| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
6. අන්‌ධකාරසුත්‌තං
6. Andhakārasuttaṃ
1116. ‘‘අත්‌ථි, භික්‌ඛවෙ, ලොකන්‌තරිකා අඝා අසංවුතා අන්‌ධකාරා අන්‌ධකාරතිමිසා, යත්‌ථමිමෙසං චන්‌දිමසූරියානං එවංමහිද්‌ධිකානං එවං මහානුභාවානං ආභාය නානුභොන්‌තී’’ති.
1116. ‘‘Atthi, bhikkhave, lokantarikā aghā asaṃvutā andhakārā andhakāratimisā, yatthamimesaṃ candimasūriyānaṃ evaṃmahiddhikānaṃ evaṃ mahānubhāvānaṃ ābhāya nānubhontī’’ti.
එවං වුත්‌තෙ අඤ්‌ඤතරො භික්‌ඛු භගවන්‌තං එතදවොච – ‘‘මහා වත සො, භන්‌තෙ, අන්‌ධකාරො, සුමහා වත සො, භන්‌තෙ, අන්‌ධකාරො! අත්‌ථි නු ඛො, භන්‌තෙ, එතම්‌හා අන්‌ධකාරා අඤ්‌ඤො අන්‌ධකාරො මහන්‌තතරො ච භයානකතරො චා’’ති? ‘‘අත්‌ථි ඛො, භික්‌ඛු, එතම්‌හා අන්‌ධකාරා අඤ්‌ඤො අන්‌ධකාරො මහන්‌තතරො ච භයානකතරො චා’’ති.
Evaṃ vutte aññataro bhikkhu bhagavantaṃ etadavoca – ‘‘mahā vata so, bhante, andhakāro, sumahā vata so, bhante, andhakāro! Atthi nu kho, bhante, etamhā andhakārā añño andhakāro mahantataro ca bhayānakataro cā’’ti? ‘‘Atthi kho, bhikkhu, etamhā andhakārā añño andhakāro mahantataro ca bhayānakataro cā’’ti.
‘‘කතමො පන, භන්‌තෙ, එතම්‌හා අන්‌ධකාරා අඤ්‌ඤො අන්‌ධකාරො මහන්‌තතරො ච භයානකතරො චා’’ති? ‘‘යෙ හි කෙචි, භික්‌ඛු, සමණා වා බ්‍රාහ්‌මණා වා ‘ඉදං දුක්‌ඛ’න්‌ති යථාභූතං නප්‌පජානන්‌ති…පෙ.… ‘අයං දුක්‌ඛනිරොධගාමිනී පටිපදා’ති යථාභූතං නප්‌පජානන්‌ති, තෙ ජාතිසංවත්‌තනිකෙසු සඞ්‌ඛාරෙසු අභිරමන්‌ති…පෙ.… අභිරතා…පෙ.… අභිසඞ්‌ඛරොන්‌ති…පෙ.… අභිසඞ්‌ඛරිත්‌වා ජාතන්‌ධකාරම්‌පි පපතන්‌ති, ජරන්‌ධකාරම්‌පි පපතන්‌ති, මරණන්‌ධකාරම්‌පි පපතන්‌ති, සොකපරිදෙවදුක්‌ඛදොමනස්‌සුපායාසන්‌ධකාරම්‌පි පපතන්‌ති. තෙ න පරිමුච්‌චන්‌ති ජාතියා ජරාය මරණෙන සොකෙහි පරිදෙවෙහි දුක්‌ඛෙහි දොමනස්‌සෙහි උපායාසෙහි. ‘න පරිමුච්‌චන්‌ති දුක්‌ඛස්‌මා’ති වදාමි’’.
‘‘Katamo pana, bhante, etamhā andhakārā añño andhakāro mahantataro ca bhayānakataro cā’’ti? ‘‘Ye hi keci, bhikkhu, samaṇā vā brāhmaṇā vā ‘idaṃ dukkha’nti yathābhūtaṃ nappajānanti…pe… ‘ayaṃ dukkhanirodhagāminī paṭipadā’ti yathābhūtaṃ nappajānanti, te jātisaṃvattanikesu saṅkhāresu abhiramanti…pe… abhiratā…pe… abhisaṅkharonti…pe… abhisaṅkharitvā jātandhakārampi papatanti, jarandhakārampi papatanti, maraṇandhakārampi papatanti, sokaparidevadukkhadomanassupāyāsandhakārampi papatanti. Te na parimuccanti jātiyā jarāya maraṇena sokehi paridevehi dukkhehi domanassehi upāyāsehi. ‘Na parimuccanti dukkhasmā’ti vadāmi’’.
‘‘යෙ ච ඛො කෙචි, භික්‌ඛු, සමණා වා බ්‍රාහ්‌මණා වා ‘ඉදං දුක්‌ඛ’න්‌ති යථාභූතං පජානන්‌ති…පෙ.… ‘අයං දුක්‌ඛනිරොධගාමිනී පටිපදා’ති යථාභූතං පජානන්‌ති, තෙ ජාතිසංවත්‌තනිකෙසු සඞ්‌ඛාරෙසු නාභිරමන්‌ති…පෙ.… අනභිරතා…පෙ.… නාභිසඞ්‌ඛරොන්‌ති…පෙ.… අනභිසඞ්‌ඛරිත්‌වා ජාතන්‌ධකාරම්‌පි නප්‌පපතන්‌ති , ජරන්‌ධකාරම්‌පි නප්‌පපතන්‌ති, මරණන්‌ධකාරම්‌පි නප්‌පපතන්‌ති, සොකපරිදෙවදුක්‌ඛදොමනස්‌සුපායාසන්‌ධකාරම්‌පි නප්‌පපතන්‌ති. තෙ පරිමුච්‌චන්‌ති ජාතියා ජරාය මරණෙන සොකෙහි පරිදෙවෙහි දුක්‌ඛෙහි දොමනස්‌සෙහි උපායාසෙහි. ‘පරිමුච්‌චන්‌ති දුක්‌ඛස්‌මා’ති වදාමි’’.
‘‘Ye ca kho keci, bhikkhu, samaṇā vā brāhmaṇā vā ‘idaṃ dukkha’nti yathābhūtaṃ pajānanti…pe… ‘ayaṃ dukkhanirodhagāminī paṭipadā’ti yathābhūtaṃ pajānanti, te jātisaṃvattanikesu saṅkhāresu nābhiramanti…pe… anabhiratā…pe… nābhisaṅkharonti…pe… anabhisaṅkharitvā jātandhakārampi nappapatanti , jarandhakārampi nappapatanti, maraṇandhakārampi nappapatanti, sokaparidevadukkhadomanassupāyāsandhakārampi nappapatanti. Te parimuccanti jātiyā jarāya maraṇena sokehi paridevehi dukkhehi domanassehi upāyāsehi. ‘Parimuccanti dukkhasmā’ti vadāmi’’.
‘‘තස්‌මාතිහ, භික්‌ඛවෙ, ‘ඉදං දුක්‌ඛ’න්‌ති යොගො කරණීයො…පෙ.… ‘අයං දුක්‌ඛනිරොධගාමිනී පටිපදා’ති යොගො කරණීයො’’ති. ඡට්‌ඨං.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Chaṭṭhaṃ.
