| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
4. අන්‌ධකවින්‌දසුත්‌තං
4. Andhakavindasuttaṃ
114. එකං සමයං භගවා මගධෙසු විහරති අන්‌ධකවින්‌දෙ. අථ ඛො ආයස්‌මා ආනන්‌දො යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නං ඛො ආයස්‌මන්‌තං ආනන්‌දං භගවා එතදවොච –
114. Ekaṃ samayaṃ bhagavā magadhesu viharati andhakavinde. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ ānandaṃ bhagavā etadavoca –
‘‘යෙ තෙ, ආනන්‌ද, භික්‌ඛූ නවා අචිරපබ්‌බජිතා අධුනාගතා ඉමං ධම්‌මවිනයං, තෙ වො, ආනන්‌ද, භික්‌ඛූ පඤ්‌චසු ධම්‌මෙසු සමාදපෙතබ්‌බා 1 නිවෙසෙතබ්‌බා පතිට්‌ඨාපෙතබ්‌බා . කතමෙසු පඤ්‌චසු? ‘එථ තුම්‌හෙ, ආවුසො, සීලවා හොථ, පාතිමොක්‌ඛසංවරසංවුතා විහරථ ආචාරගොචරසම්‌පන්‌නා අණුමත්‌තෙසු වජ්‌ජෙසු භයදස්‌සාවිනො, සමාදාය සික්‌ඛථ සික්‌ඛාපදෙසූ’ති – ඉති පාතිමොක්‌ඛසංවරෙ සමාදපෙතබ්‌බා නිවෙසෙතබ්‌බා පතිට්‌ඨාපෙතබ්‌බා.
‘‘Ye te, ānanda, bhikkhū navā acirapabbajitā adhunāgatā imaṃ dhammavinayaṃ, te vo, ānanda, bhikkhū pañcasu dhammesu samādapetabbā 2 nivesetabbā patiṭṭhāpetabbā . Katamesu pañcasu? ‘Etha tumhe, āvuso, sīlavā hotha, pātimokkhasaṃvarasaṃvutā viharatha ācāragocarasampannā aṇumattesu vajjesu bhayadassāvino, samādāya sikkhatha sikkhāpadesū’ti – iti pātimokkhasaṃvare samādapetabbā nivesetabbā patiṭṭhāpetabbā.
‘‘‘එථ තුම්‌හෙ, ආවුසො, ඉන්‌ද්‍රියෙසු ගුත්‌තද්‌වාරා විහරථ ආරක්‌ඛසතිනො නිපක්‌කසතිනො 3, සාරක්‌ඛිතමානසා සතාරක්‌ඛෙන චෙතසා සමන්‌නාගතා’ති – ඉති ඉන්‌ද්‍රියසංවරෙ සමාදපෙතබ්‌බා නිවෙසෙතබ්‌බා පතිට්‌ඨාපෙතබ්‌බා.
‘‘‘Etha tumhe, āvuso, indriyesu guttadvārā viharatha ārakkhasatino nipakkasatino 4, sārakkhitamānasā satārakkhena cetasā samannāgatā’ti – iti indriyasaṃvare samādapetabbā nivesetabbā patiṭṭhāpetabbā.
‘‘‘එථ තුම්‌හෙ, ආවුසො, අප්‌පභස්‌සා හොථ, භස්‌සෙ පරියන්‌තකාරිනො’ති – ඉති භස්‌සපරියන්‌තෙ සමාදපෙතබ්‌බා නිවෙසෙතබ්‌බා පතිට්‌ඨාපෙතබ්‌බා.
‘‘‘Etha tumhe, āvuso, appabhassā hotha, bhasse pariyantakārino’ti – iti bhassapariyante samādapetabbā nivesetabbā patiṭṭhāpetabbā.
‘‘‘එථ තුම්‌හෙ, ආවුසො, ආරඤ්‌ඤිකා හොථ, අරඤ්‌ඤවනපත්‌ථානි පන්‌තානි සෙනාසනානි පටිසෙවථා’ති – ඉති කායවූපකාසෙ සමාදපෙතබ්‌බා නිවෙසෙතබ්‌බා පතිට්‌ඨාපෙතබ්‌බා.
‘‘‘Etha tumhe, āvuso, āraññikā hotha, araññavanapatthāni pantāni senāsanāni paṭisevathā’ti – iti kāyavūpakāse samādapetabbā nivesetabbā patiṭṭhāpetabbā.
‘‘‘එථ තුම්‌හෙ, ආවුසො, සම්‌මාදිට්‌ඨිකා හොථ සම්‌මාදස්‌සනෙන සමන්‌නාගතා’ති – ඉති සම්‌මාදස්‌සනෙ සමාදපෙතබ්‌බා නිවෙසෙතබ්‌බා පතිට්‌ඨාපෙතබ්‌බා. යෙ තෙ, ආනන්‌ද, භික්‌ඛූ නවා අචිරපබ්‌බජිතා අධුනාගතා ඉමං ධම්‌මවිනයං, තෙ වො, ආනන්‌ද, භික්‌ඛූ ඉමෙසු පඤ්‌චසු ධම්‌මෙසු සමාදපෙතබ්‌බා නිවෙසෙතබ්‌බා පතිට්‌ඨාපෙතබ්‌බා’’ති . චතුත්‌ථං.
‘‘‘Etha tumhe, āvuso, sammādiṭṭhikā hotha sammādassanena samannāgatā’ti – iti sammādassane samādapetabbā nivesetabbā patiṭṭhāpetabbā. Ye te, ānanda, bhikkhū navā acirapabbajitā adhunāgatā imaṃ dhammavinayaṃ, te vo, ānanda, bhikkhū imesu pañcasu dhammesu samādapetabbā nivesetabbā patiṭṭhāpetabbā’’ti . Catutthaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 4. අන්‌ධකවින්‌දසුත්‌තවණ්‌ණනා • 4. Andhakavindasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-4. කුලූපකසුත්‌තාදිවණ්‌ණනා • 1-4. Kulūpakasuttādivaṇṇanā
