| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၄. အာနေဉ္ဇသုတ္တဝဏ္ဏနာ
4. Āneñjasuttavaṇṇanā
၁၁၇. စတုတ္ထေ သဟ ဗ္ယယတိ ဂစ္ဆတီတိ သဟဗ္ယော, သဟပဝတ္တနကော။ တသ္သ ဘာဝော သဟဗ္ယတာ, သဟပဝတ္တီတိ အာဟ ‘‘သဟဘာဝံ ဥပပဇ္ဇတီ’’တိ။ ‘‘ယာဝတကံ တေသံ ဒေဝာနံ အာယုပ္ပမာဏံ, တံ သဗ္ဗံ ခေပေတ္ဝာ နိရယမ္ပိ ဂစ္ဆတီ’’တိအာဒိဝစနတော အရူပဘဝတော စုတသ္သ အပာယူပပတ္တိ ဝုတ္တာ ဝိယ ဒိသ္သတီတိ တန္နိဝတ္တနတ္ထံ ဘဂဝတော အဓိပ္ပာယံ ဝိဝရန္တော ‘‘သန္ဓာယဘာသိတမိဒံ ဝစန’’န္တိ ဒီပေတိ ‘‘နိရယာဒီဟိ အဝိပ္ပမုတ္တတ္တာ’’တိအာဒိနာ။ န ဟိ တသ္သ ဥပစာရဇ္ဈာနတော ဗလဝတရံ အကုသလံ အတ္ထီတိ။ ဣမိနာ တတော စဝန္တာနံ ဥပစာရဇ္ဈာနမေဝ ပဋိသန္ဓိဇနကံ ကမ္မန္တိ ဒီပေတိ။ အဓိကံ ပယသတိ ပယုဇ္ဇတိ ဧတေနာတိ အဓိပ္ပယာသော, သဝိသေသံ ဣတိကတ္တဗ္ဗကိရိယာ။ တေနာဟ ‘‘အဓိကပ္ပယောဂော’’တိ။ သေသမေတ္ထ ဥတ္တာနမေဝ။
117. Catutthe saha byayati gacchatīti sahabyo, sahapavattanako. Tassa bhāvo sahabyatā, sahapavattīti āha ‘‘sahabhāvaṃ upapajjatī’’ti. ‘‘Yāvatakaṃ tesaṃ devānaṃ āyuppamāṇaṃ, taṃ sabbaṃ khepetvā nirayampi gacchatī’’tiādivacanato arūpabhavato cutassa apāyūpapatti vuttā viya dissatīti tannivattanatthaṃ bhagavato adhippāyaṃ vivaranto ‘‘sandhāyabhāsitamidaṃ vacana’’nti dīpeti ‘‘nirayādīhi avippamuttattā’’tiādinā. Na hi tassa upacārajjhānato balavataraṃ akusalaṃ atthīti. Iminā tato cavantānaṃ upacārajjhānameva paṭisandhijanakaṃ kammanti dīpeti. Adhikaṃ payasati payujjati etenāti adhippayāso, savisesaṃ itikattabbakiriyā. Tenāha ‘‘adhikappayogo’’ti. Sesamettha uttānameva.
အာနေဉ္ဇသုတ္တဝဏ္ဏနာ နိဋ္ဌိတာ။
Āneñjasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၄. အာနေဉ္ဇသုတ္တံ • 4. Āneñjasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၄. အာနေဉ္ဇသုတ္တဝဏ္ဏနာ • 4. Āneñjasuttavaṇṇanā
