| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
৬. অনিচ্চানুপস্সীসুত্তৰণ্ণনা
6. Aniccānupassīsuttavaṇṇanā
১৬. ছট্ঠে অনিচ্চাতি এৰং পঞ্ঞায ফরন্তো অনুপস্সতীতি অনিচ্চানুপস্সী। অনিচ্চাতি এৰং সঞ্ঞা অস্সাতি অনিচ্চসঞ্ঞী। অনিচ্চাতি এৰং ঞাণেন পটিসংৰেদিতা অস্সাতি অনিচ্চপটিসংৰেদী। সততন্তি সব্বকালং। সমিতন্তি যথা পুরিমচিত্তেন পচ্ছিমচিত্তং সমিতং সমুপগতং ঘট্টিতং হোতি, এৰং। অব্বোকিণ্ণন্তি নিরন্তরং অঞ্ঞেন চেতসা অসংমিস্সং। চেতসা অধিমুচ্চমানোতি চিত্তেন সন্নিট্ঠাপযমানো। পঞ্ঞায পরিযোগাহমানোতি ৰিপস্সনাঞাণেন অনুপৰিসমানো।
16. Chaṭṭhe aniccāti evaṃ paññāya pharanto anupassatīti aniccānupassī. Aniccāti evaṃ saññā assāti aniccasaññī. Aniccāti evaṃ ñāṇena paṭisaṃveditā assāti aniccapaṭisaṃvedī. Satatanti sabbakālaṃ. Samitanti yathā purimacittena pacchimacittaṃ samitaṃ samupagataṃ ghaṭṭitaṃ hoti, evaṃ. Abbokiṇṇanti nirantaraṃ aññena cetasā asaṃmissaṃ. Cetasā adhimuccamānoti cittena sanniṭṭhāpayamāno. Paññāya pariyogāhamānoti vipassanāñāṇena anupavisamāno.
অপুব্বং অচরিমন্তি অপুরে অপচ্ছা একক্খণেযেৰ। ইধ সমসীসী কথিতো। সো চতুব্বিধো হোতি রোগসমসীসী, ৰেদনাসমসীসী, ইরিযাপথসমসীসী, জীৰিতসমসীসীতি। তত্থ যস্স অঞ্ঞতরেন রোগেন ফুট্ঠস্স সতো রোগৰূপসমো চ আসৰক্খযো চ একপ্পহারেনেৰ হোতি, অযং রোগসমসীসী নাম। যস্স পন অঞ্ঞতরং ৰেদনং ৰেদযতো ৰেদনাৰূপসমো চ আসৰক্খযো চ একপ্পহারেনেৰ হোতি, অযং ৰেদনাসমসীসী নাম। যস্স পন ঠানাদীসু ইরিযাপথেসু অঞ্ঞতরসমঙ্গিনো ৰিপস্সন্তস্স ইরিযাপথস্স পরিযোসানঞ্চ আসৰক্খযো চ একপ্পহারেনেৰ হোতি, অযং ইরিযাপথসমসীসী নাম। যস্স পন উপক্কমতো ৰা সরসতো ৰা জীৰিতপরিযাদানঞ্চ আসৰক্খযো চ একপ্পহারেনেৰ হোতি, অযং জীৰিতসমসীসী নাম। অযমিধ অধিপ্পেতো। তত্থ কিঞ্চাপি আসৰপরিযাদানং মগ্গচিত্তেন, জীৰিতপরিযাদানং চুতিচিত্তেন হোতীতি উভিন্নং একক্খণে সম্ভৰো নাম নত্থি। যস্মা পনস্স আসৰেসু খীণমত্তেসু পচ্চৰেক্খণৰারানন্তরমেৰ জীৰিতপরিযাদানং গচ্ছতি, অন্তরং ন পঞ্ঞাযতি, তস্মা এৰং ৰুত্তং।
Apubbaṃ acarimanti apure apacchā ekakkhaṇeyeva. Idha samasīsī kathito. So catubbidho hoti rogasamasīsī, vedanāsamasīsī, iriyāpathasamasīsī, jīvitasamasīsīti. Tattha yassa aññatarena rogena phuṭṭhassa sato rogavūpasamo ca āsavakkhayo ca ekappahāreneva hoti, ayaṃ rogasamasīsī nāma. Yassa pana aññataraṃ vedanaṃ vedayato vedanāvūpasamo ca āsavakkhayo ca ekappahāreneva hoti, ayaṃ vedanāsamasīsī nāma. Yassa pana ṭhānādīsu iriyāpathesu aññatarasamaṅgino vipassantassa iriyāpathassa pariyosānañca āsavakkhayo ca ekappahāreneva hoti, ayaṃ iriyāpathasamasīsī nāma. Yassa pana upakkamato vā sarasato vā jīvitapariyādānañca āsavakkhayo ca ekappahāreneva hoti, ayaṃ jīvitasamasīsī nāma. Ayamidha adhippeto. Tattha kiñcāpi āsavapariyādānaṃ maggacittena, jīvitapariyādānaṃ cuticittena hotīti ubhinnaṃ ekakkhaṇe sambhavo nāma natthi. Yasmā panassa āsavesu khīṇamattesu paccavekkhaṇavārānantarameva jīvitapariyādānaṃ gacchati, antaraṃ na paññāyati, tasmā evaṃ vuttaṃ.
অন্তরাপরিনিব্বাযীতি যো পঞ্চসু সুদ্ধাৰাসেসু যত্থ কত্থচি উপ্পন্নো নিব্বত্তক্খণে ৰা থোকং অতিক্কমিত্ৰা ৰা ৰেমজ্ঝে ঠত্ৰা ৰা অরহত্তং পাপুণাতি, তস্সেতং নামং। উপহচ্চপরিনিব্বাযীতি যো তত্থেৰ আযুৰেমজ্ঝং অতিক্কমিত্ৰা অরহত্তং পাপুণাতি। অসঙ্খারপরিনিব্বাযীতি যো তেসংযেৰ পুগ্গলানং অসঙ্খারেনেৰ অপ্পযোগেন কিলেসে খেপেতি। সসঙ্খারপরিনিব্বাযীতি যো সসঙ্খারেন সপ্পযোগেন কিলেসে খেপেতি। উদ্ধংসোতো অকনিট্ঠগামীতি যো হেট্ঠা চতূসু সুদ্ধাৰাসেসু যত্থ কত্থচি নিব্বত্তিত্ৰা ততো চুতো অনুপুব্বেন অকনিট্ঠে উপ্পজ্জিত্ৰা অরহত্তং পাপুণাতি।
Antarāparinibbāyīti yo pañcasu suddhāvāsesu yattha katthaci uppanno nibbattakkhaṇe vā thokaṃ atikkamitvā vā vemajjhe ṭhatvā vā arahattaṃ pāpuṇāti, tassetaṃ nāmaṃ. Upahaccaparinibbāyīti yo tattheva āyuvemajjhaṃ atikkamitvā arahattaṃ pāpuṇāti. Asaṅkhāraparinibbāyīti yo tesaṃyeva puggalānaṃ asaṅkhāreneva appayogena kilese khepeti. Sasaṅkhāraparinibbāyīti yo sasaṅkhārena sappayogena kilese khepeti. Uddhaṃsoto akaniṭṭhagāmīti yo heṭṭhā catūsu suddhāvāsesu yattha katthaci nibbattitvā tato cuto anupubbena akaniṭṭhe uppajjitvā arahattaṃ pāpuṇāti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৬. অনিচ্চানুপস্সীসুত্তং • 6. Aniccānupassīsuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৬-৯. অনিচ্চানুপস্সীসুত্তাদিৰণ্ণনা • 6-9. Aniccānupassīsuttādivaṇṇanā
