| Library / Tipiṭaka / तिपिटक • Tipiṭaka / विमानवत्थुपाळि • Vimānavatthupāḷi |
८. अनेकवण्णविमानवत्थु
8. Anekavaṇṇavimānavatthu
११९९.
1199.
‘‘अनेकवण्णं दरसोकनासनं, विमानमारुय्ह अनेकचित्तं।
‘‘Anekavaṇṇaṃ darasokanāsanaṃ, vimānamāruyha anekacittaṃ;
परिवारितो अच्छरासङ्गणेन, सुनिम्मितो भूतपतीव मोदसि॥
Parivārito accharāsaṅgaṇena, sunimmito bhūtapatīva modasi.
१२००.
1200.
‘‘समस्समो नत्थि कुतो पनुत्तरो 1, यसेन पुञ्ञेन च इद्धिया च।
‘‘Samassamo natthi kuto panuttaro 2, yasena puññena ca iddhiyā ca;
सब्बे च देवा तिदसगणा समेच्च, तं तं नमस्सन्ति ससिंव देवा।
Sabbe ca devā tidasagaṇā samecca, taṃ taṃ namassanti sasiṃva devā;
इमा च ते अच्छरायो समन्ततो, नच्चन्ति गायन्ति पमोदयन्ति॥
Imā ca te accharāyo samantato, naccanti gāyanti pamodayanti.
१२०१.
1201.
‘‘देविद्धिपत्तोसि महानुभावो, मनुस्सभूतो किमकासि पुञ्ञं।
‘‘Deviddhipattosi mahānubhāvo, manussabhūto kimakāsi puññaṃ;
केनासि एवं जलितानुभावो, वण्णो च ते सब्बदिसा पभासती’’ति॥
Kenāsi evaṃ jalitānubhāvo, vaṇṇo ca te sabbadisā pabhāsatī’’ti.
१२०२.
1202.
सो देवपुत्तो अत्तमनो…पे॰… यस्स कम्मस्सिदं फलं॥
So devaputto attamano…pe… yassa kammassidaṃ phalaṃ.
१२०३.
1203.
‘‘अहं भदन्ते अहुवासि पुब्बे, सुमेधनामस्स जिनस्स सावको।
‘‘Ahaṃ bhadante ahuvāsi pubbe, sumedhanāmassa jinassa sāvako;
१२०४.
1204.
‘‘सोहं सुमेधस्स जिनस्स सत्थुनो, परिनिब्बुतस्सोघतिण्णस्स तादिनो।
‘‘Sohaṃ sumedhassa jinassa satthuno, parinibbutassoghatiṇṇassa tādino;
रतनुच्चयं हेमजालेन छन्नं, वन्दित्वा थूपस्मिं मनं पसादयिं॥
Ratanuccayaṃ hemajālena channaṃ, vanditvā thūpasmiṃ manaṃ pasādayiṃ.
१२०५.
1205.
‘‘न मासि दानं न च मत्थि दातुं, परे च खो तत्थ समादपेसिं।
‘‘Na māsi dānaṃ na ca matthi dātuṃ, pare ca kho tattha samādapesiṃ;
पूजेथ नं पूजनीयस्स 7 धातुं, एवं किर सग्गमितो गमिस्सथ॥
Pūjetha naṃ pūjanīyassa 8 dhātuṃ, evaṃ kira saggamito gamissatha.
१२०६.
1206.
‘‘तदेव कम्मं कुसलं कतं मया, सुखञ्च दिब्बं अनुभोमि अत्तना।
‘‘Tadeva kammaṃ kusalaṃ kataṃ mayā, sukhañca dibbaṃ anubhomi attanā;
मोदामहं तिदसगणस्स मज्झे, न तस्स पुञ्ञस्स खयम्पि अज्झग’’न्ति॥
Modāmahaṃ tidasagaṇassa majjhe, na tassa puññassa khayampi ajjhaga’’nti.
अनेकवण्णविमानं अट्ठमं।
Anekavaṇṇavimānaṃ aṭṭhamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / विमानवत्थु-अट्ठकथा • Vimānavatthu-aṭṭhakathā / ८. अनेकवण्णविमानवण्णना • 8. Anekavaṇṇavimānavaṇṇanā
