| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
9. அந்த⁴ஸுத்தவண்ணனா
9. Andhasuttavaṇṇanā
29. நவமே சக்கு² ந ஹோதீதி பஞ்ஞாசக்கு² ந ஹோதி. பா²திங் கரெய்யாதி பீ²தங் வட்³டி⁴தங் கரெய்ய. ஸாவஜ்ஜானவஜ்ஜேதி ஸதோ³ஸனித்³தோ³ஸே. ஹீனப்பணீதேதி அத⁴முத்தமே. கண்ஹஸுக்கஸப்படிபா⁴கே³தி கண்ஹஸுக்காயேவ அஞ்ஞமஞ்ஞங் படிபா³ஹனதோ படிபக்க²வஸேன ஸப்படிபா⁴கா³தி வுச்சந்தி. அயங் பனெத்த² ஸங்கே²போ – குஸலே த⁴ம்மே ‘‘குஸலா த⁴ம்மா’’தி ஜானெய்ய, அகுஸலே த⁴ம்மே ‘‘அகுஸலா த⁴ம்மா’’தி ஜானெய்ய. ஸாவஜ்ஜாதீ³ஸுபி ஏஸேவ நயோ. கண்ஹஸுக்கஸப்படிபா⁴கே³ஸு பன கண்ஹத⁴ம்மே ‘‘ஸுக்கஸப்படிபா⁴கா³’’தி ஜானெய்ய, ஸுக்கத⁴ம்மே ‘‘கண்ஹஸப்படிபா⁴கா³’’தி யேன பஞ்ஞாசக்கு²னா ஜானெய்ய, ததா²ரூபம்பிஸ்ஸ சக்கு² ந ஹோதீதி. இமினா நயேன ஸேஸவாரேஸுபி அத்தோ² வேதி³தப்³போ³.
29. Navame cakkhu na hotīti paññācakkhu na hoti. Phātiṃ kareyyāti phītaṃ vaḍḍhitaṃ kareyya. Sāvajjānavajjeti sadosaniddose. Hīnappaṇīteti adhamuttame. Kaṇhasukkasappaṭibhāgeti kaṇhasukkāyeva aññamaññaṃ paṭibāhanato paṭipakkhavasena sappaṭibhāgāti vuccanti. Ayaṃ panettha saṅkhepo – kusale dhamme ‘‘kusalā dhammā’’ti jāneyya, akusale dhamme ‘‘akusalā dhammā’’ti jāneyya. Sāvajjādīsupi eseva nayo. Kaṇhasukkasappaṭibhāgesu pana kaṇhadhamme ‘‘sukkasappaṭibhāgā’’ti jāneyya, sukkadhamme ‘‘kaṇhasappaṭibhāgā’’ti yena paññācakkhunā jāneyya, tathārūpampissa cakkhu na hotīti. Iminā nayena sesavāresupi attho veditabbo.
ந சேவ போ⁴கா³ ததா²ரூபாதி ததா²ஜாதிகா போ⁴கா³பிஸ்ஸ ந ஹொந்தி. ந ச புஞ்ஞானி குப்³ப³தீதி புஞ்ஞானி ச ந கரோதி. எத்தாவதா போ⁴கு³ப்பாத³னசக்கு²னோ ச புஞ்ஞகரணசக்கு²னோ ச அபா⁴வோ வுத்தோ. உப⁴யத்த² கலிக்³கா³ஹோதி இத⁴லோகே ச பரலோகே சாதி உப⁴யஸ்மிம்பி அபரத்³த⁴க்³கா³ஹோ, பராஜயக்³கா³ஹோ ஹோதீதி அத்தோ². அத² வா உப⁴யத்த² கலிக்³கா³ஹோதி உப⁴யேஸம்பி தி³ட்ட²த⁴ம்மிகஸம்பராயிகானங் அத்தா²னங் கலிக்³கா³ஹோ, பராஜயக்³கா³ஹோதி அத்தோ². த⁴ம்மாத⁴ம்மேனாதி த³ஸகுஸலகம்மபத²த⁴ம்மேனபி த³ஸஅகுஸலகம்மபத²அத⁴ம்மேனபி. ஸடோ²தி கேராடிகோ. போ⁴கா³னி பரியேஸதீதி போ⁴கே³ க³வேஸதி. தெ²ய்யேன கூடகம்மேன, முஸாவாதே³ன சூப⁴யந்தி தெ²ய்யாதீ³ஸு உப⁴யேன பரியேஸதீதி அத்தோ². கத²ங்? தெ²ய்யேன கூடகம்மேன ச பரியேஸதி, தெ²ய்யேன முஸாவாதே³ன ச பரியேஸதி , கூடகம்மேன முஸாவாதே³ன ச பரியேஸதி. ஸங்கா⁴துந்தி ஸங்க⁴ரிதுங். த⁴ம்மலத்³தே⁴ஹீதி த³ஸகுஸலகம்மபத²த⁴ம்மங் அகோபெத்வா லத்³தே⁴ஹி. உட்டா²னாதி⁴க³தந்தி வீரியேன அதி⁴க³தங். அப்³யக்³க⁴மானஸோதி நிப்³பி³சிகிச்ச²சித்தோ. ப⁴த்³த³கங் டா²னந்தி ஸெட்ட²ங் தே³வட்டா²னங். ந ஸோசதீதி யஸ்மிங் டா²னே அந்தோஸோகேன ந ஸோசதி.
Na ceva bhogā tathārūpāti tathājātikā bhogāpissa na honti. Na ca puññāni kubbatīti puññāni ca na karoti. Ettāvatā bhoguppādanacakkhuno ca puññakaraṇacakkhuno ca abhāvo vutto. Ubhayattha kaliggāhoti idhaloke ca paraloke cāti ubhayasmimpi aparaddhaggāho, parājayaggāho hotīti attho. Atha vā ubhayattha kaliggāhoti ubhayesampi diṭṭhadhammikasamparāyikānaṃ atthānaṃ kaliggāho, parājayaggāhoti attho. Dhammādhammenāti dasakusalakammapathadhammenapi dasaakusalakammapathaadhammenapi. Saṭhoti kerāṭiko. Bhogāni pariyesatīti bhoge gavesati. Theyyenakūṭakammena, musāvādena cūbhayanti theyyādīsu ubhayena pariyesatīti attho. Kathaṃ? Theyyena kūṭakammena ca pariyesati, theyyena musāvādena ca pariyesati , kūṭakammena musāvādena ca pariyesati. Saṅghātunti saṅgharituṃ. Dhammaladdhehīti dasakusalakammapathadhammaṃ akopetvā laddhehi. Uṭṭhānādhigatanti vīriyena adhigataṃ. Abyagghamānasoti nibbicikicchacitto. Bhaddakaṃ ṭhānanti seṭṭhaṃ devaṭṭhānaṃ. Na socatīti yasmiṃ ṭhāne antosokena na socati.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. அந்த⁴ஸுத்தங் • 9. Andhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9. அந்த⁴ஸுத்தவண்ணனா • 9. Andhasuttavaṇṇanā
