| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၁၄. အနတ္တာနုပသ္သီသုတ္တံ
14. Anattānupassīsuttaṃ
၁၄၉. သာဝတ္ထိနိဒာနံ ။ ‘‘သဒ္ဓာပဗ္ဗဇိတသ္သ, ဘိက္ခဝေ, ကုလပုတ္တသ္သ အယမနုဓမ္မော ဟောတိ – ယံ ရူပေ အနတ္တာနုပသ္သီ ဝိဟရေယ္ယ။ ဝေဒနာယ။ သညာယ။ သင္ခာရေသု။ ဝိညာဏေ အနတ္တာနုပသ္သီ ဝိဟရေယ္ယ။ (သော ရူပေ) အနတ္တာနုပသ္သီ ဝိဟရန္တော, ဝေဒနာယ။ သညာယ။ သင္ခာရေသု။ ဝိညာဏေ အနတ္တာနုပသ္သီ ဝိဟရန္တော ရူပံ ပရိဇာနာတိ, ဝေဒနံ။ပေ.။ သညံ။ သင္ခာရေ။ ဝိညာဏံ ပရိဇာနာတိ။ သော ရူပံ ပရိဇာနံ ဝေဒနံ ပရိဇာနံ သညံ ပရိဇာနံ သင္ခာရေ ပရိဇာနံ ဝိညာဏံ ပရိဇာနံ ပရိမုစ္စတိ ရူပမ္ဟာ, ပရိမုစ္စတိ ဝေဒနာယ, ပရိမုစ္စတိ သညာယ, ပရိမုစ္စတိ သင္ခာရေဟိ, ပရိမုစ္စတိ ဝိညာဏမ္ဟာ , ပရိမုစ္စတိ ဇာတိယာ ဇရာယ မရဏေန သောကေဟိ ပရိဒေဝေဟိ ဒုက္ခေဟိ ဒောမနသ္သေဟိ ဥပာယာသေဟိ; ‘ပရိမုစ္စတိ ဒုက္ခသ္မာ’တိ ဝဒာမီ’’တိ။ စုဒ္ဒသမံ။
149. Sāvatthinidānaṃ . ‘‘Saddhāpabbajitassa, bhikkhave, kulaputtassa ayamanudhammo hoti – yaṃ rūpe anattānupassī vihareyya. Vedanāya… saññāya… saṅkhāresu… viññāṇe anattānupassī vihareyya. (So rūpe) anattānupassī viharanto, vedanāya… saññāya… saṅkhāresu… viññāṇe anattānupassī viharanto rūpaṃ parijānāti, vedanaṃ…pe… saññaṃ… saṅkhāre… viññāṇaṃ parijānāti. So rūpaṃ parijānaṃ vedanaṃ parijānaṃ saññaṃ parijānaṃ saṅkhāre parijānaṃ viññāṇaṃ parijānaṃ parimuccati rūpamhā, parimuccati vedanāya, parimuccati saññāya, parimuccati saṅkhārehi, parimuccati viññāṇamhā , parimuccati jātiyā jarāya maraṇena sokehi paridevehi dukkhehi domanassehi upāyāsehi; ‘parimuccati dukkhasmā’ti vadāmī’’ti. Cuddasamaṃ.
ကုက္ကုဠဝဂ္ဂော စုဒ္ဒသမော။
Kukkuḷavaggo cuddasamo.
တသ္သုဒ္ဒာနံ –
Tassuddānaṃ –
ကုက္ကုဠာ တယော အနိစ္စေန၊ ဒုက္ခေန အပရေ တယော။
Kukkuḷā tayo aniccena, dukkhena apare tayo;
အနတ္တေန တယော ဝုတ္တာ၊ ကုလပုတ္တေန ဒ္ဝေ ဒုကာတိ။
Anattena tayo vuttā, kulaputtena dve dukāti.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁-၁၃. ကုက္ကုဠသုတ္တာဒိဝဏ္ဏနာ • 1-13. Kukkuḷasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁-၁၄. ကုက္ကုဠသုတ္တာဒိဝဏ္ဏနာ • 1-14. Kukkuḷasuttādivaṇṇanā
