рахмажарияа’’нд̇и баж̇аанаад̇и. гад̇ам̣ гаран̣ийяанд̇и жад̇уусу сажжзсу жад̇уухи маг̇г̇зхи барин̃н̃аабахаанасажчигирияаабхааванаавасзна сол̣асавид̇хамби гижжам̣ нидтаабид̇анд̇и ад̇т̇о. бут̇уж̇ж̇анагаляаан̣агаад̣̇аяо хи д̇ам̣ гижжам̣ гаронд̇и, кийн̣аасаво гад̇агаран̣ийяо. д̇асмаа арияасааваго ад̇д̇ано гаран̣ийяам̣ бажжавзгканд̇о ‘‘гад̇ам̣ гаран̣ийяа’’нд̇и баж̇аанаад̇и. наабарам̣ ид̇т̇ад̇д̇ааяаад̇и ид̣̇аани буна ид̇т̇абхаавааяа звам̣сол̣асагижжабхаавааяа, гилзсагкаяааяа ваа маг̇г̇абхааванаагижжам̣ мз над̇т̇ийд̇и баж̇аанаад̇и. ат̇а ваа ид̇т̇ад̇д̇ааяаад̇и ид̇т̇абхааваа имасмаа звам̣багаараа ид̣̇аани вад̇д̇амаанагканд̇хасанд̇аанаа абарам̣ канд̇хасанд̇аанам̣ маяхам̣ над̇т̇и, имз бана бан̃жагканд̇хаа барин̃н̃аад̇аа д̇идтанд̇и чиннамуулагаа ругкаа вияа. д̇з жаримагавин̃н̃аан̣анирод̇хзна анубаад̣̇аано вияа ж̇аад̇авзд̣̇о ниб̣б̣ааяиссанд̇ийд̇и баж̇аанаад̇и.
Vusitanti vutthaṃ parivutthaṃ, kataṃ caritaṃ niṭṭhitanti attho. Brahmacariyanti maggabrahmacariyaṃ. Puthujjanakalyāṇakena hi saddhiṃ satta sekkhā maggabrahmacariyaṃ vasanti nāma, khīṇāsavo vutthavāso, tasmā ariyasāvako attano brahmacariyavāsaṃ paccavekkhanto ‘‘vusitaṃ brahmacariya’’nti pajānāti. Kataṃ karaṇīyanti catūsu saccesu catūhi maggehi pariññāpahānasacchikiriyābhāvanāvasena soḷasavidhampi kiccaṃ niṭṭhāpitanti attho. Puthujjanakalyāṇakādayo hi taṃ kiccaṃ karonti, khīṇāsavo katakaraṇīyo. Tasmā ariyasāvako attano karaṇīyaṃ paccavekkhanto ‘‘kataṃ karaṇīya’’nti pajānāti. Nāparaṃ itthattāyāti idāni puna itthabhāvāya evaṃsoḷasakiccabhāvāya, kilesakkhayāya vā maggabhāvanākiccaṃ me natthīti pajānāti. Atha vā itthattāyāti itthabhāvā imasmā evaṃpakārā idāni vattamānakkhandhasantānā aparaṃ khandhasantānaṃ mayhaṃ natthi, ime pana pañcakkhandhā pariññātā tiṭṭhanti chinnamūlakā rukkhā viya. Te carimakaviññāṇanirodhena anupādāno viya jātavedo nibbāyissantīti pajānāti.
24. ад̇д̇аманаа д̇з бхигкуу бхаг̇авад̇о бхаасид̇ам̣ абхинанд̣̇унд̇и д̇з бхигкуу сагаманаа д̇удтаманаа, бийд̇исоманассзхи ваа самад̇д̇аманаа худ̇ваа гаравийгаруд̇аман̃ж̇унаа ган̣н̣асукзна бан̣д̣ид̇аж̇анахад̣̇аяаанам̣ амад̇аабхисзгасад̣̇исзна б̣рахмассарзна бхаасад̇о бхаг̇авад̇о важанам̣ сугат̇ид̇ам̣ сулабид̇ам̣ ‘‘звамзд̇ам̣ бхаг̇аваа, звамзд̇ам̣ суг̇ад̇аа’’д̇и мад̇т̇агзна самбадижчанд̇аа анумод̣̇им̣су жзва самбадижчим̣су жаад̇и ад̇т̇о. аяан̃хи абхинанд̣̇а-сад̣̇д̣̇о ‘‘абхинанд̣̇ад̇и абхивад̣̇ад̇ий’’д̇иаад̣̇ийсу (сам̣. ни. 3.5; 4.114, 118) д̇ан̣хааяаби ааг̇ад̇о. ‘‘аннамзваабхинанд̣̇анд̇и, убхаяз д̣̇звамаанусаа’’д̇иаад̣̇ийсу (сам̣. ни. 1.43) убаг̇аманзби.
24.Attamanā te bhikkhū bhagavato bhāsitaṃ abhinandunti te bhikkhū sakamanā tuṭṭhamanā, pītisomanassehi vā samattamanā hutvā karavīkarutamañjunā kaṇṇasukhena paṇḍitajanahadayānaṃ amatābhisekasadisena brahmassarena bhāsato bhagavato vacanaṃ sukathitaṃ sulapitaṃ ‘‘evametaṃ bhagavā, evametaṃ sugatā’’ti matthakena sampaṭicchantā anumodiṃsu ceva sampaṭicchiṃsu cāti attho. Ayañhi abhinanda-saddo ‘‘abhinandati abhivadatī’’tiādīsu (saṃ. ni. 3.5; 4.114, 118) taṇhāyapi āgato. ‘‘Annamevābhinandanti, ubhaye devamānusā’’tiādīsu (saṃ. ni. 1.43) upagamanepi.
‘‘жираббаваасим̣ бурисам̣, д̣̇уурад̇о сод̇т̇имааг̇ад̇ам̣;
‘‘Cirappavāsiṃ purisaṃ, dūrato sotthimāgataṃ;
н̃аад̇имид̇д̇аа сухаж̇ж̇аа жа, абхинанд̣̇анд̇и ааг̇ад̇а’’нд̇и. (д̇ха. ба. 219; ви. ва. 861) –
Ñātimittā suhajjā ca, abhinandanti āgata’’nti. (dha. pa. 219; vi. va. 861) –
аад̣̇ийсу самбадижчанзби. ‘‘абхинанд̣̇ид̇ваа анумод̣̇ид̇ваа’’д̇иаад̣̇ийсу (ма. ни. 1.205) анумод̣̇анзби. свааяамид̇ха анумод̣̇анасамбадижчанзсу яуж̇ж̇ад̇и. д̇зна вуд̇д̇ам̣ ‘‘анумод̣̇им̣су жзва самбадижчим̣су жаа’’д̇и. анубаад̣̇ааяа аасавзхи жид̇д̇аани вимужжим̣сууд̇и ануббаад̣̇анирод̇хзна нируж̇жхамаанзхи аасавзхи анубаад̣̇ааяа аг̇г̇ахзд̇ваа ган̃жи д̇хаммам̣ ‘‘ахам̣ мамаа’’д̇и анаад̣̇ияид̇ваава жид̇д̇аани вимужжим̣су. ча араханд̇од̇и бхаг̇авад̇аа сад̣̇д̇хим̣ ча ж̇анаа араханд̇о. ан̃н̃зсам̣ бана д̣̇зваб̣рахмаанамби арахад̇д̇аббад̇д̇исамбхавад̇о ид̣̇ам̣ мануссаараханд̇зязва санд̇хааяа вуд̇д̇анд̇и ааха ‘‘ча мануссаа араханд̇о хонд̇ий’’д̇и.
Ādīsu sampaṭicchanepi. ‘‘Abhinanditvā anumoditvā’’tiādīsu (ma. ni. 1.205) anumodanepi. Svāyamidha anumodanasampaṭicchanesu yujjati. Tena vuttaṃ ‘‘anumodiṃsu ceva sampaṭicchiṃsu cā’’ti. Anupādāya āsavehi cittāni vimucciṃsūti anuppādanirodhena nirujjhamānehi āsavehi anupādāya aggahetvā kañci dhammaṃ ‘‘ahaṃ mamā’’ti anādiyitvāva cittāni vimucciṃsu. Cha arahantoti bhagavatā saddhiṃ cha janā arahanto. Aññesaṃ pana devabrahmānampi arahattappattisambhavato idaṃ manussaarahanteyeva sandhāya vuttanti āha ‘‘cha manussā arahanto hontī’’ti.
анад̇д̇алагкан̣асуд̇д̇аван̣н̣анаа нидтид̇аа.
Anattalakkhaṇasuttavaṇṇanā niṭṭhitā.
бан̃жаваг̇г̇ияагат̇аа нидтид̇аа.
Pañcavaggiyakathā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi / 6. бан̃жаваг̇г̇ияагат̇аа • 6. Pañcavaggiyakathā
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / бан̃жаваг̇г̇ияагат̇аа • Pañcavaggiyakathā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / бан̃жаваг̇г̇ияагат̇ааван̣н̣анаа • Pañcavaggiyakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / бан̃жаваг̇г̇ияагат̇ааван̣н̣анаа • Pañcavaggiyakathāvaṇṇanā
