| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
১০. অনিচ্চসঞ্ঞাসুত্তৰণ্ণনা
10. Aniccasaññāsuttavaṇṇanā
১০২. দসমে অনিচ্চসঞ্ঞাতি অনিচ্চং অনিচ্চন্তি ভাৰেন্তস্স উপ্পন্নসঞ্ঞা। পরিযাদিযতীতি খেপযতি। সব্বং অস্মিমানন্তি নৰৰিধং অস্মিমানং। মূলসন্তানকানীতি সন্তানেত্ৰা ঠিতমূলানি। মহানঙ্গলং ৰিয হি অনিচ্চসঞ্ঞা, খুদ্দানুখুদ্দকানি মূলসন্তানকানি ৰিয কিলেসা, যথা কস্সকো কসন্তো নঙ্গলেন তানি পদালেতি, এৰং যোগী অনিচ্চসঞ্ঞং ভাৰেন্তো অনিচ্চসঞ্ঞাঞাণেন কিলেসে পদালেতীতি ইদমেত্থ ওপম্মসংসন্দনং।
102. Dasame aniccasaññāti aniccaṃ aniccanti bhāventassa uppannasaññā. Pariyādiyatīti khepayati. Sabbaṃ asmimānanti navavidhaṃ asmimānaṃ. Mūlasantānakānīti santānetvā ṭhitamūlāni. Mahānaṅgalaṃ viya hi aniccasaññā, khuddānukhuddakāni mūlasantānakāni viya kilesā, yathā kassako kasanto naṅgalena tāni padāleti, evaṃ yogī aniccasaññaṃ bhāvento aniccasaññāñāṇena kilese padāletīti idamettha opammasaṃsandanaṃ.
ওধুনাতীতি হেট্ঠা ধুনাতি। নিদ্ধুনাতীতি পপ্ফোটেতি। নিচ্ছোটেতীতি পপ্ফোটেত্ৰা ছড্ডেতি। ইধাপি পব্বজানি ৰিয কিলেসা, লাযনং নিচ্ছোটনং ৰিয অনিচ্চসঞ্ঞাঞাণন্তি ইমিনা অত্থেন উপমা সংসন্দেতব্বা।
Odhunātīti heṭṭhā dhunāti. Niddhunātīti papphoṭeti. Nicchoṭetīti papphoṭetvā chaḍḍeti. Idhāpi pabbajāni viya kilesā, lāyanaṃ nicchoṭanaṃ viya aniccasaññāñāṇanti iminā atthena upamā saṃsandetabbā.
ৰণ্টচ্ছিন্নাযাতি তিণ্হেন খুরপ্পেন ৰণ্টচ্ছিন্নায। তদন্ৰযানি ভৰন্তীতি তং অম্বপিণ্ডিং অনুগচ্ছন্তি, তস্সা পতমানায অম্বানি ভূমিযং পতন্তি। ইধাপি অম্বপিণ্ডি ৰিয কিলেসা, তিণ্হখুরপ্পো ৰিয অনিচ্চসঞ্ঞা, যথা খুরপ্পেন ছিন্নায অম্বপিণ্ডিযা সব্বানি অম্বানি ভূমিযং পতন্তি, এৰং অনিচ্চসঞ্ঞাঞাণেন কিলেসানং মূলভূতায অৰিজ্জায ছিন্নায সব্বকিলেসা সমুগ্ঘাতং গচ্ছন্তীতি, ইদং ওপম্মসংসন্দনং।
Vaṇṭacchinnāyāti tiṇhena khurappena vaṇṭacchinnāya. Tadanvayāni bhavantīti taṃ ambapiṇḍiṃ anugacchanti, tassā patamānāya ambāni bhūmiyaṃ patanti. Idhāpi ambapiṇḍi viya kilesā, tiṇhakhurappo viya aniccasaññā, yathā khurappena chinnāya ambapiṇḍiyā sabbāni ambāni bhūmiyaṃ patanti, evaṃ aniccasaññāñāṇena kilesānaṃ mūlabhūtāya avijjāya chinnāya sabbakilesā samugghātaṃ gacchantīti, idaṃ opammasaṃsandanaṃ.
কূটঙ্গমাতি কূটং গচ্ছন্তি। কূটনিন্নাতি কূটং পৰিসনভাৰেন কূটে নিন্না। কূটসমোসরণাতি কূটে সমোসরিত্ৰা ঠিতা। ইধাপি কূটং ৰিয অনিচ্চসঞ্ঞা, গোপানসিযো ৰিয চতুভূমককুসলধম্মা, যথা সব্বগোপানসীনং কূটং অগ্গং, এৰং কুসলধম্মানং অনিচ্চসঞ্ঞা অগ্গা। ননু চ অনিচ্চসঞ্ঞা লোকিযা, সা লোকিযকুসলানং তাৰ অগ্গং হোতু, লোকুত্তরানং কথং অগ্গন্তি? তেসম্পি পটিলাভকরণত্থেন অগ্গন্তি ৰেদিতব্বা। ইমিনা উপাযেন সব্বাসু উপমাসু ওপম্মসংসন্দনং ৰেদিতব্বং। পুরিমাহি পনেত্থ তীহি অনিচ্চসঞ্ঞায কিচ্চং, পচ্ছিমাহি বলন্তি। দসমং।
Kūṭaṅgamāti kūṭaṃ gacchanti. Kūṭaninnāti kūṭaṃ pavisanabhāvena kūṭe ninnā. Kūṭasamosaraṇāti kūṭe samosaritvā ṭhitā. Idhāpi kūṭaṃ viya aniccasaññā, gopānasiyo viya catubhūmakakusaladhammā, yathā sabbagopānasīnaṃ kūṭaṃ aggaṃ, evaṃ kusaladhammānaṃ aniccasaññā aggā. Nanu ca aniccasaññā lokiyā, sā lokiyakusalānaṃ tāva aggaṃ hotu, lokuttarānaṃ kathaṃ agganti? Tesampi paṭilābhakaraṇatthena agganti veditabbā. Iminā upāyena sabbāsu upamāsu opammasaṃsandanaṃ veditabbaṃ. Purimāhi panettha tīhi aniccasaññāya kiccaṃ, pacchimāhi balanti. Dasamaṃ.
পুপ্ফৰগ্গো দসমো।
Pupphavaggo dasamo.
মজ্ঝিমপণ্ণাসকো সমত্তো।
Majjhimapaṇṇāsako samatto.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১০. অনিচ্চসঞ্ঞাসুত্তং • 10. Aniccasaññāsuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১০. অনিচ্চসঞ্ঞাসুত্তৰণ্ণনা • 10. Aniccasaññāsuttavaṇṇanā
