| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
៩. អន្ធសុត្តវណ្ណនា
9. Andhasuttavaṇṇanā
២៩. នវមេ អន្ធោតិអាទីសុ បាឡិបទេសុ បឋមោ ទិដ្ឋធម្មិកភោគសំហរណបញ្ញាចក្ខុនោ ច សម្បរាយិកត្ថសាធនបញ្ញាចក្ខុនោ ច អភាវា ‘‘អន្ធោ’’តិ វុច្ចតិ ទុតិយោបិ, តតិយោ បន ទ្វិន្នម្បិ ភាវា ‘‘ទ្វិចក្ខូ’’តិ វុច្ចតិ។ បញ្ញាចក្ខូតិ អាយកោសល្លភូតា បញ្ញាចក្ខុ។ តេនាហ ‘‘ផាតិំ ករេយ្យា’’តិ។ អធមុត្តមេតិ អធមេ ចេវ ឧត្តមេ ច។ បដិបក្ខវសេនាតិ បដិបក្ខស្ស អត្ថិតាវសេន។ សុក្កសប្បដិភាគាតិ សុក្កធម្មេហិ បហាយកេហិ សប្បដិភាគាតិ ជានេយ្យ។ កណ្ហសប្បដិភាគាតិ កណ្ហធម្មេហិ បហាតព្ពេហិ សប្បដិភាគាតិ ជានេយ្យ។
29. Navame andhotiādīsu pāḷipadesu paṭhamo diṭṭhadhammikabhogasaṃharaṇapaññācakkhuno ca samparāyikatthasādhanapaññācakkhuno ca abhāvā ‘‘andho’’ti vuccati dutiyopi, tatiyo pana dvinnampi bhāvā ‘‘dvicakkhū’’ti vuccati. Paññācakkhūti āyakosallabhūtā paññācakkhu. Tenāha ‘‘phātiṃ kareyyā’’ti. Adhamuttameti adhame ceva uttame ca. Paṭipakkhavasenāti paṭipakkhassa atthitāvasena. Sukkasappaṭibhāgāti sukkadhammehi pahāyakehi sappaṭibhāgāti jāneyya. Kaṇhasappaṭibhāgāti kaṇhadhammehi pahātabbehi sappaṭibhāgāti jāneyya.
តថាជាតិកាតិ យាទិសេហិ សបុត្តទារបរិជនសញាតិមិត្តពន្ធវគ្គំ អត្តានំ សុខេតិ បីណេតិ, តាទិសា ភោគាបិ ន សន្តិ។ បុញ្ញានិ ច ន ករោតីតិ សមណព្រាហ្មណកបណទ្ធិកយាចកានំ សន្តប្បនវសេន បុញ្ញានិ ន ករោតិ។ ឧភយត្ថាតិ ឧភយស្មិំ លោកេ, ឧភយស្មិំ វា អត្ថេតិ វិគ្គហោតិ ទស្សេន្តោ ‘‘ឥធលោកេ’’តិអាទិមាហ។ ឧភយេនាតិ វុត្តមត្ថំ យោជេត្វា ទស្សេតុំ ‘‘កថ’’ន្តិអាទិ វុត្តំ។ យស្មិំ ឋានេតិ យស្មិំយេវ ឋានេ។ ន សោចតីតិ សោកហេតូនំ តត្ថ អភាវតោ ន សោចតិ។
Tathājātikāti yādisehi saputtadāraparijanasañātimittabandhavaggaṃ attānaṃ sukheti pīṇeti, tādisā bhogāpi na santi. Puññāni ca na karotīti samaṇabrāhmaṇakapaṇaddhikayācakānaṃ santappanavasena puññāni na karoti. Ubhayatthāti ubhayasmiṃ loke, ubhayasmiṃ vā attheti viggahoti dassento ‘‘idhaloke’’tiādimāha. Ubhayenāti vuttamatthaṃ yojetvā dassetuṃ ‘‘katha’’ntiādi vuttaṃ. Yasmiṃ ṭhāneti yasmiṃyeva ṭhāne. Na socatīti sokahetūnaṃ tattha abhāvato na socati.
អន្ធសុត្តវណ្ណនា និដ្ឋិតា។
Andhasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៩. អន្ធសុត្តំ • 9. Andhasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៩. អន្ធសុត្តវណ្ណនា • 9. Andhasuttavaṇṇanā
