| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೬. ಅನಿಚ್ಚಾನುಪಸ್ಸೀಸುತ್ತವಣ್ಣನಾ
6. Aniccānupassīsuttavaṇṇanā
೧೬. ಛಟ್ಠೇ ಅನಿಚ್ಚಾತಿ ಏವಂ ಪಞ್ಞಾಯ ಫರನ್ತೋ ಅನುಪಸ್ಸತೀತಿ ಅನಿಚ್ಚಾನುಪಸ್ಸೀ। ಅನಿಚ್ಚಾತಿ ಏವಂ ಸಞ್ಞಾ ಅಸ್ಸಾತಿ ಅನಿಚ್ಚಸಞ್ಞೀ। ಅನಿಚ್ಚಾತಿ ಏವಂ ಞಾಣೇನ ಪಟಿಸಂವೇದಿತಾ ಅಸ್ಸಾತಿ ಅನಿಚ್ಚಪಟಿಸಂವೇದೀ। ಸತತನ್ತಿ ಸಬ್ಬಕಾಲಂ। ಸಮಿತನ್ತಿ ಯಥಾ ಪುರಿಮಚಿತ್ತೇನ ಪಚ್ಛಿಮಚಿತ್ತಂ ಸಮಿತಂ ಸಮುಪಗತಂ ಘಟ್ಟಿತಂ ಹೋತಿ, ಏವಂ। ಅಬ್ಬೋಕಿಣ್ಣನ್ತಿ ನಿರನ್ತರಂ ಅಞ್ಞೇನ ಚೇತಸಾ ಅಸಂಮಿಸ್ಸಂ। ಚೇತಸಾ ಅಧಿಮುಚ್ಚಮಾನೋತಿ ಚಿತ್ತೇನ ಸನ್ನಿಟ್ಠಾಪಯಮಾನೋ। ಪಞ್ಞಾಯ ಪರಿಯೋಗಾಹಮಾನೋತಿ ವಿಪಸ್ಸನಾಞಾಣೇನ ಅನುಪವಿಸಮಾನೋ।
16. Chaṭṭhe aniccāti evaṃ paññāya pharanto anupassatīti aniccānupassī. Aniccāti evaṃ saññā assāti aniccasaññī. Aniccāti evaṃ ñāṇena paṭisaṃveditā assāti aniccapaṭisaṃvedī. Satatanti sabbakālaṃ. Samitanti yathā purimacittena pacchimacittaṃ samitaṃ samupagataṃ ghaṭṭitaṃ hoti, evaṃ. Abbokiṇṇanti nirantaraṃ aññena cetasā asaṃmissaṃ. Cetasā adhimuccamānoti cittena sanniṭṭhāpayamāno. Paññāya pariyogāhamānoti vipassanāñāṇena anupavisamāno.
ಅಪುಬ್ಬಂ ಅಚರಿಮನ್ತಿ ಅಪುರೇ ಅಪಚ್ಛಾ ಏಕಕ್ಖಣೇಯೇವ। ಇಧ ಸಮಸೀಸೀ ಕಥಿತೋ। ಸೋ ಚತುಬ್ಬಿಧೋ ಹೋತಿ ರೋಗಸಮಸೀಸೀ, ವೇದನಾಸಮಸೀಸೀ, ಇರಿಯಾಪಥಸಮಸೀಸೀ, ಜೀವಿತಸಮಸೀಸೀತಿ। ತತ್ಥ ಯಸ್ಸ ಅಞ್ಞತರೇನ ರೋಗೇನ ಫುಟ್ಠಸ್ಸ ಸತೋ ರೋಗವೂಪಸಮೋ ಚ ಆಸವಕ್ಖಯೋ ಚ ಏಕಪ್ಪಹಾರೇನೇವ ಹೋತಿ, ಅಯಂ ರೋಗಸಮಸೀಸೀ ನಾಮ। ಯಸ್ಸ ಪನ ಅಞ್ಞತರಂ ವೇದನಂ ವೇದಯತೋ ವೇದನಾವೂಪಸಮೋ ಚ ಆಸವಕ್ಖಯೋ ಚ ಏಕಪ್ಪಹಾರೇನೇವ ಹೋತಿ, ಅಯಂ ವೇದನಾಸಮಸೀಸೀ ನಾಮ। ಯಸ್ಸ ಪನ ಠಾನಾದೀಸು ಇರಿಯಾಪಥೇಸು ಅಞ್ಞತರಸಮಙ್ಗಿನೋ ವಿಪಸ್ಸನ್ತಸ್ಸ ಇರಿಯಾಪಥಸ್ಸ ಪರಿಯೋಸಾನಞ್ಚ ಆಸವಕ್ಖಯೋ ಚ ಏಕಪ್ಪಹಾರೇನೇವ ಹೋತಿ, ಅಯಂ ಇರಿಯಾಪಥಸಮಸೀಸೀ ನಾಮ। ಯಸ್ಸ ಪನ ಉಪಕ್ಕಮತೋ ವಾ ಸರಸತೋ ವಾ ಜೀವಿತಪರಿಯಾದಾನಞ್ಚ ಆಸವಕ್ಖಯೋ ಚ ಏಕಪ್ಪಹಾರೇನೇವ ಹೋತಿ, ಅಯಂ ಜೀವಿತಸಮಸೀಸೀ ನಾಮ। ಅಯಮಿಧ ಅಧಿಪ್ಪೇತೋ। ತತ್ಥ ಕಿಞ್ಚಾಪಿ ಆಸವಪರಿಯಾದಾನಂ ಮಗ್ಗಚಿತ್ತೇನ, ಜೀವಿತಪರಿಯಾದಾನಂ ಚುತಿಚಿತ್ತೇನ ಹೋತೀತಿ ಉಭಿನ್ನಂ ಏಕಕ್ಖಣೇ ಸಮ್ಭವೋ ನಾಮ ನತ್ಥಿ। ಯಸ್ಮಾ ಪನಸ್ಸ ಆಸವೇಸು ಖೀಣಮತ್ತೇಸು ಪಚ್ಚವೇಕ್ಖಣವಾರಾನನ್ತರಮೇವ ಜೀವಿತಪರಿಯಾದಾನಂ ಗಚ್ಛತಿ, ಅನ್ತರಂ ನ ಪಞ್ಞಾಯತಿ, ತಸ್ಮಾ ಏವಂ ವುತ್ತಂ।
Apubbaṃ acarimanti apure apacchā ekakkhaṇeyeva. Idha samasīsī kathito. So catubbidho hoti rogasamasīsī, vedanāsamasīsī, iriyāpathasamasīsī, jīvitasamasīsīti. Tattha yassa aññatarena rogena phuṭṭhassa sato rogavūpasamo ca āsavakkhayo ca ekappahāreneva hoti, ayaṃ rogasamasīsī nāma. Yassa pana aññataraṃ vedanaṃ vedayato vedanāvūpasamo ca āsavakkhayo ca ekappahāreneva hoti, ayaṃ vedanāsamasīsī nāma. Yassa pana ṭhānādīsu iriyāpathesu aññatarasamaṅgino vipassantassa iriyāpathassa pariyosānañca āsavakkhayo ca ekappahāreneva hoti, ayaṃ iriyāpathasamasīsī nāma. Yassa pana upakkamato vā sarasato vā jīvitapariyādānañca āsavakkhayo ca ekappahāreneva hoti, ayaṃ jīvitasamasīsī nāma. Ayamidha adhippeto. Tattha kiñcāpi āsavapariyādānaṃ maggacittena, jīvitapariyādānaṃ cuticittena hotīti ubhinnaṃ ekakkhaṇe sambhavo nāma natthi. Yasmā panassa āsavesu khīṇamattesu paccavekkhaṇavārānantarameva jīvitapariyādānaṃ gacchati, antaraṃ na paññāyati, tasmā evaṃ vuttaṃ.
ಅನ್ತರಾಪರಿನಿಬ್ಬಾಯೀತಿ ಯೋ ಪಞ್ಚಸು ಸುದ್ಧಾವಾಸೇಸು ಯತ್ಥ ಕತ್ಥಚಿ ಉಪ್ಪನ್ನೋ ನಿಬ್ಬತ್ತಕ್ಖಣೇ ವಾ ಥೋಕಂ ಅತಿಕ್ಕಮಿತ್ವಾ ವಾ ವೇಮಜ್ಝೇ ಠತ್ವಾ ವಾ ಅರಹತ್ತಂ ಪಾಪುಣಾತಿ, ತಸ್ಸೇತಂ ನಾಮಂ। ಉಪಹಚ್ಚಪರಿನಿಬ್ಬಾಯೀತಿ ಯೋ ತತ್ಥೇವ ಆಯುವೇಮಜ್ಝಂ ಅತಿಕ್ಕಮಿತ್ವಾ ಅರಹತ್ತಂ ಪಾಪುಣಾತಿ। ಅಸಙ್ಖಾರಪರಿನಿಬ್ಬಾಯೀತಿ ಯೋ ತೇಸಂಯೇವ ಪುಗ್ಗಲಾನಂ ಅಸಙ್ಖಾರೇನೇವ ಅಪ್ಪಯೋಗೇನ ಕಿಲೇಸೇ ಖೇಪೇತಿ। ಸಸಙ್ಖಾರಪರಿನಿಬ್ಬಾಯೀತಿ ಯೋ ಸಸಙ್ಖಾರೇನ ಸಪ್ಪಯೋಗೇನ ಕಿಲೇಸೇ ಖೇಪೇತಿ। ಉದ್ಧಂಸೋತೋ ಅಕನಿಟ್ಠಗಾಮೀತಿ ಯೋ ಹೇಟ್ಠಾ ಚತೂಸು ಸುದ್ಧಾವಾಸೇಸು ಯತ್ಥ ಕತ್ಥಚಿ ನಿಬ್ಬತ್ತಿತ್ವಾ ತತೋ ಚುತೋ ಅನುಪುಬ್ಬೇನ ಅಕನಿಟ್ಠೇ ಉಪ್ಪಜ್ಜಿತ್ವಾ ಅರಹತ್ತಂ ಪಾಪುಣಾತಿ।
Antarāparinibbāyīti yo pañcasu suddhāvāsesu yattha katthaci uppanno nibbattakkhaṇe vā thokaṃ atikkamitvā vā vemajjhe ṭhatvā vā arahattaṃ pāpuṇāti, tassetaṃ nāmaṃ. Upahaccaparinibbāyīti yo tattheva āyuvemajjhaṃ atikkamitvā arahattaṃ pāpuṇāti. Asaṅkhāraparinibbāyīti yo tesaṃyeva puggalānaṃ asaṅkhāreneva appayogena kilese khepeti. Sasaṅkhāraparinibbāyīti yo sasaṅkhārena sappayogena kilese khepeti. Uddhaṃsoto akaniṭṭhagāmīti yo heṭṭhā catūsu suddhāvāsesu yattha katthaci nibbattitvā tato cuto anupubbena akaniṭṭhe uppajjitvā arahattaṃ pāpuṇāti.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೬. ಅನಿಚ್ಚಾನುಪಸ್ಸೀಸುತ್ತಂ • 6. Aniccānupassīsuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೬-೯. ಅನಿಚ್ಚಾನುಪಸ್ಸೀಸುತ್ತಾದಿವಣ್ಣನಾ • 6-9. Aniccānupassīsuttādivaṇṇanā
