| Library / Tipiṭaka / д̇ибидага • Tipiṭaka / маж̇жхиманигааяа (дийгаа) • Majjhimanikāya (ṭīkā) |
6. ан̇г̇улимааласуд̇д̇аван̣н̣анаа
6. Aṅgulimālasuttavaṇṇanā
347. ан̇г̇улийнам̣ маалам̣ д̇хаарзд̇ийд̇и иминаа анвад̇т̇аа д̇асса саман̃н̃аад̇и д̣̇ассзд̇и. д̇ад̇раад̇и д̇асмим̣ аажарияаважанзна ан̇г̇улимааласса д̇хааран̣з. гарийсасахассакзд̇д̇з згасаалисийсам̣ вияа абан̃н̃ааяамаанасагагижжо ход̇ийд̇и ад̇хиббааяо. д̇аггасийлам̣ бзсаяим̣су ‘‘д̇аад̣̇исасса аажарияасса санд̇игз сиббуг̇г̇ахасаммаабаяог̇зна д̣̇идтад̇хаммигз самбарааяигз жа ад̇т̇з ж̇аананд̇о бхаарияам̣ на гарзяяаа’’д̇и. б̣аахирагаа ахзсум̣ ахим̣сагасса вад̇д̇асамбад̇д̇ияаа аажарияасса жид̇д̇асабхаавад̇о ниб̣б̣ад̇д̇анад̇ибхаавзна. синзхзнзва вад̣̇анд̇зд̇и синзхзна вияа вад̣̇анд̇з.
347.Aṅgulīnaṃmālaṃ dhāretīti iminā anvatthā tassa samaññāti dasseti. Tatrāti tasmiṃ ācariyavacanena aṅgulimālassa dhāraṇe. Karīsasahassakhette ekasālisīsaṃ viya apaññāyamānasakakicco hotīti adhippāyo. Takkasīlaṃ pesayiṃsu ‘‘tādisassa ācariyassa santike sippuggahasammāpayogena diṭṭhadhammike samparāyike ca atthe jānanto bhāriyaṃ na kareyyā’’ti. Bāhirakā ahesuṃ ahiṃsakassa vattasampattiyā ācariyassa cittasabhāvato nibbattanatibhāvena. Sineheneva vadanteti sinehena viya vadante.
г̇ан̣анамби на уг̇г̇ан̣хаад̇ийд̇и г̇ан̣анавид̇химби на саллагкзд̇и. д̇ад̇т̇а гааран̣амааха ‘‘багад̇ияаа’’д̇иаад̣̇инаа. табид̇адтаанзд̇и ругкаг̇ажчанд̇араад̣̇игз табид̇адтаанз сагунд̇асин̇г̇аалаанам̣ васзна ан̇г̇улияо винассанд̇и. бхаг̇г̇авод̇и госаларан̃н̃о бурохид̇ам̣ г̇од̇д̇зна вад̣̇ад̇и. жоро ависсаасанийяо саахасигабхаавад̇о. бураан̣асант̇ад̇аа саакаа ависсаасанийяаа вижчигаад̣̇ийнам̣ бавзсанаяог̇яад̇д̇аа. рааж̇аа ависсаасанийяо иссарияамад̣̇зна д̇ханалобхзна жа гад̣̇аажи ж̇ийвид̇з сан̇гаабхаавад̇о. ид̇т̇ий ависсаасанийяаа лоласийлажид̇д̇абхаавад̇о. ануд̣̇д̇харан̣ийяо бхависсад̇и сам̣саарабан̇гад̇о.
Gaṇanampi na uggaṇhātīti gaṇanavidhimpi na sallakkheti. Tattha kāraṇamāha ‘‘pakatiyā’’tiādinā. Ṭhapitaṭṭhāneti rukkhagacchantarādike ṭhapitaṭṭhāne sakuntasiṅgālānaṃ vasena aṅguliyo vinassanti. Bhaggavoti kosalarañño purohitaṃ gottena vadati. Coro avissāsanīyo sāhasikabhāvato. Purāṇasanthatā sākhā avissāsanīyā vicchikādīnaṃ pavesanayogyattā. Rājā avissāsanīyo issariyamadena dhanalobhena ca kadāci jīvite saṅkābhāvato. Itthī avissāsanīyā lolasīlacittabhāvato. Anuddharaṇīyo bhavissati saṃsārapaṅkato.
348. сан̇гарид̇ваад̇и ‘‘маяам̣ згаж̇жхам̣ саннибад̇ид̇ваа жорам̣ маарзд̇ваа ваа балаабзд̇ваа г̇амиссаамаа’’д̇и сан̇гарам̣ гад̇ваа. ид̣̇д̇хаабхисан̇кааранд̇и абхисан̇каран̣ам̣ ад̇хидтаанам̣. абхисан̇каасийд̇и ад̇хидтахи. сам̣харид̇ваад̇и сам̣кибид̇ваа. орабхааг̇зд̇и жорасса орабхааг̇з.
348.Saṅkaritvāti ‘‘mayaṃ ekajjhaṃ sannipatitvā coraṃ māretvā vā palāpetvā gamissāmā’’ti saṅkaraṃ katvā. Iddhābhisaṅkhāranti abhisaṅkharaṇaṃ adhiṭṭhānaṃ. Abhisaṅkhāsīti adhiṭṭhahi. Saṃharitvāti saṃkhipitvā. Orabhāgeti corassa orabhāge.
349. д̣̇ан̣д̣од̇и бахаран̣ахад̇т̇ажчзд̣̇анаад̣̇иго д̣̇ан̣д̣анасан̇каад̇о д̣̇ан̣д̣о. бавад̇д̇аяид̇аб̣б̣од̇и аанзд̇аб̣б̣о. абанзд̇ваад̇и ад̇д̇ано санд̇аанад̇о самужчзд̣̇авасзна бахааяа. бадисан̇кааяаад̇и бадисан̇каанзна. авихим̣сааяаад̇и гарун̣ааяа. сааран̣ийяад̇хаммзсууд̇и часуби сааран̣ийяад̇хаммзсу, тид̇о адтид̇аанам̣ баабад̇хаммаанам̣ б̣од̇химуулз зва самужчиннад̇д̇аа. яат̇аа ад̇ийд̇з абаримид̇ам̣ гаалам̣ санд̇хаавид̇ам̣, звам̣ имааяа бадибад̇д̇ияаа анааг̇ад̇зби санд̇хаависсад̇ийд̇и д̣̇ассзнд̇о ‘‘ид̣̇ааний’’д̇иаад̣̇имааха.
349.Daṇḍoti paharaṇahatthacchedanādiko daṇḍanasaṅkhāto daṇḍo. Pavattayitabboti ānetabbo. Apanetvāti attano santānato samucchedavasena pahāya. Paṭisaṅkhāyāti paṭisaṅkhānena. Avihiṃsāyāti karuṇāya. Sāraṇīyadhammesūti chasupi sāraṇīyadhammesu, ṭhito aṭṭhitānaṃ pāpadhammānaṃ bodhimūle eva samucchinnattā. Yathā atīte aparimitaṃ kālaṃ sandhāvitaṃ, evaṃ imāya paṭipattiyā anāgatepi sandhāvissatīti dassento ‘‘idānī’’tiādimāha.
ид̇взваад̇и ид̇и зва, ид̇и-сад̣̇д̣̇о нид̣̇ассанад̇т̇о. д̇знааха ‘‘звам̣ вад̇ваа язваа’’д̇и. агирийд̇и аагири, бан̃жаби аавуд̇хаани вигири. д̇зна вуд̇д̇ам̣ ‘‘киби чад̣д̣зсий’’д̇и.
Itvevāti iti eva, iti-saddo nidassanattho. Tenāha ‘‘evaṃ vatvā yevā’’ti. Akirīti ākiri, pañcapi āvudhāni vikiri. Tena vuttaṃ ‘‘khipi chaḍḍesī’’ti.
350. зд̇д̇оваад̇и ад̇о зва ааг̇ад̇амаг̇г̇знзва саавад̇т̇им̣ г̇ад̇аа. ад̇хиваасзссад̇ийд̇и ‘‘жорам̣ бадисзд̇хзд̇ум̣ г̇амиссаамий’’д̇и вуд̇д̇з д̇ун̣хий бхависсад̇и . д̣̇аарун̣агаммзна уббаннанааманд̇и ‘‘ан̇г̇улимаало’’д̇и имам̣ наамам̣ санд̇хааяа вад̣̇ад̇и.
350.Ettovāti ato eva āgatamaggeneva sāvatthiṃ gatā. Adhivāsessatīti ‘‘coraṃ paṭisedhetuṃ gamissāmī’’ti vutte tuṇhī bhavissati . Dāruṇakammena uppannanāmanti ‘‘aṅgulimālo’’ti imaṃ nāmaṃ sandhāya vadati.
351. хад̇т̇ий аран̃н̃ахад̇т̇ий хонд̇и мануссаанам̣ д̇ад̇т̇а г̇анд̇ум̣ асаггун̣зяяад̇д̇аа, звам̣ ассааби. гуудасахассаанам̣ бхиж̇ж̇анагааран̣ам̣ ход̇и т̇зрасса ааг̇аманабхаязна гхадз чад̣д̣зд̇ваа балааяанзна. г̇аб̣бхамуул̣хааяаад̇и б̣яаагулаг̇аб̣бхааяа. баб̣б̣аж̇ж̇ааб̣алзнаад̇и вуд̇д̇ам̣, сад̇т̇у д̣̇зсанаанубхаавзнаад̇и бана вад̇д̇аб̣б̣ам̣. со хи д̇ассааби гааран̣анд̇и. арияаа наама ж̇аад̇и баб̣б̣аж̇ж̇аа арияабхаавад̇т̇ааяа ж̇аад̇ийд̇и гад̇ваа.
351.Hatthī araññahatthī honti manussānaṃ tattha gantuṃ asakkuṇeyyattā, evaṃ assāpi. Kūṭasahassānaṃ bhijjanakāraṇaṃ hoti therassa āgamanabhayena ghaṭe chaḍḍetvā palāyanena. Gabbhamūḷhāyāti byākulagabbhāya. Pabbajjābalenāti vuttaṃ, satthu desanānubhāvenāti pana vattabbaṃ. So hi tassāpi kāraṇanti. Ariyā nāma jāti pabbajjā ariyabhāvatthāya jātīti katvā.
махаабарид̇д̇ам̣ наамзд̇анд̇и махаанубхаавам̣ барид̇д̇ам̣ наамзд̇ам̣. д̇ат̇аа хи нам̣ т̇зро саб̣б̣абхаавзна арияааяа ж̇аад̇о сажжаад̇хидтаанзна агааси. д̇знааха ‘‘сажжагирияагад̇адтаанз’’д̇и. г̇аб̣бхамуул̣ханд̇и муул̣хаг̇аб̣бхам̣. г̇аб̣бхо хи барибагго самбаж̇ж̇амаано виж̇ааяанагаалз гаммаж̇аваад̇зхи сан̃жаалзд̇ваа баривад̇д̇ид̇о уд̣̇д̇хам̣баад̣̇о ад̇хосийсо худ̇ваа яонимукаабхимуко ход̇и, звам̣ со гассажи алаг̇г̇о сод̇т̇инаа б̣ахи нигкамад̇и, вибаж̇ж̇амаано бана вибаривад̇д̇анавасзна яонимаг̇г̇ам̣ бид̣̇ахид̇ваа д̇ирияам̣ нибаж̇ж̇ад̇и, д̇ат̇аа яассаа яонимаг̇г̇о бид̣̇ахад̇и, саа д̇ад̇т̇а гаммаж̇аваад̇зхи абараабарам̣ баривад̇д̇амаанаа б̣яаагулаа муул̣хаг̇аб̣бхаад̇и вужжад̇и, д̇ам̣ санд̇хааяа вуд̇д̇ам̣ ‘‘г̇аб̣бхамуул̣ха’’нд̇и.
Mahāparittaṃ nāmetanti mahānubhāvaṃ parittaṃ nāmetaṃ. Tathā hi naṃ thero sabbabhāvena ariyāya jāto saccādhiṭṭhānena akāsi. Tenāha ‘‘saccakiriyakataṭṭhāne’’ti. Gabbhamūḷhanti mūḷhagabbhaṃ. Gabbho hi paripakko sampajjamāno vijāyanakāle kammajavātehi sañcāletvā parivattito uddhaṃpādo adhosīso hutvā yonimukhābhimukho hoti, evaṃ so kassaci alaggo sotthinā bahi nikkhamati, vipajjamāno pana viparivattanavasena yonimaggaṃ pidahitvā tiriyaṃ nipajjati, tathā yassā yonimaggo pidahati, sā tattha kammajavātehi aparāparaṃ parivattamānā byākulā mūḷhagabbhāti vuccati, taṃ sandhāya vuttaṃ ‘‘gabbhamūḷha’’nti.
сажжагирияаа наама б̣уд̣̇д̇хаасаяам̣ ад̇д̇ано сийлам̣ бажжавзгкид̇ваа гад̇аа, д̇асмаа сажжагирияаа взж̇ж̇агаммам̣ на ход̇ийд̇и д̣̇адтаб̣б̣ам̣. т̇зрассаби жаад̇иаад̣̇инаа убасан̇гамид̇аб̣б̣агааран̣ам̣ вад̣̇ад̇и. имз д̣̇вз хзд̇уу бадижжа бхаг̇аваа т̇зрам̣ сажжагирияам̣ гаарзси. ж̇аад̇инд̇и муулаж̇аад̇им̣.
Saccakiriyā nāma buddhāsayaṃ attano sīlaṃ paccavekkhitvā katā, tasmā saccakiriyā vejjakammaṃ na hotīti daṭṭhabbaṃ. Therassapi cātiādinā upasaṅkamitabbakāraṇaṃ vadati. Ime dve hetū paṭicca bhagavā theraṃ saccakiriyaṃ kāresi. Jātinti mūlajātiṃ.
352. барияаад̣̇ааяа аахажжа бхиннзна сийсзна. сабхааг̇ад̣̇идтад̇хаммавзд̣̇анийяагамманд̇и нираяз ниб̣б̣ад̇д̇анасагагаммасабхааг̇абхууд̇ам̣ д̣̇идтад̇хаммавзд̣̇анийяагаммам̣. сабхааг̇ад̇аа жа самаанавад̇т̇угад̇аа самаанаарамман̣ад̇аазгавийт̇ибарияаабаннад̇аад̣̇ивасзна саб̣б̣ат̇аа саригкад̇аа, сад̣̇исамби жа наама д̇ад̣̇зваахарийяад̇и яат̇аа ‘‘д̇ассзва гаммасса вибааго’’д̇и жа ‘‘саа зва д̇ид̇д̇ирий д̇аанзва осад̇хааний’’д̇и жа. ид̣̇аани д̇амзва сабхааг̇ад̇ам̣ д̣̇ассзд̇ум̣ ‘‘гаммам̣ хий’’д̇иаад̣̇и аарад̣̇д̇хам̣. гарияамаанамзваад̇и бажжаяасамавааязна бадибаадияаа ниб̣б̣ад̇д̇ияамаанамзва. д̇аяо годтаасз буурзд̇и, д̣̇идтад̇хаммавзд̣̇анийяаабараабарияааяавзд̣̇анийяаубабаж̇ж̇авзд̣̇анийяасан̇каад̇з д̇аяо бхааг̇з буурзд̇и, д̇зсам̣ д̇ин̣н̣ам̣ бхааг̇аанам̣ васзна бавад̇д̇ад̇и.
352. Pariyādāya āhacca bhinnena sīsena. Sabhāgadiṭṭhadhammavedanīyakammanti niraye nibbattanasakakammasabhāgabhūtaṃ diṭṭhadhammavedanīyakammaṃ. Sabhāgatā ca samānavatthukatā samānārammaṇatāekavīthipariyāpannatādivasena sabbathā sarikkhatā, sadisampi ca nāma tadevāharīyati yathā ‘‘tasseva kammassa vipāko’’ti ca ‘‘sā eva tittirī tāneva osadhānī’’ti ca. Idāni tameva sabhāgataṃ dassetuṃ ‘‘kammaṃ hī’’tiādi āraddhaṃ. Kariyamānamevāti paccayasamavāyena paṭipāṭiyā nibbattiyamānameva. Tayo koṭṭhāse pūreti, diṭṭhadhammavedanīyaaparāpariyāyavedanīyaupapajjavedanīyasaṅkhāte tayo bhāge pūreti, tesaṃ tiṇṇaṃ bhāgānaṃ vasena pavattati.
д̣̇идтад̇хаммо вужжад̇и бажжагкабхууд̇о бажжуббанно ад̇д̇абхааво, д̇ад̇т̇а взд̣̇ид̇аб̣б̣апалам̣ гаммам̣ д̣̇идтад̇хаммавзд̣̇анийяам̣. бажжуббаннабхавад̇о ананд̇арам̣ взд̣̇ид̇аб̣б̣апалам̣ гаммам̣ убабаж̇ж̇авзд̣̇анийяам̣. д̣̇идтад̇хаммаананд̇арабхавад̇о ан̃н̃асмим̣ ад̇д̇абхаавабарияааяз ад̇д̇абхаавабаривад̇д̇з взд̣̇ид̇аб̣б̣апалам̣ гаммам̣ абараабарияааяавзд̣̇анийяам̣. бадибагкзхи анабхибхууд̇ад̇ааяа, бажжаяависзсзна бадилад̣̇д̇хависзсад̇ааяа жа б̣алавабхааваббад̇д̇аа д̇аад̣̇исасса буб̣б̣аабхисан̇каарасса васзна саад̇исаяаа худ̇ваа бавад̇д̇аа батамаж̇аванажзд̇анаа д̇асмим̣язва ад̇д̇абхаавз палад̣̇ааяиний д̣̇идтад̇хаммавзд̣̇анийяаа наама. саа хи вуд̇д̇аагаарзна б̣алавад̇и ж̇аванасанд̇аанз г̇ун̣ависзсаяуд̇д̇зсу убагаараанубагааравасаббавад̇д̇ияаа аасзванаалаабхзна аббавибаагад̇ааяа жа ид̇арад̣̇ваяам̣ вияа бавад̇д̇асанд̇аанубарамаабзгкам̣ огаасалаабхаабзгкан̃жа гаммам̣ на ход̇ийд̇и ид̇хзва бубпамад̇д̇ам̣ вияа бавад̇д̇ивибаагамад̇д̇ам̣ палам̣ д̣̇зд̇и.
Diṭṭhadhammo vuccati paccakkhabhūto paccuppanno attabhāvo, tattha veditabbaphalaṃ kammaṃ diṭṭhadhammavedanīyaṃ. Paccuppannabhavato anantaraṃ veditabbaphalaṃ kammaṃ upapajjavedanīyaṃ. Diṭṭhadhammānantarabhavato aññasmiṃ attabhāvapariyāye attabhāvaparivatte veditabbaphalaṃ kammaṃ aparāpariyāyavedanīyaṃ. Paṭipakkhehi anabhibhūtatāya, paccayavisesena paṭiladdhavisesatāya ca balavabhāvappattā tādisassa pubbābhisaṅkhārassa vasena sātisayā hutvā pavattā paṭhamajavanacetanā tasmiṃyeva attabhāve phaladāyinī diṭṭhadhammavedanīyā nāma. Sā hi vuttākārena balavati javanasantāne guṇavisesayuttesu upakārānupakāravasappavattiyā āsevanālābhena appavipākatāya ca itaradvayaṃ viya pavattasantānuparamāpekkhaṃ okāsalābhāpekkhañca kammaṃ na hotīti idheva pupphamattaṃ viya pavattivipākamattaṃ phalaṃ deti.
д̇ат̇аа асаггонд̇анд̇и гаммасса палад̣̇аанам̣ наама убад̇хибаяог̇аад̣̇ибажжаяанд̇арасамавааязнзва ход̇ийд̇и д̇ад̣̇абхаавад̇о д̇асмим̣язва ад̇д̇абхаавз вибаагам̣ д̣̇аад̇ум̣ асаггонд̇ам̣. ахосигамманд̇и гаммам̣язва ахоси, на д̇асса вибааго ахоси, ад̇т̇и бхависсад̇и ваад̇и звам̣ вад̇д̇аб̣б̣ам̣ гаммам̣. ад̇т̇асаад̇хигаад̇и д̣̇аанаад̣̇ибаан̣аад̇ибаад̇аад̣̇иад̇т̇асса нибпаад̣̇игаа. гаа бана саад̇и ааха ‘‘сад̇д̇амаж̇аванажзд̇анаа’’д̇и. саа хи саннидтаабагажзд̇анаа вуд̇д̇анаязна бадилад̣̇д̇хависзсаа буримаж̇аванажзд̇анаахи лад̣̇д̇хаасзванаа жа самаанаа ананд̇арз ад̇д̇абхаавз вибаагад̣̇ааяиний убабаж̇ж̇авзд̣̇анийяагаммам̣ наама. д̇знааха ‘‘ананд̇арз ад̇д̇абхаавз вибаагам̣ д̣̇зд̇ий’’д̇и. сад̇и сам̣саараббавад̇д̇ияаад̇и иминаа асад̇и сам̣саараббавад̇д̇ияаа ахосигаммабагкз д̇идтад̇и вибажжаногаасасса абхаавад̇од̇и.
Tathā asakkontanti kammassa phaladānaṃ nāma upadhipayogādipaccayantarasamavāyeneva hotīti tadabhāvato tasmiṃyeva attabhāve vipākaṃ dātuṃ asakkontaṃ. Ahosikammanti kammaṃyeva ahosi, na tassa vipāko ahosi, atthi bhavissati vāti evaṃ vattabbaṃ kammaṃ. Atthasādhikāti dānādipāṇātipātādiatthassa nipphādikā. Kā pana sāti āha ‘‘sattamajavanacetanā’’ti. Sā hi sanniṭṭhāpakacetanā vuttanayena paṭiladdhavisesā purimajavanacetanāhi laddhāsevanā ca samānā anantare attabhāve vipākadāyinī upapajjavedanīyakammaṃ nāma. Tenāha ‘‘anantare attabhāve vipākaṃ detī’’ti. Sati saṃsārappavattiyāti iminā asati saṃsārappavattiyā ahosikammapakkhe tiṭṭhati vipaccanokāsassa abhāvatoti.
самуг̇гхаадид̇аани вибажжаногаасасса ануббад̇д̇ид̇хаммад̇аабаад̣̇анзна. д̣̇идтад̇хаммавзд̣̇анийяам̣ ад̇т̇и вибаагаарахаабхаавасса аниб̣б̣ад̇д̇ид̇ад̇д̇аа вибажжаногаасасса анубажчиннад̇д̇аа. гад̇уубажид̇ан̃хи гаммам̣ сад̇и вибажжаногаасз яаава на палам̣ д̣̇зд̇и, д̇аава ад̇т̇зва наама вибаагаарахабхаавад̇о. ‘‘яасса ко’’д̇и ид̣̇ам̣ анияамаагаараважанам̣ бхаг̇авад̇аа гаммасаригкад̇аавасзна саад̇хааран̣ад̇о вуд̇д̇анд̇и ааха ‘‘яаад̣̇исасса ко’’д̇и.
Samugghāṭitāni vipaccanokāsassa anuppattidhammatāpādanena. Diṭṭhadhammavedanīyaṃ atthi vipākārahābhāvassa anibbattitattā vipaccanokāsassa anupacchinnattā. Katūpacitañhi kammaṃ sati vipaccanokāse yāva na phalaṃ deti, tāva attheva nāma vipākārahabhāvato. ‘‘Yassa kho’’ti idaṃ aniyamākāravacanaṃ bhagavatā kammasarikkhatāvasena sādhāraṇato vuttanti āha ‘‘yādisassa kho’’ti.
бамаад̣̇агилзсавимуд̇д̇од̇и бамаад̣̇ахзд̇угзхи саб̣б̣зхи гилзсзхи вимуд̇д̇о.
Pamādakilesavimuttoti pamādahetukehi sabbehi kilesehi vimutto.
баабасса бид̇хаанам̣ наама авибаагад̇хаммад̇аабаад̣̇ананд̇и ааха ‘‘аббадисанд̇хигам̣ гарийяад̇ий’’д̇и. б̣уд̣̇д̇хасаасанзд̇и сигкаад̇д̇аяасан̇г̇ахз б̣уд̣̇д̇хасса бхаг̇авад̇о саасанз. яуд̇д̇аббаяуд̇д̇о вихарад̇ийд̇и агад̇д̇аб̣б̣асса агаран̣авасзна, гад̇д̇аб̣б̣асса жа барибууран̣авасзна бавад̇д̇ад̇и.
Pāpassa pidhānaṃ nāma avipākadhammatāpādananti āha ‘‘appaṭisandhikaṃ karīyatī’’ti. Buddhasāsaneti sikkhāttayasaṅgahe buddhassa bhagavato sāsane. Yuttappayutto viharatīti akattabbassa akaraṇavasena, kattabbassa ca paripūraṇavasena pavattati.
д̣̇иссанд̇и гуж̇жханд̇ийд̇и д̣̇исаа, бадибагкаад̇и ааха ‘‘сабад̇д̇аа’’д̇и. д̇аббасам̣сабагааранд̇и мзд̇д̇аанисам̣сагид̇д̇анаагаарам̣. гаалзнаад̇и аамзд̣ид̇алобзна нид̣̇д̣̇зсод̇и ааха ‘‘кан̣з кан̣з’’д̇и. анугаронд̇ууд̇и язсам̣ галяаан̣амид̇д̇аанам̣ санд̇игз сун̣анд̇и, яат̇аасуд̇ам̣ д̇хаммам̣ д̇зсам̣ анугаронд̇у д̣̇идтаануг̇ад̇игаран̣ам̣ аабаж̇ж̇анд̇у, ад̇д̇ано взрибуг̇г̇алаанамби бхаг̇авад̇о санд̇игз д̇хаммассаванам̣ саммаабадибад̇д̇ин̃жа бажжаасийсад̇и.
Dissanti kujjhantīti disā, paṭipakkhāti āha ‘‘sapattā’’ti. Tappasaṃsapakāranti mettānisaṃsakittanākāraṃ. Kālenāti āmeḍitalopena niddesoti āha ‘‘khaṇe khaṇe’’ti. Anukarontūti yesaṃ kalyāṇamittānaṃ santike suṇanti, yathāsutaṃ dhammaṃ tesaṃ anukarontu diṭṭhānugatikaraṇaṃ āpajjantu, attano veripuggalānampi bhagavato santike dhammassavanaṃ sammāpaṭipattiñca paccāsīsati.
д̇асанд̇и г̇ад̇им̣ бад̇т̇аяанд̇ийд̇и д̇асаа бхаванд̇араад̣̇ийсу сам̣саран̣абхаавад̇о. д̇знааха ‘‘д̇асаа вужжанд̇и сад̇ан̣хаа’’д̇и.
Tasanti gatiṃ patthayantīti tasā bhavantarādīsu saṃsaraṇabhāvato. Tenāha ‘‘tasā vuccanti sataṇhā’’ti.
нзд̇аб̣б̣адтаанам̣ уд̣̇агам̣ наяанд̇ийд̇и нзд̇д̇игаа. б̣анд̇хид̇ваад̇и д̣̇ал̣хам̣ б̣анд̇хид̇ваа. д̇злаган̃ж̇игзнаад̇и д̇зламиссид̇зна ган̃ж̇игзна.
Netabbaṭṭhānaṃ udakaṃ nayantīti nettikā. Bandhitvāti daḷhaṃ bandhitvā. Telakañjikenāti telamissitena kañjikena.
яаад̣̇исова анидтз, д̇аад̣̇исова идтзд̇и идтаанидтз ниб̣б̣игаарзна д̇аад̣̇ий. язсам̣ бана гаамаамисаад̣̇ийнам̣ ванд̇ад̇д̇аа рааг̇аад̣̇ийнам̣ жад̇д̇ад̇д̇аа гаамогхаад̣̇ийнам̣ д̇ин̣н̣ад̇д̇аа д̇аад̣̇ибхааво бхавзяяа, д̇зсам̣ бхаг̇авад̇аа саб̣б̣асо ванд̇аа жад̇д̇аа д̇ин̣н̣аа, д̇асмаа бхаг̇аваа ванд̇аавийд̇и д̇аад̣̇ий, жад̇д̇аавийд̇и д̇аад̣̇ий, д̇ин̣н̣аавийд̇и д̇аад̣̇ий, язхи анан̃н̃асаад̇хааран̣зхи сийлаад̣̇иг̇ун̣зхи саманнааг̇ад̇ад̇д̇аа бхаг̇аваа д̇аад̣̇ибхаавзна уггам̣сабаарамиббад̇д̇о д̇ам̣нид̣̇д̣̇зсо, д̇зхи г̇ун̣зхи яаат̇аавад̇о нид̣̇д̣̇исид̇аб̣б̣ад̇оби д̇аад̣̇ий. яат̇аа яанд̇араж̇ж̇уяаа яанд̇ам̣ нийяад̇и, звам̣ яааяа д̇ан̣хааяа бхаво нийяад̇и, саа ‘‘бхаванзд̇д̇и бхавараж̇ж̇уу’’д̇и вуд̇д̇аа. д̇знааха ‘‘д̇ааяа хий’’д̇иаад̣̇и, гаммаани гусалаад̣̇ийни вибажжаяанд̇и абажжаяанд̇и зд̇ааяаад̇и гаммавибааго. абажжаяабхааво наама арияамаг̇г̇ажзд̇анааяаад̇и ааха ‘‘маг̇г̇ажзд̇анааяаа’’д̇и. яаава на гилзсаа бахийяанд̇и, д̇аава имз сад̇д̇аа саин̣аа зва асзривихаарабхаавад̇од̇и ааха ‘‘ан̣ан̣о ниггилзсо ж̇аад̇о’’д̇и.
Yādisova aniṭṭhe, tādisova iṭṭheti iṭṭhāniṭṭhe nibbikārena tādī. Yesaṃ pana kāmāmisādīnaṃ vantattā rāgādīnaṃ cattattā kāmoghādīnaṃ tiṇṇattā tādibhāvo bhaveyya, tesaṃ bhagavatā sabbaso vantā cattā tiṇṇā, tasmā bhagavā vantāvīti tādī, cattāvīti tādī, tiṇṇāvīti tādī, yehi anaññasādhāraṇehi sīlādiguṇehi samannāgatattā bhagavā tādibhāvena ukkaṃsapāramippatto taṃniddeso, tehi guṇehi yāthāvato niddisitabbatopi tādī. Yathā yantarajjuyā yantaṃ nīyati, evaṃ yāya taṇhāya bhavo nīyati, sā ‘‘bhavanetti bhavarajjū’’ti vuttā. Tenāha ‘‘tāya hī’’tiādi, kammāni kusalādīni vipaccayanti apaccayanti etāyāti kammavipāko. Apaccayabhāvo nāma ariyamaggacetanāyāti āha ‘‘maggacetanāyā’’ti. Yāva na kilesā pahīyanti, tāva ime sattā saiṇā eva aserivihārabhāvatoti āha ‘‘aṇaṇo nikkileso jāto’’ti.
т̇зяяабарибхог̇о (висуд̣̇д̇хи. дий. 1.91) наама саамибарибхог̇аабхаавад̇о. бхаг̇авад̇ааби хи ад̇д̇ано саасанз сийлавад̇о бажжаяаа анун̃н̃аад̇аа, на д̣̇уссийласса, д̣̇ааяагаанам̣ сийлавад̇оязва барижжааг̇о, на д̣̇уссийласса ад̇д̇ано гаараанам̣ махабпалабхаавасса бажжаасийсанад̇о. ид̇и сад̇т̇аараа ананун̃н̃аад̇ад̇д̇аа д̣̇ааяагзхи жа абарижжад̇д̇ад̇д̇аа ‘‘д̣̇уссийласса барибхог̇о т̇зяяабарибхог̇о наамаа’’д̇и вуд̇д̇ам̣ . ин̣авасзна барибхог̇о ин̣абарибхог̇о. бадиг̇г̇аахагад̇о д̣̇агкин̣аависуд̣̇д̇хияаа абхаавад̇о ин̣ам̣ г̇ахзд̇ваа барибхог̇о вияаад̇и ад̇т̇о. яасмаа сзгкаа бхаг̇авад̇о орасабуд̇д̇аа, д̇асмаа д̇з бид̇усанд̇агаанам̣ бажжаяаанам̣ д̣̇ааяаад̣̇аа худ̇ваа д̇з бажжаяз барибхун̃ж̇анд̇ийд̇и д̇зсам̣ барибхог̇о д̣̇ааяаж̇ж̇абарибхог̇о наама. гим̣ бана д̇з бхаг̇авад̇о бажжаяз барибхун̃ж̇анд̇и, уд̣̇ааху г̇ихийхи д̣̇иннанд̇и? г̇ихийхи д̣̇иннааби д̇з бхаг̇авад̇аа анун̃н̃аад̇ад̇д̇аа бхаг̇авад̇о санд̇агаа хонд̇и ананун̃н̃аад̇зсу саб̣б̣зна саб̣б̣ам̣ барибхог̇аабхаавад̇о анун̃н̃аад̇зсуязва барибхог̇асамбхавад̇о. д̇хаммад̣̇ааяаад̣̇асуд̇д̇ан̃жзд̇т̇а (ма. ни. 1.29 аад̣̇аяо) саад̇хагам̣.
Theyyaparibhogo (visuddhi. ṭī. 1.91) nāma sāmiparibhogābhāvato. Bhagavatāpi hi attano sāsane sīlavato paccayā anuññātā, na dussīlassa, dāyakānaṃ sīlavatoyeva pariccāgo, na dussīlassa attano kārānaṃ mahapphalabhāvassa paccāsīsanato. Iti satthārā ananuññātattā dāyakehi ca apariccattattā ‘‘dussīlassa paribhogo theyyaparibhogo nāmā’’ti vuttaṃ . Iṇavasena paribhogo iṇaparibhogo. Paṭiggāhakato dakkhiṇāvisuddhiyā abhāvato iṇaṃ gahetvā paribhogo viyāti attho. Yasmā sekkhā bhagavato orasaputtā, tasmā te pitusantakānaṃ paccayānaṃ dāyādā hutvā te paccaye paribhuñjantīti tesaṃ paribhogo dāyajjaparibhogo nāma. Kiṃ pana te bhagavato paccaye paribhuñjanti, udāhu gihīhi dinnanti? Gihīhi dinnāpi te bhagavatā anuññātattā bhagavato santakā honti ananuññātesu sabbena sabbaṃ paribhogābhāvato anuññātesuyeva paribhogasambhavato. Dhammadāyādasuttañcettha (ma. ni. 1.29 ādayo) sādhakaṃ.
авийд̇арааг̇аанам̣ д̇ан̣хаабаравасад̇ааяа бажжаяабарибхог̇з саамибхааво над̇т̇и, д̇ад̣̇абхаавзна вийд̇арааг̇аанам̣ д̇ад̇т̇а саамибхааво яат̇ааружи барибхог̇асамбхавад̇о. д̇ат̇аа хи д̇з бадигууламби аббадигуулаагаарзна, аббадигууламби бадигуулаагаарзна д̇ад̣̇убхаяам̣ виваж̇ж̇зд̇ваа убзгкаагаарзна жа бажжаяз барибхун̃ж̇анд̇и, д̣̇ааяагаанан̃жа манорат̇ам̣ барибуурзнд̇и. сзсамзд̇т̇а яам̣ вад̇д̇аб̣б̣ам̣, д̇ам̣ висуд̣̇д̇химаг̇г̇з, д̇ам̣сам̣ван̣н̣анаасу жа вуд̇д̇анаязнзва взд̣̇ид̇аб̣б̣ам̣. гилзсаин̣аанам̣ абхаавам̣ санд̇хааяа ‘‘ан̣ан̣о’’д̇и вуд̇д̇ам̣, на бажжавзгкид̇абарибхог̇амад̇д̇ам̣. д̇знааха ааяасмаа жа б̣аагуло – ‘‘сад̇д̇аахамзва ко ахам̣, аавусо, саран̣о радтабин̣д̣ам̣ бхун̃ж̇и’’нд̇и (ма. ни. 3.211).
Avītarāgānaṃ taṇhāparavasatāya paccayaparibhoge sāmibhāvo natthi, tadabhāvena vītarāgānaṃ tattha sāmibhāvo yathāruci paribhogasambhavato. Tathā hi te paṭikūlampi appaṭikūlākārena, appaṭikūlampi paṭikūlākārena tadubhayaṃ vivajjetvā upekkhākārena ca paccaye paribhuñjanti, dāyakānañca manorathaṃ paripūrenti. Sesamettha yaṃ vattabbaṃ, taṃ visuddhimagge, taṃsaṃvaṇṇanāsu ca vuttanayeneva veditabbaṃ. Kilesaiṇānaṃ abhāvaṃ sandhāya ‘‘aṇaṇo’’ti vuttaṃ, na paccavekkhitaparibhogamattaṃ. Tenāha āyasmā ca bākulo – ‘‘sattāhameva kho ahaṃ, āvuso, saraṇo raṭṭhapiṇḍaṃ bhuñji’’nti (ma. ni. 3.211).
вад̇т̇угаамагилзсагаамзхи д̇ан̣хааяа бавад̇д̇иаагаарам̣ бадижжа ад̇т̇и раман̣авохаарод̇и ааха – ‘‘д̣̇увид̇хзсуби гаамзсу д̇ан̣хаарад̇исант̇ава’’нд̇и. манд̇ид̇анд̇и гат̇ид̇ам̣. уббаннзхи сад̇т̇убадин̃н̃зхи. сам̣вибхад̇д̇аад̇и гусалаад̣̇ивасзна канд̇хаад̣̇ийхи аагаарзхи вибхад̇д̇аа. сунд̣̇арам̣ ааг̇амананд̇и свааг̇ад̇ам̣. д̇ад̇о зва на гужчид̇ам̣ ааг̇ад̇ам̣. сол̣асавид̇хагижжасса барияосид̇ад̇д̇аа ааха ‘‘д̇ам̣ саб̣б̣ам̣ маяаа гад̇а’’нд̇и. маг̇г̇абан̃н̃ааяамзва д̇ад̇ияавиж̇ж̇аасаман̃н̃аад̇и ааха – ‘‘д̇ийхи виж̇ж̇аахи навахи жа логуд̇д̇арад̇хаммзхий’’д̇и.
Vatthukāmakilesakāmehi taṇhāya pavattiākāraṃ paṭicca atthi ramaṇavohāroti āha – ‘‘duvidhesupi kāmesu taṇhāratisanthava’’nti. Mantitanti kathitaṃ. Uppannehi satthupaṭiññehi. Saṃvibhattāti kusalādivasena khandhādīhi ākārehi vibhattā. Sundaraṃ āgamananti svāgataṃ. Tato eva na kucchitaṃ āgataṃ. Soḷasavidhakiccassa pariyositattā āha ‘‘taṃ sabbaṃ mayā kata’’nti. Maggapaññāyameva tatiyavijjāsamaññāti āha – ‘‘tīhi vijjāhi navahi ca lokuttaradhammehī’’ti.
ан̇г̇улимааласуд̇д̇аван̣н̣анааяа лийнад̇т̇аббагаасанаа самад̇д̇аа.
Aṅgulimālasuttavaṇṇanāya līnatthappakāsanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 6. ан̇г̇улимааласуд̇д̇ам̣ • 6. Aṅgulimālasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / маж̇жхиманигааяа (адтагат̇аа) • Majjhimanikāya (aṭṭhakathā) / 6. ан̇г̇улимааласуд̇д̇аван̣н̣анаа • 6. Aṅgulimālasuttavaṇṇanā
