| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
7. අනත්‌තලක්‌ඛණසුත්‌තවණ්‌ණනා
7. Anattalakkhaṇasuttavaṇṇanā
59. සත්‌තමෙ පඤ්‌චවග්‌ගියෙති අඤ්‌ඤාසි කොණ්‌ඩඤ්‌ඤත්‌ථෙරාදිකෙ පඤ්‌ච ජනෙ පුරාණුපට්‌ඨාකෙ. ආමන්‌තෙසීති ආසාළ්‌හිපුණ්‌ණමදිවසෙ ධම්‌මචක්‌කප්‌පවත්‌තනතො පට්‌ඨාය අනුක්‌කමෙන සොතාපත්‌තිඵලෙ පතිට්‌ඨිතෙ ‘‘ඉදානි නෙසං ආසවක්‌ඛයාය ධම්‌මං දෙසෙස්‌සාමී’’ති පඤ්‌චමියං පක්‌ඛස්‌ස ආමන්‌තෙසි. එතදවොචාති එතං ‘‘රූපං, භික්‌ඛවෙ, අනත්‌තා’’තිආදිනයප්‌පවත්‌තං අනත්‌තලක්‌ඛණසුත්‌තං අවොච. තත්‌ථ අනත්‌තාති පුබ්‌බෙ වුත්‌තෙහි චතූහි කාරණෙහි අනත්‌තා. තං කිං මඤ්‌ඤථ, භික්‌ඛවෙති ඉදං කස්‌මා ආරද්‌ධං? එත්‌තකෙන ඨානෙන අනත්‌තලක්‌ඛණමෙව කථිතං, න අනිච්‌චදුක්‌ඛලක්‌ඛණානි, ඉදානි තානි දස්‌සෙත්‌වා සමොධානෙත්‌වා තීණිපි ලක්‌ඛණානි දස්‌සෙතුං ඉදමාරද්‌ධන්‌ති වෙදිතබ්‌බං. තස්‌මාති යස්‌මා ඉමෙ පඤ්‌චක්‌ඛන්‌ධා අනිච්‌චා දුක්‌ඛා අනත්‌තා, තස්‌මා. යංකිඤ්‌චි රූපන්‌තිආදීසු විත්‌ථාරකථා විසුද්‌ධිමග්‌ගෙ පඤ්‌ඤාභාවනාධිකාරෙ ඛන්‌ධනිද්‌දෙසෙ වුත්‌තාව. සෙසං සබ්‌බත්‌ථ වුත්‌තානුසාරෙනෙව වෙදිතබ්‌බං. ඉමස්‌මිං පන සුත්‌තෙ අනත්‌තලක්‌ඛණමෙව කථිතන්‌ති. සත්‌තමං.
59. Sattame pañcavaggiyeti aññāsi koṇḍaññattherādike pañca jane purāṇupaṭṭhāke. Āmantesīti āsāḷhipuṇṇamadivase dhammacakkappavattanato paṭṭhāya anukkamena sotāpattiphale patiṭṭhite ‘‘idāni nesaṃ āsavakkhayāya dhammaṃ desessāmī’’ti pañcamiyaṃ pakkhassa āmantesi. Etadavocāti etaṃ ‘‘rūpaṃ, bhikkhave, anattā’’tiādinayappavattaṃ anattalakkhaṇasuttaṃ avoca. Tattha anattāti pubbe vuttehi catūhi kāraṇehi anattā. Taṃ kiṃ maññatha, bhikkhaveti idaṃ kasmā āraddhaṃ? Ettakena ṭhānena anattalakkhaṇameva kathitaṃ, na aniccadukkhalakkhaṇāni, idāni tāni dassetvā samodhānetvā tīṇipi lakkhaṇāni dassetuṃ idamāraddhanti veditabbaṃ. Tasmāti yasmā ime pañcakkhandhā aniccā dukkhā anattā, tasmā. Yaṃkiñci rūpantiādīsu vitthārakathā visuddhimagge paññābhāvanādhikāre khandhaniddese vuttāva. Sesaṃ sabbattha vuttānusāreneva veditabbaṃ. Imasmiṃ pana sutte anattalakkhaṇameva kathitanti. Sattamaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 7. අනත්‌තලක්‌ඛණසුත්‌තං • 7. Anattalakkhaṇasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7. අනත්‌තලක්‌ඛණසුත්‌තවණ්‌ණනා • 7. Anattalakkhaṇasuttavaṇṇanā
