| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৩. অন্ধকৰিন্দসুত্তৰণ্ণনা
3. Andhakavindasuttavaṇṇanā
১৮৪. ততিযে অন্ধকৰিন্দন্তি এৰংনামকং গামং। উপসঙ্কমীতি ‘‘সত্থা ইদানিপি ৰীরিযং করোতি পধানমনুযুঞ্জতি, গচ্ছামিস্স সন্তিকে ঠত্ৰা সাসনানুচ্ছৰিকং ৰীরিযপটিসংযুত্তং গাথং ৰক্খামী’’তি উপসঙ্কমি।
184. Tatiye andhakavindanti evaṃnāmakaṃ gāmaṃ. Upasaṅkamīti ‘‘satthā idānipi vīriyaṃ karoti padhānamanuyuñjati, gacchāmissa santike ṭhatvā sāsanānucchavikaṃ vīriyapaṭisaṃyuttaṃ gāthaṃ vakkhāmī’’ti upasaṅkami.
পন্তানীতি জনতং অতিক্কমিত্ৰা মনুস্সানং অনুপচারে ঠিতানি। সংযোজনৰিপ্পমোক্খাতি তানি চ সেনাসনানি সেৰমানো ন চীৰরাদীনং অত্থায সেৰেয্য, অথ খো দসসংযোজনৰিপ্পমোক্খত্থায চরেয্য। সঙ্ঘে ৰসেতি তেসু সেনাসনেসু রতিং অলভন্তো উপট্ঠাকাদীনং চিত্তানুরক্খণত্থং গদ্রভপিট্ঠে রজং ৰিয উপ্পতন্তো অরঞ্ঞে অচরিত্ৰা সঙ্ঘমজ্ঝে ৰসেয্য। রক্খিতত্তো সতীমাতি তত্থ চ ৰসন্তো সগৰচণ্ডো গোণো ৰিয সব্রহ্মচারিনো অৰিজ্ঝন্তো অঘট্টেন্তো রক্খিতত্তো সতিপট্ঠানপরাযণো হুত্ৰা ৰসেয্য।
Pantānīti janataṃ atikkamitvā manussānaṃ anupacāre ṭhitāni. Saṃyojanavippamokkhāti tāni ca senāsanāni sevamāno na cīvarādīnaṃ atthāya seveyya, atha kho dasasaṃyojanavippamokkhatthāya careyya. Saṅghe vaseti tesu senāsanesu ratiṃ alabhanto upaṭṭhākādīnaṃ cittānurakkhaṇatthaṃ gadrabhapiṭṭhe rajaṃ viya uppatanto araññe acaritvā saṅghamajjhe vaseyya. Rakkhitatto satīmāti tattha ca vasanto sagavacaṇḍo goṇo viya sabrahmacārino avijjhanto aghaṭṭento rakkhitatto satipaṭṭhānaparāyaṇo hutvā vaseyya.
ইদানি সঙ্ঘে ৰসমানস্স ভিক্খুনো ভিক্খাচারৰত্তং আচিক্খন্তো কুলাকুলন্তিআদিমাহ। তত্থ পিণ্ডিকায চরন্তোতি পিণ্ডত্থায চরমানো। সেৰেথ পন্তানি সেনাসনানীতি সঙ্ঘমজ্ঝং ওতরিত্ৰা ৰসমানোপি ধুরপরিৰেণে তালনাল়িকেরআদীনি রোপেত্ৰা উপট্ঠাকাদিসংসট্ঠো ন ৰসেয্য, চিত্তকল্লতং পন জনেত্ৰা চিত্তং হাসেত্ৰা তোসেত্ৰা পুন পন্তসেনাসনে ৰসেয্যাতি অরঞ্ঞস্সেৰ ৰণ্ণং কথেতি। ভযাতি ৰট্টভযতো। অভযেতি নিব্বানে। ৰিমুত্তোতি অধিমুত্তো হুত্ৰা ৰসেয্য।
Idāni saṅghe vasamānassa bhikkhuno bhikkhācāravattaṃ ācikkhanto kulākulantiādimāha. Tattha piṇḍikāya carantoti piṇḍatthāya caramāno. Sevetha pantāni senāsanānīti saṅghamajjhaṃ otaritvā vasamānopi dhurapariveṇe tālanāḷikeraādīni ropetvā upaṭṭhākādisaṃsaṭṭho na vaseyya, cittakallataṃ pana janetvā cittaṃ hāsetvā tosetvā puna pantasenāsane vaseyyāti araññasseva vaṇṇaṃ katheti. Bhayāti vaṭṭabhayato. Abhayeti nibbāne. Vimuttoti adhimutto hutvā vaseyya.
যত্থ ভেরৰাতি যস্মিং ঠানে ভযজনকা সৰিঞ্ঞাণকা সীহব্যগ্ঘাদযো, অৰিঞ্ঞাণকা রত্তিভাগে খাণুৰল্লিআদযো বহূ অত্থি। সরীসপাতি দীঘজাতিকাদিসরীসপা। নিসীদি তত্থ ভিক্খূতি তাদিসে ঠানে ভিক্খু নিসিন্নো। ইমিনা ইদং দীপেতি – ভগৰা যথা তুম্হে এতরহি তত্রট্ঠকভেরৰারম্মণানি চেৰ সরীসপে চ ৰিজ্জুনিচ্ছারণাদীনি চ অমনসিকত্ৰা নিসিন্না, এৰমেৰং পধানমনুযুত্তা ভিক্খূ নিসীদন্তীতি।
Yattha bheravāti yasmiṃ ṭhāne bhayajanakā saviññāṇakā sīhabyagghādayo, aviññāṇakā rattibhāge khāṇuvalliādayo bahū atthi. Sarīsapāti dīghajātikādisarīsapā. Nisīdi tattha bhikkhūti tādise ṭhāne bhikkhu nisinno. Iminā idaṃ dīpeti – bhagavā yathā tumhe etarahi tatraṭṭhakabheravārammaṇāni ceva sarīsape ca vijjunicchāraṇādīni ca amanasikatvā nisinnā, evamevaṃ padhānamanuyuttā bhikkhū nisīdantīti.
জাতু মে দিট্ঠন্তি একংসেন মযা দিট্ঠং। ন যিদং ইতিহীতিহন্তি ইদং ইতিহ ইতিহাতি ন তক্কহেতু ৰা নযহেতু ৰা পিটকসম্পদানেন ৰা অহং ৰদামি। একস্মিং ব্রহ্মচরিযস্মিন্তি একায ধম্মদেসনায। ধম্মদেসনা হি ইধ ব্রহ্মচরিযন্তি অধিপ্পেতা। মচ্চুহাযিনন্তি মরণপরিচ্চাগিনং খীণাসৰানং।
Jātu me diṭṭhanti ekaṃsena mayā diṭṭhaṃ. Na yidaṃ itihītihanti idaṃ itiha itihāti na takkahetu vā nayahetu vā piṭakasampadānena vā ahaṃ vadāmi. Ekasmiṃ brahmacariyasminti ekāya dhammadesanāya. Dhammadesanā hi idha brahmacariyanti adhippetā. Maccuhāyinanti maraṇapariccāginaṃ khīṇāsavānaṃ.
দসা চ দসধা দসাতি এত্থ দসাতি দসেৰ, দসধা দসাতি সতং, অঞ্ঞে চ দসুত্তরং সেখসতং পস্সামীতি ৰদতি। সোতসমাপন্নাতি মগ্গসোতং সমাপন্না। অতিরচ্ছানগামিনোতি দেসনামত্তমেতং, অৰিনিপাতধম্মাতি অত্থো। সঙ্খাতুং নোপি সক্কোমীতি মুসাৰাদভযেন এত্তকা নাম পুঞ্ঞভাগিনো সত্তাতি গণেতুং ন সক্কোমীতি বহুং ব্রহ্মধম্মদেসনং সন্ধায এৰমাহ। ততিযং।
Dasā ca dasadhā dasāti ettha dasāti daseva, dasadhā dasāti sataṃ, aññe ca dasuttaraṃ sekhasataṃ passāmīti vadati. Sotasamāpannāti maggasotaṃ samāpannā. Atiracchānagāminoti desanāmattametaṃ, avinipātadhammāti attho. Saṅkhātuṃ nopi sakkomīti musāvādabhayena ettakā nāma puññabhāgino sattāti gaṇetuṃ na sakkomīti bahuṃ brahmadhammadesanaṃ sandhāya evamāha. Tatiyaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৩. অন্ধকৰিন্দসুত্তং • 3. Andhakavindasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩. অন্ধকৰিন্দসুত্তৰণ্ণনা • 3. Andhakavindasuttavaṇṇanā
