| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
6. අනිච්‌චානුපස්‌සීසුත්‌තවණ්‌ණනා
6. Aniccānupassīsuttavaṇṇanā
16. ඡට්‌ඨෙ අනිච්‌චාති එවං පඤ්‌ඤාය ඵරන්‌තො අනුපස්‌සතීති අනිච්‌චානුපස්‌සී. අනිච්‌චාති එවං සඤ්‌ඤා අස්‌සාති අනිච්‌චසඤ්‌ඤී. අනිච්‌චාති එවං ඤාණෙන පටිසංවෙදිතා අස්‌සාති අනිච්‌චපටිසංවෙදී. සතතන්‌ති සබ්‌බකාලං. සමිතන්‌ති යථා පුරිමචිත්‌තෙන පච්‌ඡිමචිත්‌තං සමිතං සමුපගතං ඝට්‌ටිතං හොති, එවං. අබ්‌බොකිණ්‌ණන්‌ති නිරන්‌තරං අඤ්‌ඤෙන චෙතසා අසංමිස්‌සං. චෙතසා අධිමුච්‌චමානොති චිත්‌තෙන සන්‌නිට්‌ඨාපයමානො. පඤ්‌ඤාය පරියොගාහමානොති විපස්‌සනාඤාණෙන අනුපවිසමානො.
16. Chaṭṭhe aniccāti evaṃ paññāya pharanto anupassatīti aniccānupassī. Aniccāti evaṃ saññā assāti aniccasaññī. Aniccāti evaṃ ñāṇena paṭisaṃveditā assāti aniccapaṭisaṃvedī. Satatanti sabbakālaṃ. Samitanti yathā purimacittena pacchimacittaṃ samitaṃ samupagataṃ ghaṭṭitaṃ hoti, evaṃ. Abbokiṇṇanti nirantaraṃ aññena cetasā asaṃmissaṃ. Cetasā adhimuccamānoti cittena sanniṭṭhāpayamāno. Paññāya pariyogāhamānoti vipassanāñāṇena anupavisamāno.
අපුබ්‌බං අචරිමන්‌ති අපුරෙ අපච්‌ඡා එකක්‌ඛණෙයෙව. ඉධ සමසීසී කථිතො. සො චතුබ්‌බිධො හොති රොගසමසීසී, වෙදනාසමසීසී, ඉරියාපථසමසීසී, ජීවිතසමසීසීති. තත්‌ථ යස්‌ස අඤ්‌ඤතරෙන රොගෙන ඵුට්‌ඨස්‌ස සතො රොගවූපසමො ච ආසවක්‌ඛයො ච එකප්‌පහාරෙනෙව හොති, අයං රොගසමසීසී නාම. යස්‌ස පන අඤ්‌ඤතරං වෙදනං වෙදයතො වෙදනාවූපසමො ච ආසවක්‌ඛයො ච එකප්‌පහාරෙනෙව හොති, අයං වෙදනාසමසීසී නාම. යස්‌ස පන ඨානාදීසු ඉරියාපථෙසු අඤ්‌ඤතරසමඞ්‌ගිනො විපස්‌සන්‌තස්‌ස ඉරියාපථස්‌ස පරියොසානඤ්‌ච ආසවක්‌ඛයො ච එකප්‌පහාරෙනෙව හොති, අයං ඉරියාපථසමසීසී නාම. යස්‌ස පන උපක්‌කමතො වා සරසතො වා ජීවිතපරියාදානඤ්‌ච ආසවක්‌ඛයො ච එකප්‌පහාරෙනෙව හොති, අයං ජීවිතසමසීසී නාම. අයමිධ අධිප්‌පෙතො. තත්‌ථ කිඤ්‌චාපි ආසවපරියාදානං මග්‌ගචිත්‌තෙන, ජීවිතපරියාදානං චුතිචිත්‌තෙන හොතීති උභින්‌නං එකක්‌ඛණෙ සම්‌භවො නාම නත්‌ථි. යස්‌මා පනස්‌ස ආසවෙසු ඛීණමත්‌තෙසු පච්‌චවෙක්‌ඛණවාරානන්‌තරමෙව ජීවිතපරියාදානං ගච්‌ඡති, අන්‌තරං න පඤ්‌ඤායති, තස්‌මා එවං වුත්‌තං.
Apubbaṃ acarimanti apure apacchā ekakkhaṇeyeva. Idha samasīsī kathito. So catubbidho hoti rogasamasīsī, vedanāsamasīsī, iriyāpathasamasīsī, jīvitasamasīsīti. Tattha yassa aññatarena rogena phuṭṭhassa sato rogavūpasamo ca āsavakkhayo ca ekappahāreneva hoti, ayaṃ rogasamasīsī nāma. Yassa pana aññataraṃ vedanaṃ vedayato vedanāvūpasamo ca āsavakkhayo ca ekappahāreneva hoti, ayaṃ vedanāsamasīsī nāma. Yassa pana ṭhānādīsu iriyāpathesu aññatarasamaṅgino vipassantassa iriyāpathassa pariyosānañca āsavakkhayo ca ekappahāreneva hoti, ayaṃ iriyāpathasamasīsī nāma. Yassa pana upakkamato vā sarasato vā jīvitapariyādānañca āsavakkhayo ca ekappahāreneva hoti, ayaṃ jīvitasamasīsī nāma. Ayamidha adhippeto. Tattha kiñcāpi āsavapariyādānaṃ maggacittena, jīvitapariyādānaṃ cuticittena hotīti ubhinnaṃ ekakkhaṇe sambhavo nāma natthi. Yasmā panassa āsavesu khīṇamattesu paccavekkhaṇavārānantarameva jīvitapariyādānaṃ gacchati, antaraṃ na paññāyati, tasmā evaṃ vuttaṃ.
අන්‌තරාපරිනිබ්‌බායීති යො පඤ්‌චසු සුද්‌ධාවාසෙසු යත්‌ථ කත්‌ථචි උප්‌පන්‌නො නිබ්‌බත්‌තක්‌ඛණෙ වා ථොකං අතික්‌කමිත්‌වා වා වෙමජ්‌ඣෙ ඨත්‌වා වා අරහත්‌තං පාපුණාති, තස්‌සෙතං නාමං. උපහච්‌චපරිනිබ්‌බායීති යො තත්‌ථෙව ආයුවෙමජ්‌ඣං අතික්‌කමිත්‌වා අරහත්‌තං පාපුණාති. අසඞ්‌ඛාරපරිනිබ්‌බායීති යො තෙසංයෙව පුග්‌ගලානං අසඞ්‌ඛාරෙනෙව අප්‌පයොගෙන කිලෙසෙ ඛෙපෙති. සසඞ්‌ඛාරපරිනිබ්‌බායීති යො සසඞ්‌ඛාරෙන සප්‌පයොගෙන කිලෙසෙ ඛෙපෙති. උද්‌ධංසොතො අකනිට්‌ඨගාමීති යො හෙට්‌ඨා චතූසු සුද්‌ධාවාසෙසු යත්‌ථ කත්‌ථචි නිබ්‌බත්‌තිත්‌වා තතො චුතො අනුපුබ්‌බෙන අකනිට්‌ඨෙ උප්‌පජ්‌ජිත්‌වා අරහත්‌තං පාපුණාති.
Antarāparinibbāyīti yo pañcasu suddhāvāsesu yattha katthaci uppanno nibbattakkhaṇe vā thokaṃ atikkamitvā vā vemajjhe ṭhatvā vā arahattaṃ pāpuṇāti, tassetaṃ nāmaṃ. Upahaccaparinibbāyīti yo tattheva āyuvemajjhaṃ atikkamitvā arahattaṃ pāpuṇāti. Asaṅkhāraparinibbāyīti yo tesaṃyeva puggalānaṃ asaṅkhāreneva appayogena kilese khepeti. Sasaṅkhāraparinibbāyīti yo sasaṅkhārena sappayogena kilese khepeti. Uddhaṃsoto akaniṭṭhagāmīti yo heṭṭhā catūsu suddhāvāsesu yattha katthaci nibbattitvā tato cuto anupubbena akaniṭṭhe uppajjitvā arahattaṃ pāpuṇāti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 6. අනිච්‌චානුපස්‌සීසුත්‌තං • 6. Aniccānupassīsuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 6-9. අනිච්‌චානුපස්‌සීසුත්‌තාදිවණ්‌ණනා • 6-9. Aniccānupassīsuttādivaṇṇanā
