| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৪. অন্ধকৰিন্দসুত্তং
4. Andhakavindasuttaṃ
১১৪. একং সমযং ভগৰা মগধেসু ৰিহরতি অন্ধকৰিন্দে। অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নং খো আযস্মন্তং আনন্দং ভগৰা এতদৰোচ –
114. Ekaṃ samayaṃ bhagavā magadhesu viharati andhakavinde. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ ānandaṃ bhagavā etadavoca –
‘‘যে তে, আনন্দ, ভিক্খূ নৰা অচিরপব্বজিতা অধুনাগতা ইমং ধম্মৰিনযং, তে ৰো, আনন্দ, ভিক্খূ পঞ্চসু ধম্মেসু সমাদপেতব্বা 1 নিৰেসেতব্বা পতিট্ঠাপেতব্বা । কতমেসু পঞ্চসু? ‘এথ তুম্হে, আৰুসো, সীলৰা হোথ, পাতিমোক্খসংৰরসংৰুতা ৰিহরথ আচারগোচরসম্পন্না অণুমত্তেসু ৰজ্জেসু ভযদস্সাৰিনো, সমাদায সিক্খথ সিক্খাপদেসূ’তি – ইতি পাতিমোক্খসংৰরে সমাদপেতব্বা নিৰেসেতব্বা পতিট্ঠাপেতব্বা।
‘‘Ye te, ānanda, bhikkhū navā acirapabbajitā adhunāgatā imaṃ dhammavinayaṃ, te vo, ānanda, bhikkhū pañcasu dhammesu samādapetabbā 2 nivesetabbā patiṭṭhāpetabbā . Katamesu pañcasu? ‘Etha tumhe, āvuso, sīlavā hotha, pātimokkhasaṃvarasaṃvutā viharatha ācāragocarasampannā aṇumattesu vajjesu bhayadassāvino, samādāya sikkhatha sikkhāpadesū’ti – iti pātimokkhasaṃvare samādapetabbā nivesetabbā patiṭṭhāpetabbā.
‘‘‘এথ তুম্হে, আৰুসো, ইন্দ্রিযেসু গুত্তদ্ৰারা ৰিহরথ আরক্খসতিনো নিপক্কসতিনো 3, সারক্খিতমানসা সতারক্খেন চেতসা সমন্নাগতা’তি – ইতি ইন্দ্রিযসংৰরে সমাদপেতব্বা নিৰেসেতব্বা পতিট্ঠাপেতব্বা।
‘‘‘Etha tumhe, āvuso, indriyesu guttadvārā viharatha ārakkhasatino nipakkasatino 4, sārakkhitamānasā satārakkhena cetasā samannāgatā’ti – iti indriyasaṃvare samādapetabbā nivesetabbā patiṭṭhāpetabbā.
‘‘‘এথ তুম্হে, আৰুসো, অপ্পভস্সা হোথ, ভস্সে পরিযন্তকারিনো’তি – ইতি ভস্সপরিযন্তে সমাদপেতব্বা নিৰেসেতব্বা পতিট্ঠাপেতব্বা।
‘‘‘Etha tumhe, āvuso, appabhassā hotha, bhasse pariyantakārino’ti – iti bhassapariyante samādapetabbā nivesetabbā patiṭṭhāpetabbā.
‘‘‘এথ তুম্হে, আৰুসো, আরঞ্ঞিকা হোথ, অরঞ্ঞৰনপত্থানি পন্তানি সেনাসনানি পটিসেৰথা’তি – ইতি কাযৰূপকাসে সমাদপেতব্বা নিৰেসেতব্বা পতিট্ঠাপেতব্বা।
‘‘‘Etha tumhe, āvuso, āraññikā hotha, araññavanapatthāni pantāni senāsanāni paṭisevathā’ti – iti kāyavūpakāse samādapetabbā nivesetabbā patiṭṭhāpetabbā.
‘‘‘এথ তুম্হে, আৰুসো, সম্মাদিট্ঠিকা হোথ সম্মাদস্সনেন সমন্নাগতা’তি – ইতি সম্মাদস্সনে সমাদপেতব্বা নিৰেসেতব্বা পতিট্ঠাপেতব্বা। যে তে, আনন্দ, ভিক্খূ নৰা অচিরপব্বজিতা অধুনাগতা ইমং ধম্মৰিনযং, তে ৰো, আনন্দ, ভিক্খূ ইমেসু পঞ্চসু ধম্মেসু সমাদপেতব্বা নিৰেসেতব্বা পতিট্ঠাপেতব্বা’’তি । চতুত্থং।
‘‘‘Etha tumhe, āvuso, sammādiṭṭhikā hotha sammādassanena samannāgatā’ti – iti sammādassane samādapetabbā nivesetabbā patiṭṭhāpetabbā. Ye te, ānanda, bhikkhū navā acirapabbajitā adhunāgatā imaṃ dhammavinayaṃ, te vo, ānanda, bhikkhū imesu pañcasu dhammesu samādapetabbā nivesetabbā patiṭṭhāpetabbā’’ti . Catutthaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৪. অন্ধকৰিন্দসুত্তৰণ্ণনা • 4. Andhakavindasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-৪. কুলূপকসুত্তাদিৰণ্ণনা • 1-4. Kulūpakasuttādivaṇṇanā
