| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
৬. আনেঞ্জসপ্পাযসুত্তৰণ্ণনা
6. Āneñjasappāyasuttavaṇṇanā
৬৬. এৰং মে সুতন্তি আনেঞ্জসপ্পাযসুত্তং। তত্থ অনিচ্চাতি হুত্ৰা অভাৰট্ঠেন অনিচ্চা। কামাতি ৰত্থুকামাপি কিলেসকামাপি। তুচ্ছাতি নিচ্চসারধুৰসারঅত্তসারৰিরহিতত্তা রিত্তা, ন পন নত্থীতি গহেতব্বা। ন হি তুচ্ছমুট্ঠীতি ৰুত্তে মুট্ঠি নাম নত্থীতি ৰুত্তং হোতি। যস্স পন অব্ভন্তরে কিঞ্চি নত্থি, সো ৰুচ্চতি তুচ্ছো। মুসাতি নাসনকা। মোসধম্মাতি নস্সনসভাৰা, খেত্তং ৰিয ৰত্থু ৰিয হিরঞ্ঞসুৰণ্ণং ৰিয চ ন পঞ্ঞাযিত্থ, কতিপাহেনেৰ সুপিনকে দিট্ঠা ৰিয নস্সন্তি ন পঞ্ঞাযন্তি। তেন ৰুত্তং ‘‘মোসধম্মা’’তি, মাযাকতমেতন্তি যথা মাযায উদকং মণীতি কত্ৰা দস্সিতং, বদরিপণ্ণং কহাপণোতি কত্ৰা দস্সিতং, অঞ্ঞং ৰা পন এৰরূপং দস্সনূপচারে ঠিতস্সেৰ তথা পঞ্ঞাযতি, উপচারাতিক্কমতো পট্ঠায পাকতিকমেৰ পঞ্ঞাযতি। এৰং কামাপি ইত্তরপচ্চুপট্ঠানট্ঠেন ‘‘মাযাকত’’ন্তি ৰুত্তা। যথা চ মাযাকারো উদকাদীনি মণিআদীনং ৰসেন দস্সেন্তো ৰঞ্চেতি, এৰং কামাপি অনিচ্চাদীনি নিচ্চাদিসভাৰং দস্সেন্তা ৰঞ্চেন্তীতি ৰঞ্চনকট্ঠেনপি ‘‘মাযাকত’’ন্তি ৰুত্তা। বাললাপনন্তি ময্হং পুত্তো, ময্হং ধীতা, ময্হং হিরঞ্ঞং ময্হং সুৰণ্ণন্তি এৰং বালানং লাপনতো বাললাপনং। দিট্ঠধম্মিকা কামাতি মানুসকা পঞ্চ কামগুণা। সম্পরাযিকাতি তে ঠপেত্ৰা অৰসেসা। দিট্ঠধম্মিকা। কামসঞ্ঞাতি মানুসকে কামে আরব্ভ উপ্পন্নসঞ্ঞা। উভযমেতং মারধেয্যন্তি এতে কামা চ কামসঞ্ঞা চ উভযম্পি মারধেয্যং। যেহি উভযমেতং গহিতং, তেসঞ্হি উপরি মারো ৰসং ৰত্তেতি। তং সন্ধায ‘‘উভযমেতং মারধেয্য’’ন্তি ৰুত্তং।
66.Evaṃme sutanti āneñjasappāyasuttaṃ. Tattha aniccāti hutvā abhāvaṭṭhena aniccā. Kāmāti vatthukāmāpi kilesakāmāpi. Tucchāti niccasāradhuvasāraattasāravirahitattā rittā, na pana natthīti gahetabbā. Na hi tucchamuṭṭhīti vutte muṭṭhi nāma natthīti vuttaṃ hoti. Yassa pana abbhantare kiñci natthi, so vuccati tuccho. Musāti nāsanakā. Mosadhammāti nassanasabhāvā, khettaṃ viya vatthu viya hiraññasuvaṇṇaṃ viya ca na paññāyittha, katipāheneva supinake diṭṭhā viya nassanti na paññāyanti. Tena vuttaṃ ‘‘mosadhammā’’ti, māyākatametanti yathā māyāya udakaṃ maṇīti katvā dassitaṃ, badaripaṇṇaṃ kahāpaṇoti katvā dassitaṃ, aññaṃ vā pana evarūpaṃ dassanūpacāre ṭhitasseva tathā paññāyati, upacārātikkamato paṭṭhāya pākatikameva paññāyati. Evaṃ kāmāpi ittarapaccupaṭṭhānaṭṭhena ‘‘māyākata’’nti vuttā. Yathā ca māyākāro udakādīni maṇiādīnaṃ vasena dassento vañceti, evaṃ kāmāpi aniccādīni niccādisabhāvaṃ dassentā vañcentīti vañcanakaṭṭhenapi ‘‘māyākata’’nti vuttā. Bālalāpananti mayhaṃ putto, mayhaṃ dhītā, mayhaṃ hiraññaṃ mayhaṃ suvaṇṇanti evaṃ bālānaṃ lāpanato bālalāpanaṃ. Diṭṭhadhammikā kāmāti mānusakā pañca kāmaguṇā. Samparāyikāti te ṭhapetvā avasesā. Diṭṭhadhammikā. Kāmasaññāti mānusake kāme ārabbha uppannasaññā. Ubhayametaṃ māradheyyanti ete kāmā ca kāmasaññā ca ubhayampi māradheyyaṃ. Yehi ubhayametaṃ gahitaṃ, tesañhi upari māro vasaṃ vatteti. Taṃ sandhāya ‘‘ubhayametaṃ māradheyya’’nti vuttaṃ.
মারস্সেস ৰিসযোতিআদীসুপি যথা চোল়স্স ৰিসযো চোল়ৰিসযো, পণ্ডস্স ৰিসযো পণ্ডৰিসযো, সংৰরানং ৰিসযো সংৰরৰিসযোতি পৰত্তনট্ঠানং ৰিসযোতি ৰুচ্চতি, এৰং যেহি এতে কামা গহিতা, তেসং উপরি মারো ৰসং ৰত্তেতি। তং সন্ধায মারস্সেস ৰিসযোতি ৰুত্তং। পঞ্চ পন কামগুণে নিৰাপবীজং ৰিয ৰিপ্পকিরন্তো মারো গচ্ছতি। যেহি পন তে গহিতা, তেসং উপরি মারো ৰসং ৰত্তেতি। তং সন্ধায মারস্সেস নিৰাপোতি ৰুত্তং। যথা চ যত্থ হত্থিআদযো ৰসং ৰত্তেন্তি, সো হত্থিগোচরো অস্সগোচরো অজগোচরোতি ৰুচ্চতি, এৰং যেহি এতে কামা গহিতা, তেসু মারো ৰসং ৰত্তেতি। তং সন্ধায মারস্সেস গোচরোতি ৰুত্তং।
Mārassesa visayotiādīsupi yathā coḷassa visayo coḷavisayo, paṇḍassa visayo paṇḍavisayo, saṃvarānaṃ visayo saṃvaravisayoti pavattanaṭṭhānaṃ visayoti vuccati, evaṃ yehi ete kāmā gahitā, tesaṃ upari māro vasaṃ vatteti. Taṃ sandhāya mārassesa visayoti vuttaṃ. Pañca pana kāmaguṇe nivāpabījaṃ viya vippakiranto māro gacchati. Yehi pana te gahitā, tesaṃ upari māro vasaṃ vatteti. Taṃ sandhāya mārassesa nivāpoti vuttaṃ. Yathā ca yattha hatthiādayo vasaṃ vattenti, so hatthigocaro assagocaro ajagocaroti vuccati, evaṃ yehi ete kāmā gahitā, tesu māro vasaṃ vatteti. Taṃ sandhāya mārassesa gocaroti vuttaṃ.
এত্থাতি এতেসু কামেসু। মানসাতি চিত্তসম্ভূতা। তত্থ সিযা – দুৰিধে তাৰ কামে আরব্ভ অভিজ্ঝানলক্খণা অভিজ্ঝা, করণুত্তরিযলক্খণো সারম্ভো চ উপ্পজ্জতু, ব্যাপাদো কথং উপ্পজ্জতীতি? মমাযিতে ৰত্থুস্মিং অচ্ছিন্নেপি সোচন্তি, অচ্ছিজ্জন্তেপি সোচন্তি, অচ্ছিন্নসঙ্কিনোপি সোচন্তি, যো এৰরূপো চিত্তস্স আঘাতোতি এৰং উপ্পজ্জতি। তেৰ অরিযসাৰকস্সাতি তে অরিযসাৰকস্স। ৰকারো আগমসন্ধিমত্তং হোতি। ইধ মনুসিক্খতোতি ইমস্মিং সাসনে সিক্খন্তস্স তে তযোপি কিলেসা অন্তরাযকরা হোন্তি। অভিভুয্য লোকন্তি কামলোকং অভিভৰিত্ৰা। অধিট্ঠায মনসাতি ঝানারম্মণচিত্তেন অধিট্ঠহিত্ৰা। অপরিত্তন্তি কামাৰচরচিত্তং পরিত্তং নাম, তস্স পটিক্খেপেন মহগ্গতং অপরিত্তং নাম। পমাণন্তিপি কামাৰচরমেৰ, রূপাৰচরং অরূপাৰচরং অপ্পমাণং। সুভাৰিতন্তি পন এতং কামাৰচরাদীনং নামং ন হোতি, লোকুত্তরস্সেৰেতং নামং। তস্মা এতস্স ৰসেন অপরিত্তং অপ্পমাণং সুভাৰিতন্তি সব্বং লোকুত্তরমেৰ ৰট্টতি।
Etthāti etesu kāmesu. Mānasāti cittasambhūtā. Tattha siyā – duvidhe tāva kāme ārabbha abhijjhānalakkhaṇā abhijjhā, karaṇuttariyalakkhaṇo sārambho ca uppajjatu, byāpādo kathaṃ uppajjatīti? Mamāyite vatthusmiṃ acchinnepi socanti, acchijjantepi socanti, acchinnasaṅkinopi socanti, yo evarūpo cittassa āghātoti evaṃ uppajjati. Teva ariyasāvakassāti te ariyasāvakassa. Vakāro āgamasandhimattaṃ hoti. Idha manusikkhatoti imasmiṃ sāsane sikkhantassa te tayopi kilesā antarāyakarā honti. Abhibhuyya lokanti kāmalokaṃ abhibhavitvā. Adhiṭṭhāya manasāti jhānārammaṇacittena adhiṭṭhahitvā. Aparittanti kāmāvacaracittaṃ parittaṃ nāma, tassa paṭikkhepena mahaggataṃ aparittaṃ nāma. Pamāṇantipi kāmāvacarameva, rūpāvacaraṃ arūpāvacaraṃ appamāṇaṃ. Subhāvitanti pana etaṃ kāmāvacarādīnaṃ nāmaṃ na hoti, lokuttarassevetaṃ nāmaṃ. Tasmā etassa vasena aparittaṃ appamāṇaṃ subhāvitanti sabbaṃ lokuttarameva vaṭṭati.
তব্বহুলৰিহারিনোতি কামপটিবাহনেন তমেৰ পটিপদং বহুলং কত্ৰা ৰিহরন্তস্স। আযতনে চিত্তং পসীদতীতি কারণে চিত্তং পসীদতি। কিং পনেত্থ কারণং? অরহত্তং ৰা, অরহত্তস্স ৰিপস্সনং ৰা, চতুত্থজ্ঝানং ৰা, চতুত্থজ্ঝানস্স উপচারং ৰা। সম্পসাদে সতীতি এত্থ দুৰিধো সম্পসাদো অধিমোক্খসম্পসাদো চ পটিলাভসম্পসাদো চ। অরহত্তস্স হি ৰিপস্সনং পট্ঠপেত্ৰা ৰিহরতো মহাভূতাদীসু উপট্ঠহন্তেসু যেনিমে নীহারেন মহাভূতা উপট্ঠহন্তি, উপাদারূপা উপট্ঠহন্তি নামরূপা উপট্ঠহন্তি, পচ্চযা সব্বথা উপট্ঠহন্তি, লক্খণারম্মণা ৰিপস্সনা উপট্ঠহতি, অজ্জেৰ অরহত্তং গণ্হিস্সামীতি অপ্পটিলদ্ধেযেৰ আসা সন্তিট্ঠতি, অধিমোক্খং পটিলভতি। ততিযজ্ঝানং ৰা পাদকং কত্ৰা চতুত্থজ্ঝানত্থায কসিণপরিকম্মং করোন্তস্স নীৰরণৰিক্খম্ভনাদীনি সমনুপস্সতো যেনিমে নীহারেন নীৰরণা ৰিক্খম্ভন্তি, কিলেসা সন্নিসীদন্তি, সতি সন্তিট্ঠতি, সঙ্খারগতং ৰা ৰিভূতং পাকটং হুত্ৰা দিব্বচক্খুকস্স পরলোকো ৰিয উপট্ঠাতি , চিত্তুপ্পাদো লেপপিণ্ডে লগ্গমানো ৰিয উপচারেন সমাধিযতি, অজ্জেৰ চতুত্থজ্ঝানং নিব্বত্তেস্সামীতি অপটিলদ্ধেযেৰ আসা সন্তিট্ঠতি, অধিমোক্খং পটিলভতি । অযং অধিমোক্খসম্পসাদো নাম। তস্মিং সম্পসাদে সতি। যো পন অরহত্তং ৰা পটিলভতি চতুত্থজ্ঝানং ৰা, তস্স চিত্তং ৰিপ্পসন্নং হোতিযেৰ। ইধ পন ‘‘আযতনে চিত্তং পসীদতী’’তি ৰচনতো অরহত্তৰিপস্সনায চেৰ চতুত্থজ্ঝানূপচারস্স চ পটিলাভো পটিলাভসম্পসাদোতি ৰেদিতব্বো। ৰিপস্সনা হি পঞ্ঞায অধিমুচ্চনস্স কারণং, উপচারং আনেঞ্জসমাপত্তিযা।
Tabbahulavihārinoti kāmapaṭibāhanena tameva paṭipadaṃ bahulaṃ katvā viharantassa. Āyatane cittaṃ pasīdatīti kāraṇe cittaṃ pasīdati. Kiṃ panettha kāraṇaṃ? Arahattaṃ vā, arahattassa vipassanaṃ vā, catutthajjhānaṃ vā, catutthajjhānassa upacāraṃ vā. Sampasāde satīti ettha duvidho sampasādo adhimokkhasampasādo ca paṭilābhasampasādo ca. Arahattassa hi vipassanaṃ paṭṭhapetvā viharato mahābhūtādīsu upaṭṭhahantesu yenime nīhārena mahābhūtā upaṭṭhahanti, upādārūpā upaṭṭhahanti nāmarūpā upaṭṭhahanti, paccayā sabbathā upaṭṭhahanti, lakkhaṇārammaṇā vipassanā upaṭṭhahati, ajjeva arahattaṃ gaṇhissāmīti appaṭiladdheyeva āsā santiṭṭhati, adhimokkhaṃ paṭilabhati. Tatiyajjhānaṃ vā pādakaṃ katvā catutthajjhānatthāya kasiṇaparikammaṃ karontassa nīvaraṇavikkhambhanādīni samanupassato yenime nīhārena nīvaraṇā vikkhambhanti, kilesā sannisīdanti, sati santiṭṭhati, saṅkhāragataṃ vā vibhūtaṃ pākaṭaṃ hutvā dibbacakkhukassa paraloko viya upaṭṭhāti , cittuppādo lepapiṇḍe laggamāno viya upacārena samādhiyati, ajjeva catutthajjhānaṃ nibbattessāmīti apaṭiladdheyeva āsā santiṭṭhati, adhimokkhaṃ paṭilabhati . Ayaṃ adhimokkhasampasādo nāma. Tasmiṃ sampasāde sati. Yo pana arahattaṃ vā paṭilabhati catutthajjhānaṃ vā, tassa cittaṃ vippasannaṃ hotiyeva. Idha pana ‘‘āyatane cittaṃ pasīdatī’’ti vacanato arahattavipassanāya ceva catutthajjhānūpacārassa ca paṭilābho paṭilābhasampasādoti veditabbo. Vipassanā hi paññāya adhimuccanassa kāraṇaṃ, upacāraṃ āneñjasamāpattiyā.
এতরহি ৰা আনেঞ্জং সমাপজ্জতি। পঞ্ঞায ৰা অধিমুচ্চতীতি এত্থ এতরহি ৰা পঞ্ঞায অধিমুচ্চতি, আনেঞ্জং ৰা সমাপজ্জতীতি এৰং পদপরিৰত্তনং কত্ৰা অত্থো ৰেদিতব্বো। ইদঞ্হি ৰুত্তং হোতি – তস্মিং সম্পসাদে সতি এতরহি ৰা পঞ্ঞায অধিমুচ্চতি, অরহত্তং সচ্ছিকরোতীতি অত্থো। তং অনভিসম্ভুণন্তো আনেঞ্জং ৰা সমাপজ্জতি, অথ ৰা পঞ্ঞায ৰা অধিমুচ্চতীতি অরহত্তমগ্গং ভাৰেতি, তং অনভিসম্ভুণন্তো আনেঞ্জং ৰা সমাপজ্জতি। অরহত্তমগ্গং ভাৰেতুং অসক্কোন্তো এতরহি চতুসচ্চং ৰা সচ্ছিকরোতি। তং অনভিসম্ভুণন্তো আনেঞ্জং ৰা সমাপজ্জতীতি।
Etarahi vā āneñjaṃ samāpajjati. Paññāya vā adhimuccatīti ettha etarahi vā paññāya adhimuccati, āneñjaṃ vā samāpajjatīti evaṃ padaparivattanaṃ katvā attho veditabbo. Idañhi vuttaṃ hoti – tasmiṃ sampasāde sati etarahi vā paññāya adhimuccati, arahattaṃ sacchikarotīti attho. Taṃ anabhisambhuṇanto āneñjaṃ vā samāpajjati, atha vā paññāya vā adhimuccatīti arahattamaggaṃ bhāveti, taṃ anabhisambhuṇanto āneñjaṃ vā samāpajjati. Arahattamaggaṃ bhāvetuṃ asakkonto etarahi catusaccaṃ vā sacchikaroti. Taṃ anabhisambhuṇanto āneñjaṃ vā samāpajjatīti.
তত্রাযং নযো – ইধ ভিক্খু ততিযজ্ঝানং পাদকং কত্ৰা চতুত্থজ্ঝানস্স কসিণপরিকম্মং করোতি। তস্স নীৰরণা ৰিক্খম্ভন্তি, সতি সন্তিট্ঠতি, উপচারেন চিত্তং সমাধিযতি। সো রূপারূপং পরিগণ্হাতি, পচ্চযং পরিগ্গণ্হাতি, লক্খণারম্মণিকং ৰিপস্সনং ৰৰত্থপেতি, তস্স এৰং হোতি – ‘‘উপচারেন মে ঝানং ৰিসেসভাগিযং ভৰেয্য, তিট্ঠতু ৰিসেসভাগিযতা, নিব্বেধভাগিযং নং করিস্সামী’’তি ৰিপস্সনং ৰড্ঢেত্ৰা অরহত্তং সচ্ছিকরোতি। এত্তকেনস্স কিচ্চং কতং নাম হোতি। অরহত্তং সচ্ছিকাতুং অসক্কোন্তো পন ততো ওসক্কিতমানসো অন্তরা ন তিট্ঠতি, চতুত্থজ্ঝানং সমাপজ্জতিযেৰ। যথা কিং? যথা পুরিসো ‘‘ৰনমহিংসং ঘাতেস্সামী’’তি সত্তিং গহেত্ৰা অনুবন্ধন্তো সচে তং ঘাতেতি, সকলগামৰাসিনো তোসেস্সতি, অসক্কোন্তো পন অন্তরামগ্গে সসগোধাদযো খুদ্দকমিগে ঘাতেত্ৰা কাজং পূরেত্ৰা এতিযেৰ।
Tatrāyaṃ nayo – idha bhikkhu tatiyajjhānaṃ pādakaṃ katvā catutthajjhānassa kasiṇaparikammaṃ karoti. Tassa nīvaraṇā vikkhambhanti, sati santiṭṭhati, upacārena cittaṃ samādhiyati. So rūpārūpaṃ parigaṇhāti, paccayaṃ pariggaṇhāti, lakkhaṇārammaṇikaṃ vipassanaṃ vavatthapeti, tassa evaṃ hoti – ‘‘upacārena me jhānaṃ visesabhāgiyaṃ bhaveyya, tiṭṭhatu visesabhāgiyatā, nibbedhabhāgiyaṃ naṃ karissāmī’’ti vipassanaṃ vaḍḍhetvā arahattaṃ sacchikaroti. Ettakenassa kiccaṃ kataṃ nāma hoti. Arahattaṃ sacchikātuṃ asakkonto pana tato osakkitamānaso antarā na tiṭṭhati, catutthajjhānaṃ samāpajjatiyeva. Yathā kiṃ? Yathā puriso ‘‘vanamahiṃsaṃ ghātessāmī’’ti sattiṃ gahetvā anubandhanto sace taṃ ghāteti, sakalagāmavāsino tosessati, asakkonto pana antarāmagge sasagodhādayo khuddakamige ghātetvā kājaṃ pūretvā etiyeva.
তত্থ পুরিসস্স সত্তিং গহেত্ৰা ৰনমহিংসানুবন্ধনং ৰিয ইমস্স ভিক্খুনো ততিযজ্ঝানং পাদকং কত্ৰা চতুত্থজ্ঝানস্স পরিকম্মকরণং, ৰনমহিংসঘাতনং ৰিয – ‘‘নীৰরণৰিক্খম্ভনাদীনি সমনুপস্সতো ৰিসেসভাগিযং ভৰেয্য, তিট্ঠতু ৰিসেসভাগিযতা, নিব্বেধভাগিযং নং করিস্সামী’’তি ৰিপস্সনং ৰড্ঢেত্ৰা অরহত্তস্স সচ্ছিকরণং, মহিংসং ঘাতেতুং অসক্কোন্তস্স অন্তরামগ্গে সসগোধাদযো খুদ্দকমিগে ঘাতেত্ৰা কাজং পূরেত্ৰা গমনং ৰিয অরহত্তং সচ্ছিকাতুং অসক্কোন্তস্স, ততো ওসক্কিত্ৰা চতুত্থজ্ঝানসমাপজ্জনং ৰেদিতব্বং। মগ্গভাৰনা চতুসচ্চসচ্ছিকিরিযাযোজনাসুপি এসেৰ নযো।
Tattha purisassa sattiṃ gahetvā vanamahiṃsānubandhanaṃ viya imassa bhikkhuno tatiyajjhānaṃ pādakaṃ katvā catutthajjhānassa parikammakaraṇaṃ, vanamahiṃsaghātanaṃ viya – ‘‘nīvaraṇavikkhambhanādīni samanupassato visesabhāgiyaṃ bhaveyya, tiṭṭhatu visesabhāgiyatā, nibbedhabhāgiyaṃ naṃ karissāmī’’ti vipassanaṃ vaḍḍhetvā arahattassa sacchikaraṇaṃ, mahiṃsaṃ ghātetuṃ asakkontassa antarāmagge sasagodhādayo khuddakamige ghātetvā kājaṃ pūretvā gamanaṃ viya arahattaṃ sacchikātuṃ asakkontassa, tato osakkitvā catutthajjhānasamāpajjanaṃ veditabbaṃ. Maggabhāvanā catusaccasacchikiriyāyojanāsupi eseva nayo.
ইদানি অরহত্তং সচ্ছিকাতুং অসক্কোন্তস্স নিব্বত্তট্ঠানং দস্সেন্তো কাযস্স ভেদাতিআদিমাহ। তত্থ যন্তি যেন কারণেন তং সংৰত্তনিকং ৰিঞ্ঞাণং অস্স আনেঞ্জূপগং, তং কারণং ৰিজ্জতীতি অত্থো। এত্থ চ তংসংৰত্তনিকন্তি তস্স ভিক্খুনো সংৰত্তনিকং। যেন ৰিপাকৰিঞ্ঞাণেন সো ভিক্খু সংৰত্ততি নিব্বত্ততি, তং ৰিঞ্ঞাণং। আনেঞ্জূপগন্তি কুসলানেঞ্জসভাৰূপগতং অস্স, তাদিসমেৰ ভৰেয্যাতি অত্থো। কেচি কুসলৰিঞ্ঞাণং ৰদন্তি। যং তস্স ভিক্খুনো সংৰত্তনিকং উপপত্তিহেতুভূতং কুসলৰিঞ্ঞাণং আনেঞ্জূপগতং অস্স, ৰিপাককালেপি তন্নামকমেৰ অস্সাতি অত্থো। সো পনাযমত্থো – ‘‘পুঞ্ঞং চে সঙ্খারং অভিসঙ্খরোতি, পুঞ্ঞূপগং হোতি ৰিঞ্ঞাণং। অপুঞ্ঞং চে সঙ্খারং অভিসঙ্খারোতি, অপুঞ্ঞুপগং হোতি ৰিঞ্ঞাণং। আনেঞ্জং চে সঙ্খারং অভিসঙ্খরোতি, আনেঞ্জূপগং হোতি ৰিঞ্ঞাণ’’ন্তি (সং॰ নি॰ ২.৫১) ইমিনা নযেন ৰেদিতব্বো। আনেঞ্জসপ্পাযাতি আনেঞ্জস্স চতুত্থজ্ঝানস্স সপ্পাযা। ন কেৰলঞ্চ সা আনেঞ্জস্সেৰ, উপরি অরহত্তস্সাপি সপ্পাযাৰ উপকারভূতাযেৰাতি ৰেদিতব্বা। ইতি ইমস্মিং পঠমকআনেঞ্জে সমাধিৰসেন ওসক্কনা কথিতা।
Idāni arahattaṃ sacchikātuṃ asakkontassa nibbattaṭṭhānaṃ dassento kāyassa bhedātiādimāha. Tattha yanti yena kāraṇena taṃ saṃvattanikaṃ viññāṇaṃ assa āneñjūpagaṃ, taṃ kāraṇaṃ vijjatīti attho. Ettha ca taṃsaṃvattanikanti tassa bhikkhuno saṃvattanikaṃ. Yena vipākaviññāṇena so bhikkhu saṃvattati nibbattati, taṃ viññāṇaṃ. Āneñjūpaganti kusalāneñjasabhāvūpagataṃ assa, tādisameva bhaveyyāti attho. Keci kusalaviññāṇaṃ vadanti. Yaṃ tassa bhikkhuno saṃvattanikaṃ upapattihetubhūtaṃ kusalaviññāṇaṃ āneñjūpagataṃ assa, vipākakālepi tannāmakameva assāti attho. So panāyamattho – ‘‘puññaṃ ce saṅkhāraṃ abhisaṅkharoti, puññūpagaṃ hoti viññāṇaṃ. Apuññaṃ ce saṅkhāraṃ abhisaṅkhāroti, apuññupagaṃ hoti viññāṇaṃ. Āneñjaṃ ce saṅkhāraṃ abhisaṅkharoti, āneñjūpagaṃ hoti viññāṇa’’nti (saṃ. ni. 2.51) iminā nayena veditabbo. Āneñjasappāyāti āneñjassa catutthajjhānassa sappāyā. Na kevalañca sā āneñjasseva, upari arahattassāpi sappāyāva upakārabhūtāyevāti veditabbā. Iti imasmiṃ paṭhamakaāneñje samādhivasena osakkanā kathitā.
৬৭. ইতি পটিসঞ্চিক্খতীতি চতুত্থজ্ঝানং পত্ৰা এৰং পটিসঞ্চিক্খতি। অযঞ্হি ভিক্খু হেট্ঠিমেন ভিক্খুনা পঞ্ঞৰন্ততরো তস্স চ ভিক্খুনো অত্তনো চাতি দ্ৰিন্নম্পি কম্মট্ঠানং একতো কত্ৰা সম্মসতি। তব্বহুলৰিহারিনোতি রূপপটিবাহনেন তমেৰ পটিপদং বহুলং কত্ৰা ৰিহরন্তস্স। আনেঞ্জং সমাপজ্জতীতি আকাসানঞ্চাযতানানেঞ্জং সমাপজ্জতি। সেসং পুরিমসদিসমেৰ। যথা চ ইধ, এৰং সব্বত্থ ৰিসেসমত্তমেৰ পন ৰক্খাম। ইতি ইমস্মিং দুতিযআনেঞ্জে ৰিপস্সনাৰসেন ওসক্কনা কথিতা, ‘‘যংকিঞ্চি রূপ’’ন্তি এৰং ৰিপস্সনামগ্গং দস্সেন্তেন কথিতাতি অত্থো।
67.Iti paṭisañcikkhatīti catutthajjhānaṃ patvā evaṃ paṭisañcikkhati. Ayañhi bhikkhu heṭṭhimena bhikkhunā paññavantataro tassa ca bhikkhuno attano cāti dvinnampi kammaṭṭhānaṃ ekato katvā sammasati. Tabbahulavihārinoti rūpapaṭibāhanena tameva paṭipadaṃ bahulaṃ katvā viharantassa. Āneñjaṃ samāpajjatīti ākāsānañcāyatānāneñjaṃ samāpajjati. Sesaṃ purimasadisameva. Yathā ca idha, evaṃ sabbattha visesamattameva pana vakkhāma. Iti imasmiṃ dutiyaāneñje vipassanāvasena osakkanā kathitā, ‘‘yaṃkiñci rūpa’’nti evaṃ vipassanāmaggaṃ dassentena kathitāti attho.
ইতি পটিসঞ্চিক্খতীতি আকাসানঞ্চাযতনং পত্ৰা এৰং পটিসঞ্চিক্খতি। অযঞ্হি হেট্ঠা দ্ৰীহি ভিক্খূহি পঞ্ঞৰন্ততরো তেসঞ্চ ভিক্খূনং অত্তনো চাতি তিণ্ণম্পি কম্মট্ঠানং একতো কত্ৰা সম্মসতি। উভযমেতং অনিচ্চন্তি এত্থ অট্ঠ একেককোট্ঠাসা দিট্ঠধম্মিকসম্পরাযিকৰসেন পন সঙ্খিপিত্ৰা উভযন্তি ৰুত্তং। নালং অভিনন্দিতুন্তি তণ্হাদিট্ঠিৰসেন অভিনন্দিতুং ন যুত্তং। সেসপদদ্ৰযেপি এসেৰ নযো। তব্বহুলৰিহারিনোতি কামপটিবাহনেন চ রূপপটিবাহনেন চ তমেৰ পটিপদং বহুলং কত্ৰা ৰিহরন্তস্স। আনেঞ্জং সমাপজ্জতীতি ৰিঞ্ঞাণঞ্চাযতনানেঞ্জং সমাপজ্জতি। ইমস্মিং ততিযআনেঞ্জে ৰিপস্সনাৰসেন ওসক্কনা কথিতা।
Itipaṭisañcikkhatīti ākāsānañcāyatanaṃ patvā evaṃ paṭisañcikkhati. Ayañhi heṭṭhā dvīhi bhikkhūhi paññavantataro tesañca bhikkhūnaṃ attano cāti tiṇṇampi kammaṭṭhānaṃ ekato katvā sammasati. Ubhayametaṃ aniccanti ettha aṭṭha ekekakoṭṭhāsā diṭṭhadhammikasamparāyikavasena pana saṅkhipitvā ubhayanti vuttaṃ. Nālaṃ abhinanditunti taṇhādiṭṭhivasena abhinandituṃ na yuttaṃ. Sesapadadvayepi eseva nayo. Tabbahulavihārinoti kāmapaṭibāhanena ca rūpapaṭibāhanena ca tameva paṭipadaṃ bahulaṃ katvā viharantassa. Āneñjaṃ samāpajjatīti viññāṇañcāyatanāneñjaṃ samāpajjati. Imasmiṃ tatiyaāneñje vipassanāvasena osakkanā kathitā.
৬৮. ইতি পটিসঞ্চিক্খতীতি ৰিঞ্ঞাণঞ্চাযতনং পত্ৰা এৰং পটিসঞ্চিক্খতি। অযঞ্হি হেট্ঠা তীহি ভিক্খূহি পঞ্ঞৰন্ততরো তেসঞ্চ ভিক্খূনং অত্তনো চাতি চতুন্নম্পি কম্মট্ঠানং একতো কত্ৰা সম্মসতি। যত্থেতা অপরিসেসা নিরুজ্ঝন্তীতি যং আকিঞ্চঞ্ঞাযতনং পত্ৰা এতা হেট্ঠা ৰুত্তা সব্বসঞ্ঞা নিরুজ্ঝন্তি। এতং সন্তং এতং পণীতন্তি এতং অঙ্গসন্ততায আরম্মণসন্ততায চ সন্তং, অতপ্পকট্ঠেন পণীতং। তব্বহুলৰিহারিনোতি তাসং সঞ্ঞানং পটিবাহনেন তমেৰ পটিপদং বহুলং কত্ৰা ৰিহরন্তস্স। ইমস্মিং পঠমাকিঞ্চঞ্ঞাযতনে সমাধিৰসেন ওসক্কনা কথিতা।
68.Iti paṭisañcikkhatīti viññāṇañcāyatanaṃ patvā evaṃ paṭisañcikkhati. Ayañhi heṭṭhā tīhi bhikkhūhi paññavantataro tesañca bhikkhūnaṃ attano cāti catunnampi kammaṭṭhānaṃ ekato katvā sammasati. Yatthetā aparisesā nirujjhantīti yaṃ ākiñcaññāyatanaṃ patvā etā heṭṭhā vuttā sabbasaññā nirujjhanti. Etaṃ santaṃ etaṃ paṇītanti etaṃ aṅgasantatāya ārammaṇasantatāya ca santaṃ, atappakaṭṭhena paṇītaṃ. Tabbahulavihārinoti tāsaṃ saññānaṃ paṭibāhanena tameva paṭipadaṃ bahulaṃ katvā viharantassa. Imasmiṃ paṭhamākiñcaññāyatane samādhivasena osakkanā kathitā.
ইতি পটিসঞ্চিক্খতীতি ৰিঞ্ঞাণঞ্চাযতনমেৰ পত্ৰা এৰং পটিসঞ্চিক্খতি। অযঞ্হি হেট্ঠা চতূহি ভিক্খূহি পঞ্ঞৰন্ততরো তেসঞ্চ ভিক্খূনং অত্তনো চাতি পঞ্চন্নম্পি কম্মট্ঠানং একতো কত্ৰা সম্মসতি। অত্তেন ৰা অত্তনিযেন ৰাতি অহং মমাতি গহেতব্বেন সুঞ্ঞং তুচ্ছং রিত্তং। এৰমেত্থ দ্ৰিকোটিকা সুঞ্ঞতা দস্সিতা। তব্বহুলৰিহারিনোতি হেট্ঠা ৰুত্তপটিপদঞ্চ ইমঞ্চ সুঞ্ঞতপটিপদং বহুলং কত্ৰা ৰিহরন্তস্স। ইমস্মিং দুতিযাকিঞ্চঞ্ঞাযতনে ৰিপস্সনাৰসেন ওসক্কনা কথিতা।
Iti paṭisañcikkhatīti viññāṇañcāyatanameva patvā evaṃ paṭisañcikkhati. Ayañhi heṭṭhā catūhi bhikkhūhi paññavantataro tesañca bhikkhūnaṃ attano cāti pañcannampi kammaṭṭhānaṃ ekato katvā sammasati. Attena vā attaniyena vāti ahaṃ mamāti gahetabbena suññaṃ tucchaṃ rittaṃ. Evamettha dvikoṭikā suññatā dassitā. Tabbahulavihārinoti heṭṭhā vuttapaṭipadañca imañca suññatapaṭipadaṃ bahulaṃ katvā viharantassa. Imasmiṃ dutiyākiñcaññāyatane vipassanāvasena osakkanā kathitā.
৭০. ইতি পটিসঞ্চিক্খতীতি ৰিঞ্ঞাণঞ্চাযতনমেৰ পত্ৰা এৰং পটিসঞ্চিক্খতি। অযঞ্হি হেট্ঠা পঞ্চহি ভিক্খূহি পঞ্ঞৰন্ততরো তেসঞ্চ ভিক্খূনং অত্তনো চাতি ছন্নম্পি কম্মট্ঠানং একতো কত্ৰা সম্মসতি। নাহং ক্ৰচনি কস্সচি কিঞ্চনতস্মিং, ন চ মম ক্ৰচনি কিস্মিঞ্চি কিঞ্চনং নত্থীতি এত্থ পন চতুকোটিকা সুঞ্ঞতা কথিতা। কথং? অযঞ্হি নাহং ক্ৰচনীতি ক্ৰচি অত্তানং ন পস্সতি, কস্সচি কিঞ্চনতস্মিন্তি অত্তনো অত্তানং কস্সচি পরস্স কিঞ্চনভাৰে উপনেতব্বং ন পস্সতি, অত্তনো ভাতিট্ঠানে ভাতরং সহাযট্ঠানে সহাযং পরিক্খারট্ঠানে ৰা পরিক্খারং মঞ্ঞিত্ৰা উপগন্ত্ৰা উপনেতব্বং ন পস্সতীতি অত্থো। ন চ মম ক্ৰচনীতি এত্থ মম – সদ্দং তাৰ ঠপেত্ৰা ন চ ক্ৰচনি পরস্স চ অত্তানং ক্ৰচি ন পস্সতীতি অযমত্থো। ইদানি মম – সদ্দং আহরিত্ৰা মম কিস্মিঞ্চি কিঞ্চনং নত্থীতি সো পরস্স অত্তা মম কিস্মিঞ্চি কিঞ্চনভাৰে অত্থীতি ন পস্সতি। অত্তনো ভাতিট্ঠানে ভাতরং সহাযট্ঠানে সহাযং পরিক্খারট্ঠানে ৰা পরিক্খারন্তি কিস্মিঞ্চি ঠানে পরস্স অত্তানং ইমিনা কিঞ্চনভাৰেন উপনেতব্বং ন পস্সতীতি অত্থো। এৰমযং যস্মা নেৰ কত্থচি অত্তানং পস্সতি, ন তং পরস্স কিঞ্চনভাৰে উপনেতব্বং পস্সতি, ন পরস্স অত্তানং পস্সতি, ন পরস্স অত্তানং অত্তনো কিঞ্চনভাৰে উপনেতব্বং পস্সতি, তস্মা অযং সুঞ্ঞতা চতুকোটিকাতি ৰেদিতব্বা। তব্বহুলৰিহারিনোতি হেট্ঠা ৰুত্তপ্পটিপদং ইমং চতুকোটিসুঞ্ঞতঞ্চ বহুলং কত্ৰা ৰিহরন্তস্স। ইমস্মিং ততিযাকিঞ্চঞ্ঞাযতনেপি ৰিপস্সনাৰসেনেৰ ওসক্কনা কথিতা।
70.Itipaṭisañcikkhatīti viññāṇañcāyatanameva patvā evaṃ paṭisañcikkhati. Ayañhi heṭṭhā pañcahi bhikkhūhi paññavantataro tesañca bhikkhūnaṃ attano cāti channampi kammaṭṭhānaṃ ekato katvā sammasati. Nāhaṃ kvacani kassaci kiñcanatasmiṃ, na ca mama kvacani kismiñcikiñcanaṃ natthīti ettha pana catukoṭikā suññatā kathitā. Kathaṃ? Ayañhi nāhaṃ kvacanīti kvaci attānaṃ na passati, kassaci kiñcanatasminti attano attānaṃ kassaci parassa kiñcanabhāve upanetabbaṃ na passati, attano bhātiṭṭhāne bhātaraṃ sahāyaṭṭhāne sahāyaṃ parikkhāraṭṭhāne vā parikkhāraṃ maññitvā upagantvā upanetabbaṃ na passatīti attho. Na ca mama kvacanīti ettha mama – saddaṃ tāva ṭhapetvā na ca kvacani parassa ca attānaṃ kvaci na passatīti ayamattho. Idāni mama – saddaṃ āharitvā mama kismiñci kiñcanaṃ natthīti so parassa attā mama kismiñci kiñcanabhāve atthīti na passati. Attano bhātiṭṭhāne bhātaraṃ sahāyaṭṭhāne sahāyaṃ parikkhāraṭṭhāne vā parikkhāranti kismiñci ṭhāne parassa attānaṃ iminā kiñcanabhāvena upanetabbaṃ na passatīti attho. Evamayaṃ yasmā neva katthaci attānaṃ passati, na taṃ parassa kiñcanabhāve upanetabbaṃ passati, na parassa attānaṃ passati, na parassa attānaṃ attano kiñcanabhāve upanetabbaṃ passati, tasmā ayaṃ suññatā catukoṭikāti veditabbā. Tabbahulavihārinoti heṭṭhā vuttappaṭipadaṃ imaṃ catukoṭisuññatañca bahulaṃ katvā viharantassa. Imasmiṃ tatiyākiñcaññāyatanepi vipassanāvaseneva osakkanā kathitā.
ইতি পটিসঞ্চিক্খতীতি আকিঞ্চঞ্ঞাযতনং পত্ৰা এৰং পটিসঞ্চিক্খতি। অযঞ্হি হেট্ঠা ছহি ভিক্খূহি পঞ্ঞৰন্ততরো তেসঞ্চ ভিক্খূনং অত্তনো চাতি সত্তন্নম্পি কম্মট্ঠানং একতো কত্ৰা সম্মসতি। যত্থেতা অপরিসেসা নিরুজ্ঝন্তীতি যং নেৰসঞ্ঞানাসঞ্ঞাযতনং পত্ৰা এত্থ এতা হেট্ঠা ৰুত্তা সব্বসঞ্ঞা নিরুজ্ঝন্তি। তব্বহুলৰিহারিনোতি তাসং সঞ্ঞানং পটিবাহনেন তমেৰ পটিপদং বহুলং কত্ৰা ৰিহরন্তস্স। ইমস্মিং নেৰসঞ্ঞানাসঞ্ঞাযতনে সমাধিৰসেন ওসক্কনা কথিতা।
Iti paṭisañcikkhatīti ākiñcaññāyatanaṃ patvā evaṃ paṭisañcikkhati. Ayañhi heṭṭhā chahi bhikkhūhi paññavantataro tesañca bhikkhūnaṃ attano cāti sattannampi kammaṭṭhānaṃ ekato katvā sammasati. Yatthetā aparisesā nirujjhantīti yaṃ nevasaññānāsaññāyatanaṃ patvā ettha etā heṭṭhā vuttā sabbasaññā nirujjhanti. Tabbahulavihārinoti tāsaṃ saññānaṃ paṭibāhanena tameva paṭipadaṃ bahulaṃ katvā viharantassa. Imasmiṃ nevasaññānāsaññāyatane samādhivasena osakkanā kathitā.
৭১. নো চস্স নো চ মে সিযাতি সচে ময্হং পুব্বে পঞ্চৰিধং কম্মৰট্টং ন আযূহিতং অস্স, যং মে ইদং এতরহি এৰং পঞ্চৰিধং ৰিপাকৰট্টং এতং মে ন সিযা নপ্পৰত্তেয্যাতি অত্থো। ন ভৰিস্সতীতি সচে এতরহি পঞ্চৰিধং কম্মৰট্টং আযূহিতং ন ভৰিস্সতি। ন মে ভৰিস্সতীতি তস্মিং অসতি অনাগতে মে পঞ্চৰিধং ৰিপাকৰট্টং ন ভৰিস্সতি। যদত্থি যং ভূতং তং পজহামীতি যং অত্থি যং ভূতং এতরহি খন্ধপঞ্চকং, তং পজহামি। এৰং উপেক্খং পটিলভতীতি সো ভিক্খু এৰং ৰিপস্সনুপেক্খং লভতীতি অত্থো।
71.No cassa no ca me siyāti sace mayhaṃ pubbe pañcavidhaṃ kammavaṭṭaṃ na āyūhitaṃ assa, yaṃ me idaṃ etarahi evaṃ pañcavidhaṃ vipākavaṭṭaṃ etaṃ me na siyā nappavatteyyāti attho. Na bhavissatīti sace etarahi pañcavidhaṃ kammavaṭṭaṃ āyūhitaṃ na bhavissati. Na me bhavissatīti tasmiṃ asati anāgate me pañcavidhaṃ vipākavaṭṭaṃ na bhavissati. Yadatthi yaṃ bhūtaṃ taṃ pajahāmīti yaṃ atthi yaṃ bhūtaṃ etarahi khandhapañcakaṃ, taṃ pajahāmi. Evaṃupekkhaṃ paṭilabhatīti so bhikkhu evaṃ vipassanupekkhaṃ labhatīti attho.
পরিনিব্বাযেয্য নু খো সো, ভন্তে, ভিক্খু ন ৰা পরিনিব্বাযেয্যাতি কিং পুচ্ছামীতি পুচ্ছতি, ততিযজ্ঝানং পাদকং কত্ৰা ঠিতস্স অরহত্তম্পি ওসক্কনাপি পটিপদাপি পটিসন্ধিপি কথিতা, তথা চতুত্থজ্ঝানাদীনি পাদকানি কত্ৰা ঠিতানং, নেৰসঞ্ঞানাসঞ্ঞাযতনং পাদকং কত্ৰা ঠিতস্স ন কিঞ্চি কথিতং, তং পুচ্ছামীতি পুচ্ছতি। অপেত্থাতি অপি এত্থ। সো তং উপেক্খং অভিনন্দতীতি সো তং ৰিপস্সনুপেক্খং তণ্হাদিট্ঠিঅভিনন্দনাহি অভিনন্দতি। সেসপদদ্ৰযেপি এসেৰ নযো। তন্নিস্সিতং হোতি ৰিঞ্ঞাণন্তি ৰিঞ্ঞাণং ৰিপস্সনানিস্সিতং হোতি। তদুপাদানন্তি যং নিকন্তিৰিঞ্ঞাণং, তং তস্স উপাদানং নাম গহণং নাম হোতি। সউপাদানোতি সগহণো। ন পরিনিব্বাযতীতি ৰিপস্সনায সালযো ভিক্খু মম সাসনে ন পরিনিব্বাযতি। যো পন ৰিহারপরিৰেণউপট্ঠাকাদীসু সালযো, তস্মিং ৰত্তব্বমেৰ নত্থীতি দস্সেতি। কহং পনাতি? কত্থ পন? উপাদিযমানো উপাদিযতীতি পটিসন্ধিং গণ্হমানো গণ্হাতি। উপাদানসেট্ঠং কির সো, ভন্তেতি, ভন্তে, সো কির ভিক্খু গহেতব্বট্ঠানং সেট্ঠং উত্তমং ভৰং উপাদিযতি, সেট্ঠভৰে পটিসন্ধিং গণ্হাতীতি অত্থো। ইমিনা তস্স ভিক্খুনো পটিসন্ধি কথিতা। ইদানিস্স অরহত্তং কথেতুং ইধানন্দাতিআদিমাহ।
Parinibbāyeyya nu kho so, bhante, bhikkhu na vā parinibbāyeyyāti kiṃ pucchāmīti pucchati, tatiyajjhānaṃ pādakaṃ katvā ṭhitassa arahattampi osakkanāpi paṭipadāpi paṭisandhipi kathitā, tathā catutthajjhānādīni pādakāni katvā ṭhitānaṃ, nevasaññānāsaññāyatanaṃ pādakaṃ katvā ṭhitassa na kiñci kathitaṃ, taṃ pucchāmīti pucchati. Apetthāti api ettha. So taṃ upekkhaṃ abhinandatīti so taṃ vipassanupekkhaṃ taṇhādiṭṭhiabhinandanāhi abhinandati. Sesapadadvayepi eseva nayo. Tannissitaṃ hoti viññāṇanti viññāṇaṃ vipassanānissitaṃ hoti. Tadupādānanti yaṃ nikantiviññāṇaṃ, taṃ tassa upādānaṃ nāma gahaṇaṃ nāma hoti. Saupādānoti sagahaṇo. Na parinibbāyatīti vipassanāya sālayo bhikkhu mama sāsane na parinibbāyati. Yo pana vihārapariveṇaupaṭṭhākādīsu sālayo, tasmiṃ vattabbameva natthīti dasseti. Kahaṃ panāti? Kattha pana? Upādiyamānoupādiyatīti paṭisandhiṃ gaṇhamāno gaṇhāti. Upādānaseṭṭhaṃ kira so, bhanteti, bhante, so kira bhikkhu gahetabbaṭṭhānaṃ seṭṭhaṃ uttamaṃ bhavaṃ upādiyati, seṭṭhabhave paṭisandhiṃ gaṇhātīti attho. Iminā tassa bhikkhuno paṭisandhi kathitā. Idānissa arahattaṃ kathetuṃ idhānandātiādimāha.
৭৩. নিস্সায নিস্সাযাতি তং তং সমাপত্তিং নিস্সায। ওঘস্স নিত্থরণা অক্খাতাতি ওঘতরণং কথিতং, ততিযজ্ঝানং পাদকং কত্ৰা ঠিতভিক্খুনো ওঘনিত্থরণা কথিতা…পে॰… নেৰসঞ্ঞানাসঞ্ঞাযতনং পাদকং কত্ৰা ঠিতভিক্খুনো ওঘনিত্থরণা কথিতাতি ৰদতি।
73.Nissāya nissāyāti taṃ taṃ samāpattiṃ nissāya. Oghassa nittharaṇā akkhātāti oghataraṇaṃ kathitaṃ, tatiyajjhānaṃ pādakaṃ katvā ṭhitabhikkhuno oghanittharaṇā kathitā…pe… nevasaññānāsaññāyatanaṃ pādakaṃ katvā ṭhitabhikkhuno oghanittharaṇā kathitāti vadati.
কতমো পন, ভন্তে, অরিযো ৰিমোক্খোতি ইধ কিং পুচ্ছতি? সমাপত্তিং তাৰ পদট্ঠানং কত্ৰা ৰিপস্সনং ৰড্ঢেত্ৰা অরহত্তং গণ্হন্তো ভিক্খু নাৰং ৰা উল়ুম্পাদীনি ৰা নিস্সায মহোঘং তরিত্ৰা পারং গচ্ছন্তো ৰিয ন কিলমতি। সুক্খৰিপস্সকো পন পকিণ্ণকসঙ্খারে সম্মসিত্ৰা অরহত্তং গণ্হন্তো বাহুবলেন সোতং ছিন্দিত্ৰা পারং গচ্ছন্তো ৰিয কিলমতি। ইতি ইমস্স সুক্খৰিপস্সকস্স অরহত্তং পুচ্ছামীতি পুচ্ছতি। অরিযসাৰকোতি সুক্খৰিপস্সকো অরিযসাৰকো। অযঞ্হি হেট্ঠা অট্ঠহি ভিক্খূহি পঞ্ঞৰন্ততরো তেসঞ্চ ভিক্খূনং অত্তনো চাতি নৰন্নম্পি কম্মট্ঠানং একতো কত্ৰা সম্মসতি। এস সক্কাযো যাৰতা সক্কাযোতি যত্তকো তেভূমকৰট্টসঙ্খাতো সক্কাযো নাম অত্থি, সব্বোপি সো এস সক্কাযো, ন ইতো পরং সক্কাযো অত্থীতি পটিসঞ্চিক্খতি।
Katamo pana, bhante, ariyo vimokkhoti idha kiṃ pucchati? Samāpattiṃ tāva padaṭṭhānaṃ katvā vipassanaṃ vaḍḍhetvā arahattaṃ gaṇhanto bhikkhu nāvaṃ vā uḷumpādīni vā nissāya mahoghaṃ taritvā pāraṃ gacchanto viya na kilamati. Sukkhavipassako pana pakiṇṇakasaṅkhāre sammasitvā arahattaṃ gaṇhanto bāhubalena sotaṃ chinditvā pāraṃ gacchanto viya kilamati. Iti imassa sukkhavipassakassa arahattaṃ pucchāmīti pucchati. Ariyasāvakoti sukkhavipassako ariyasāvako. Ayañhi heṭṭhā aṭṭhahi bhikkhūhi paññavantataro tesañca bhikkhūnaṃ attano cāti navannampi kammaṭṭhānaṃ ekato katvā sammasati. Esa sakkāyo yāvatā sakkāyoti yattako tebhūmakavaṭṭasaṅkhāto sakkāyo nāma atthi, sabbopi so esa sakkāyo, na ito paraṃ sakkāyo atthīti paṭisañcikkhati.
এতং অমতং যদিদং অনুপাদা চিত্তস্স ৰিমোক্খোতি যো পনেস চিত্তস্স অনুপাদাৰিমোক্খো নাম, এতং অমতং এতং সন্তং এতং পণীতন্তি পটিসঞ্চিক্খতি। অঞ্ঞত্থ চ ‘‘অনুপাদা চিত্তস্স ৰিমোক্খো’’তি নিব্বানং ৰুচ্চতি। ইমস্মিং পন সুত্তে সুক্খৰিপস্সকস্স অরহত্তং কথিতং। সেসং সব্বত্থ উত্তানমেৰ।
Etaṃamataṃ yadidaṃ anupādā cittassa vimokkhoti yo panesa cittassa anupādāvimokkho nāma, etaṃ amataṃ etaṃ santaṃ etaṃ paṇītanti paṭisañcikkhati. Aññattha ca ‘‘anupādā cittassa vimokkho’’ti nibbānaṃ vuccati. Imasmiṃ pana sutte sukkhavipassakassa arahattaṃ kathitaṃ. Sesaṃ sabbattha uttānameva.
কেৰলং পন ইমস্মিং সুত্তে সত্তসু ঠানেসু ওসক্কনা কথিতা, অট্ঠসু ঠানেসু পটিসন্ধি, নৰসু ঠানেসু অরহত্তং কথিতন্তি ৰেদিতব্বং। কথং? ততিযং ঝানং তাৰ পাদকং কত্ৰা ঠিতস্স ভিক্খুনো ওসক্কনা কথিতা, পটিসন্ধি কথিতা, অরহত্তং কথিতং, তথা চতুত্থজ্ঝানং, তথা আকাসানঞ্চাযতনং। ৰিঞ্ঞাণঞ্চাযতনং পন পদট্ঠানং কত্ৰা ঠিতানং তিণ্ণং ভিক্খূনং ওসক্কনা কথিতা, পটিসন্ধি কথিতা, অরহত্তং কথিতং। তথা আকিঞ্চঞ্ঞাযতনং পাদকং কত্ৰা ঠিতস্স ভিক্খুনো। নেৰসঞ্ঞানাসঞ্ঞাযতনং পাদকং কত্ৰা ঠিতস্স পন ওসক্কনা নত্থি, পটিসন্ধি পন অরহত্তঞ্চ কথিতং। সুক্খৰিপস্সকস্স অরহত্তমেৰ কথিতন্তি। এৰং সত্তসু ঠানেসু ওসক্কনা কথিতা, অট্ঠসু ঠানেসু পটিসন্ধি, নৰসু ঠানেসু অরহত্তং কথিতন্তি ৰেদিতব্বং। ইমঞ্চ পন সত্তসু ঠানেসু ওসক্কনং অট্ঠসু পটিসন্ধিং নৰসু অরহত্তং সমোধানেত্ৰা কথেন্তেন ইমং আনেঞ্জসপ্পাযসুত্তং সুকথিতং নাম হোতীতি।
Kevalaṃ pana imasmiṃ sutte sattasu ṭhānesu osakkanā kathitā, aṭṭhasu ṭhānesu paṭisandhi, navasu ṭhānesu arahattaṃ kathitanti veditabbaṃ. Kathaṃ? Tatiyaṃ jhānaṃ tāva pādakaṃ katvā ṭhitassa bhikkhuno osakkanā kathitā, paṭisandhi kathitā, arahattaṃ kathitaṃ, tathā catutthajjhānaṃ, tathā ākāsānañcāyatanaṃ. Viññāṇañcāyatanaṃ pana padaṭṭhānaṃ katvā ṭhitānaṃ tiṇṇaṃ bhikkhūnaṃ osakkanā kathitā, paṭisandhi kathitā, arahattaṃ kathitaṃ. Tathā ākiñcaññāyatanaṃ pādakaṃ katvā ṭhitassa bhikkhuno. Nevasaññānāsaññāyatanaṃ pādakaṃ katvā ṭhitassa pana osakkanā natthi, paṭisandhi pana arahattañca kathitaṃ. Sukkhavipassakassa arahattameva kathitanti. Evaṃ sattasu ṭhānesu osakkanā kathitā, aṭṭhasu ṭhānesu paṭisandhi, navasu ṭhānesu arahattaṃ kathitanti veditabbaṃ. Imañca pana sattasu ṭhānesu osakkanaṃ aṭṭhasu paṭisandhiṃ navasu arahattaṃ samodhānetvā kathentena imaṃ āneñjasappāyasuttaṃ sukathitaṃ nāma hotīti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
আনেঞ্জসপ্পাযসুত্তৰণ্ণনা নিট্ঠিতা।
Āneñjasappāyasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৬. আনেঞ্জসপ্পাযসুত্তং • 6. Āneñjasappāyasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৬. আনেঞ্জসপ্পাযসুত্তৰণ্ণনা • 6. Āneñjasappāyasuttavaṇṇanā
