| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
3. අන්‌ධකවින්‌දසුත්‌තවණ්‌ණනා
3. Andhakavindasuttavaṇṇanā
184. තතියෙ අන්‌ධකවින්‌දන්‌ති එවංනාමකං ගාමං. උපසඞ්‌කමීති ‘‘සත්‌ථා ඉදානිපි වීරියං කරොති පධානමනුයුඤ්‌ජති, ගච්‌ඡාමිස්‌ස සන්‌තිකෙ ඨත්‌වා සාසනානුච්‌ඡවිකං වීරියපටිසංයුත්‌තං ගාථං වක්‌ඛාමී’’ති උපසඞ්‌කමි.
184. Tatiye andhakavindanti evaṃnāmakaṃ gāmaṃ. Upasaṅkamīti ‘‘satthā idānipi vīriyaṃ karoti padhānamanuyuñjati, gacchāmissa santike ṭhatvā sāsanānucchavikaṃ vīriyapaṭisaṃyuttaṃ gāthaṃ vakkhāmī’’ti upasaṅkami.
පන්‌තානීති ජනතං අතික්‌කමිත්‌වා මනුස්‌සානං අනුපචාරෙ ඨිතානි. සංයොජනවිප්‌පමොක්‌ඛාති තානි ච සෙනාසනානි සෙවමානො න චීවරාදීනං අත්‌ථාය සෙවෙය්‍ය, අථ ඛො දසසංයොජනවිප්‌පමොක්‌ඛත්‌ථාය චරෙය්‍ය. සඞ්‌ඝෙ වසෙති තෙසු සෙනාසනෙසු රතිං අලභන්‌තො උපට්‌ඨාකාදීනං චිත්‌තානුරක්‌ඛණත්‌ථං ගද්‍රභපිට්‌ඨෙ රජං විය උප්‌පතන්‌තො අරඤ්‌ඤෙ අචරිත්‌වා සඞ්‌ඝමජ්‌ඣෙ වසෙය්‍ය. රක්‌ඛිතත්‌තො සතීමාති තත්‌ථ ච වසන්‌තො සගවචණ්‌ඩො ගොණො විය සබ්‍රහ්‌මචාරිනො අවිජ්‌ඣන්‌තො අඝට්‌ටෙන්‌තො රක්‌ඛිතත්‌තො සතිපට්‌ඨානපරායණො හුත්‌වා වසෙය්‍ය.
Pantānīti janataṃ atikkamitvā manussānaṃ anupacāre ṭhitāni. Saṃyojanavippamokkhāti tāni ca senāsanāni sevamāno na cīvarādīnaṃ atthāya seveyya, atha kho dasasaṃyojanavippamokkhatthāya careyya. Saṅghe vaseti tesu senāsanesu ratiṃ alabhanto upaṭṭhākādīnaṃ cittānurakkhaṇatthaṃ gadrabhapiṭṭhe rajaṃ viya uppatanto araññe acaritvā saṅghamajjhe vaseyya. Rakkhitatto satīmāti tattha ca vasanto sagavacaṇḍo goṇo viya sabrahmacārino avijjhanto aghaṭṭento rakkhitatto satipaṭṭhānaparāyaṇo hutvā vaseyya.
ඉදානි සඞ්‌ඝෙ වසමානස්‌ස භික්‌ඛුනො භික්‌ඛාචාරවත්‌තං ආචික්‌ඛන්‌තො කුලාකුලන්‌තිආදිමාහ. තත්‌ථ පිණ්‌ඩිකාය චරන්‌තොති පිණ්‌ඩත්‌ථාය චරමානො. සෙවෙථ පන්‌තානි සෙනාසනානීති සඞ්‌ඝමජ්‌ඣං ඔතරිත්‌වා වසමානොපි ධුරපරිවෙණෙ තාලනාළිකෙරආදීනි රොපෙත්‌වා උපට්‌ඨාකාදිසංසට්‌ඨො න වසෙය්‍ය, චිත්‌තකල්‌ලතං පන ජනෙත්‌වා චිත්‌තං හාසෙත්‌වා තොසෙත්‌වා පුන පන්‌තසෙනාසනෙ වසෙය්‍යාති අරඤ්‌ඤස්‌සෙව වණ්‌ණං කථෙති. භයාති වට්‌ටභයතො. අභයෙති නිබ්‌බානෙ. විමුත්‌තොති අධිමුත්‌තො හුත්‌වා වසෙය්‍ය.
Idāni saṅghe vasamānassa bhikkhuno bhikkhācāravattaṃ ācikkhanto kulākulantiādimāha. Tattha piṇḍikāya carantoti piṇḍatthāya caramāno. Sevetha pantāni senāsanānīti saṅghamajjhaṃ otaritvā vasamānopi dhurapariveṇe tālanāḷikeraādīni ropetvā upaṭṭhākādisaṃsaṭṭho na vaseyya, cittakallataṃ pana janetvā cittaṃ hāsetvā tosetvā puna pantasenāsane vaseyyāti araññasseva vaṇṇaṃ katheti. Bhayāti vaṭṭabhayato. Abhayeti nibbāne. Vimuttoti adhimutto hutvā vaseyya.
යත්‌ථ භෙරවාති යස්‌මිං ඨානෙ භයජනකා සවිඤ්‌ඤාණකා සීහබ්‍යග්‌ඝාදයො, අවිඤ්‌ඤාණකා රත්‌තිභාගෙ ඛාණුවල්‌ලිආදයො බහූ අත්‌ථි. සරීසපාති දීඝජාතිකාදිසරීසපා. නිසීදි තත්‌ථ භික්‌ඛූති තාදිසෙ ඨානෙ භික්‌ඛු නිසින්‌නො. ඉමිනා ඉදං දීපෙති – භගවා යථා තුම්‌හෙ එතරහි තත්‍රට්‌ඨකභෙරවාරම්‌මණානි චෙව සරීසපෙ ච විජ්‌ජුනිච්‌ඡාරණාදීනි ච අමනසිකත්‌වා නිසින්‌නා, එවමෙවං පධානමනුයුත්‌තා භික්‌ඛූ නිසීදන්‌තීති.
Yattha bheravāti yasmiṃ ṭhāne bhayajanakā saviññāṇakā sīhabyagghādayo, aviññāṇakā rattibhāge khāṇuvalliādayo bahū atthi. Sarīsapāti dīghajātikādisarīsapā. Nisīdi tattha bhikkhūti tādise ṭhāne bhikkhu nisinno. Iminā idaṃ dīpeti – bhagavā yathā tumhe etarahi tatraṭṭhakabheravārammaṇāni ceva sarīsape ca vijjunicchāraṇādīni ca amanasikatvā nisinnā, evamevaṃ padhānamanuyuttā bhikkhū nisīdantīti.
ජාතු මෙ දිට්‌ඨන්‌ති එකංසෙන මයා දිට්‌ඨං. න යිදං ඉතිහීතිහන්‌ති ඉදං ඉතිහ ඉතිහාති න තක්‌කහෙතු වා නයහෙතු වා පිටකසම්‌පදානෙන වා අහං වදාමි. එකස්‌මිං බ්‍රහ්‌මචරියස්‌මින්‌ති එකාය ධම්‌මදෙසනාය. ධම්‌මදෙසනා හි ඉධ බ්‍රහ්‌මචරියන්‌ති අධිප්‌පෙතා. මච්‌චුහායිනන්‌ති මරණපරිච්‌චාගිනං ඛීණාසවානං.
Jātu me diṭṭhanti ekaṃsena mayā diṭṭhaṃ. Na yidaṃ itihītihanti idaṃ itiha itihāti na takkahetu vā nayahetu vā piṭakasampadānena vā ahaṃ vadāmi. Ekasmiṃ brahmacariyasminti ekāya dhammadesanāya. Dhammadesanā hi idha brahmacariyanti adhippetā. Maccuhāyinanti maraṇapariccāginaṃ khīṇāsavānaṃ.
දසා ච දසධා දසාති එත්‌ථ දසාති දසෙව, දසධා දසාති සතං, අඤ්‌ඤෙ ච දසුත්‌තරං සෙඛසතං පස්‌සාමීති වදති. සොතසමාපන්‌නාති මග්‌ගසොතං සමාපන්‌නා. අතිරච්‌ඡානගාමිනොති දෙසනාමත්‌තමෙතං, අවිනිපාතධම්‌මාති අත්‌ථො. සඞ්‌ඛාතුං නොපි සක්‌කොමීති මුසාවාදභයෙන එත්‌තකා නාම පුඤ්‌ඤභාගිනො සත්‌තාති ගණෙතුං න සක්‌කොමීති බහුං බ්‍රහ්‌මධම්‌මදෙසනං සන්‌ධාය එවමාහ. තතියං.
Dasā ca dasadhā dasāti ettha dasāti daseva, dasadhā dasāti sataṃ, aññe ca dasuttaraṃ sekhasataṃ passāmīti vadati. Sotasamāpannāti maggasotaṃ samāpannā. Atiracchānagāminoti desanāmattametaṃ, avinipātadhammāti attho. Saṅkhātuṃ nopi sakkomīti musāvādabhayena ettakā nāma puññabhāgino sattāti gaṇetuṃ na sakkomīti bahuṃ brahmadhammadesanaṃ sandhāya evamāha. Tatiyaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 3. අන්‌ධකවින්‌දසුත්‌තං • 3. Andhakavindasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 3. අන්‌ධකවින්‌දසුත්‌තවණ්‌ණනා • 3. Andhakavindasuttavaṇṇanā
