| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৩. অন্ধকৰিন্দসুত্তৰণ্ণনা
3. Andhakavindasuttavaṇṇanā
১৮৪. জনতন্তি জনানং সমূহং, জনসঞ্চরণট্ঠানন্তি অত্থো। মনুস্সানং অনুপচারেতি যত্তকে কসনাদিকিচ্চং করোন্তানং সঞ্চারো হোতি, এত্তকং অতিক্কমিত্ৰা অনুপচারে। সংযোজনৰিপ্পমোক্খাতি সংযোজনৰিমোক্খহেতু। ৰিৰেকরতিং পৰিৰেকসুখজ্ঝানং অলভন্তো। চিত্তানুরক্খণত্থন্তি পুব্বে মং মনুস্সা ‘‘অরঞ্ঞৰাসেন পৰিৰিত্তো অসংসট্ঠো আরদ্ধৰীরিযো’’তি মঞ্ঞিংসু, ইদানি গামন্তে ৰসন্তং দিস্ৰা গণসঙ্গণিকায নিৰুট্ঠোতি অপ্পসাদং আপজ্জিস্সন্তি। যদিপি মে ইধ অভিরতি নত্থি, এৰং সন্তেপি ইধেৰ ৰসিস্সামীতি ৰিক্খিত্তচিত্তেন হুত্ৰা ন ৰসিতব্বং, কো অত্থো চিত্তৰসং গন্ত্ৰাতি অধিপ্পাযো। সতিপট্ঠানপরাযণোতি সতিপট্ঠানভাৰনারতো। এৰং হিস্স গণৰাসোপি পাসংসো ৰিৰেকৰাসেন ৰিনা সমণকিচ্চস্স অসিজ্ঝনতো।
184.Janatanti janānaṃ samūhaṃ, janasañcaraṇaṭṭhānanti attho. Manussānaṃ anupacāreti yattake kasanādikiccaṃ karontānaṃ sañcāro hoti, ettakaṃ atikkamitvā anupacāre. Saṃyojanavippamokkhāti saṃyojanavimokkhahetu. Vivekaratiṃ pavivekasukhajjhānaṃ alabhanto. Cittānurakkhaṇatthanti pubbe maṃ manussā ‘‘araññavāsena pavivitto asaṃsaṭṭho āraddhavīriyo’’ti maññiṃsu, idāni gāmante vasantaṃ disvā gaṇasaṅgaṇikāya nivuṭṭhoti appasādaṃ āpajjissanti. Yadipi me idha abhirati natthi, evaṃ santepi idheva vasissāmīti vikkhittacittena hutvā na vasitabbaṃ, ko attho cittavasaṃ gantvāti adhippāyo. Satipaṭṭhānaparāyaṇoti satipaṭṭhānabhāvanārato. Evaṃ hissa gaṇavāsopi pāsaṃso vivekavāsena vinā samaṇakiccassa asijjhanato.
ৰট্টভযতো পমুত্তো অজ্ঝাসযৰসেনাতি অধিপ্পাযো।
Vaṭṭabhayato pamutto ajjhāsayavasenāti adhippāyo.
নিসীদি তত্থ ভিক্খূতি ইমিনা সত্তূপলদ্ধিযা অনিস্সিতত্তা যথারুচিযা তেসং নিসজ্জং দস্সেতি। তেনাহ ‘‘ইমিনা’’তিআদি।
Nisīdi tattha bhikkhūti iminā sattūpaladdhiyā anissitattā yathāruciyā tesaṃ nisajjaṃ dasseti. Tenāha ‘‘iminā’’tiādi.
ইমিনা চ ইমিনা চ আকারেন জাতন্তি ন অনুস্সৰদস্সনমেতং, ন অনুস্সৰগ্গহণং। তক্কহেতু নযহেতু ৰা ন ৰদামীতি যোজনা। পিটকং গন্থো সম্পদীযতি এতস্সাতি পিটকসম্পদানং, গন্থস্স উগ্গণ্হনতো তেন পিটকস্স উগ্গণ্হনকভাৰেন, কেনচি গন্থানুসারেন এৰং ন ৰদামীতি অত্থো। ব্রহ্মস্স সেট্ঠস্স ধম্মস্স চরিযং ৰাচসিকং পৰত্ততীতি ব্রহ্মচরিযং, ধম্মদেসনা। ভাৰিতেন মরণস্স সব্বসো ভাগেন ৰিপ্পহানেন মরণপরিচ্চাগীনং। তে চ খীণজাতিকাতি আহ ‘‘খীণাসৰান’’ন্তি।
Iminā ca iminā ca ākārena jātanti na anussavadassanametaṃ, na anussavaggahaṇaṃ. Takkahetu nayahetu vā na vadāmīti yojanā. Piṭakaṃ gantho sampadīyati etassāti piṭakasampadānaṃ, ganthassa uggaṇhanato tena piṭakassa uggaṇhanakabhāvena, kenaci ganthānusārena evaṃ na vadāmīti attho. Brahmassa seṭṭhassa dhammassa cariyaṃ vācasikaṃ pavattatīti brahmacariyaṃ, dhammadesanā. Bhāvitena maraṇassa sabbaso bhāgena vippahānena maraṇapariccāgīnaṃ. Te ca khīṇajātikāti āha ‘‘khīṇāsavāna’’nti.
দসধা দসাতি দসক্খত্তুং দস। অঞ্ঞন্তি পঞ্চসতাধিকসহস্সতো অঞ্ঞং। পুঞ্ঞভাগিনোতি ৰিৰট্টনিস্সিতপুঞ্ঞস্স ভাগিনো তস্সা দেসনায এত্তকা সত্তা জাতাতি গণেতুং অহং ন সক্কোমীতি দস্সেতি। ব্রহ্মধম্মদেসনন্তি ব্রহ্মুনা ৰুত্তং আহ।
Dasadhādasāti dasakkhattuṃ dasa. Aññanti pañcasatādhikasahassato aññaṃ. Puññabhāginoti vivaṭṭanissitapuññassa bhāgino tassā desanāya ettakā sattā jātāti gaṇetuṃ ahaṃ na sakkomīti dasseti. Brahmadhammadesananti brahmunā vuttaṃ āha.
অন্ধকৰিন্দসুত্তৰণ্ণনা নিট্ঠিতা।
Andhakavindasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৩. অন্ধকৰিন্দসুত্তং • 3. Andhakavindasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩. অন্ধকৰিন্দসুত্তৰণ্ণনা • 3. Andhakavindasuttavaṇṇanā
