| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༤. ཨནྡྷཀཝིནྡསུཏྟཾ
4. Andhakavindasuttaṃ
༡༡༤. ཨེཀཾ སམཡཾ བྷགཝཱ མགདྷེསུ ཝིཧརཏི ཨནྡྷཀཝིནྡེ། ཨཐ ཁོ ཨཱཡསྨཱ ཨཱནནྡོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣཾ ཁོ ཨཱཡསྨནྟཾ ཨཱནནྡཾ བྷགཝཱ ཨེཏདཝོཙ –
114. Ekaṃ samayaṃ bhagavā magadhesu viharati andhakavinde. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ ānandaṃ bhagavā etadavoca –
‘‘ཡེ ཏེ, ཨཱནནྡ, བྷིཀྑཱུ ནཝཱ ཨཙིརཔབྦཛིཏཱ ཨདྷུནཱགཏཱ ཨིམཾ དྷམྨཝིནཡཾ, ཏེ ཝོ, ཨཱནནྡ, བྷིཀྑཱུ པཉྩསུ དྷམྨེསུ སམཱདཔེཏབྦཱ 1 ནིཝེསེཏབྦཱ པཏིཊྛཱཔེཏབྦཱ ། ཀཏམེསུ པཉྩསུ? ‘ཨེཐ ཏུམྷེ, ཨཱཝུསོ, སཱིལཝཱ ཧོཐ, པཱཏིམོཀྑསཾཝརསཾཝུཏཱ ཝིཧརཐ ཨཱཙཱརགོཙརསམྤནྣཱ ཨཎུམཏྟེསུ ཝཛྫེསུ བྷཡདསྶཱཝིནོ, སམཱདཱཡ སིཀྑཐ སིཀྑཱཔདེསཱུ’ཏི – ཨིཏི པཱཏིམོཀྑསཾཝརེ སམཱདཔེཏབྦཱ ནིཝེསེཏབྦཱ པཏིཊྛཱཔེཏབྦཱ།
‘‘Ye te, ānanda, bhikkhū navā acirapabbajitā adhunāgatā imaṃ dhammavinayaṃ, te vo, ānanda, bhikkhū pañcasu dhammesu samādapetabbā 2 nivesetabbā patiṭṭhāpetabbā . Katamesu pañcasu? ‘Etha tumhe, āvuso, sīlavā hotha, pātimokkhasaṃvarasaṃvutā viharatha ācāragocarasampannā aṇumattesu vajjesu bhayadassāvino, samādāya sikkhatha sikkhāpadesū’ti – iti pātimokkhasaṃvare samādapetabbā nivesetabbā patiṭṭhāpetabbā.
‘‘‘ཨེཐ ཏུམྷེ, ཨཱཝུསོ, ཨིནྡྲིཡེསུ གུཏྟདྭཱརཱ ཝིཧརཐ ཨཱརཀྑསཏིནོ ནིཔཀྐསཏིནོ 3, སཱརཀྑིཏམཱནསཱ སཏཱརཀྑེན ཙེཏསཱ སམནྣཱགཏཱ’ཏི – ཨིཏི ཨིནྡྲིཡསཾཝརེ སམཱདཔེཏབྦཱ ནིཝེསེཏབྦཱ པཏིཊྛཱཔེཏབྦཱ།
‘‘‘Etha tumhe, āvuso, indriyesu guttadvārā viharatha ārakkhasatino nipakkasatino 4, sārakkhitamānasā satārakkhena cetasā samannāgatā’ti – iti indriyasaṃvare samādapetabbā nivesetabbā patiṭṭhāpetabbā.
‘‘‘ཨེཐ ཏུམྷེ, ཨཱཝུསོ, ཨཔྤབྷསྶཱ ཧོཐ, བྷསྶེ པརིཡནྟཀཱརིནོ’ཏི – ཨིཏི བྷསྶཔརིཡནྟེ སམཱདཔེཏབྦཱ ནིཝེསེཏབྦཱ པཏིཊྛཱཔེཏབྦཱ།
‘‘‘Etha tumhe, āvuso, appabhassā hotha, bhasse pariyantakārino’ti – iti bhassapariyante samādapetabbā nivesetabbā patiṭṭhāpetabbā.
‘‘‘ཨེཐ ཏུམྷེ, ཨཱཝུསོ, ཨཱརཉྙིཀཱ ཧོཐ, ཨརཉྙཝནཔཏྠཱནི པནྟཱནི སེནཱསནཱནི པཊིསེཝཐཱ’ཏི – ཨིཏི ཀཱཡཝཱུཔཀཱསེ སམཱདཔེཏབྦཱ ནིཝེསེཏབྦཱ པཏིཊྛཱཔེཏབྦཱ།
‘‘‘Etha tumhe, āvuso, āraññikā hotha, araññavanapatthāni pantāni senāsanāni paṭisevathā’ti – iti kāyavūpakāse samādapetabbā nivesetabbā patiṭṭhāpetabbā.
‘‘‘ཨེཐ ཏུམྷེ, ཨཱཝུསོ, སམྨཱདིཊྛིཀཱ ཧོཐ སམྨཱདསྶནེན སམནྣཱགཏཱ’ཏི – ཨིཏི སམྨཱདསྶནེ སམཱདཔེཏབྦཱ ནིཝེསེཏབྦཱ པཏིཊྛཱཔེཏབྦཱ། ཡེ ཏེ, ཨཱནནྡ, བྷིཀྑཱུ ནཝཱ ཨཙིརཔབྦཛིཏཱ ཨདྷུནཱགཏཱ ཨིམཾ དྷམྨཝིནཡཾ, ཏེ ཝོ, ཨཱནནྡ, བྷིཀྑཱུ ཨིམེསུ པཉྩསུ དྷམྨེསུ སམཱདཔེཏབྦཱ ནིཝེསེཏབྦཱ པཏིཊྛཱཔེཏབྦཱ’’ཏི ། ཙཏུཏྠཾ།
‘‘‘Etha tumhe, āvuso, sammādiṭṭhikā hotha sammādassanena samannāgatā’ti – iti sammādassane samādapetabbā nivesetabbā patiṭṭhāpetabbā. Ye te, ānanda, bhikkhū navā acirapabbajitā adhunāgatā imaṃ dhammavinayaṃ, te vo, ānanda, bhikkhū imesu pañcasu dhammesu samādapetabbā nivesetabbā patiṭṭhāpetabbā’’ti . Catutthaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༤. ཨནྡྷཀཝིནྡསུཏྟཝཎྞནཱ • 4. Andhakavindasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༤. ཀུལཱུཔཀསུཏྟཱདིཝཎྞནཱ • 1-4. Kulūpakasuttādivaṇṇanā
