| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
១០. អនិច្ចសញ្ញាសុត្តវណ្ណនា
10. Aniccasaññāsuttavaṇṇanā
១០២. ទសមេ អនិច្ចសញ្ញាតិ អនិច្ចំ អនិច្ចន្តិ ភាវេន្តស្ស ឧប្បន្នសញ្ញា។ បរិយាទិយតីតិ ខេបយតិ។ សព្ពំ អស្មិមានន្តិ នវវិធំ អស្មិមានំ។ មូលសន្តានកានីតិ សន្តានេត្វា ឋិតមូលានិ។ មហានង្គលំ វិយ ហិ អនិច្ចសញ្ញា, ខុទ្ទានុខុទ្ទកានិ មូលសន្តានកានិ វិយ កិលេសា, យថា កស្សកោ កសន្តោ នង្គលេន តានិ បទាលេតិ, ឯវំ យោគី អនិច្ចសញ្ញំ ភាវេន្តោ អនិច្ចសញ្ញាញាណេន កិលេសេ បទាលេតីតិ ឥទមេត្ថ ឱបម្មសំសន្ទនំ។
102. Dasame aniccasaññāti aniccaṃ aniccanti bhāventassa uppannasaññā. Pariyādiyatīti khepayati. Sabbaṃ asmimānanti navavidhaṃ asmimānaṃ. Mūlasantānakānīti santānetvā ṭhitamūlāni. Mahānaṅgalaṃ viya hi aniccasaññā, khuddānukhuddakāni mūlasantānakāni viya kilesā, yathā kassako kasanto naṅgalena tāni padāleti, evaṃ yogī aniccasaññaṃ bhāvento aniccasaññāñāṇena kilese padāletīti idamettha opammasaṃsandanaṃ.
ឱធុនាតីតិ ហេដ្ឋា ធុនាតិ។ និទ្ធុនាតីតិ បប្ផោដេតិ។ និច្ឆោដេតីតិ បប្ផោដេត្វា ឆឌ្ឌេតិ។ ឥធាបិ បព្ពជានិ វិយ កិលេសា, លាយនំ និច្ឆោដនំ វិយ អនិច្ចសញ្ញាញាណន្តិ ឥមិនា អត្ថេន ឧបមា សំសន្ទេតព្ពា។
Odhunātīti heṭṭhā dhunāti. Niddhunātīti papphoṭeti. Nicchoṭetīti papphoṭetvā chaḍḍeti. Idhāpi pabbajāni viya kilesā, lāyanaṃ nicchoṭanaṃ viya aniccasaññāñāṇanti iminā atthena upamā saṃsandetabbā.
វណ្ដច្ឆិន្នាយាតិ តិណ្ហេន ខុរប្បេន វណ្ដច្ឆិន្នាយ។ តទន្វយានិ ភវន្តីតិ តំ អម្ពបិណ្ឌិំ អនុគច្ឆន្តិ, តស្សា បតមានាយ អម្ពានិ ភូមិយំ បតន្តិ។ ឥធាបិ អម្ពបិណ្ឌិ វិយ កិលេសា, តិណ្ហខុរប្បោ វិយ អនិច្ចសញ្ញា, យថា ខុរប្បេន ឆិន្នាយ អម្ពបិណ្ឌិយា សព្ពានិ អម្ពានិ ភូមិយំ បតន្តិ, ឯវំ អនិច្ចសញ្ញាញាណេន កិលេសានំ មូលភូតាយ អវិជ្ជាយ ឆិន្នាយ សព្ពកិលេសា សមុគ្ឃាតំ គច្ឆន្តីតិ, ឥទំ ឱបម្មសំសន្ទនំ។
Vaṇṭacchinnāyāti tiṇhena khurappena vaṇṭacchinnāya. Tadanvayāni bhavantīti taṃ ambapiṇḍiṃ anugacchanti, tassā patamānāya ambāni bhūmiyaṃ patanti. Idhāpi ambapiṇḍi viya kilesā, tiṇhakhurappo viya aniccasaññā, yathā khurappena chinnāya ambapiṇḍiyā sabbāni ambāni bhūmiyaṃ patanti, evaṃ aniccasaññāñāṇena kilesānaṃ mūlabhūtāya avijjāya chinnāya sabbakilesā samugghātaṃ gacchantīti, idaṃ opammasaṃsandanaṃ.
កូដង្គមាតិ កូដំ គច្ឆន្តិ។ កូដនិន្នាតិ កូដំ បវិសនភាវេន កូដេ និន្នា។ កូដសមោសរណាតិ កូដេ សមោសរិត្វា ឋិតា។ ឥធាបិ កូដំ វិយ អនិច្ចសញ្ញា, គោបានសិយោ វិយ ចតុភូមកកុសលធម្មា, យថា សព្ពគោបានសីនំ កូដំ អគ្គំ, ឯវំ កុសលធម្មានំ អនិច្ចសញ្ញា អគ្គា។ ននុ ច អនិច្ចសញ្ញា លោកិយា, សា លោកិយកុសលានំ តាវ អគ្គំ ហោតុ, លោកុត្តរានំ កថំ អគ្គន្តិ? តេសម្បិ បដិលាភករណត្ថេន អគ្គន្តិ វេទិតព្ពា។ ឥមិនា ឧបាយេន សព្ពាសុ ឧបមាសុ ឱបម្មសំសន្ទនំ វេទិតព្ពំ។ បុរិមាហិ បនេត្ថ តីហិ អនិច្ចសញ្ញាយ កិច្ចំ, បច្ឆិមាហិ ពលន្តិ។ ទសមំ។
Kūṭaṅgamāti kūṭaṃ gacchanti. Kūṭaninnāti kūṭaṃ pavisanabhāvena kūṭe ninnā. Kūṭasamosaraṇāti kūṭe samosaritvā ṭhitā. Idhāpi kūṭaṃ viya aniccasaññā, gopānasiyo viya catubhūmakakusaladhammā, yathā sabbagopānasīnaṃ kūṭaṃ aggaṃ, evaṃ kusaladhammānaṃ aniccasaññā aggā. Nanu ca aniccasaññā lokiyā, sā lokiyakusalānaṃ tāva aggaṃ hotu, lokuttarānaṃ kathaṃ agganti? Tesampi paṭilābhakaraṇatthena agganti veditabbā. Iminā upāyena sabbāsu upamāsu opammasaṃsandanaṃ veditabbaṃ. Purimāhi panettha tīhi aniccasaññāya kiccaṃ, pacchimāhi balanti. Dasamaṃ.
បុប្ផវគ្គោ ទសមោ។
Pupphavaggo dasamo.
មជ្ឈិមបណ្ណាសកោ សមត្តោ។
Majjhimapaṇṇāsako samatto.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១០. អនិច្ចសញ្ញាសុត្តំ • 10. Aniccasaññāsuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១០. អនិច្ចសញ្ញាសុត្តវណ្ណនា • 10. Aniccasaññāsuttavaṇṇanā
