| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
10. அனிச்சஸஞ்ஞாஸுத்தவண்ணனா
10. Aniccasaññāsuttavaṇṇanā
102. த³ஸமே அனிச்சஸஞ்ஞாதி அனிச்சங் அனிச்சந்தி பா⁴வெந்தஸ்ஸ உப்பன்னஸஞ்ஞா. பரியாதி³யதீதி கே²பயதி. ஸப்³ப³ங் அஸ்மிமானந்தி நவவித⁴ங் அஸ்மிமானங். மூலஸந்தானகானீதி ஸந்தானெத்வா டி²தமூலானி. மஹானங்க³லங் விய ஹி அனிச்சஸஞ்ஞா, கு²த்³தா³னுகு²த்³த³கானி மூலஸந்தானகானி விய கிலேஸா, யதா² கஸ்ஸகோ கஸந்தோ நங்க³லேன தானி பதா³லேதி, ஏவங் யோகீ³ அனிச்சஸஞ்ஞங் பா⁴வெந்தோ அனிச்சஸஞ்ஞாஞாணேன கிலேஸே பதா³லேதீதி இத³மெத்த² ஓபம்மஸங்ஸந்த³னங்.
102. Dasame aniccasaññāti aniccaṃ aniccanti bhāventassa uppannasaññā. Pariyādiyatīti khepayati. Sabbaṃ asmimānanti navavidhaṃ asmimānaṃ. Mūlasantānakānīti santānetvā ṭhitamūlāni. Mahānaṅgalaṃ viya hi aniccasaññā, khuddānukhuddakāni mūlasantānakāni viya kilesā, yathā kassako kasanto naṅgalena tāni padāleti, evaṃ yogī aniccasaññaṃ bhāvento aniccasaññāñāṇena kilese padāletīti idamettha opammasaṃsandanaṃ.
ஓது⁴னாதீதி ஹெட்டா² து⁴னாதி. நித்³து⁴னாதீதி பப்போ²டேதி. நிச்சோ²டேதீதி பப்போ²டெத்வா ச²ட்³டே³தி. இதா⁴பி பப்³ப³ஜானி விய கிலேஸா, லாயனங் நிச்சோ²டனங் விய அனிச்சஸஞ்ஞாஞாணந்தி இமினா அத்தே²ன உபமா ஸங்ஸந்தே³தப்³பா³.
Odhunātīti heṭṭhā dhunāti. Niddhunātīti papphoṭeti. Nicchoṭetīti papphoṭetvā chaḍḍeti. Idhāpi pabbajāni viya kilesā, lāyanaṃ nicchoṭanaṃ viya aniccasaññāñāṇanti iminā atthena upamā saṃsandetabbā.
வண்டச்சி²ன்னாயாதி திண்ஹேன கு²ரப்பேன வண்டச்சி²ன்னாய. தத³ன்வயானி ப⁴வந்தீதி தங் அம்ப³பிண்டி³ங் அனுக³ச்ச²ந்தி, தஸ்ஸா பதமானாய அம்பா³னி பூ⁴மியங் பதந்தி. இதா⁴பி அம்ப³பிண்டி³ விய கிலேஸா, திண்ஹகு²ரப்போ விய அனிச்சஸஞ்ஞா, யதா² கு²ரப்பேன சி²ன்னாய அம்ப³பிண்டி³யா ஸப்³பா³னி அம்பா³னி பூ⁴மியங் பதந்தி, ஏவங் அனிச்சஸஞ்ஞாஞாணேன கிலேஸானங் மூலபூ⁴தாய அவிஜ்ஜாய சி²ன்னாய ஸப்³ப³கிலேஸா ஸமுக்³கா⁴தங் க³ச்ச²ந்தீதி, இத³ங் ஓபம்மஸங்ஸந்த³னங்.
Vaṇṭacchinnāyāti tiṇhena khurappena vaṇṭacchinnāya. Tadanvayāni bhavantīti taṃ ambapiṇḍiṃ anugacchanti, tassā patamānāya ambāni bhūmiyaṃ patanti. Idhāpi ambapiṇḍi viya kilesā, tiṇhakhurappo viya aniccasaññā, yathā khurappena chinnāya ambapiṇḍiyā sabbāni ambāni bhūmiyaṃ patanti, evaṃ aniccasaññāñāṇena kilesānaṃ mūlabhūtāya avijjāya chinnāya sabbakilesā samugghātaṃ gacchantīti, idaṃ opammasaṃsandanaṃ.
கூடங்க³மாதி கூடங் க³ச்ச²ந்தி. கூடனின்னாதி கூடங் பவிஸனபா⁴வேன கூடே நின்னா. கூடஸமோஸரணாதி கூடே ஸமோஸரித்வா டி²தா. இதா⁴பி கூடங் விய அனிச்சஸஞ்ஞா, கோ³பானஸியோ விய சதுபூ⁴மககுஸலத⁴ம்மா, யதா² ஸப்³ப³கோ³பானஸீனங் கூடங் அக்³க³ங், ஏவங் குஸலத⁴ம்மானங் அனிச்சஸஞ்ஞா அக்³கா³. நனு ச அனிச்சஸஞ்ஞா லோகியா, ஸா லோகியகுஸலானங் தாவ அக்³க³ங் ஹோது, லோகுத்தரானங் கத²ங் அக்³க³ந்தி? தேஸம்பி படிலாப⁴கரணத்தே²ன அக்³க³ந்தி வேதி³தப்³பா³. இமினா உபாயேன ஸப்³பா³ஸு உபமாஸு ஓபம்மஸங்ஸந்த³னங் வேதி³தப்³ப³ங். புரிமாஹி பனெத்த² தீஹி அனிச்சஸஞ்ஞாய கிச்சங், பச்சி²மாஹி ப³லந்தி. த³ஸமங்.
Kūṭaṅgamāti kūṭaṃ gacchanti. Kūṭaninnāti kūṭaṃ pavisanabhāvena kūṭe ninnā. Kūṭasamosaraṇāti kūṭe samosaritvā ṭhitā. Idhāpi kūṭaṃ viya aniccasaññā, gopānasiyo viya catubhūmakakusaladhammā, yathā sabbagopānasīnaṃ kūṭaṃ aggaṃ, evaṃ kusaladhammānaṃ aniccasaññā aggā. Nanu ca aniccasaññā lokiyā, sā lokiyakusalānaṃ tāva aggaṃ hotu, lokuttarānaṃ kathaṃ agganti? Tesampi paṭilābhakaraṇatthena agganti veditabbā. Iminā upāyena sabbāsu upamāsu opammasaṃsandanaṃ veditabbaṃ. Purimāhi panettha tīhi aniccasaññāya kiccaṃ, pacchimāhi balanti. Dasamaṃ.
புப்ப²வக்³கோ³ த³ஸமோ.
Pupphavaggo dasamo.
மஜ்ஜி²மபண்ணாஸகோ ஸமத்தோ.
Majjhimapaṇṇāsako samatto.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. அனிச்சஸஞ்ஞாஸுத்தங் • 10. Aniccasaññāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. அனிச்சஸஞ்ஞாஸுத்தவண்ணனா • 10. Aniccasaññāsuttavaṇṇanā
