| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೧೦. ಅನಿಚ್ಚಸಞ್ಞಾಸುತ್ತವಣ್ಣನಾ
10. Aniccasaññāsuttavaṇṇanā
೧೦೨. ದಸಮೇ ಅನಿಚ್ಚಸಞ್ಞಾತಿ ಅನಿಚ್ಚಂ ಅನಿಚ್ಚನ್ತಿ ಭಾವೇನ್ತಸ್ಸ ಉಪ್ಪನ್ನಸಞ್ಞಾ। ಪರಿಯಾದಿಯತೀತಿ ಖೇಪಯತಿ। ಸಬ್ಬಂ ಅಸ್ಮಿಮಾನನ್ತಿ ನವವಿಧಂ ಅಸ್ಮಿಮಾನಂ। ಮೂಲಸನ್ತಾನಕಾನೀತಿ ಸನ್ತಾನೇತ್ವಾ ಠಿತಮೂಲಾನಿ। ಮಹಾನಙ್ಗಲಂ ವಿಯ ಹಿ ಅನಿಚ್ಚಸಞ್ಞಾ, ಖುದ್ದಾನುಖುದ್ದಕಾನಿ ಮೂಲಸನ್ತಾನಕಾನಿ ವಿಯ ಕಿಲೇಸಾ, ಯಥಾ ಕಸ್ಸಕೋ ಕಸನ್ತೋ ನಙ್ಗಲೇನ ತಾನಿ ಪದಾಲೇತಿ, ಏವಂ ಯೋಗೀ ಅನಿಚ್ಚಸಞ್ಞಂ ಭಾವೇನ್ತೋ ಅನಿಚ್ಚಸಞ್ಞಾಞಾಣೇನ ಕಿಲೇಸೇ ಪದಾಲೇತೀತಿ ಇದಮೇತ್ಥ ಓಪಮ್ಮಸಂಸನ್ದನಂ।
102. Dasame aniccasaññāti aniccaṃ aniccanti bhāventassa uppannasaññā. Pariyādiyatīti khepayati. Sabbaṃ asmimānanti navavidhaṃ asmimānaṃ. Mūlasantānakānīti santānetvā ṭhitamūlāni. Mahānaṅgalaṃ viya hi aniccasaññā, khuddānukhuddakāni mūlasantānakāni viya kilesā, yathā kassako kasanto naṅgalena tāni padāleti, evaṃ yogī aniccasaññaṃ bhāvento aniccasaññāñāṇena kilese padāletīti idamettha opammasaṃsandanaṃ.
ಓಧುನಾತೀತಿ ಹೇಟ್ಠಾ ಧುನಾತಿ। ನಿದ್ಧುನಾತೀತಿ ಪಪ್ಫೋಟೇತಿ। ನಿಚ್ಛೋಟೇತೀತಿ ಪಪ್ಫೋಟೇತ್ವಾ ಛಡ್ಡೇತಿ। ಇಧಾಪಿ ಪಬ್ಬಜಾನಿ ವಿಯ ಕಿಲೇಸಾ, ಲಾಯನಂ ನಿಚ್ಛೋಟನಂ ವಿಯ ಅನಿಚ್ಚಸಞ್ಞಾಞಾಣನ್ತಿ ಇಮಿನಾ ಅತ್ಥೇನ ಉಪಮಾ ಸಂಸನ್ದೇತಬ್ಬಾ।
Odhunātīti heṭṭhā dhunāti. Niddhunātīti papphoṭeti. Nicchoṭetīti papphoṭetvā chaḍḍeti. Idhāpi pabbajāni viya kilesā, lāyanaṃ nicchoṭanaṃ viya aniccasaññāñāṇanti iminā atthena upamā saṃsandetabbā.
ವಣ್ಟಚ್ಛಿನ್ನಾಯಾತಿ ತಿಣ್ಹೇನ ಖುರಪ್ಪೇನ ವಣ್ಟಚ್ಛಿನ್ನಾಯ। ತದನ್ವಯಾನಿ ಭವನ್ತೀತಿ ತಂ ಅಮ್ಬಪಿಣ್ಡಿಂ ಅನುಗಚ್ಛನ್ತಿ, ತಸ್ಸಾ ಪತಮಾನಾಯ ಅಮ್ಬಾನಿ ಭೂಮಿಯಂ ಪತನ್ತಿ। ಇಧಾಪಿ ಅಮ್ಬಪಿಣ್ಡಿ ವಿಯ ಕಿಲೇಸಾ, ತಿಣ್ಹಖುರಪ್ಪೋ ವಿಯ ಅನಿಚ್ಚಸಞ್ಞಾ, ಯಥಾ ಖುರಪ್ಪೇನ ಛಿನ್ನಾಯ ಅಮ್ಬಪಿಣ್ಡಿಯಾ ಸಬ್ಬಾನಿ ಅಮ್ಬಾನಿ ಭೂಮಿಯಂ ಪತನ್ತಿ, ಏವಂ ಅನಿಚ್ಚಸಞ್ಞಾಞಾಣೇನ ಕಿಲೇಸಾನಂ ಮೂಲಭೂತಾಯ ಅವಿಜ್ಜಾಯ ಛಿನ್ನಾಯ ಸಬ್ಬಕಿಲೇಸಾ ಸಮುಗ್ಘಾತಂ ಗಚ್ಛನ್ತೀತಿ, ಇದಂ ಓಪಮ್ಮಸಂಸನ್ದನಂ।
Vaṇṭacchinnāyāti tiṇhena khurappena vaṇṭacchinnāya. Tadanvayāni bhavantīti taṃ ambapiṇḍiṃ anugacchanti, tassā patamānāya ambāni bhūmiyaṃ patanti. Idhāpi ambapiṇḍi viya kilesā, tiṇhakhurappo viya aniccasaññā, yathā khurappena chinnāya ambapiṇḍiyā sabbāni ambāni bhūmiyaṃ patanti, evaṃ aniccasaññāñāṇena kilesānaṃ mūlabhūtāya avijjāya chinnāya sabbakilesā samugghātaṃ gacchantīti, idaṃ opammasaṃsandanaṃ.
ಕೂಟಙ್ಗಮಾತಿ ಕೂಟಂ ಗಚ್ಛನ್ತಿ। ಕೂಟನಿನ್ನಾತಿ ಕೂಟಂ ಪವಿಸನಭಾವೇನ ಕೂಟೇ ನಿನ್ನಾ। ಕೂಟಸಮೋಸರಣಾತಿ ಕೂಟೇ ಸಮೋಸರಿತ್ವಾ ಠಿತಾ। ಇಧಾಪಿ ಕೂಟಂ ವಿಯ ಅನಿಚ್ಚಸಞ್ಞಾ, ಗೋಪಾನಸಿಯೋ ವಿಯ ಚತುಭೂಮಕಕುಸಲಧಮ್ಮಾ, ಯಥಾ ಸಬ್ಬಗೋಪಾನಸೀನಂ ಕೂಟಂ ಅಗ್ಗಂ, ಏವಂ ಕುಸಲಧಮ್ಮಾನಂ ಅನಿಚ್ಚಸಞ್ಞಾ ಅಗ್ಗಾ। ನನು ಚ ಅನಿಚ್ಚಸಞ್ಞಾ ಲೋಕಿಯಾ, ಸಾ ಲೋಕಿಯಕುಸಲಾನಂ ತಾವ ಅಗ್ಗಂ ಹೋತು, ಲೋಕುತ್ತರಾನಂ ಕಥಂ ಅಗ್ಗನ್ತಿ? ತೇಸಮ್ಪಿ ಪಟಿಲಾಭಕರಣತ್ಥೇನ ಅಗ್ಗನ್ತಿ ವೇದಿತಬ್ಬಾ। ಇಮಿನಾ ಉಪಾಯೇನ ಸಬ್ಬಾಸು ಉಪಮಾಸು ಓಪಮ್ಮಸಂಸನ್ದನಂ ವೇದಿತಬ್ಬಂ। ಪುರಿಮಾಹಿ ಪನೇತ್ಥ ತೀಹಿ ಅನಿಚ್ಚಸಞ್ಞಾಯ ಕಿಚ್ಚಂ, ಪಚ್ಛಿಮಾಹಿ ಬಲನ್ತಿ। ದಸಮಂ।
Kūṭaṅgamāti kūṭaṃ gacchanti. Kūṭaninnāti kūṭaṃ pavisanabhāvena kūṭe ninnā. Kūṭasamosaraṇāti kūṭe samosaritvā ṭhitā. Idhāpi kūṭaṃ viya aniccasaññā, gopānasiyo viya catubhūmakakusaladhammā, yathā sabbagopānasīnaṃ kūṭaṃ aggaṃ, evaṃ kusaladhammānaṃ aniccasaññā aggā. Nanu ca aniccasaññā lokiyā, sā lokiyakusalānaṃ tāva aggaṃ hotu, lokuttarānaṃ kathaṃ agganti? Tesampi paṭilābhakaraṇatthena agganti veditabbā. Iminā upāyena sabbāsu upamāsu opammasaṃsandanaṃ veditabbaṃ. Purimāhi panettha tīhi aniccasaññāya kiccaṃ, pacchimāhi balanti. Dasamaṃ.
ಪುಪ್ಫವಗ್ಗೋ ದಸಮೋ।
Pupphavaggo dasamo.
ಮಜ್ಝಿಮಪಣ್ಣಾಸಕೋ ಸಮತ್ತೋ।
Majjhimapaṇṇāsako samatto.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೧೦. ಅನಿಚ್ಚಸಞ್ಞಾಸುತ್ತಂ • 10. Aniccasaññāsuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೧೦. ಅನಿಚ್ಚಸಞ್ಞಾಸುತ್ತವಣ್ಣನಾ • 10. Aniccasaññāsuttavaṇṇanā
