| Library / Tipiṭaka / д̇ибидага • Tipiṭaka / ид̇ивуд̇д̇ага-адтагат̇аа • Itivuttaka-aṭṭhakathā |
8. анд̇хагаран̣асуд̇д̇аван̣н̣анаа
8. Andhakaraṇasuttavaṇṇanā
87. адтамз агусалавид̇аггаад̇и агосалласамбхууд̇аа вид̇аггаа. анд̇хагаран̣аад̇иаад̣̇ийсу яасса саяам̣ уббаж̇ж̇анд̇и, д̇ам̣ яат̇аабхууд̇ад̣̇ассананивааран̣зна анд̇хам̣ гаронд̇ийд̇и анд̇хагаран̣аа. на бан̃н̃аажагкум̣ гаронд̇ийд̇и ажагкугаран̣аа. ан̃н̃аан̣ам̣ гаронд̇ийд̇и ан̃н̃аан̣агаран̣аа. бан̃н̃аанирод̇хигаад̇и гаммассагад̇аабан̃н̃аа, жхаанабан̃н̃аа, вибассанаабан̃н̃аад̇и имаа д̇иссо бан̃н̃аа аббавад̇д̇игаран̣зна нирод̇хзнд̇ийд̇и бан̃н̃аанирод̇хигаа. анидтапалад̣̇ааяагад̇д̇аа д̣̇угкасан̇каад̇асса вигхаад̇асса багкз вад̇д̇анд̇ийд̇и вигхаад̇абагкигаа. гилзсаниб̣б̣аанам̣ на сам̣вад̇д̇аяанд̇ийд̇и аниб̣б̣аанасам̣вад̇д̇анигаа.
87. Aṭṭhame akusalavitakkāti akosallasambhūtā vitakkā. Andhakaraṇātiādīsu yassa sayaṃ uppajjanti, taṃ yathābhūtadassananivāraṇena andhaṃ karontīti andhakaraṇā. Na paññācakkhuṃ karontīti acakkhukaraṇā. Aññāṇaṃ karontīti aññāṇakaraṇā. Paññānirodhikāti kammassakatāpaññā, jhānapaññā, vipassanāpaññāti imā tisso paññā appavattikaraṇena nirodhentīti paññānirodhikā. Aniṭṭhaphaladāyakattā dukkhasaṅkhātassa vighātassa pakkhe vattantīti vighātapakkhikā. Kilesanibbānaṃ na saṃvattayantīti anibbānasaṃvattanikā.
гаамавид̇аггод̇и гаамабадисам̣яуд̇д̇о вид̇агго. со хи гилзсагаамасахид̇о худ̇ваа вад̇т̇угаамзсу бавад̇д̇ад̇и. б̣яаабаад̣̇абадисам̣яуд̇д̇о вид̇агго б̣яаабаад̣̇авид̇агго. вихим̣саабадисам̣яуд̇д̇о вид̇агго вихим̣саавид̇агго. имз д̣̇вз жа сад̇д̇зсуби сан̇каарзсуби уббаж̇ж̇анд̇и. гаамавид̇агго хи бияаманаабз сад̇д̇з ваа сан̇каарз ваа вид̇аггзнд̇асса уббаж̇ж̇ад̇и, б̣яаабаад̣̇авид̇агго аббияз аманаабз сад̇д̇з ваа сан̇каарз ваа гуж̇жхид̇ваа ологанагаалад̇о бадтааяа яаава наасанаа уббаж̇ж̇ад̇и, вихим̣саавид̇агго сан̇каарзсу на уббаж̇ж̇ад̇и, сан̇каараа д̣̇угкаабзд̇аб̣б̣аа наама над̇т̇и, ‘‘имз сад̇д̇аа хан̃н̃анд̇у ваа б̣аж̇жханд̇у ваа ужчиж̇ж̇анд̇у ваа винассанд̇у ваа маа ваа ахзсу’’нд̇и жинд̇анагаалз бана сад̇д̇зсу уббаж̇ж̇ад̇и.
Kāmavitakkoti kāmapaṭisaṃyutto vitakko. So hi kilesakāmasahito hutvā vatthukāmesu pavattati. Byāpādapaṭisaṃyutto vitakko byāpādavitakko. Vihiṃsāpaṭisaṃyutto vitakko vihiṃsāvitakko. Ime dve ca sattesupi saṅkhāresupi uppajjanti. Kāmavitakko hi piyamanāpe satte vā saṅkhāre vā vitakkentassa uppajjati, byāpādavitakko appiye amanāpe satte vā saṅkhāre vā kujjhitvā olokanakālato paṭṭhāya yāva nāsanā uppajjati, vihiṃsāvitakko saṅkhāresu na uppajjati, saṅkhārā dukkhāpetabbā nāma natthi, ‘‘ime sattā haññantu vā bajjhantu vā ucchijjantu vā vinassantu vā mā vā ahesu’’nti cintanakāle pana sattesu uppajjati.
имзязва бана гаамасан̇габбаад̣̇аяо. ад̇т̇ад̇о хи гаамавид̇аггаад̣̇ийнам̣ гаамасан̇габбаад̣̇ийнан̃жа наанаагаран̣ам̣ над̇т̇и, д̇ам̣самбаяуд̇д̇аа бана сан̃н̃аад̣̇аяо гаамасан̃н̃аад̣̇аяо. гаамад̇хаад̇уаад̣̇ийнам̣ бана яасмаа баал̣ияам̣ –
Imeyeva pana kāmasaṅkappādayo. Atthato hi kāmavitakkādīnaṃ kāmasaṅkappādīnañca nānākaraṇaṃ natthi, taṃsampayuttā pana saññādayo kāmasaññādayo. Kāmadhātuādīnaṃ pana yasmā pāḷiyaṃ –
‘‘гаамабадисам̣яуд̇д̇о д̇агго вид̇агго…бз… мижчаасан̇габбо, аяам̣ вужжад̇и гаамад̇хаад̇у, саб̣б̣зби агусалаа д̇хаммаа гаамад̇хаад̇у. б̣яаабаад̣̇абадисам̣яуд̇д̇о д̇агго вид̇агго…бз… мижчаасан̇габбо, аяам̣ вужжад̇и б̣яаабаад̣̇ад̇хаад̇у. д̣̇асасу аагхаад̇авад̇т̇уусу жид̇д̇асса аагхаад̇о бадигхаад̇о…бз… анад̇д̇аманад̇аа жид̇д̇асса, аяам̣ вужжад̇и б̣яаабаад̣̇ад̇хаад̇у. вихим̣саабадисам̣яуд̇д̇о д̇агго вид̇агго мижчаасан̇габбо , аяам̣ вужжад̇и вихим̣саад̇хаад̇у. ид̇хзгажжо баан̣инаа ваа лзд̣д̣унаа ваа д̣̇ан̣д̣зна ваа сад̇т̇зна ваа раж̇ж̇уяаа ваа ан̃н̃ад̇аран̃н̃ад̇арзна сад̇д̇з вихзтзд̇и, аяам̣ вихим̣саад̇хаад̇уу’’д̇и (вибха. 182, 910) –
‘‘Kāmapaṭisaṃyutto takko vitakko…pe… micchāsaṅkappo, ayaṃ vuccati kāmadhātu, sabbepi akusalā dhammā kāmadhātu. Byāpādapaṭisaṃyutto takko vitakko…pe… micchāsaṅkappo, ayaṃ vuccati byāpādadhātu. Dasasu āghātavatthūsu cittassa āghāto paṭighāto…pe… anattamanatā cittassa, ayaṃ vuccati byāpādadhātu. Vihiṃsāpaṭisaṃyutto takko vitakko micchāsaṅkappo , ayaṃ vuccati vihiṃsādhātu. Idhekacco pāṇinā vā leḍḍunā vā daṇḍena vā satthena vā rajjuyā vā aññataraññatarena satte viheṭheti, ayaṃ vihiṃsādhātū’’ti (vibha. 182, 910) –
ааг̇ад̇ад̇д̇аа висзсо лаб̣бхад̇и.
Āgatattā viseso labbhati.
д̇ад̇т̇а д̣̇вз гат̇аа саб̣б̣асан̇г̇аахигаа жа асамбхиннаа жа. д̇ад̇т̇а гаамад̇хаад̇уяаа г̇ахид̇ааяа ид̇араа д̣̇взби г̇ахид̇аа наама хонд̇и. д̇ад̇о бана нийхарид̇ваа аяам̣ б̣яаабаад̣̇ад̇хаад̇у, аяам̣ вихим̣саад̇хаад̇ууд̇и д̣̇ассзд̇ийд̇и аяам̣ саб̣б̣асан̇г̇аахигаа наама. гаамад̇хаад̇ум̣ гат̇знд̇о бана бхаг̇аваа б̣яаабаад̣̇ад̇хаад̇ум̣ б̣яаабаад̣̇ад̇хаад̇удтаанз , вихим̣саад̇хаад̇ум̣ вихим̣саад̇хаад̇удтаанз табзд̇ваава авасзсам̣ гаамад̇хаад̇у наамаад̇и гат̇зсийд̇и аяам̣ асамбхиннагат̇аа наама.
Tattha dve kathā sabbasaṅgāhikā ca asambhinnā ca. Tattha kāmadhātuyā gahitāya itarā dvepi gahitā nāma honti. Tato pana nīharitvā ayaṃ byāpādadhātu, ayaṃ vihiṃsādhātūti dassetīti ayaṃ sabbasaṅgāhikā nāma. Kāmadhātuṃ kathento pana bhagavā byāpādadhātuṃ byāpādadhātuṭṭhāne , vihiṃsādhātuṃ vihiṃsādhātuṭṭhāne ṭhapetvāva avasesaṃ kāmadhātu nāmāti kathesīti ayaṃ asambhinnakathā nāma.
суггабагкз вуд̇д̇авибарияааязна ад̇т̇о взд̣̇ид̇аб̣б̣о. нзгкаммабадисам̣яуд̇д̇о вид̇агго нзгкаммавид̇агго. со асубхабуб̣б̣абхааг̇з гаамааважаро ход̇и, асубхаж̇жхаанз руубааважаро, д̇ам̣ жхаанам̣ баад̣̇агам̣ гад̇ваа уббаннамаг̇г̇апалагаалз логуд̇д̇аро. аб̣яаабаад̣̇абадисам̣яуд̇д̇о вид̇агго аб̣яаабаад̣̇авид̇агго. со мзд̇д̇аабуб̣б̣абхааг̇з гаамааважаро ход̇и, мзд̇д̇аажхаанз руубааважаро, д̇ам̣ жхаанам̣ баад̣̇агам̣ гад̇ваа уббаннамаг̇г̇апалагаалз логуд̇д̇аро. авихим̣саабадисам̣яуд̇д̇о вид̇агго авихим̣саавид̇агго. со гарун̣аабуб̣б̣абхааг̇з гаамааважаро, гарун̣ааж̇жхаанз руубааважаро, д̇ам̣ жхаанам̣ баад̣̇агам̣ гад̇ваа уббаннамаг̇г̇апалагаалз логуд̇д̇аро. яад̣̇аа бана алобхо сийсам̣ ход̇и, д̇ад̣̇аа ид̇арз д̣̇вз д̇ад̣̇анвааяигаа хонд̇и. яад̣̇аа мзд̇д̇аа сийсам̣ ход̇и, д̇ад̣̇аа ид̇арз д̣̇вз д̇ад̣̇анвааяигаа хонд̇и. яад̣̇аа гарун̣аа сийсам̣ ход̇и, д̇ад̣̇аа ид̇арз д̣̇вз д̇ад̣̇анвааяигаа хонд̇и.
Sukkapakkhe vuttavipariyāyena attho veditabbo. Nekkhammapaṭisaṃyutto vitakko nekkhammavitakko. So asubhapubbabhāge kāmāvacaro hoti, asubhajjhāne rūpāvacaro, taṃ jhānaṃ pādakaṃ katvā uppannamaggaphalakāle lokuttaro. Abyāpādapaṭisaṃyutto vitakko abyāpādavitakko. So mettāpubbabhāge kāmāvacaro hoti, mettājhāne rūpāvacaro, taṃ jhānaṃ pādakaṃ katvā uppannamaggaphalakāle lokuttaro. Avihiṃsāpaṭisaṃyutto vitakko avihiṃsāvitakko. So karuṇāpubbabhāge kāmāvacaro, karuṇājjhāne rūpāvacaro, taṃ jhānaṃ pādakaṃ katvā uppannamaggaphalakāle lokuttaro. Yadā pana alobho sīsaṃ hoti, tadā itare dve tadanvāyikā honti. Yadā mettā sīsaṃ hoti, tadā itare dve tadanvāyikā honti. Yadā karuṇā sīsaṃ hoti, tadā itare dve tadanvāyikā honti.
имзязва бана нзгкаммасан̇габбаад̣̇аяо. ад̇т̇ад̇о хи нзгкаммавид̇аггаад̣̇ийнам̣ нзгкаммасан̇габбаад̣̇ийнан̃жа наанаагаран̣ам̣ над̇т̇и, д̇ам̣самбаяуд̇д̇аа бана сан̃н̃аад̣̇аяо нзгкаммасан̃н̃аад̣̇аяо. нзгкаммад̇хаад̇уаад̣̇ийнам̣ бана яасмаа баал̣ияам̣ –
Imeyeva pana nekkhammasaṅkappādayo. Atthato hi nekkhammavitakkādīnaṃ nekkhammasaṅkappādīnañca nānākaraṇaṃ natthi, taṃsampayuttā pana saññādayo nekkhammasaññādayo. Nekkhammadhātuādīnaṃ pana yasmā pāḷiyaṃ –
‘‘нзгкаммабадисам̣яуд̇д̇о д̇агго вид̇агго сан̇габбо, аяам̣ вужжад̇и нзгкаммад̇хаад̇у, саб̣б̣зби гусалаа д̇хаммаа нзгкаммад̇хаад̇у. аб̣яаабаад̣̇абадисам̣яуд̇д̇о д̇агго вид̇агго сан̇габбо, аяам̣ вужжад̇и аб̣яаабаад̣̇ад̇хаад̇у. яаа сад̇д̇зсу мзд̇д̇и мзд̇д̇ааяанаа мзд̇д̇аажзд̇овимуд̇д̇и , аяам̣ вужжад̇и аб̣яаабаад̣̇ад̇хаад̇у. авихим̣саабадисам̣яуд̇д̇о д̇агго вид̇агго сан̇габбо – аяам̣ вужжад̇и авихим̣саад̇хаад̇у. яаа сад̇д̇зсу гарун̣аа гарун̣ааяанаа гарун̣аажзд̇овимуд̇д̇и – аяам̣ вужжад̇и авихим̣саад̇хаад̇уу’’д̇и. (вибха. 182) –
‘‘Nekkhammapaṭisaṃyutto takko vitakko saṅkappo, ayaṃ vuccati nekkhammadhātu, sabbepi kusalā dhammā nekkhammadhātu. Abyāpādapaṭisaṃyutto takko vitakko saṅkappo, ayaṃ vuccati abyāpādadhātu. Yā sattesu metti mettāyanā mettācetovimutti , ayaṃ vuccati abyāpādadhātu. Avihiṃsāpaṭisaṃyutto takko vitakko saṅkappo – ayaṃ vuccati avihiṃsādhātu. Yā sattesu karuṇā karuṇāyanā karuṇācetovimutti – ayaṃ vuccati avihiṃsādhātū’’ti. (Vibha. 182) –
ааг̇ад̇ад̇д̇аа висзсо лаб̣бхад̇и. ид̇хааби саб̣б̣асан̇г̇аахигаа, асамбхиннаад̇и д̣̇вз гат̇аа вуд̇д̇анаязнзва взд̣̇ид̇аб̣б̣аа. сзсам̣ сувин̃н̃зяяамзва.
Āgatattā viseso labbhati. Idhāpi sabbasaṅgāhikā, asambhinnāti dve kathā vuttanayeneva veditabbā. Sesaṃ suviññeyyameva.
г̇аат̇аасу вид̇аггаязд̇и вид̇аггзяяа. нираагарзд̇и ад̇д̇ано санд̇аанад̇о нийхарзяяа винод̣̇зяяа, баж̇ахзяяаад̇и ад̇т̇о. савз вид̇аггаани вижаарид̇аани, самзд̇и вудтийва раж̇ам̣ самуухад̇анд̇и яат̇аа наама г̇имхаанам̣ бажчимз маасз бат̇авияам̣ самуухад̇ам̣ саманд̇ад̇о удтид̇ам̣ раж̇ам̣ махад̇о агааламзгхасса вассад̇о вудти таанасо вуубасамзд̇и, звамзва со яог̇ааважаро вид̇аггаани мижчаавид̇аггз жа вижаарид̇аани д̇ам̣самбаяуд̇д̇авижаарз жа самзд̇и вуубасамзд̇и самужчинд̣̇ад̇и. д̇ат̇аабхууд̇о жа вид̇аггуубасамзна жзд̇асаа саб̣б̣зсам̣ мижчаавид̇аггаанам̣ убасаманад̇о вид̇аггуубасамзна арияамаг̇г̇ажид̇д̇зна. ид̇хзва д̣̇идтзва д̇хаммз, санд̇ибад̣̇ам̣ ниб̣б̣аанам̣, самаж̇жхаг̇аа самад̇хиг̇ад̇о ход̇ийд̇и.
Gāthāsu vitakkayeti vitakkeyya. Nirākareti attano santānato nīhareyya vinodeyya, pajaheyyāti attho. Save vitakkāni vicāritāni, sameti vuṭṭhīva rajaṃ samūhatanti yathā nāma gimhānaṃ pacchime māse pathaviyaṃ samūhataṃ samantato uṭṭhitaṃ rajaṃ mahato akālameghassa vassato vuṭṭhi ṭhānaso vūpasameti, evameva so yogāvacaro vitakkāni micchāvitakke ca vicāritāni taṃsampayuttavicāre ca sameti vūpasameti samucchindati. Tathābhūto ca vitakkūpasamena cetasā sabbesaṃ micchāvitakkānaṃ upasamanato vitakkūpasamena ariyamaggacittena. Idheva diṭṭheva dhamme, santipadaṃ nibbānaṃ, samajjhagā samadhigato hotīti.
адтамасуд̇д̇аван̣н̣анаа нидтид̇аа.
Aṭṭhamasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ид̇ивуд̇д̇агабаал̣и • Itivuttakapāḷi / 8. анд̇хагаран̣асуд̇д̇ам̣ • 8. Andhakaraṇasuttaṃ
