| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೧೦. ಅನಿಚ್ಚಸಞ್ಞಾಸುತ್ತವಣ್ಣನಾ
10. Aniccasaññāsuttavaṇṇanā
೧೦೨. ಭಾವೇನ್ತಸ್ಸಾತಿ ವಿಪಸ್ಸನಾಯ ಮಗ್ಗಂ ಭಾವೇನ್ತಸ್ಸ ಉಪ್ಪನ್ನಸಞ್ಞಾ। ತೇನಾಹ – ‘‘ಸಬ್ಬಂ ಕಾಮರಾಗಂ ಪರಿಯಾದಿಯತೀ’’ತಿಆದಿ। ಸನ್ತಾನೇತ್ವಾತಿ ಕಸನಟ್ಠಾನಂ ಸಬ್ಬಸೋ ವಿತನೇತ್ವಾ ಪತ್ಥರಿತ್ವಾ। ಕಿಲೇಸಾತಿ ಉಪಕ್ಕಿಲೇಸಪ್ಪಭೇದಾ ಕಿಲೇಸಾ। ಅನಿಚ್ಚಸಞ್ಞಾಞಾಣೇನಾತಿ ಅನಿಚ್ಚಸಞ್ಞಾಸಹಗತೇನ ಞಾಣೇನ।
102.Bhāventassāti vipassanāya maggaṃ bhāventassa uppannasaññā. Tenāha – ‘‘sabbaṃ kāmarāgaṃ pariyādiyatī’’tiādi. Santānetvāti kasanaṭṭhānaṃ sabbaso vitanetvā pattharitvā. Kilesāti upakkilesappabhedā kilesā. Aniccasaññāñāṇenāti aniccasaññāsahagatena ñāṇena.
ಲಾಯನನ್ತಿ ಲಾಯನಂ ವಿಯ ನಯನಂ ವಿಯ ನಿಚ್ಛೋಟನಂ ವಿಯ ಚ ಅನಿಚ್ಚಸಞ್ಞಾಞಾಣಂ। ಇಮಿನಾ ಅತ್ಥೇನಾತಿ ಇಮಿನಾ ಯಥಾವುತ್ತೇನ ಪಾಳಿಯಾ ಅತ್ಥೇನ, ಉಪಮಾ ಸಂಸನ್ದೇತಬ್ಬಾತಿ ಏತ್ಥ ಪಬ್ಬಜಲಾಯಕೋ ವಿಯ ಯೋಗಾವಚರೋ। ಲಾಯನಾದಿನಾ ತಸ್ಸ ತತ್ಥ ಕತಕಿಚ್ಚತಾಯ ಪರಿತುಟ್ಠಿ ವಿಯ ಇಮಸ್ಸ ಕಿಲೇಸೇ ಸಬ್ಬಸೋ ಛಿನ್ದಿತ್ವಾ ಫಲಸಮಾಪತ್ತಿಸುಖೇನ ಕಾಲಸ್ಸ ವೀತಿನಾಮನಾ।
Lāyananti lāyanaṃ viya nayanaṃ viya nicchoṭanaṃ viya ca aniccasaññāñāṇaṃ. Iminā atthenāti iminā yathāvuttena pāḷiyā atthena, upamā saṃsandetabbāti ettha pabbajalāyako viya yogāvacaro. Lāyanādinā tassa tattha katakiccatāya parituṭṭhi viya imassa kilese sabbaso chinditvā phalasamāpattisukhena kālassa vītināmanā.
ಕೂಟಂ ಗಚ್ಛನ್ತೀತಿ ಪಾರಿಮನ್ತೇನ ಕೂಟಂ ಗಚ್ಛನ್ತಿ। ಕೂಟಂ ಪವಿಸನಭಾವೇನಾತಿ ಕೂಟಚ್ಛಿದ್ದಂ ಅಗ್ಗೇನ ಪವಿಸನವಸೇನ। ಸಮೋಸರಿತ್ವಾತಿ ಛಿದ್ದೇ ಅನುಪವಿಸನವಸೇನ ಚ ಆಹಚ್ಚ ಅವಟ್ಠಾನೇನ ಚ ಸಮೋಸರಿತ್ವಾ ಠಿತಾ। ಕೂಟಂ ವಿಯ ಅನಿಚ್ಚಸಞ್ಞಾ ಅನಿಚ್ಚಾನುಪಸ್ಸನಾವಸೇನ ಅವಟ್ಠಾನಸ್ಸ ಮೂಲಭಾವತೋ। ಗೋಪಾನಸಿಯೋ ವಿಯ ಚತುಭೂಮಕಕುಸಲಾ ಧಮ್ಮಾ ಅನಿಚ್ಚಸಞ್ಞಾಮೂಲಕತ್ತಾ। ಕೂಟಂ ಅಗ್ಗಂ ಸಬ್ಬಗೋಪಾನಸೀನಂ ತಥಾಅಧಿಟ್ಠಾನಸ್ಸ ಪಧಾನಕಾರಣತ್ತಾ। ಅನಿಚ್ಚಸಞ್ಞಾ ಅಗ್ಗಾತಿ ಏತ್ಥಾಪಿ ಏಸೇವ ನಯೋ। ಅನಿಚ್ಚಸಞ್ಞಾ ಲೋಕಿಯಾತಿ ಇದಂ ಅನಿಚ್ಚಸಞ್ಞಾನುಪಸ್ಸನಂ ಸನ್ಧಾಯ ವುತ್ತಂ। ಅನಿಚ್ಚಾನುಪಸ್ಸನಾಮುಖೇನ ಅಧಿಗತಅರಿಯಮಗ್ಗೇ ಉಪ್ಪನ್ನಸಞ್ಞಾ ಅನಿಚ್ಚಸಞ್ಞಾತಿ ವತ್ತಬ್ಬತಂ ಲಭತೀತಿ ‘‘ಅನಿಚ್ಚಸಞ್ಞಾ, ಭಿಕ್ಖವೇ, ಭಾವಿತಾ ಬಹುಲೀಕತಾ ಸಬ್ಬಂ ಕಾಮರಾಗಂ ಪರಿಯಾದಿಯತೀ’’ತಿಆದಿ ವುತ್ತಂ। ತಥಾ ಹಿ ಧಮ್ಮಸಙ್ಗಹೇ (ಧ॰ ಸ॰ ೩೫೭, ೩೬೦) ‘‘ಯಸ್ಮಿಂ ಸಮಯೇ ಲೋಕುತ್ತರಂ ಸಞ್ಞಂ ಭಾವೇತೀ’’ತಿಆದಿನಾ ಸಞ್ಞಾಪಿ ಉದ್ಧಟಾ। ಸಬ್ಬಾಸು ಉಪಮಾಸೂತಿ ಮೂಲಸನ್ತಾನಉಪಮಾದೀಸು ಪಞ್ಚಸು ಉಪಮಾಸು। ಪುರಿಮಾಹೀತಿ ಕಸ್ಸಕಪಬ್ಬಜಲಾಯನಅಮ್ಬಪಿಣ್ಡಿಉಪಮಾಹಿ ಅನಿಚ್ಚಸಞ್ಞಾಯ ಕಿಚ್ಚಂ ವುತ್ತಂ ಮೂಲಸನ್ತಾನಕಪದಾಲನಪಬ್ಬಜಲಾಯನವಣ್ಟಚ್ಛೇದನಪದೇಸೇನ ಅನಿಚ್ಚಸಞ್ಞಾಯ ಪಟಿಪಕ್ಖಪಚ್ಛೇದನಸ್ಸ ದಸ್ಸಿತತ್ತಾ। ಪಚ್ಛಿಮಾಹಿ ಬಲಂ ದಸ್ಸಿತಂ ಪಟಿಪಕ್ಖಾತಿಭಾವಸ್ಸ ಜೋತಿತತ್ತಾ।
Kūṭaṃ gacchantīti pārimantena kūṭaṃ gacchanti. Kūṭaṃ pavisanabhāvenāti kūṭacchiddaṃ aggena pavisanavasena. Samosaritvāti chidde anupavisanavasena ca āhacca avaṭṭhānena ca samosaritvā ṭhitā. Kūṭaṃ viya aniccasaññā aniccānupassanāvasena avaṭṭhānassa mūlabhāvato. Gopānasiyo viya catubhūmakakusalā dhammā aniccasaññāmūlakattā. Kūṭaṃ aggaṃ sabbagopānasīnaṃ tathāadhiṭṭhānassa padhānakāraṇattā. Aniccasaññā aggāti etthāpi eseva nayo. Aniccasaññā lokiyāti idaṃ aniccasaññānupassanaṃ sandhāya vuttaṃ. Aniccānupassanāmukhena adhigataariyamagge uppannasaññā aniccasaññāti vattabbataṃ labhatīti ‘‘aniccasaññā, bhikkhave, bhāvitā bahulīkatā sabbaṃ kāmarāgaṃ pariyādiyatī’’tiādi vuttaṃ. Tathā hi dhammasaṅgahe (dha. sa. 357, 360) ‘‘yasmiṃ samaye lokuttaraṃ saññaṃ bhāvetī’’tiādinā saññāpi uddhaṭā. Sabbāsu upamāsūti mūlasantānaupamādīsu pañcasu upamāsu. Purimāhīti kassakapabbajalāyanaambapiṇḍiupamāhi aniccasaññāya kiccaṃ vuttaṃ mūlasantānakapadālanapabbajalāyanavaṇṭacchedanapadesena aniccasaññāya paṭipakkhapacchedanassa dassitattā. Pacchimāhi balaṃ dassitaṃ paṭipakkhātibhāvassa jotitattā.
ಅನಿಚ್ಚಸಞ್ಞಾಸುತ್ತವಣ್ಣನಾ ನಿಟ್ಠಿತಾ।
Aniccasaññāsuttavaṇṇanā niṭṭhitā.
ಪುಪ್ಫವಗ್ಗವಣ್ಣನಾ ನಿಟ್ಠಿತಾ।
Pupphavaggavaṇṇanā niṭṭhitā.
ಮಜ್ಝಿಮಪಣ್ಣಾಸಕೋ ಸಮತ್ತೋ।
Majjhimapaṇṇāsako samatto.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೧೦. ಅನಿಚ್ಚಸಞ್ಞಾಸುತ್ತಂ • 10. Aniccasaññāsuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೧೦. ಅನಿಚ್ಚಸಞ್ಞಾಸುತ್ತವಣ್ಣನಾ • 10. Aniccasaññāsuttavaṇṇanā
