| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
9. අන්‌ධසුත්‌තවණ්‌ණනා
9. Andhasuttavaṇṇanā
29. නවමෙ චක්‌ඛු න හොතීති පඤ්‌ඤාචක්‌ඛු න හොති. ඵාතිං කරෙය්‍යාති ඵීතං වඩ්‌ඪිතං කරෙය්‍ය. සාවජ්‌ජානවජ්‌ජෙති සදොසනිද්‌දොසෙ. හීනප්‌පණීතෙති අධමුත්‌තමෙ. කණ්‌හසුක්‌කසප්‌පටිභාගෙති කණ්‌හසුක්‌කායෙව අඤ්‌ඤමඤ්‌ඤං පටිබාහනතො පටිපක්‌ඛවසෙන සප්‌පටිභාගාති වුච්‌චන්‌ති. අයං පනෙත්‌ථ සඞ්‌ඛෙපො – කුසලෙ ධම්‌මෙ ‘‘කුසලා ධම්‌මා’’ති ජානෙය්‍ය, අකුසලෙ ධම්‌මෙ ‘‘අකුසලා ධම්‌මා’’ති ජානෙය්‍ය. සාවජ්‌ජාදීසුපි එසෙව නයො. කණ්‌හසුක්‌කසප්‌පටිභාගෙසු පන කණ්‌හධම්‌මෙ ‘‘සුක්‌කසප්‌පටිභාගා’’ති ජානෙය්‍ය, සුක්‌කධම්‌මෙ ‘‘කණ්‌හසප්‌පටිභාගා’’ති යෙන පඤ්‌ඤාචක්‌ඛුනා ජානෙය්‍ය, තථාරූපම්‌පිස්‌ස චක්‌ඛු න හොතීති. ඉමිනා නයෙන සෙසවාරෙසුපි අත්‌ථො වෙදිතබ්‌බො.
29. Navame cakkhu na hotīti paññācakkhu na hoti. Phātiṃ kareyyāti phītaṃ vaḍḍhitaṃ kareyya. Sāvajjānavajjeti sadosaniddose. Hīnappaṇīteti adhamuttame. Kaṇhasukkasappaṭibhāgeti kaṇhasukkāyeva aññamaññaṃ paṭibāhanato paṭipakkhavasena sappaṭibhāgāti vuccanti. Ayaṃ panettha saṅkhepo – kusale dhamme ‘‘kusalā dhammā’’ti jāneyya, akusale dhamme ‘‘akusalā dhammā’’ti jāneyya. Sāvajjādīsupi eseva nayo. Kaṇhasukkasappaṭibhāgesu pana kaṇhadhamme ‘‘sukkasappaṭibhāgā’’ti jāneyya, sukkadhamme ‘‘kaṇhasappaṭibhāgā’’ti yena paññācakkhunā jāneyya, tathārūpampissa cakkhu na hotīti. Iminā nayena sesavāresupi attho veditabbo.
න චෙව භොගා තථාරූපාති තථාජාතිකා භොගාපිස්‌ස න හොන්‌ති. න ච පුඤ්‌ඤානි කුබ්‌බතීති පුඤ්‌ඤානි ච න කරොති. එත්‌තාවතා භොගුප්‌පාදනචක්‌ඛුනො ච පුඤ්‌ඤකරණචක්‌ඛුනො ච අභාවො වුත්‌තො. උභයත්‌ථ කලිග්‌ගාහොති ඉධලොකෙ ච පරලොකෙ චාති උභයස්‌මිම්‌පි අපරද්‌ධග්‌ගාහො, පරාජයග්‌ගාහො හොතීති අත්‌ථො. අථ වා උභයත්‌ථ කලිග්‌ගාහොති උභයෙසම්‌පි දිට්‌ඨධම්‌මිකසම්‌පරායිකානං අත්‌ථානං කලිග්‌ගාහො, පරාජයග්‌ගාහොති අත්‌ථො. ධම්‌මාධම්‌මෙනාති දසකුසලකම්‌මපථධම්‌මෙනපි දසඅකුසලකම්‌මපථඅධම්‌මෙනපි. සඨොති කෙරාටිකො. භොගානි පරියෙසතීති භොගෙ ගවෙසති. ථෙය්‍යෙන කූටකම්‌මෙන, මුසාවාදෙන චූභයන්‌ති ථෙය්‍යාදීසු උභයෙන පරියෙසතීති අත්‌ථො. කථං? ථෙය්‍යෙන කූටකම්‌මෙන ච පරියෙසති, ථෙය්‍යෙන මුසාවාදෙන ච පරියෙසති , කූටකම්‌මෙන මුසාවාදෙන ච පරියෙසති. සඞ්‌ඝාතුන්‌ති සඞ්‌ඝරිතුං. ධම්‌මලද්‌ධෙහීති දසකුසලකම්‌මපථධම්‌මං අකොපෙත්‌වා ලද්‌ධෙහි. උට්‌ඨානාධිගතන්‌ති වීරියෙන අධිගතං. අබ්‍යග්‌ඝමානසොති නිබ්‌බිචිකිච්‌ඡචිත්‌තො. භද්‌දකං ඨානන්‌ති සෙට්‌ඨං දෙවට්‌ඨානං. න සොචතීති යස්‌මිං ඨානෙ අන්‌තොසොකෙන න සොචති.
Na ceva bhogā tathārūpāti tathājātikā bhogāpissa na honti. Na ca puññāni kubbatīti puññāni ca na karoti. Ettāvatā bhoguppādanacakkhuno ca puññakaraṇacakkhuno ca abhāvo vutto. Ubhayattha kaliggāhoti idhaloke ca paraloke cāti ubhayasmimpi aparaddhaggāho, parājayaggāho hotīti attho. Atha vā ubhayattha kaliggāhoti ubhayesampi diṭṭhadhammikasamparāyikānaṃ atthānaṃ kaliggāho, parājayaggāhoti attho. Dhammādhammenāti dasakusalakammapathadhammenapi dasaakusalakammapathaadhammenapi. Saṭhoti kerāṭiko. Bhogāni pariyesatīti bhoge gavesati. Theyyenakūṭakammena, musāvādena cūbhayanti theyyādīsu ubhayena pariyesatīti attho. Kathaṃ? Theyyena kūṭakammena ca pariyesati, theyyena musāvādena ca pariyesati , kūṭakammena musāvādena ca pariyesati. Saṅghātunti saṅgharituṃ. Dhammaladdhehīti dasakusalakammapathadhammaṃ akopetvā laddhehi. Uṭṭhānādhigatanti vīriyena adhigataṃ. Abyagghamānasoti nibbicikicchacitto. Bhaddakaṃ ṭhānanti seṭṭhaṃ devaṭṭhānaṃ. Na socatīti yasmiṃ ṭhāne antosokena na socati.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 9. අන්‌ධසුත්‌තං • 9. Andhasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 9. අන්‌ධසුත්‌තවණ්‌ණනා • 9. Andhasuttavaṇṇanā
