| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၈. အနဝသေသသိက္ခာပဒပဉ္ဟော
8. Anavasesasikkhāpadapañho
၈. ‘‘ဘန္တေ နာဂသေန, ယေ တေ အဟေသုံ တိကိစ္ဆကာနံ ပုဗ္ဗကာ အာစရိယာ သေယ္ယထိဒံ, နာရဒော ဓမ္မန္တရီ 1 အင္ဂိရသော ကပိလော ကဏ္ဍရဂ္ဂိ သာမော အတုလော ပုဗ္ဗကစ္စာယနော, သဗ္ဗေပေတေ အာစရိယာ သကိံ ယေဝ ရောဂုပ္ပတ္တိဉ္စ နိဒာနဉ္စ သဘာဝဉ္စ သမုဋ္ဌာနဉ္စ တိကိစ္ဆဉ္စ ကိရိယဉ္စ သိဒ္ဓာသိဒ္ဓဉ္စ သဗ္ဗံ တံ 2 နိရဝသေသံ ဇာနိတ္ဝာ ‘ဣမသ္မိံ ကာယေ ဧတ္တကာ ရောဂာ ဥပ္ပဇ္ဇိသ္သန္တီ’တိ ဧကပ္ပဟာရေန ကလာပဂ္ဂာဟံ ကရိတ္ဝာ သုတ္တံ ဗန္ဓိံသု, အသဗ္ဗညုနော ဧတေ သဗ္ဗေ, ကိသ္သ ပန တထာဂတော သဗ္ဗညူ သမာနော အနာဂတံ ကိရိယံ ဗုဒ္ဓဉာဏေန ဇာနိတ္ဝာ ‘ဧတ္တကေ နာမ ဝတ္ထုသ္မိံ ဧတ္တကံ နာမ သိက္ခာပဒံ ပညပေတဗ္ဗံ ဘဝိသ္သတီ’တိ ပရိစ္ဆိန္ဒိတ္ဝာ အနဝသေသတော သိက္ခာပဒံ န ပညပေသိ, ဥပ္ပန္နုပ္ပန္နေ ဝတ္ထုသ္မိံ အယသေ ပာကဋေ ဒောသေ ဝိတ္ထာရိကေ ပုထုဂတေ ဥဇ္ဈာယန္တေသု မနုသ္သေသု တသ္မိံ တသ္မိံ ကာလေ သာဝကာနံ သိက္ခာပဒံ ပညပေသီ’’တိ?
8. ‘‘Bhante nāgasena, ye te ahesuṃ tikicchakānaṃ pubbakā ācariyā seyyathidaṃ, nārado dhammantarī 3 aṅgiraso kapilo kaṇḍaraggi sāmo atulo pubbakaccāyano, sabbepete ācariyā sakiṃ yeva roguppattiñca nidānañca sabhāvañca samuṭṭhānañca tikicchañca kiriyañca siddhāsiddhañca sabbaṃ taṃ 4 niravasesaṃ jānitvā ‘imasmiṃ kāye ettakā rogā uppajjissantī’ti ekappahārena kalāpaggāhaṃ karitvā suttaṃ bandhiṃsu, asabbaññuno ete sabbe, kissa pana tathāgato sabbaññū samāno anāgataṃ kiriyaṃ buddhañāṇena jānitvā ‘ettake nāma vatthusmiṃ ettakaṃ nāma sikkhāpadaṃ paññapetabbaṃ bhavissatī’ti paricchinditvā anavasesato sikkhāpadaṃ na paññapesi, uppannuppanne vatthusmiṃ ayase pākaṭe dose vitthārike puthugate ujjhāyantesu manussesu tasmiṃ tasmiṃ kāle sāvakānaṃ sikkhāpadaṃ paññapesī’’ti?
‘‘ဉာတမေတံ, မဟာရာဇ, တထာဂတသ္သ ‘ဣမသ္မိံ သမယေ ဣမေသု မနုသ္သေသု သာဓိကံ ဒိယဍ္ဎသိက္ခာပဒသတံ ပညပေတဗ္ဗံ ဘဝိသ္သတီ’တိ, အပိ စ တထာဂတသ္သ ဧဝံ အဟောသိ ‘သစေ ခော အဟံ သာဓိကံ ဒိယဍ္ဎသိက္ခာပဒသတံ ဧကပ္ပဟာရံ ပညပေသ္သာမိ, မဟာဇနော သန္တာသမာပဇ္ဇိသ္သတိ ‘ဗဟုကံ ဣဓ ရက္ခိတဗ္ဗံ, ဒုက္ကရံ ဝတ ဘော သမဏသ္သ ဂောတမသ္သ သာသနေ ပဗ္ဗဇိတု’န္တိ, ပဗ္ဗဇိတုကာမာပိ န ပဗ္ဗဇိသ္သန္တိ, ဝစနဉ္စ မေ န သဒ္ဒဟိသ္သန္တိ, အသဒ္ဒဟန္တာ တေ မနုသ္သာ အပာယဂာမိနော ဘဝိသ္သန္န-တိ ဥပ္ပန္နုပ္ပန္နေ ဝတ္ထုသ္မိံ ဓမ္မဒေသနာယ ဝိညာပေတ္ဝာ ပာကဋေ ဒောသေ သိက္ခာပဒံ ပညပေသ္သာမီ’’’တိ။ ‘‘အစ္ဆရိယံ, ဘန္တေ နာဂသေန, ဗုဒ္ဓာနံ, အဗ္ဘုတံ, ဘန္တေ နာဂသေန, ဗုဒ္ဓာနံ, ယာဝ မဟန္တံ တထာဂတသ္သ သဗ္ဗညုတဉာဏံ, ဧဝမေတံ, ဘန္တေ နာဂသေန, သုနိဒ္ဒိဋ္ဌော ဧသော အတ္ထော တထာဂတေန, ‘ဗဟုကံ ဣဓ သိက္ခိတဗ္ဗ’န္တိ သုတ္ဝာ သတ္တာနံ သန္တာသော ဥပ္ပဇ္ဇေယ္ယ, ဧကောပိ ဇိနသာသနေ န ပဗ္ဗဇေယ္ယ, ဧဝမေတံ တထာ သမ္ပဋိစ္ဆာမီ’’တိ။
‘‘Ñātametaṃ, mahārāja, tathāgatassa ‘imasmiṃ samaye imesu manussesu sādhikaṃ diyaḍḍhasikkhāpadasataṃ paññapetabbaṃ bhavissatī’ti, api ca tathāgatassa evaṃ ahosi ‘sace kho ahaṃ sādhikaṃ diyaḍḍhasikkhāpadasataṃ ekappahāraṃ paññapessāmi, mahājano santāsamāpajjissati ‘bahukaṃ idha rakkhitabbaṃ, dukkaraṃ vata bho samaṇassa gotamassa sāsane pabbajitu’nti, pabbajitukāmāpi na pabbajissanti, vacanañca me na saddahissanti, asaddahantā te manussā apāyagāmino bhavissanna-ti uppannuppanne vatthusmiṃ dhammadesanāya viññāpetvā pākaṭe dose sikkhāpadaṃ paññapessāmī’’’ti. ‘‘Acchariyaṃ, bhante nāgasena, buddhānaṃ, abbhutaṃ, bhante nāgasena, buddhānaṃ, yāva mahantaṃ tathāgatassa sabbaññutañāṇaṃ, evametaṃ, bhante nāgasena, suniddiṭṭho eso attho tathāgatena, ‘bahukaṃ idha sikkhitabba’nti sutvā sattānaṃ santāso uppajjeyya, ekopi jinasāsane na pabbajeyya, evametaṃ tathā sampaṭicchāmī’’ti.
အနဝသေသသိက္ခာပဒပဉ္ဟော အဋ္ဌမော။
Anavasesasikkhāpadapañho aṭṭhamo.
Footnotes:
