| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
৯. অন্ধসুত্তৰণ্ণনা
9. Andhasuttavaṇṇanā
২৯. নৰমে চক্খু ন হোতীতি পঞ্ঞাচক্খু ন হোতি। ফাতিং করেয্যাতি ফীতং ৰড্ঢিতং করেয্য। সাৰজ্জানৰজ্জেতি সদোসনিদ্দোসে। হীনপ্পণীতেতি অধমুত্তমে। কণ্হসুক্কসপ্পটিভাগেতি কণ্হসুক্কাযেৰ অঞ্ঞমঞ্ঞং পটিবাহনতো পটিপক্খৰসেন সপ্পটিভাগাতি ৰুচ্চন্তি। অযং পনেত্থ সঙ্খেপো – কুসলে ধম্মে ‘‘কুসলা ধম্মা’’তি জানেয্য, অকুসলে ধম্মে ‘‘অকুসলা ধম্মা’’তি জানেয্য। সাৰজ্জাদীসুপি এসেৰ নযো। কণ্হসুক্কসপ্পটিভাগেসু পন কণ্হধম্মে ‘‘সুক্কসপ্পটিভাগা’’তি জানেয্য, সুক্কধম্মে ‘‘কণ্হসপ্পটিভাগা’’তি যেন পঞ্ঞাচক্খুনা জানেয্য, তথারূপম্পিস্স চক্খু ন হোতীতি। ইমিনা নযেন সেসৰারেসুপি অত্থো ৰেদিতব্বো।
29. Navame cakkhu na hotīti paññācakkhu na hoti. Phātiṃ kareyyāti phītaṃ vaḍḍhitaṃ kareyya. Sāvajjānavajjeti sadosaniddose. Hīnappaṇīteti adhamuttame. Kaṇhasukkasappaṭibhāgeti kaṇhasukkāyeva aññamaññaṃ paṭibāhanato paṭipakkhavasena sappaṭibhāgāti vuccanti. Ayaṃ panettha saṅkhepo – kusale dhamme ‘‘kusalā dhammā’’ti jāneyya, akusale dhamme ‘‘akusalā dhammā’’ti jāneyya. Sāvajjādīsupi eseva nayo. Kaṇhasukkasappaṭibhāgesu pana kaṇhadhamme ‘‘sukkasappaṭibhāgā’’ti jāneyya, sukkadhamme ‘‘kaṇhasappaṭibhāgā’’ti yena paññācakkhunā jāneyya, tathārūpampissa cakkhu na hotīti. Iminā nayena sesavāresupi attho veditabbo.
ন চেৰ ভোগা তথারূপাতি তথাজাতিকা ভোগাপিস্স ন হোন্তি। ন চ পুঞ্ঞানি কুব্বতীতি পুঞ্ঞানি চ ন করোতি। এত্তাৰতা ভোগুপ্পাদনচক্খুনো চ পুঞ্ঞকরণচক্খুনো চ অভাৰো ৰুত্তো। উভযত্থ কলিগ্গাহোতি ইধলোকে চ পরলোকে চাতি উভযস্মিম্পি অপরদ্ধগ্গাহো, পরাজযগ্গাহো হোতীতি অত্থো। অথ ৰা উভযত্থ কলিগ্গাহোতি উভযেসম্পি দিট্ঠধম্মিকসম্পরাযিকানং অত্থানং কলিগ্গাহো, পরাজযগ্গাহোতি অত্থো। ধম্মাধম্মেনাতি দসকুসলকম্মপথধম্মেনপি দসঅকুসলকম্মপথঅধম্মেনপি। সঠোতি কেরাটিকো। ভোগানি পরিযেসতীতি ভোগে গৰেসতি। থেয্যেন কূটকম্মেন, মুসাৰাদেন চূভযন্তি থেয্যাদীসু উভযেন পরিযেসতীতি অত্থো। কথং? থেয্যেন কূটকম্মেন চ পরিযেসতি, থেয্যেন মুসাৰাদেন চ পরিযেসতি , কূটকম্মেন মুসাৰাদেন চ পরিযেসতি। সঙ্ঘাতুন্তি সঙ্ঘরিতুং। ধম্মলদ্ধেহীতি দসকুসলকম্মপথধম্মং অকোপেত্ৰা লদ্ধেহি। উট্ঠানাধিগতন্তি ৰীরিযেন অধিগতং। অব্যগ্ঘমানসোতি নিব্বিচিকিচ্ছচিত্তো। ভদ্দকং ঠানন্তি সেট্ঠং দেৰট্ঠানং। ন সোচতীতি যস্মিং ঠানে অন্তোসোকেন ন সোচতি।
Na ceva bhogā tathārūpāti tathājātikā bhogāpissa na honti. Na ca puññāni kubbatīti puññāni ca na karoti. Ettāvatā bhoguppādanacakkhuno ca puññakaraṇacakkhuno ca abhāvo vutto. Ubhayattha kaliggāhoti idhaloke ca paraloke cāti ubhayasmimpi aparaddhaggāho, parājayaggāho hotīti attho. Atha vā ubhayattha kaliggāhoti ubhayesampi diṭṭhadhammikasamparāyikānaṃ atthānaṃ kaliggāho, parājayaggāhoti attho. Dhammādhammenāti dasakusalakammapathadhammenapi dasaakusalakammapathaadhammenapi. Saṭhoti kerāṭiko. Bhogāni pariyesatīti bhoge gavesati. Theyyenakūṭakammena, musāvādena cūbhayanti theyyādīsu ubhayena pariyesatīti attho. Kathaṃ? Theyyena kūṭakammena ca pariyesati, theyyena musāvādena ca pariyesati , kūṭakammena musāvādena ca pariyesati. Saṅghātunti saṅgharituṃ. Dhammaladdhehīti dasakusalakammapathadhammaṃ akopetvā laddhehi. Uṭṭhānādhigatanti vīriyena adhigataṃ. Abyagghamānasoti nibbicikicchacitto. Bhaddakaṃ ṭhānanti seṭṭhaṃ devaṭṭhānaṃ. Na socatīti yasmiṃ ṭhāne antosokena na socati.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৯. অন্ধসুত্তং • 9. Andhasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৯. অন্ধসুত্তৰণ্ণনা • 9. Andhasuttavaṇṇanā
