| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. அனிச்சானுபஸ்ஸீஸுத்தவண்ணனா
6. Aniccānupassīsuttavaṇṇanā
16. ச²ட்டே² அனிச்சாதி ஏவங் பஞ்ஞாய ப²ரந்தோ அனுபஸ்ஸதீதி அனிச்சானுபஸ்ஸீ. அனிச்சாதி ஏவங் ஸஞ்ஞா அஸ்ஸாதி அனிச்சஸஞ்ஞீ. அனிச்சாதி ஏவங் ஞாணேன படிஸங்வேதி³தா அஸ்ஸாதி அனிச்சபடிஸங்வேதீ³. ஸததந்தி ஸப்³ப³காலங். ஸமிதந்தி யதா² புரிமசித்தேன பச்சி²மசித்தங் ஸமிதங் ஸமுபக³தங் க⁴ட்டிதங் ஹோதி, ஏவங். அப்³போ³கிண்ணந்தி நிரந்தரங் அஞ்ஞேன சேதஸா அஸங்மிஸ்ஸங். சேதஸா அதி⁴முச்சமானோதி சித்தேன ஸன்னிட்டா²பயமானோ. பஞ்ஞாய பரியோகா³ஹமானோதி விபஸ்ஸனாஞாணேன அனுபவிஸமானோ.
16. Chaṭṭhe aniccāti evaṃ paññāya pharanto anupassatīti aniccānupassī. Aniccāti evaṃ saññā assāti aniccasaññī. Aniccāti evaṃ ñāṇena paṭisaṃveditā assāti aniccapaṭisaṃvedī. Satatanti sabbakālaṃ. Samitanti yathā purimacittena pacchimacittaṃ samitaṃ samupagataṃ ghaṭṭitaṃ hoti, evaṃ. Abbokiṇṇanti nirantaraṃ aññena cetasā asaṃmissaṃ. Cetasā adhimuccamānoti cittena sanniṭṭhāpayamāno. Paññāya pariyogāhamānoti vipassanāñāṇena anupavisamāno.
அபுப்³ப³ங் அசரிமந்தி அபுரே அபச்சா² ஏகக்க²ணேயேவ. இத⁴ ஸமஸீஸீ கதி²தோ. ஸோ சதுப்³பி³தோ⁴ ஹோதி ரோக³ஸமஸீஸீ, வேத³னாஸமஸீஸீ, இரியாபத²ஸமஸீஸீ, ஜீவிதஸமஸீஸீதி. தத்த² யஸ்ஸ அஞ்ஞதரேன ரோகே³ன பு²ட்ட²ஸ்ஸ ஸதோ ரோக³வூபஸமோ ச ஆஸவக்க²யோ ச ஏகப்பஹாரேனேவ ஹோதி, அயங் ரோக³ஸமஸீஸீ நாம. யஸ்ஸ பன அஞ்ஞதரங் வேத³னங் வேத³யதோ வேத³னாவூபஸமோ ச ஆஸவக்க²யோ ச ஏகப்பஹாரேனேவ ஹோதி, அயங் வேத³னாஸமஸீஸீ நாம. யஸ்ஸ பன டா²னாதீ³ஸு இரியாபதே²ஸு அஞ்ஞதரஸமங்கி³னோ விபஸ்ஸந்தஸ்ஸ இரியாபத²ஸ்ஸ பரியோஸானஞ்ச ஆஸவக்க²யோ ச ஏகப்பஹாரேனேவ ஹோதி, அயங் இரியாபத²ஸமஸீஸீ நாம. யஸ்ஸ பன உபக்கமதோ வா ஸரஸதோ வா ஜீவிதபரியாதா³னஞ்ச ஆஸவக்க²யோ ச ஏகப்பஹாரேனேவ ஹோதி, அயங் ஜீவிதஸமஸீஸீ நாம. அயமித⁴ அதி⁴ப்பேதோ. தத்த² கிஞ்சாபி ஆஸவபரியாதா³னங் மக்³க³சித்தேன, ஜீவிதபரியாதா³னங் சுதிசித்தேன ஹோதீதி உபி⁴ன்னங் ஏகக்க²ணே ஸம்ப⁴வோ நாம நத்தி². யஸ்மா பனஸ்ஸ ஆஸவேஸு கீ²ணமத்தேஸு பச்சவெக்க²ணவாரானந்தரமேவ ஜீவிதபரியாதா³னங் க³ச்ச²தி, அந்தரங் ந பஞ்ஞாயதி, தஸ்மா ஏவங் வுத்தங்.
Apubbaṃ acarimanti apure apacchā ekakkhaṇeyeva. Idha samasīsī kathito. So catubbidho hoti rogasamasīsī, vedanāsamasīsī, iriyāpathasamasīsī, jīvitasamasīsīti. Tattha yassa aññatarena rogena phuṭṭhassa sato rogavūpasamo ca āsavakkhayo ca ekappahāreneva hoti, ayaṃ rogasamasīsī nāma. Yassa pana aññataraṃ vedanaṃ vedayato vedanāvūpasamo ca āsavakkhayo ca ekappahāreneva hoti, ayaṃ vedanāsamasīsī nāma. Yassa pana ṭhānādīsu iriyāpathesu aññatarasamaṅgino vipassantassa iriyāpathassa pariyosānañca āsavakkhayo ca ekappahāreneva hoti, ayaṃ iriyāpathasamasīsī nāma. Yassa pana upakkamato vā sarasato vā jīvitapariyādānañca āsavakkhayo ca ekappahāreneva hoti, ayaṃ jīvitasamasīsī nāma. Ayamidha adhippeto. Tattha kiñcāpi āsavapariyādānaṃ maggacittena, jīvitapariyādānaṃ cuticittena hotīti ubhinnaṃ ekakkhaṇe sambhavo nāma natthi. Yasmā panassa āsavesu khīṇamattesu paccavekkhaṇavārānantarameva jīvitapariyādānaṃ gacchati, antaraṃ na paññāyati, tasmā evaṃ vuttaṃ.
அந்தராபரினிப்³பா³யீதி யோ பஞ்சஸு ஸுத்³தா⁴வாஸேஸு யத்த² கத்த²சி உப்பன்னோ நிப்³ப³த்தக்க²ணே வா தோ²கங் அதிக்கமித்வா வா வேமஜ்ஜே² ட²த்வா வா அரஹத்தங் பாபுணாதி, தஸ்ஸேதங் நாமங். உபஹச்சபரினிப்³பா³யீதி யோ தத்தே²வ ஆயுவேமஜ்ஜ²ங் அதிக்கமித்வா அரஹத்தங் பாபுணாதி. அஸங்கா²ரபரினிப்³பா³யீதி யோ தேஸங்யேவ புக்³க³லானங் அஸங்கா²ரேனேவ அப்பயோகே³ன கிலேஸே கே²பேதி. ஸஸங்கா²ரபரினிப்³பா³யீதி யோ ஸஸங்கா²ரேன ஸப்பயோகே³ன கிலேஸே கே²பேதி. உத்³த⁴ங்ஸோதோ அகனிட்ட²கா³மீதி யோ ஹெட்டா² சதூஸு ஸுத்³தா⁴வாஸேஸு யத்த² கத்த²சி நிப்³ப³த்தித்வா ததோ சுதோ அனுபுப்³பே³ன அகனிட்டே² உப்பஜ்ஜித்வா அரஹத்தங் பாபுணாதி.
Antarāparinibbāyīti yo pañcasu suddhāvāsesu yattha katthaci uppanno nibbattakkhaṇe vā thokaṃ atikkamitvā vā vemajjhe ṭhatvā vā arahattaṃ pāpuṇāti, tassetaṃ nāmaṃ. Upahaccaparinibbāyīti yo tattheva āyuvemajjhaṃ atikkamitvā arahattaṃ pāpuṇāti. Asaṅkhāraparinibbāyīti yo tesaṃyeva puggalānaṃ asaṅkhāreneva appayogena kilese khepeti. Sasaṅkhāraparinibbāyīti yo sasaṅkhārena sappayogena kilese khepeti. Uddhaṃsoto akaniṭṭhagāmīti yo heṭṭhā catūsu suddhāvāsesu yattha katthaci nibbattitvā tato cuto anupubbena akaniṭṭhe uppajjitvā arahattaṃ pāpuṇāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. அனிச்சானுபஸ்ஸீஸுத்தங் • 6. Aniccānupassīsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6-9. அனிச்சானுபஸ்ஸீஸுத்தாதி³வண்ணனா • 6-9. Aniccānupassīsuttādivaṇṇanā
