| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
১০. অনিচ্চসঞ্ঞাসুত্তৰণ্ণনা
10. Aniccasaññāsuttavaṇṇanā
১০২. ভাৰেন্তস্সাতি ৰিপস্সনায মগ্গং ভাৰেন্তস্স উপ্পন্নসঞ্ঞা। তেনাহ – ‘‘সব্বং কামরাগং পরিযাদিযতী’’তিআদি। সন্তানেত্ৰাতি কসনট্ঠানং সব্বসো ৰিতনেত্ৰা পত্থরিত্ৰা। কিলেসাতি উপক্কিলেসপ্পভেদা কিলেসা। অনিচ্চসঞ্ঞাঞাণেনাতি অনিচ্চসঞ্ঞাসহগতেন ঞাণেন।
102.Bhāventassāti vipassanāya maggaṃ bhāventassa uppannasaññā. Tenāha – ‘‘sabbaṃ kāmarāgaṃ pariyādiyatī’’tiādi. Santānetvāti kasanaṭṭhānaṃ sabbaso vitanetvā pattharitvā. Kilesāti upakkilesappabhedā kilesā. Aniccasaññāñāṇenāti aniccasaññāsahagatena ñāṇena.
লাযনন্তি লাযনং ৰিয নযনং ৰিয নিচ্ছোটনং ৰিয চ অনিচ্চসঞ্ঞাঞাণং। ইমিনা অত্থেনাতি ইমিনা যথাৰুত্তেন পাল়িযা অত্থেন, উপমা সংসন্দেতব্বাতি এত্থ পব্বজলাযকো ৰিয যোগাৰচরো। লাযনাদিনা তস্স তত্থ কতকিচ্চতায পরিতুট্ঠি ৰিয ইমস্স কিলেসে সব্বসো ছিন্দিত্ৰা ফলসমাপত্তিসুখেন কালস্স ৰীতিনামনা।
Lāyananti lāyanaṃ viya nayanaṃ viya nicchoṭanaṃ viya ca aniccasaññāñāṇaṃ. Iminā atthenāti iminā yathāvuttena pāḷiyā atthena, upamā saṃsandetabbāti ettha pabbajalāyako viya yogāvacaro. Lāyanādinā tassa tattha katakiccatāya parituṭṭhi viya imassa kilese sabbaso chinditvā phalasamāpattisukhena kālassa vītināmanā.
কূটং গচ্ছন্তীতি পারিমন্তেন কূটং গচ্ছন্তি। কূটং পৰিসনভাৰেনাতি কূটচ্ছিদ্দং অগ্গেন পৰিসনৰসেন। সমোসরিত্ৰাতি ছিদ্দে অনুপৰিসনৰসেন চ আহচ্চ অৰট্ঠানেন চ সমোসরিত্ৰা ঠিতা। কূটং ৰিয অনিচ্চসঞ্ঞা অনিচ্চানুপস্সনাৰসেন অৰট্ঠানস্স মূলভাৰতো। গোপানসিযো ৰিয চতুভূমককুসলা ধম্মা অনিচ্চসঞ্ঞামূলকত্তা। কূটং অগ্গং সব্বগোপানসীনং তথাঅধিট্ঠানস্স পধানকারণত্তা। অনিচ্চসঞ্ঞা অগ্গাতি এত্থাপি এসেৰ নযো। অনিচ্চসঞ্ঞা লোকিযাতি ইদং অনিচ্চসঞ্ঞানুপস্সনং সন্ধায ৰুত্তং। অনিচ্চানুপস্সনামুখেন অধিগতঅরিযমগ্গে উপ্পন্নসঞ্ঞা অনিচ্চসঞ্ঞাতি ৰত্তব্বতং লভতীতি ‘‘অনিচ্চসঞ্ঞা, ভিক্খৰে, ভাৰিতা বহুলীকতা সব্বং কামরাগং পরিযাদিযতী’’তিআদি ৰুত্তং। তথা হি ধম্মসঙ্গহে (ধ॰ স॰ ৩৫৭, ৩৬০) ‘‘যস্মিং সমযে লোকুত্তরং সঞ্ঞং ভাৰেতী’’তিআদিনা সঞ্ঞাপি উদ্ধটা। সব্বাসু উপমাসূতি মূলসন্তানউপমাদীসু পঞ্চসু উপমাসু। পুরিমাহীতি কস্সকপব্বজলাযনঅম্বপিণ্ডিউপমাহি অনিচ্চসঞ্ঞায কিচ্চং ৰুত্তং মূলসন্তানকপদালনপব্বজলাযনৰণ্টচ্ছেদনপদেসেন অনিচ্চসঞ্ঞায পটিপক্খপচ্ছেদনস্স দস্সিতত্তা। পচ্ছিমাহি বলং দস্সিতং পটিপক্খাতিভাৰস্স জোতিতত্তা।
Kūṭaṃ gacchantīti pārimantena kūṭaṃ gacchanti. Kūṭaṃ pavisanabhāvenāti kūṭacchiddaṃ aggena pavisanavasena. Samosaritvāti chidde anupavisanavasena ca āhacca avaṭṭhānena ca samosaritvā ṭhitā. Kūṭaṃ viya aniccasaññā aniccānupassanāvasena avaṭṭhānassa mūlabhāvato. Gopānasiyo viya catubhūmakakusalā dhammā aniccasaññāmūlakattā. Kūṭaṃ aggaṃ sabbagopānasīnaṃ tathāadhiṭṭhānassa padhānakāraṇattā. Aniccasaññā aggāti etthāpi eseva nayo. Aniccasaññā lokiyāti idaṃ aniccasaññānupassanaṃ sandhāya vuttaṃ. Aniccānupassanāmukhena adhigataariyamagge uppannasaññā aniccasaññāti vattabbataṃ labhatīti ‘‘aniccasaññā, bhikkhave, bhāvitā bahulīkatā sabbaṃ kāmarāgaṃ pariyādiyatī’’tiādi vuttaṃ. Tathā hi dhammasaṅgahe (dha. sa. 357, 360) ‘‘yasmiṃ samaye lokuttaraṃ saññaṃ bhāvetī’’tiādinā saññāpi uddhaṭā. Sabbāsu upamāsūti mūlasantānaupamādīsu pañcasu upamāsu. Purimāhīti kassakapabbajalāyanaambapiṇḍiupamāhi aniccasaññāya kiccaṃ vuttaṃ mūlasantānakapadālanapabbajalāyanavaṇṭacchedanapadesena aniccasaññāya paṭipakkhapacchedanassa dassitattā. Pacchimāhi balaṃ dassitaṃ paṭipakkhātibhāvassa jotitattā.
অনিচ্চসঞ্ঞাসুত্তৰণ্ণনা নিট্ঠিতা।
Aniccasaññāsuttavaṇṇanā niṭṭhitā.
পুপ্ফৰগ্গৰণ্ণনা নিট্ঠিতা।
Pupphavaggavaṇṇanā niṭṭhitā.
মজ্ঝিমপণ্ণাসকো সমত্তো।
Majjhimapaṇṇāsako samatto.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১০. অনিচ্চসঞ্ঞাসুত্তং • 10. Aniccasaññāsuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. অনিচ্চসঞ্ঞাসুত্তৰণ্ণনা • 10. Aniccasaññāsuttavaṇṇanā
