| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
৪. আনেঞ্জসুত্তৰণ্ণনা
4. Āneñjasuttavaṇṇanā
১১৭. চতুত্থে তদস্সাদেতীতি তং ঝানং অস্সাদেতি। তং নিকামেতীতি তদেৰ পত্থেতি। তেন চ ৰিত্তিং আপজ্জতীতি তেন ঝানেন তুট্ঠিং আপজ্জতি। তত্র ঠিতোতি তস্মিং ঝানে ঠিতো। তদধিমুত্তোতি তত্থেৰ অধিমুত্তো। তব্বহুলৰিহারীতি তেন বহুলং ৰিহরন্তো। সহব্যতং উপপজ্জতীতি সহভাৰং উপপজ্জতি, তস্মিং দেৰলোকে নিব্বত্ততীতি অত্থো । নিরযম্পি গচ্ছতীতিআদি নিরযাদীহি অৰিপ্পমুত্তত্তা অপরপরিযাযৰসেন তত্থ গমনং সন্ধায ৰুত্তং। ন হি তস্স উপচারজ্ঝানতো বলৰতরং অকুসলং অত্থি, যেন অনন্তরং অপাযে নিব্বত্তেয্য। ভগৰতো পন সাৰকোতি সোতাপন্নসকদাগামিঅনাগামীনং অঞ্ঞতরো। তস্মিংযেৰ ভৰেতি তত্থেৰ অরূপভৰে। পরিনিব্বাযতীতি অপ্পচ্চযপরিনিব্বানেন পরিনিব্বাযতি। অধিপ্পযাসোতি অধিকপ্পযোগো। সেসমেত্থ ৰুত্তনযেনেৰ ৰেদিতব্বং। ইমস্মিং পন সুত্তে পুথুজ্জনস্স উপপত্তিজ্ঝানং কথিতং, অরিযসাৰকস্স তদেৰ উপপত্তিজ্ঝানঞ্চ ৰিপস্সনাপাদকজ্ঝানঞ্চ কথিতং।
117. Catutthe tadassādetīti taṃ jhānaṃ assādeti. Taṃ nikāmetīti tadeva pattheti. Tena ca vittiṃ āpajjatīti tena jhānena tuṭṭhiṃ āpajjati. Tatra ṭhitoti tasmiṃ jhāne ṭhito. Tadadhimuttoti tattheva adhimutto. Tabbahulavihārīti tena bahulaṃ viharanto. Sahabyataṃ upapajjatīti sahabhāvaṃ upapajjati, tasmiṃ devaloke nibbattatīti attho . Nirayampi gacchatītiādi nirayādīhi avippamuttattā aparapariyāyavasena tattha gamanaṃ sandhāya vuttaṃ. Na hi tassa upacārajjhānato balavataraṃ akusalaṃ atthi, yena anantaraṃ apāye nibbatteyya. Bhagavato pana sāvakoti sotāpannasakadāgāmianāgāmīnaṃ aññataro. Tasmiṃyeva bhaveti tattheva arūpabhave. Parinibbāyatīti appaccayaparinibbānena parinibbāyati. Adhippayāsoti adhikappayogo. Sesamettha vuttanayeneva veditabbaṃ. Imasmiṃ pana sutte puthujjanassa upapattijjhānaṃ kathitaṃ, ariyasāvakassa tadeva upapattijjhānañca vipassanāpādakajjhānañca kathitaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৪. আনেঞ্জসুত্তং • 4. Āneñjasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৪. আনেঞ্জসুত্তৰণ্ণনা • 4. Āneñjasuttavaṇṇanā
