| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
9. அந்த⁴ஸுத்தவண்ணனா
9. Andhasuttavaṇṇanā
29. நவமே அந்தோ⁴திஆதீ³ஸு பாளிபதே³ஸு பட²மோ தி³ட்ட²த⁴ம்மிகபோ⁴க³ஸங்ஹரணபஞ்ஞாசக்கு²னோ ச ஸம்பராயிகத்த²ஸாத⁴னபஞ்ஞாசக்கு²னோ ச அபா⁴வா ‘‘அந்தோ⁴’’தி வுச்சதி து³தியோபி, ததியோ பன த்³வின்னம்பி பா⁴வா ‘‘த்³விசக்கூ²’’தி வுச்சதி. பஞ்ஞாசக்கூ²தி ஆயகோஸல்லபூ⁴தா பஞ்ஞாசக்கு². தேனாஹ ‘‘பா²திங் கரெய்யா’’தி. அத⁴முத்தமேதி அத⁴மே சேவ உத்தமே ச. படிபக்க²வஸேனாதி படிபக்க²ஸ்ஸ அத்தி²தாவஸேன. ஸுக்கஸப்படிபா⁴கா³தி ஸுக்கத⁴ம்மேஹி பஹாயகேஹி ஸப்படிபா⁴கா³தி ஜானெய்ய. கண்ஹஸப்படிபா⁴கா³தி கண்ஹத⁴ம்மேஹி பஹாதப்³பே³ஹி ஸப்படிபா⁴கா³தி ஜானெய்ய.
29. Navame andhotiādīsu pāḷipadesu paṭhamo diṭṭhadhammikabhogasaṃharaṇapaññācakkhuno ca samparāyikatthasādhanapaññācakkhuno ca abhāvā ‘‘andho’’ti vuccati dutiyopi, tatiyo pana dvinnampi bhāvā ‘‘dvicakkhū’’ti vuccati. Paññācakkhūti āyakosallabhūtā paññācakkhu. Tenāha ‘‘phātiṃ kareyyā’’ti. Adhamuttameti adhame ceva uttame ca. Paṭipakkhavasenāti paṭipakkhassa atthitāvasena. Sukkasappaṭibhāgāti sukkadhammehi pahāyakehi sappaṭibhāgāti jāneyya. Kaṇhasappaṭibhāgāti kaṇhadhammehi pahātabbehi sappaṭibhāgāti jāneyya.
ததா²ஜாதிகாதி யாதி³ஸேஹி ஸபுத்ததா³ரபரிஜனஸஞாதிமித்தப³ந்த⁴வக்³க³ங் அத்தானங் ஸுகே²தி பீணேதி, தாதி³ஸா போ⁴கா³பி ந ஸந்தி. புஞ்ஞானி ச ந கரோதீதி ஸமணப்³ராஹ்மணகபணத்³தி⁴கயாசகானங் ஸந்தப்பனவஸேன புஞ்ஞானி ந கரோதி. உப⁴யத்தா²தி உப⁴யஸ்மிங் லோகே, உப⁴யஸ்மிங் வா அத்தே²தி விக்³க³ஹோதி த³ஸ்ஸெந்தோ ‘‘இத⁴லோகே’’திஆதி³மாஹ. உப⁴யேனாதி வுத்தமத்த²ங் யோஜெத்வா த³ஸ்ஸேதுங் ‘‘கத²’’ந்திஆதி³ வுத்தங். யஸ்மிங் டா²னேதி யஸ்மிங்யேவ டா²னே. ந ஸோசதீதி ஸோகஹேதூனங் தத்த² அபா⁴வதோ ந ஸோசதி.
Tathājātikāti yādisehi saputtadāraparijanasañātimittabandhavaggaṃ attānaṃ sukheti pīṇeti, tādisā bhogāpi na santi. Puññāni ca na karotīti samaṇabrāhmaṇakapaṇaddhikayācakānaṃ santappanavasena puññāni na karoti. Ubhayatthāti ubhayasmiṃ loke, ubhayasmiṃ vā attheti viggahoti dassento ‘‘idhaloke’’tiādimāha. Ubhayenāti vuttamatthaṃ yojetvā dassetuṃ ‘‘katha’’ntiādi vuttaṃ. Yasmiṃ ṭhāneti yasmiṃyeva ṭhāne. Na socatīti sokahetūnaṃ tattha abhāvato na socati.
அந்த⁴ஸுத்தவண்ணனா நிட்டி²தா.
Andhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. அந்த⁴ஸுத்தங் • 9. Andhasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. அந்த⁴ஸுத்தவண்ணனா • 9. Andhasuttavaṇṇanā
