| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
9. අන්‌ධසුත්‌තවණ්‌ණනා
9. Andhasuttavaṇṇanā
29. නවමෙ අන්‌ධොතිආදීසු පාළිපදෙසු පඨමො දිට්‌ඨධම්‌මිකභොගසංහරණපඤ්‌ඤාචක්‌ඛුනො ච සම්‌පරායිකත්‌ථසාධනපඤ්‌ඤාචක්‌ඛුනො ච අභාවා ‘‘අන්‌ධො’’ති වුච්‌චති දුතියොපි, තතියො පන ද්‌වින්‌නම්‌පි භාවා ‘‘ද්‌විචක්‌ඛූ’’ති වුච්‌චති. පඤ්‌ඤාචක්‌ඛූති ආයකොසල්‌ලභූතා පඤ්‌ඤාචක්‌ඛු. තෙනාහ ‘‘ඵාතිං කරෙය්‍යා’’ති. අධමුත්‌තමෙති අධමෙ චෙව උත්‌තමෙ ච. පටිපක්‌ඛවසෙනාති පටිපක්‌ඛස්‌ස අත්‌ථිතාවසෙන. සුක්‌කසප්‌පටිභාගාති සුක්‌කධම්‌මෙහි පහායකෙහි සප්‌පටිභාගාති ජානෙය්‍ය. කණ්‌හසප්‌පටිභාගාති කණ්‌හධම්‌මෙහි පහාතබ්‌බෙහි සප්‌පටිභාගාති ජානෙය්‍ය.
29. Navame andhotiādīsu pāḷipadesu paṭhamo diṭṭhadhammikabhogasaṃharaṇapaññācakkhuno ca samparāyikatthasādhanapaññācakkhuno ca abhāvā ‘‘andho’’ti vuccati dutiyopi, tatiyo pana dvinnampi bhāvā ‘‘dvicakkhū’’ti vuccati. Paññācakkhūti āyakosallabhūtā paññācakkhu. Tenāha ‘‘phātiṃ kareyyā’’ti. Adhamuttameti adhame ceva uttame ca. Paṭipakkhavasenāti paṭipakkhassa atthitāvasena. Sukkasappaṭibhāgāti sukkadhammehi pahāyakehi sappaṭibhāgāti jāneyya. Kaṇhasappaṭibhāgāti kaṇhadhammehi pahātabbehi sappaṭibhāgāti jāneyya.
තථාජාතිකාති යාදිසෙහි සපුත්‌තදාරපරිජනසඤාතිමිත්‌තබන්‌ධවග්‌ගං අත්‌තානං සුඛෙති පීණෙති, තාදිසා භොගාපි න සන්‌ති. පුඤ්‌ඤානි ච න කරොතීති සමණබ්‍රාහ්‌මණකපණද්‌ධිකයාචකානං සන්‌තප්‌පනවසෙන පුඤ්‌ඤානි න කරොති. උභයත්‌ථාති උභයස්‌මිං ලොකෙ, උභයස්‌මිං වා අත්‌ථෙති විග්‌ගහොති දස්‌සෙන්‌තො ‘‘ඉධලොකෙ’’තිආදිමාහ. උභයෙනාති වුත්‌තමත්‌ථං යොජෙත්‌වා දස්‌සෙතුං ‘‘කථ’’න්‌තිආදි වුත්‌තං. යස්‌මිං ඨානෙති යස්‌මිංයෙව ඨානෙ. න සොචතීති සොකහෙතූනං තත්‌ථ අභාවතො න සොචති.
Tathājātikāti yādisehi saputtadāraparijanasañātimittabandhavaggaṃ attānaṃ sukheti pīṇeti, tādisā bhogāpi na santi. Puññāni ca na karotīti samaṇabrāhmaṇakapaṇaddhikayācakānaṃ santappanavasena puññāni na karoti. Ubhayatthāti ubhayasmiṃ loke, ubhayasmiṃ vā attheti viggahoti dassento ‘‘idhaloke’’tiādimāha. Ubhayenāti vuttamatthaṃ yojetvā dassetuṃ ‘‘katha’’ntiādi vuttaṃ. Yasmiṃ ṭhāneti yasmiṃyeva ṭhāne. Na socatīti sokahetūnaṃ tattha abhāvato na socati.
අන්‌ධසුත්‌තවණ්‌ණනා නිට්‌ඨිතා.
Andhasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 9. අන්‌ධසුත්‌තං • 9. Andhasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 9. අන්‌ධසුත්‌තවණ්‌ණනා • 9. Andhasuttavaṇṇanā
