| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
ஆணத்திகதா²வண்ணனா
Āṇattikathāvaṇṇanā
121. ஆணத்திகதா²யங் அஸம்மோஹத்த²ந்தி யஸ்மா ஸங்கேதகம்மனிமித்தகம்மானி கரொந்தோ ந கேவலங் புரேப⁴த்தாதி³காலஸங்கேதகம்மங் அக்கி²னிக²ணனாதி³னிமித்தகம்மமேவ வா கரோதி, அத² கோ² ஏவங்வண்ணஸண்டா²னப⁴ண்ட³ங் க³ண்ஹாதி, ப⁴ண்ட³னியமம்பி கரோதி, த்வங் இத்த²ன்னாமஸ்ஸ பாவத³, ஸோ அஞ்ஞஸ்ஸ பாவத³தூதிஆதி³னா புக்³க³லபடிபாடியா ச ஆணாபேதி, தஸ்மா புப்³ப³ண்ஹாதி³காலவஸேன அக்கி²னிக²ணனாதி³கிரியாவஸேன ப⁴ண்ட³புக்³க³லபடிபாடிவஸேன ச ஆணத்தே ஏதேஸு ஸங்கேதகம்மனிமித்தகம்மேஸு விஸங்கேதா விஸங்கேதபா⁴வே ஸம்மோஹோ ஜாயதி, தத³பக³மேன அஸம்மோஹத்த²ங். யங் ஆணாபகேன நிமித்தஸஞ்ஞங் கத்வா வுத்தந்தி புப்³ப³ண்ஹாதீ³ஸு அக்கி²னிக²ணனாதீ³ஸு வா க³ஹணத்த²ங் ஆணாபெந்தேன ஈதி³ஸவண்ணஸண்டா²னாதி³யுத்தங் க³ண்ஹாதி ஏவங் க³ஹணஸ்ஸ நிமித்தபூ⁴தஸஞ்ஞாணங் கத்வா யங் ப⁴ண்ட³ங் வுத்தங். அயங் யுத்தி ஸப்³ப³த்தா²தி ஹெட்டா² வுத்தேஸு உபரி வக்க²மானேஸு ச ஸப்³ப³த்த² ஆணத்திப்பஸங்கே³ஸு ஆணத்திக்க²ணேயேவ பாராஜிகாதீ³னங் பா⁴வஸங்கா²தா வினயயுத்தி, ஸா ச ஆணத்தஸ்ஸ கிரியானிட்டா²பனக்க²ணே ஆணாபகஸ்ஸ பயோகே³ தெ²ய்யசித்தானங் அபா⁴வா ஆணத்திக்க²ணே ஏகா ஏவ ஆபத்தி ஹோதீதி ஏவங் உபபத்தியா பவத்தத்தா யுத்தீதி வுத்தா. ‘‘மூலட்ட²ஸ்ஸ து²ல்லச்சய’’ந்தி வுத்தத்தா ஸங்க⁴ரக்கி²தேன படிக்³க³ஹிதேபி பு³த்³த⁴ரக்கி²தத⁴ம்மரக்கி²தானங் து³க்கடமேவ, கஸ்மா பனெத்த² ஆசரியஸ்ஸ து²ல்லச்சயந்தி ஆஹ ‘‘மஹாஜனோ ஹீ’’திஆதி³. மஹாஜனோதி ச பு³த்³த⁴ரக்கி²தத⁴ம்மரக்கி²தஸங்க⁴ரக்கி²தே ஸந்தா⁴ய வுத்தங். மூலட்ட²ஸ்ஸேவ து³க்கடந்தி பு³த்³த⁴ரக்கி²தஸ்ஸ து³க்கடங். இத³ஞ்ச மூலட்ட²ஸ்ஸ து²ல்லச்சயாபா⁴வத³ஸ்ஸனத்த²ங் பட²மங் ஆணத்திக்க²ணே து³க்கடங் ஸந்தா⁴ய வுத்தங், ந பன ஸங்க⁴ரக்கி²தஸ்ஸ படிக்³க³ஹணபச்சயா புன து³க்கடஸம்ப⁴வங் ஸந்தா⁴ய. ந ஹி ஸோ ஏகபயோகே³ன து³க்கடத்³வயங் ஆபஜ்ஜதி. கேசி பன ‘‘விஸங்கேதத்தா பாளியங் ‘மூலட்ட²ஸ்ஸா’தி அவத்வா ‘படிக்³க³ண்ஹாதி, ஆபத்தி து³க்கடஸ்ஸா’தி ஸாமஞ்ஞேன வுத்தத்தா இத³ங் ஸங்க⁴ரக்கி²தஸ்ஸ து³க்கடங் ஸந்தா⁴ய வுத்த’’ந்தி வத³ந்தி, தங் கிஞ்சாபி அட்ட²கதா²ய ந ஸமேதி, பாளிதோ பன யுத்தங் விய தி³ஸ்ஸதி. ந ஹி தஸ்ஸ படிக்³க³ஹணப்பயோகே³ அனாபத்தி ஹோதீதி. இமினாவ ஹெட்டா² ஆக³தவாரேஸுபி படிக்³க³ண்ஹந்தானங் து³க்கடங் வேதி³தப்³ப³ங். ‘‘பண்ணே வா ஸிலாதீ³ஸு வா ‘சோரியங் காதப்³ப³’ந்தி லிகி²த்வா ட²பிதே பாராஜிகமேவா’’தி கேசி வத³ந்தி, தங் பன ‘‘அஸுகஸ்ஸ கே³ஹே ப⁴ண்ட³’’ந்தி ஏவங் நியமெத்வா லிகி²தே யுஜ்ஜதி, ந அனியமெத்வா லிகி²தேதி வீமங்ஸிதப்³ப³ங். மக்³கா³னந்தரப²லஸதி³ஸாதி இமினா யதா² அரியபுக்³க³லானங் மக்³கா³னந்தரே ப²லே உப்பன்னே கிலேஸபடிப்பஸ்ஸத்³தி⁴பரியோஸானங் பா⁴வனாகிச்சங் நிப்ப²ன்னங் நாம ஹோதி, ஏவமேதிஸ்ஸா அத்த²ஸாத⁴கசேதனாய உப்பன்னாய ஆணத்திகிச்சங் நிப்ப²ன்னமேவாதி த³ஸ்ஸேதி, தேனாஹ ‘‘தஸ்மா அயங் ஆணத்திக்க²ணேயேவ பாராஜிகோ’’தி, ஆணத்திவசீபயோக³ஸமுட்டா²பகசேதனாக்க²ணேயேவ பாராஜிகோ ஹோதீதி அத்தோ².
121. Āṇattikathāyaṃ asammohatthanti yasmā saṅketakammanimittakammāni karonto na kevalaṃ purebhattādikālasaṅketakammaṃ akkhinikhaṇanādinimittakammameva vā karoti, atha kho evaṃvaṇṇasaṇṭhānabhaṇḍaṃ gaṇhāti, bhaṇḍaniyamampi karoti, tvaṃ itthannāmassa pāvada, so aññassa pāvadatūtiādinā puggalapaṭipāṭiyā ca āṇāpeti, tasmā pubbaṇhādikālavasena akkhinikhaṇanādikiriyāvasena bhaṇḍapuggalapaṭipāṭivasena ca āṇatte etesu saṅketakammanimittakammesu visaṅketā visaṅketabhāve sammoho jāyati, tadapagamena asammohatthaṃ. Yaṃ āṇāpakena nimittasaññaṃ katvā vuttanti pubbaṇhādīsu akkhinikhaṇanādīsu vā gahaṇatthaṃ āṇāpentena īdisavaṇṇasaṇṭhānādiyuttaṃ gaṇhāti evaṃ gahaṇassa nimittabhūtasaññāṇaṃ katvā yaṃ bhaṇḍaṃ vuttaṃ. Ayaṃ yutti sabbatthāti heṭṭhā vuttesu upari vakkhamānesu ca sabbattha āṇattippasaṅgesu āṇattikkhaṇeyeva pārājikādīnaṃ bhāvasaṅkhātā vinayayutti, sā ca āṇattassa kiriyāniṭṭhāpanakkhaṇe āṇāpakassa payoge theyyacittānaṃ abhāvā āṇattikkhaṇe ekā eva āpatti hotīti evaṃ upapattiyā pavattattā yuttīti vuttā. ‘‘Mūlaṭṭhassa thullaccaya’’nti vuttattā saṅgharakkhitena paṭiggahitepi buddharakkhitadhammarakkhitānaṃ dukkaṭameva, kasmā panettha ācariyassa thullaccayanti āha ‘‘mahājano hī’’tiādi. Mahājanoti ca buddharakkhitadhammarakkhitasaṅgharakkhite sandhāya vuttaṃ. Mūlaṭṭhasseva dukkaṭanti buddharakkhitassa dukkaṭaṃ. Idañca mūlaṭṭhassa thullaccayābhāvadassanatthaṃ paṭhamaṃ āṇattikkhaṇe dukkaṭaṃ sandhāya vuttaṃ, na pana saṅgharakkhitassa paṭiggahaṇapaccayā puna dukkaṭasambhavaṃ sandhāya. Na hi so ekapayogena dukkaṭadvayaṃ āpajjati. Keci pana ‘‘visaṅketattā pāḷiyaṃ ‘mūlaṭṭhassā’ti avatvā ‘paṭiggaṇhāti, āpatti dukkaṭassā’ti sāmaññena vuttattā idaṃ saṅgharakkhitassa dukkaṭaṃ sandhāya vutta’’nti vadanti, taṃ kiñcāpi aṭṭhakathāya na sameti, pāḷito pana yuttaṃ viya dissati. Na hi tassa paṭiggahaṇappayoge anāpatti hotīti. Imināva heṭṭhā āgatavāresupi paṭiggaṇhantānaṃ dukkaṭaṃ veditabbaṃ. ‘‘Paṇṇe vā silādīsu vā ‘coriyaṃ kātabba’nti likhitvā ṭhapite pārājikamevā’’ti keci vadanti, taṃ pana ‘‘asukassa gehe bhaṇḍa’’nti evaṃ niyametvā likhite yujjati, na aniyametvā likhiteti vīmaṃsitabbaṃ. Maggānantaraphalasadisāti iminā yathā ariyapuggalānaṃ maggānantare phale uppanne kilesapaṭippassaddhipariyosānaṃ bhāvanākiccaṃ nipphannaṃ nāma hoti, evametissā atthasādhakacetanāya uppannāya āṇattikiccaṃ nipphannamevāti dasseti, tenāha ‘‘tasmā ayaṃ āṇattikkhaṇeyeva pārājiko’’ti, āṇattivacīpayogasamuṭṭhāpakacetanākkhaṇeyeva pārājiko hotīti attho.
ஆணத்திகதா²வண்ணனானயோ நிட்டி²தோ.
Āṇattikathāvaṇṇanānayo niṭṭhito.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஆணத்திகதா²வண்ணனா • Āṇattikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பூ⁴மட்ட²கதா²தி³வண்ணனா • Bhūmaṭṭhakathādivaṇṇanā
