| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. அந்த⁴கவிந்த³ஸுத்தவண்ணனா
3. Andhakavindasuttavaṇṇanā
184. ததியே அந்த⁴கவிந்த³ந்தி ஏவங்னாமகங் கா³மங். உபஸங்கமீதி ‘‘ஸத்தா² இதா³னிபி வீரியங் கரோதி பதா⁴னமனுயுஞ்ஜதி, க³ச்சா²மிஸ்ஸ ஸந்திகே ட²த்வா ஸாஸனானுச்ச²விகங் வீரியபடிஸங்யுத்தங் கா³த²ங் வக்கா²மீ’’தி உபஸங்கமி.
184. Tatiye andhakavindanti evaṃnāmakaṃ gāmaṃ. Upasaṅkamīti ‘‘satthā idānipi vīriyaṃ karoti padhānamanuyuñjati, gacchāmissa santike ṭhatvā sāsanānucchavikaṃ vīriyapaṭisaṃyuttaṃ gāthaṃ vakkhāmī’’ti upasaṅkami.
பந்தானீதி ஜனதங் அதிக்கமித்வா மனுஸ்ஸானங் அனுபசாரே டி²தானி. ஸங்யோஜனவிப்பமொக்கா²தி தானி ச ஸேனாஸனானி ஸேவமானோ ந சீவராதீ³னங் அத்தா²ய ஸேவெய்ய, அத² கோ² த³ஸஸங்யோஜனவிப்பமொக்க²த்தா²ய சரெய்ய. ஸங்கே⁴ வஸேதி தேஸு ஸேனாஸனேஸு ரதிங் அலப⁴ந்தோ உபட்டா²காதீ³னங் சித்தானுரக்க²ணத்த²ங் க³த்³ரப⁴பிட்டே² ரஜங் விய உப்பதந்தோ அரஞ்ஞே அசரித்வா ஸங்க⁴மஜ்ஜே² வஸெய்ய. ரக்கி²தத்தோ ஸதீமாதி தத்த² ச வஸந்தோ ஸக³வசண்டோ³ கோ³ணோ விய ஸப்³ரஹ்மசாரினோ அவிஜ்ஜ²ந்தோ அக⁴ட்டெந்தோ ரக்கி²தத்தோ ஸதிபட்டா²னபராயணோ ஹுத்வா வஸெய்ய.
Pantānīti janataṃ atikkamitvā manussānaṃ anupacāre ṭhitāni. Saṃyojanavippamokkhāti tāni ca senāsanāni sevamāno na cīvarādīnaṃ atthāya seveyya, atha kho dasasaṃyojanavippamokkhatthāya careyya. Saṅghe vaseti tesu senāsanesu ratiṃ alabhanto upaṭṭhākādīnaṃ cittānurakkhaṇatthaṃ gadrabhapiṭṭhe rajaṃ viya uppatanto araññe acaritvā saṅghamajjhe vaseyya. Rakkhitatto satīmāti tattha ca vasanto sagavacaṇḍo goṇo viya sabrahmacārino avijjhanto aghaṭṭento rakkhitatto satipaṭṭhānaparāyaṇo hutvā vaseyya.
இதா³னி ஸங்கே⁴ வஸமானஸ்ஸ பி⁴க்கு²னோ பி⁴க்கா²சாரவத்தங் ஆசிக்க²ந்தோ குலாகுலந்திஆதி³மாஹ. தத்த² பிண்டி³காய சரந்தோதி பிண்ட³த்தா²ய சரமானோ. ஸேவேத² பந்தானி ஸேனாஸனானீதி ஸங்க⁴மஜ்ஜ²ங் ஓதரித்வா வஸமானோபி து⁴ரபரிவேணே தாலனாளிகேரஆதீ³னி ரோபெத்வா உபட்டா²காதி³ஸங்ஸட்டோ² ந வஸெய்ய, சித்தகல்லதங் பன ஜனெத்வா சித்தங் ஹாஸெத்வா தோஸெத்வா புன பந்தஸேனாஸனே வஸெய்யாதி அரஞ்ஞஸ்ஸேவ வண்ணங் கதே²தி. ப⁴யாதி வட்டப⁴யதோ. அப⁴யேதி நிப்³பா³னே. விமுத்தோதி அதி⁴முத்தோ ஹுத்வா வஸெய்ய.
Idāni saṅghe vasamānassa bhikkhuno bhikkhācāravattaṃ ācikkhanto kulākulantiādimāha. Tattha piṇḍikāya carantoti piṇḍatthāya caramāno. Sevetha pantāni senāsanānīti saṅghamajjhaṃ otaritvā vasamānopi dhurapariveṇe tālanāḷikeraādīni ropetvā upaṭṭhākādisaṃsaṭṭho na vaseyya, cittakallataṃ pana janetvā cittaṃ hāsetvā tosetvā puna pantasenāsane vaseyyāti araññasseva vaṇṇaṃ katheti. Bhayāti vaṭṭabhayato. Abhayeti nibbāne. Vimuttoti adhimutto hutvā vaseyya.
யத்த² பே⁴ரவாதி யஸ்மிங் டா²னே ப⁴யஜனகா ஸவிஞ்ஞாணகா ஸீஹப்³யக்³கா⁴த³யோ, அவிஞ்ஞாணகா ரத்திபா⁴கே³ கா²ணுவல்லிஆத³யோ ப³ஹூ அத்தி². ஸரீஸபாதி தீ³க⁴ஜாதிகாதி³ஸரீஸபா. நிஸீதி³ தத்த² பி⁴க்கூ²தி தாதி³ஸே டா²னே பி⁴க்கு² நிஸின்னோ. இமினா இத³ங் தீ³பேதி – ப⁴க³வா யதா² தும்ஹே ஏதரஹி தத்ரட்ட²கபே⁴ரவாரம்மணானி சேவ ஸரீஸபே ச விஜ்ஜுனிச்சா²ரணாதீ³னி ச அமனஸிகத்வா நிஸின்னா, ஏவமேவங் பதா⁴னமனுயுத்தா பி⁴க்கூ² நிஸீத³ந்தீதி.
Yattha bheravāti yasmiṃ ṭhāne bhayajanakā saviññāṇakā sīhabyagghādayo, aviññāṇakā rattibhāge khāṇuvalliādayo bahū atthi. Sarīsapāti dīghajātikādisarīsapā. Nisīdi tattha bhikkhūti tādise ṭhāne bhikkhu nisinno. Iminā idaṃ dīpeti – bhagavā yathā tumhe etarahi tatraṭṭhakabheravārammaṇāni ceva sarīsape ca vijjunicchāraṇādīni ca amanasikatvā nisinnā, evamevaṃ padhānamanuyuttā bhikkhū nisīdantīti.
ஜாது மே தி³ட்ட²ந்தி ஏகங்ஸேன மயா தி³ட்ட²ங். ந யித³ங் இதிஹீதிஹந்தி இத³ங் இதிஹ இதிஹாதி ந தக்கஹேது வா நயஹேது வா பிடகஸம்பதா³னேன வா அஹங் வதா³மி. ஏகஸ்மிங் ப்³ரஹ்மசரியஸ்மிந்தி ஏகாய த⁴ம்மதே³ஸனாய. த⁴ம்மதே³ஸனா ஹி இத⁴ ப்³ரஹ்மசரியந்தி அதி⁴ப்பேதா. மச்சுஹாயினந்தி மரணபரிச்சாகி³னங் கீ²ணாஸவானங்.
Jātu me diṭṭhanti ekaṃsena mayā diṭṭhaṃ. Na yidaṃ itihītihanti idaṃ itiha itihāti na takkahetu vā nayahetu vā piṭakasampadānena vā ahaṃ vadāmi. Ekasmiṃ brahmacariyasminti ekāya dhammadesanāya. Dhammadesanā hi idha brahmacariyanti adhippetā. Maccuhāyinanti maraṇapariccāginaṃ khīṇāsavānaṃ.
த³ஸா ச த³ஸதா⁴ த³ஸாதி எத்த² த³ஸாதி த³ஸேவ, த³ஸதா⁴ த³ஸாதி ஸதங், அஞ்ஞே ச த³ஸுத்தரங் ஸேக²ஸதங் பஸ்ஸாமீதி வத³தி. ஸோதஸமாபன்னாதி மக்³க³ஸோதங் ஸமாபன்னா. அதிரச்சா²னகா³மினோதி தே³ஸனாமத்தமேதங், அவினிபாதத⁴ம்மாதி அத்தோ². ஸங்கா²துங் நோபி ஸக்கோமீதி முஸாவாத³ப⁴யேன எத்தகா நாம புஞ்ஞபா⁴கி³னோ ஸத்தாதி க³ணேதுங் ந ஸக்கோமீதி ப³ஹுங் ப்³ரஹ்மத⁴ம்மதே³ஸனங் ஸந்தா⁴ய ஏவமாஹ. ததியங்.
Dasā ca dasadhā dasāti ettha dasāti daseva, dasadhā dasāti sataṃ, aññe ca dasuttaraṃ sekhasataṃ passāmīti vadati. Sotasamāpannāti maggasotaṃ samāpannā. Atiracchānagāminoti desanāmattametaṃ, avinipātadhammāti attho. Saṅkhātuṃ nopi sakkomīti musāvādabhayena ettakā nāma puññabhāgino sattāti gaṇetuṃ na sakkomīti bahuṃ brahmadhammadesanaṃ sandhāya evamāha. Tatiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. அந்த⁴கவிந்த³ஸுத்தங் • 3. Andhakavindasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. அந்த⁴கவிந்த³ஸுத்தவண்ணனா • 3. Andhakavindasuttavaṇṇanā
