| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
6. අනිච්‌චානුපස්‌සීසුත්‌තං
6. Aniccānupassīsuttaṃ
16. ‘‘සත්‌තිමෙ , භික්‌ඛවෙ, පුග්‌ගලා ආහුනෙය්‍යා පාහුනෙය්‍යා දක්‌ඛිණෙය්‍යා අඤ්‌ජලිකරණීයා අනුත්‌තරං පුඤ්‌ඤක්‌ඛෙත්‌තං ලොකස්‌ස. කතමෙ සත්‌ත? ඉධ, භික්‌ඛවෙ, එකච්‌චො පුග්‌ගලො සබ්‌බසඞ්‌ඛාරෙසු අනිච්‌චානුපස්‌සී විහරති, අනිච්‌චසඤ්‌ඤී, අනිච්‌චපටිසංවෙදී සතතං සමිතං අබ්‌බොකිණ්‌ණං චෙතසා අධිමුච්‌චමානො පඤ්‌ඤාය පරියොගාහමානො. සො ආසවානං ඛයා…පෙ.… සච්‌ඡිකත්‌වා උපසම්‌පජ්‌ජ විහරති. අයං, භික්‌ඛවෙ, පඨමො පුග්‌ගලො ආහුනෙය්‍යො පාහුනෙය්‍යො දක්‌ඛිණෙය්‍යො අඤ්‌ජලිකරණීයො අනුත්‌තරං පුඤ්‌ඤක්‌ඛෙත්‌තං ලොකස්‌ස.
16. ‘‘Sattime , bhikkhave, puggalā āhuneyyā pāhuneyyā dakkhiṇeyyā añjalikaraṇīyā anuttaraṃ puññakkhettaṃ lokassa. Katame satta? Idha, bhikkhave, ekacco puggalo sabbasaṅkhāresu aniccānupassī viharati, aniccasaññī, aniccapaṭisaṃvedī satataṃ samitaṃ abbokiṇṇaṃ cetasā adhimuccamāno paññāya pariyogāhamāno. So āsavānaṃ khayā…pe… sacchikatvā upasampajja viharati. Ayaṃ, bhikkhave, paṭhamo puggalo āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassa.
‘‘පුන චපරං, භික්‌ඛවෙ, ඉධෙකච්‌චො පුග්‌ගලො සබ්‌බසඞ්‌ඛාරෙසු අනිච්‌චානුපස්‌සී විහරති, අනිච්‌චසඤ්‌ඤී, අනිච්‌චපටිසංවෙදී සතතං සමිතං අබ්‌බොකිණ්‌ණං චෙතසා අධිමුච්‌චමානො පඤ්‌ඤාය පරියොගාහමානො. තස්‌ස අපුබ්‌බං අචරිමං ආසවපරියාදානඤ්‌ච හොති ජීවිතපරියාදානඤ්‌ච. අයං, භික්‌ඛවෙ, දුතියො පුග්‌ගලො ආහුනෙය්‍යො…පෙ.… අනුත්‌තරං පුඤ්‌ඤක්‌ඛෙත්‌තං ලොකස්‌ස.
‘‘Puna caparaṃ, bhikkhave, idhekacco puggalo sabbasaṅkhāresu aniccānupassī viharati, aniccasaññī, aniccapaṭisaṃvedī satataṃ samitaṃ abbokiṇṇaṃ cetasā adhimuccamāno paññāya pariyogāhamāno. Tassa apubbaṃ acarimaṃ āsavapariyādānañca hoti jīvitapariyādānañca. Ayaṃ, bhikkhave, dutiyo puggalo āhuneyyo…pe… anuttaraṃ puññakkhettaṃ lokassa.
‘‘පුන චපරං, භික්‌ඛවෙ, ඉධෙකච්‌චො පුග්‌ගලො සබ්‌බසඞ්‌ඛාරෙසු අනිච්‌චානුපස්‌සී විහරති, අනිච්‌චසඤ්‌ඤී, අනිච්‌චපටිසංවෙදී සතතං සමිතං අබ්‌බොකිණ්‌ණං චෙතසා අධිමුච්‌චමානො පඤ්‌ඤාය පරියොගාහමානො. සො පඤ්‌චන්‌නං ඔරම්‌භාගියානං සංයොජනානං පරික්‌ඛයා අන්‌තරාපරිනිබ්‌බායී හොති…පෙ.… උපහච්‌චපරිනිබ්‌බායී හොති…පෙ.… අසඞ්‌ඛාරපරිනිබ්‌බායී හොති…පෙ.… සසඞ්‌ඛාරපරිනිබ්‌බායී හොති…පෙ.… උද්‌ධංසොතො හොති අකනිට්‌ඨගාමී. අයං, භික්‌ඛවෙ, සත්‌තමො පුග්‌ගලො ආහුනෙය්‍යො පාහුනෙය්‍යො දක්‌ඛිණෙය්‍යො අඤ්‌ජලිකරණීයො අනුත්‌තරං පුඤ්‌ඤක්‌ඛෙත්‌තං ලොකස්‌ස. ඉමෙ ඛො, භික්‌ඛවෙ, සත්‌ත පුග්‌ගලා ආහුනෙය්‍යා පාහුනෙය්‍යා දක්‌ඛිණෙය්‍යා අඤ්‌ජලිකරණීයා අනුත්‌තරං පුඤ්‌ඤක්‌ඛෙත්‌තං ලොකස්‌සා’’ති. ඡට්‌ඨං.
‘‘Puna caparaṃ, bhikkhave, idhekacco puggalo sabbasaṅkhāresu aniccānupassī viharati, aniccasaññī, aniccapaṭisaṃvedī satataṃ samitaṃ abbokiṇṇaṃ cetasā adhimuccamāno paññāya pariyogāhamāno. So pañcannaṃ orambhāgiyānaṃ saṃyojanānaṃ parikkhayā antarāparinibbāyī hoti…pe… upahaccaparinibbāyī hoti…pe… asaṅkhāraparinibbāyī hoti…pe… sasaṅkhāraparinibbāyī hoti…pe… uddhaṃsoto hoti akaniṭṭhagāmī. Ayaṃ, bhikkhave, sattamo puggalo āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassa. Ime kho, bhikkhave, satta puggalā āhuneyyā pāhuneyyā dakkhiṇeyyā añjalikaraṇīyā anuttaraṃ puññakkhettaṃ lokassā’’ti. Chaṭṭhaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 6. අනිච්‌චානුපස්‌සීසුත්‌තවණ්‌ණනා • 6. Aniccānupassīsuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 6-9. අනිච්‌චානුපස්‌සීසුත්‌තාදිවණ්‌ණනා • 6-9. Aniccānupassīsuttādivaṇṇanā
