| Library / Tipiṭaka / তিপিটক • Tipiṭaka / ৰিমানৰত্থু-অট্ঠকথা • Vimānavatthu-aṭṭhakathā |
৮. অনেকৰণ্ণৰিমানৰণ্ণনা
8. Anekavaṇṇavimānavaṇṇanā
অনেকৰণ্ণং দরসোকনাসনন্তি অনেকৰণ্ণৰিমানং। তস্স কা উপ্পত্তি? ভগৰা সাৰত্থিযং ৰিহরতি জেতৰনে। তেন সমযেন আযস্মা মহামোগ্গল্লানো হেট্ঠা ৰুত্তনযেন দেৰচারিকং চরন্তো তাৰতিংসভৰনং অগমাসি। অথ নং অনেকৰণ্ণো দেৰপুত্তো দিস্ৰা সঞ্জাতগারৰবহুমানো উপসঙ্কমিত্ৰা অঞ্জলিং পগ্গয্হ অট্ঠাসি। থেরো –
Anekavaṇṇaṃ darasokanāsananti anekavaṇṇavimānaṃ. Tassa kā uppatti? Bhagavā sāvatthiyaṃ viharati jetavane. Tena samayena āyasmā mahāmoggallāno heṭṭhā vuttanayena devacārikaṃ caranto tāvatiṃsabhavanaṃ agamāsi. Atha naṃ anekavaṇṇo devaputto disvā sañjātagāravabahumāno upasaṅkamitvā añjaliṃ paggayha aṭṭhāsi. Thero –
১১৯৯.
1199.
‘‘অনেকৰণ্ণং দরসোকনাসনং, ৰিমানমারুয্হ অনেকচিত্তং।
‘‘Anekavaṇṇaṃ darasokanāsanaṃ, vimānamāruyha anekacittaṃ;
পরিৰারিতো অচ্ছরাসঙ্গণেন, সুনিম্মিতো ভূতপতীৰ মোদসি॥
Parivārito accharāsaṅgaṇena, sunimmito bhūtapatīva modasi.
১২০০.
1200.
‘‘সমস্সমো নত্থি কুতো পনুত্তরো, যসেন পুঞ্ঞেন চ ইদ্ধিযা চ।
‘‘Samassamo natthi kuto panuttaro, yasena puññena ca iddhiyā ca;
সব্বে চ দেৰা তিদসগণা সমেচ্চ, তং তং নমস্সন্তি সসিংৰ দেৰা।
Sabbe ca devā tidasagaṇā samecca, taṃ taṃ namassanti sasiṃva devā;
ইমা চ তে অচ্ছরাযো সমন্ততো, নচ্চন্তি গাযন্তি পমোদযন্তি॥
Imā ca te accharāyo samantato, naccanti gāyanti pamodayanti.
১২০১.
1201.
‘‘দেৰিদ্ধিপত্তোসি মহানুভাৰো,
‘‘Deviddhipattosi mahānubhāvo,
মনুস্সভূতো কিমকাসি পুঞ্ঞং।
Manussabhūto kimakāsi puññaṃ;
কেনাসি এৰং জলিতানুভাৰো,
Kenāsi evaṃ jalitānubhāvo,
ৰণ্ণো চ তে সব্বদিসা পভাসতী’’তি॥ –
Vaṇṇo ca te sabbadisā pabhāsatī’’ti. –
অধিগতসম্পত্তিকিত্তনমুখেন কতকম্মং পুচ্ছি। তং দস্সেতুং –
Adhigatasampattikittanamukhena katakammaṃ pucchi. Taṃ dassetuṃ –
১২০২. ‘‘সো দেৰপুত্তো অত্তমনো…পে॰…যস্স কম্মস্সিদং ফল’’ন্তি॥ –
1202. ‘‘So devaputto attamano…pe…yassa kammassidaṃ phala’’nti. –
ৰুত্তং । সোপি –
Vuttaṃ . Sopi –
১২০৩.
1203.
‘‘অহং ভদন্তে অহুৰাসি পুব্বে, সুমেধনামস্স জিনস্স সাৰকো।
‘‘Ahaṃ bhadante ahuvāsi pubbe, sumedhanāmassa jinassa sāvako;
পুথুজ্জনো অননুবোধোহমস্মি, সো সত্ত ৰস্সানি পরিব্বজিস্সহং॥
Puthujjano ananubodhohamasmi, so satta vassāni paribbajissahaṃ.
১২০৪.
1204.
‘‘সোহং সুমেধস্স জিনস্স সত্থুনো, পরিনিব্বুতস্সোঘতিণ্ণস্স তাদিনো।
‘‘Sohaṃ sumedhassa jinassa satthuno, parinibbutassoghatiṇṇassa tādino;
রতনুচ্চযং হেমজালেন ছন্নং, ৰন্দিত্ৰা থূপস্মিং মনং পসাদযিং॥
Ratanuccayaṃ hemajālena channaṃ, vanditvā thūpasmiṃ manaṃ pasādayiṃ.
১২০৫.
1205.
‘‘ন মাসি দানং ন চ মত্থি দাতুং, পরে চ খো তত্থ সমাদপেসিং।
‘‘Na māsi dānaṃ na ca matthi dātuṃ, pare ca kho tattha samādapesiṃ;
পূজেথ নং পূজনীযস্স ধাতুং, এৰং কির সগ্গমিতো গমিস্সথ॥
Pūjetha naṃ pūjanīyassa dhātuṃ, evaṃ kira saggamito gamissatha.
১২০৬.
1206.
‘‘তদেৰ কম্মং কুসলং কতং মযা,
‘‘Tadeva kammaṃ kusalaṃ kataṃ mayā,
সুখঞ্চ দিব্বং অনুভোমি অত্তনা।
Sukhañca dibbaṃ anubhomi attanā;
মোদামহং তিদসগণস্স মজ্ঝে,
Modāmahaṃ tidasagaṇassa majjhe,
ন তস্স পুঞ্ঞস্স খযম্পি অজ্ঝগ’’ন্তি॥ – কথেসি।
Na tassa puññassa khayampi ajjhaga’’nti. – kathesi;
ইতো কির তিংসকপ্পসহস্সে সুমেধো নাম সম্মাসম্বুদ্ধো লোকে উপ্পজ্জিত্ৰা সদেৰকং লোকং একোভাসং কত্ৰা কতবুদ্ধকিচ্চো পরিনিব্বুতো, মনুস্সেহি চ ভগৰতো ধাতুং গহেত্ৰা রতনচেতিযে কতে অঞ্ঞতরো পুরিসো সত্থু সাসনে পব্বজিত্ৰা সত্ত ৰস্সানি ব্রহ্মচরিযং চরিত্ৰা অনৰট্ঠিতচিত্ততায কুক্কুচ্চকো হুত্ৰা উপ্পব্বজি। উপ্পব্বজিতো চ সংৰেগবহুলতায ধম্মচ্ছন্দৰন্ততায চ চেতিযঙ্গণে সম্মজ্জনপরিভণ্ডাদীনি করোন্তো নিচ্চসীলউপোসথসীলানি রক্খন্তো ধম্মং সুণন্তো অঞ্ঞে চ পুঞ্ঞকিরিযায সমাদপেন্তো ৰিচরি। সো আযুপরিযোসানে কালকতো তাৰতিংসেসু নিব্বত্তি। সো পুঞ্ঞকম্মস্স উল়ারভাৰেন মহেসক্খো মহানুভাৰো সক্কাদীহি দেৰতাহি সক্কতপূজিতো হুত্ৰা তত্থ যাৰতাযুকং ঠত্ৰা ততো চুতো অপরাপরং দেৰমনুস্সেসু সংসরন্তো ইমস্মিং বুদ্ধুপ্পাদে তস্সেৰ কম্মস্স ৰিপাকাৰসেসেন তাৰতিংসভৰনে নিব্বত্তি, ‘‘অনেকৰণ্ণো’’তি নং দেৰতা সঞ্জানিংসু। তং সন্ধায ৰুত্তং ‘‘অথ নং অনেকৰণ্ণো দেৰপুত্তো…পে॰… ন তস্স পুঞ্ঞস্স খযম্পি অজ্ঝগন্তি কথেসী’’তি।
Ito kira tiṃsakappasahasse sumedho nāma sammāsambuddho loke uppajjitvā sadevakaṃ lokaṃ ekobhāsaṃ katvā katabuddhakicco parinibbuto, manussehi ca bhagavato dhātuṃ gahetvā ratanacetiye kate aññataro puriso satthu sāsane pabbajitvā satta vassāni brahmacariyaṃ caritvā anavaṭṭhitacittatāya kukkuccako hutvā uppabbaji. Uppabbajito ca saṃvegabahulatāya dhammacchandavantatāya ca cetiyaṅgaṇe sammajjanaparibhaṇḍādīni karonto niccasīlauposathasīlāni rakkhanto dhammaṃ suṇanto aññe ca puññakiriyāya samādapento vicari. So āyupariyosāne kālakato tāvatiṃsesu nibbatti. So puññakammassa uḷārabhāvena mahesakkho mahānubhāvo sakkādīhi devatāhi sakkatapūjito hutvā tattha yāvatāyukaṃ ṭhatvā tato cuto aparāparaṃ devamanussesu saṃsaranto imasmiṃ buddhuppāde tasseva kammassa vipākāvasesena tāvatiṃsabhavane nibbatti, ‘‘anekavaṇṇo’’ti naṃ devatā sañjāniṃsu. Taṃ sandhāya vuttaṃ ‘‘atha naṃ anekavaṇṇo devaputto…pe… na tassa puññassa khayampi ajjhaganti kathesī’’ti.
১১৯৯. তত্থ অনেকৰণ্ণন্তি নীলপীতাদিৰসেন ৰিৰিধৰণ্ণতায অনন্তরৰিমানাদীনং ৰিৰিধসণ্ঠানতায চ নানাৰিধৰণ্ণং। দরসোকনাসনন্তি সীতলভাৰেন দরথপরিল়াহানং ৰিনোদনতো মনুঞ্ঞতায দস্সনীযতায চ সোকস্স অনোকাসতো দরসোকনাসনং। অনেকচিত্তন্তি নানাৰিধচিত্তরূপং। সুনিম্মিতো ভূতপতীৰাতি তাৰতিংসকাযিকোপি উল়ারদিব্বভোগতায সুনিম্মিতদেৰরাজা ৰিয মোদসি তুস্সসি অভিরমসি।
1199. Tattha anekavaṇṇanti nīlapītādivasena vividhavaṇṇatāya anantaravimānādīnaṃ vividhasaṇṭhānatāya ca nānāvidhavaṇṇaṃ. Darasokanāsananti sītalabhāvena darathapariḷāhānaṃ vinodanato manuññatāya dassanīyatāya ca sokassa anokāsato darasokanāsanaṃ. Anekacittanti nānāvidhacittarūpaṃ. Sunimmito bhūtapatīvāti tāvatiṃsakāyikopi uḷāradibbabhogatāya sunimmitadevarājā viya modasi tussasi abhiramasi.
১২০০. সমস্সমোতি সমো এৰ হুত্ৰা সমো, নিব্বরিযাযেন সদিসো তে তুয্হং নত্থি, কুতো পন কেন কারণেন উত্তরি অধিকো কো নাম সিযা। কেন পন সমতা উত্তরিতরতা চাতি আহ ‘‘যসেন পুঞ্ঞেন চ ইদ্ধিযা চা’’তি। তত্থ যসেনাতি পরিৰারেন। ইদ্ধিযাতি আনুভাৰেন। যসেনাতি ৰা ইস্সরিযেন, ইদ্ধিযাতি দেৰিদ্ধিযা। যসেনাতি ৰা ৰিভৰসম্পত্তিযা, ইদ্ধিযাতি যথিচ্ছি তস্স কামগুণস্স ইজ্ঝনেন। যসেনাতি ৰা কিত্তিঘোসেন, ইদ্ধিযাতি সমিদ্ধিযা। পুঞ্ঞেনাতি তত্থ তত্থ ৰুত্তাৰসিট্ঠপুঞ্ঞফলেন, পুঞ্ঞকম্মেনেৰ ৰা।
1200.Samassamoti samo eva hutvā samo, nibbariyāyena sadiso te tuyhaṃ natthi, kuto pana kena kāraṇena uttari adhiko ko nāma siyā. Kena pana samatā uttaritaratā cāti āha ‘‘yasena puññena ca iddhiyā cā’’ti. Tattha yasenāti parivārena. Iddhiyāti ānubhāvena. Yasenāti vā issariyena, iddhiyāti deviddhiyā. Yasenāti vā vibhavasampattiyā, iddhiyāti yathicchi tassa kāmaguṇassa ijjhanena. Yasenāti vā kittighosena, iddhiyāti samiddhiyā. Puññenāti tattha tattha vuttāvasiṭṭhapuññaphalena, puññakammeneva vā.
‘‘সব্বে চ দেৰা’’তি সামঞ্ঞতো গহিতমত্থং ‘‘তিদসগণা’’তি ইমিনা ৰিসেসেত্ৰা ৰুত্তং। একচ্চস্স পচ্চেকং নিপচ্চকারং করোন্তাপি পমুদিতা ন করোন্তি , ন এৰমেতস্স । এতস্স পন পমুদিতাপি করোন্তিযেৰাতি দস্সেতুং ‘‘সমেচ্চা’’তি ৰুত্তং। তং তন্তি তং ত্ৰং। সসিংৰ দেৰাতি যথা নাম সুক্কপক্খপাটিপদিযং দিস্সমানং সসিং চন্দং মনুস্সা দেৰা চ আদরজাতা নমস্সন্তি, এৰং তং সব্বেপি তিদসগণা নমস্সন্তীতি অত্থো।
‘‘Sabbe ca devā’’ti sāmaññato gahitamatthaṃ ‘‘tidasagaṇā’’ti iminā visesetvā vuttaṃ. Ekaccassa paccekaṃ nipaccakāraṃ karontāpi pamuditā na karonti , na evametassa . Etassa pana pamuditāpi karontiyevāti dassetuṃ ‘‘sameccā’’ti vuttaṃ. Taṃ tanti taṃ tvaṃ. Sasiṃva devāti yathā nāma sukkapakkhapāṭipadiyaṃ dissamānaṃ sasiṃ candaṃ manussā devā ca ādarajātā namassanti, evaṃ taṃ sabbepi tidasagaṇā namassantīti attho.
১২০৩. ভদন্তেতি থেরং গারৰবহুমানেন সমুদাচরতি। অহুৰাসিন্তি অহোসিং। পুব্বেতি পুরিমজাতিযং। সুমেধনামস্স জিনস্স সাৰকোতি সুমেধোতি এৰং পাকটনামস্স সম্মাসম্বুদ্দস্স সাসনে পব্বজিতভাৰেন সাৰকো। পুথূজ্জনোতি অনরিযো। তত্থাপি সচ্চানং অনুবোধমত্তস্সাপি অভাৰেন অননুবোধো। সো সত্ত ৰস্সানি পরিব্বজিস্সহন্তি সো অহং সত্ত সংৰচ্ছরানি পব্বজ্জাগুণমত্তেন ৰিচরিং, উত্তরিমনুস্সধম্মং নাধিগচ্ছিন্তি অধিপ্পাযো।
1203.Bhadanteti theraṃ gāravabahumānena samudācarati. Ahuvāsinti ahosiṃ. Pubbeti purimajātiyaṃ. Sumedhanāmassa jinassa sāvakoti sumedhoti evaṃ pākaṭanāmassa sammāsambuddassa sāsane pabbajitabhāvena sāvako. Puthūjjanoti anariyo. Tatthāpi saccānaṃ anubodhamattassāpi abhāvena ananubodho. So satta vassāni paribbajissahanti so ahaṃ satta saṃvaccharāni pabbajjāguṇamattena vicariṃ, uttarimanussadhammaṃ nādhigacchinti adhippāyo.
১২০৪. রতনুচ্চযন্তি মণিকনকাদিরতনেহি উচ্চিতং উস্সিতরতনচেতিযং। হেমজালেন ছন্নন্তি সমন্ততো উপরি চ কঞ্চনজালেন পটিচ্ছাদিতং। ৰন্দিত্ৰাতি পঞ্চপতিট্ঠিতেন তত্থ তত্থ পণামং কত্ৰা। থূপস্মিং মনং পসাদযিন্তি ‘‘সব্বঞ্ঞুগুণাধিট্ঠানায ৰত ধাতুযা অযং থূপো’’তি থূপস্মিং চিত্তং পসাদেসিং।
1204.Ratanuccayanti maṇikanakādiratanehi uccitaṃ ussitaratanacetiyaṃ. Hemajālena channanti samantato upari ca kañcanajālena paṭicchāditaṃ. Vanditvāti pañcapatiṭṭhitena tattha tattha paṇāmaṃ katvā. Thūpasmiṃ manaṃ pasādayinti ‘‘sabbaññuguṇādhiṭṭhānāya vata dhātuyā ayaṃ thūpo’’ti thūpasmiṃ cittaṃ pasādesiṃ.
১২০৫. ন মাসি দানন্তি মে মযা কতং দানং নাসি নাহোসি। কস্মা পন? ন চ মেত্থি দাতুন্তি মে মম পরিগ্গহভূতং দানং দাতুং ন অত্থি, ন কিঞ্চি দেয্যৰত্থু ৰিজ্জতি, পরে চ খো সত্তে তত্থ দানে সমাদপেসিং। ‘‘পরেসঞ্চ তত্থ সমাদপেসি’’ন্তি চ পঠন্তি, তত্থ পরেসন্তি উপযোগত্থে সামিৰচনং দট্ঠব্বং । পূজেথ নন্তিআদি সমাদপনাকারদস্সনং, তং ধাতুন্তি যোজনা। এৰং কিরাতি কির-সদ্দো অনুস্সৰত্থো।
1205.Na māsi dānanti me mayā kataṃ dānaṃ nāsi nāhosi. Kasmā pana? Na ca metthi dātunti me mama pariggahabhūtaṃ dānaṃ dātuṃ na atthi, na kiñci deyyavatthu vijjati, pare ca kho satte tattha dāne samādapesiṃ. ‘‘Paresañca tattha samādapesi’’nti ca paṭhanti, tattha paresanti upayogatthe sāmivacanaṃ daṭṭhabbaṃ . Pūjetha nantiādi samādapanākāradassanaṃ, taṃ dhātunti yojanā. Evaṃ kirāti kira-saddo anussavattho.
১২০৬. ন তস্স পুঞ্ঞস্স খযম্পি অজ্ঝগন্তি তস্স তদা সুমেধং ভগৰন্তং উদ্দিস্স কতস্স পুঞ্ঞকম্মস্স পরিক্খযং নাধিগচ্ছিং, তস্সেৰ কম্মস্স ৰিপাকাৰসেসং পচ্চনুভোমীতি দস্সেতি। যং পনেত্থ ন ৰুত্তং, তং হেট্ঠা ৰুত্তনযত্তা সুৰিঞ্ঞেয্যমেৰাতি দট্ঠব্বং।
1206.Na tassa puññassa khayampi ajjhaganti tassa tadā sumedhaṃ bhagavantaṃ uddissa katassa puññakammassa parikkhayaṃ nādhigacchiṃ, tasseva kammassa vipākāvasesaṃ paccanubhomīti dasseti. Yaṃ panettha na vuttaṃ, taṃ heṭṭhā vuttanayattā suviññeyyamevāti daṭṭhabbaṃ.
অনেকৰণ্ণৰিমানৰণ্ণনা নিট্ঠিতা।
Anekavaṇṇavimānavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ৰিমানৰত্থুপাল়ি • Vimānavatthupāḷi / ৮. অনেকৰণ্ণৰিমানৰত্থু • 8. Anekavaṇṇavimānavatthu
